ក្រុមអាជីវករលក់ដូរជាប់អគារខ្មោចមួយចំនួនក្នុងក្រុងព្រះសីហនុព្រួយបារម្ភអាជ្ញាធរ បណ្ដេញចេញលែងឱ្យប្រកបរបរ ខណៈការប្រកបរបរលក់ដូររបស់ពលរដ្ឋប្រចាំថ្ងៃរកចំណូលមិនសូវបាន។ មន្ត្រីសង្គមស៊ីវិលលើកឡើងថា អាជ្ញាធរគួររៀបចំកន្លែងសម្រាប់ឱ្យពលរដ្ឋលក់ដូរ ដូចអាជ្ញាធររៀបចំកន្លែងឱ្យជនជាតិចិនប្រកបអាជីវកម្មដែរ ដើម្បីឱ្យពលរដ្ឋខ្មែរអាចរកស៊ីដោះស្រាយបញ្ហាជីវភាពប្រចាំថ្ងៃ។
អាជីវករមួយចំនួនលក់ដូរក្បែរអគារខ្មោចក្នុងក្រុងព្រះសីហនុចាប់ផ្ដើមរើតូបទៅលក់ដូរនៅកន្លែងផ្សេង និងខ្លះទៀតព្រួយបារម្ភអាជ្ញាធរបណ្ដេញចេញ បន្ទាប់ពីអាជ្ញាធរចុះព្រមានអាជីវករឱ្យរើរបស់របរទៅលក់ដូរនៅកន្លែងផ្សេង ដោយលើកហេតុផលថា ដើម្បីបញ្ចៀសផលប៉ះពាល់ដល់សណ្ដាប់ធ្នាប់សង្គម។
តំណាងអាជីវករនៅតំបន់រង្វង់មូលតោពីរ លោកស្រី ម៉ុម នីតា ប្រាប់វិទ្យុអាស៊ីសេរីនៅថ្ងៃទី២៩ ខែវិច្ឆិកាថា សព្វថ្ងៃនេះរកចំណូលមិនសូវបាននោះទេ ហើយបើអាជ្ញាធរបណ្ដេញចេញលែងឱ្យប្រកបរបរ នោះលោកស្រីនឹងប្រឈមការខាតបង់ច្រើន។ លោកស្រីបញ្ជាក់ថា កាលពីថ្ងៃទី២៨ ខែវិច្ឆិកា អាជ្ញាធរបានចុះព្រមានអាជីវករដោយទុកពេល ៣ថ្ងៃសម្រាប់រើរបស់របរទៅលក់ដូរនៅកន្លែងផ្សេង។ លោកស្រីថា បើអាជ្ញាធរបណ្ដេញពលរដ្ឋលែងឱ្យលក់ដូរ ពលរដ្ឋរាប់រយគ្រួសារនឹងប្រឈមជួបបញ្ហាសេដ្ឋកិច្ចកាន់តែខ្លាំង ដោយសារតែអាជ្ញាធរមិនបានរៀបចំកន្លែងថ្មីសម្រាប់ឱ្យពលរដ្ឋប្រកបរបរសមរម្យ។
លោក ម៉ុម នីតា៖ «ហើយខ្ញុំទើបលក់បាន ៣ខែមិនទាន់រួចថ្លៃធ្វើតូបផង គ្រាន់ធ្វើអីវ៉ាន់តិចតួចអស់ចូល ៤រយដុល្លារ(៤០០)ទៅ ៥រយដុល្លារដែរ។ តែឥឡូវអត់ទាន់ដឹងយ៉ាងម៉េចដែរ បើគេឈប់ឱ្យជួល ឬឈប់ឱ្យយើងលក់យើងមានតែឈប់ហ្នឹងមិនយើងមិនស្របតាមគេ ព្រោះយើងរស់នៅក្រោមគេដែរ»។
អគារខ្មោច ឬអគារមិនទាន់សាងសង់រួចរាល់កំពុងមានវត្តមានរាប់រយអគារក្នុងក្រុងព្រះសីហនុ បន្ទាប់ពីអ្នកជំនួញជនជាតិចិនបោះបង់ចោល ហើយពួកគេត្រឡប់ទៅប្រទេសចិនវិញកាលពីអំឡុងឆ្នាំ២០១៩ ក្នុងគ្រាមានជំងឺរាតត្បាតសកលកូវីដ១៩ (Covid-19)។ ពលរដ្ឋខ្មែរមួយចំនួនបានទៅជួលដីនៅជាប់តំបន់អគារខ្មោចពីឈ្មួញកណ្ដាលជនជាតិខ្មែរសម្រាប់លក់ដូរក្នុងមួយខែចន្លោះ ៥០ដុល្លារ ដល់ ៥រយដុល្លារ (៥០០) ដោយពុំមានការចុះកុងត្រានោះទេ។ ការណ៍ដែលគ្មានការចុះកុងត្រាបែបនេះ អាជីវករថា ពួកគាត់ប្រឈមការបណ្ដេញចេញលែងឱ្យលក់ដូរគ្រប់ពេល ប្រសិនបើអគារខ្មោចនោះគេបន្តសាងសង់ឡើងវិញ។
ជាក់ស្ដែងអាជីវករម្នាក់ទៀត លោក ឌី បូរី ប្រាប់វិទ្យុអាស៊ីសេរីថា បានជួលដីជាប់អគារខ្មោចនៅតំបន់រង្វង់មូលតោពីរសម្រាប់បើកលក់ស៊ុបជិតមួយឆ្នាំមកហើយ ប៉ុន្តែ លោកលក់ដូរទាំងក្ដីព្រួយបារម្ភអំពីការបណ្ដេញ ដោយសារតែពេលជួលដីពុំមានការចុះកុងត្រានោះទេ។ លោកបញ្ជាក់ថា សព្វថ្ងៃដីកំពុងជួលធ្វើអាជីវកម្មមួយខែ ២រយដុល្លារ (២០០) ប៉ុន្តែលោករកចំណូលមិនសូវបានដូចមុននោះទេ ខណៈពលរដ្ឋខ្លះគ្មានចំណូលដោយសារអត់ការងារធ្វើ។
លោក ឌី បូរី៖ «លក់អត់បានស្ងាត់ភ្ញៀវដែរចិនៗ ចិនគេមិនមកហូបរបរតូចតាចកន្លែងយើងទេ គេទៅកន្លែងគ្នាគេ។ អគារទុកចោលយើងជួលកន្លែងក្រោមៗអគារយើងធ្វើរោងលក់ទៅ ជួលអត់កុងត្រាទេ យើងចេះតែលក់ៗទៅថ្ងៃណាគេដេញ ឱ្យចេញស្មើណា ចេញស្មើហ្នឹងទៅគ្មានអីតវ៉ាព្រោះគេគ្មានធ្វើកុងត្រាឱ្យយើងផង។ រាល់ថ្ងៃអាជីវករស្វែងរកទីតាំងខ្លួនឯងទាំងអស់មិនថា អ្នកលក់តាមរទេះ ដោះស្រាយខ្លួនឯង កន្លែងណារកកើត កន្លែងណារកមិនកើតជារឿងរបស់យើងទេ»។
វិទ្យុអាស៊ីសេរីមិនអាចទាក់ទងអភិបាលខេត្តព្រះសីហនុ លោក គួច ចំរើន និងអ្នកនាំពាក្យសាលាខេត្តនេះគឺលោក ឃាង ភារម្យ និងលោក ឡុង ឌីម៉ង់ ដើម្បីសាកសួរជុំវិញបញ្ហានេះបានទេនៅថ្ងៃទី២៩ ខែវិច្ឆិកា។
ចំណាត់ការរបស់អាជ្ញាធរក្រុងព្រះសីហនុត្រៀមបណ្ដេញពលរដ្ឋលក់ដូរក្បែរអគារខ្មោចបែបនេះ បន្ទាប់ពីរដ្ឋាភិបាលអះអាងថា នឹងចាត់វិធានការដោះស្រាយគម្រោងអគារវិនិយោគជាប់គាំងក្នុងខេត្តព្រះសីហនុ។ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារដោះស្រាយគម្រោងវិនិយោគជាប់គាំងក្នុងខេត្តព្រះសីហនុ លោក ហ៊ាន សាហ៊ីប កាលពីចុងខែតុលា អះអាងថា រដ្ឋាភិបាលបន្តអនុវត្តវិធានការដោះស្រាយគម្រោងវិនិយោគជាប់គាំង ដោយឱ្យម្ចាស់អគារដែលសាងសង់មិនទាន់ចប់ អាចសាងសង់បញ្ចប់ និងឱ្យម្ចាស់អគារដែលបានសាងសង់ចប់អាចមានសកម្មភាពវិនិយោគក្នុងខេត្តព្រះសីហនុ។
ជុំវិញរឿងនេះ អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា អាជ្ញាធរគួរតែផ្ដល់ដំណោះស្រាយរកកន្លែងទីតាំងថ្មីឱ្យអាជីវករលក់ដូរអាចរកចំណូលបាន ប្រសិនបើមានការបណ្ដេញពួកគេលែងឱ្យលក់ដូរក្បែរអគារទុកចោល។ អ្នកស្រីបន្ថែមថា ពលរដ្ឋក្រុងព្រះសីហនុមួយចំនួនគ្មានលទ្ធភាពបើកហាងប្រកបអាជីវកម្មដូចជនជាតិចិនទេ ហើយបើអាជ្ញាធរគ្មានដំណោះស្រាយសម្រាប់អាជីវករ ពួកគាត់នឹងកាន់តែជួបបញ្ហាសេដ្ឋកិច្ចគ្រួសារ។
អ្នកស្រី ជៀប សុធារី៖ «ប្រសិនបើពលរដ្ឋក្រីក្រគាត់មានអាហារហូបចុក ក៏វាជាបន្ទុកធ្ងន់របស់រដ្ឋដែរក្នុងការជួយឧបត្ថម្ភបញ្ហាក្រីក្ររបស់ពួកគាត់ឱ្យគាត់មានបាយម្ហូបអាហារហូប។ ប៉ុន្តែ បើគាត់មានមុខរបរហើយឱ្យគាត់ចាកចេញពីកន្លែងហ្នឹងគួរតែមានវិធានការឱ្យគាត់ទៅរកអីធ្វើអីនៅកន្លែងណា តើកន្លែងហ្នឹងអាចដោះស្រាយបានទេ?ហើយជាពិសេសទៀតអ្នកជួលអ្នកចង់បានលុយ គេសុទ្ធតែយកលុយកក់ហើយបានលក់ដូរ តែពេលជួលរួចរដ្ឋដេញវិញ តើអ្នកដែលយកលុយពលរដ្ឋ ម្ចាស់ទីកន្លែងជួលផ្ដល់លុយឱ្យគាត់វិញអត់?អ្នកណាជាអ្នកជួយដោះស្រាយបញ្ហាហ្នឹង?លុយបើដល់ហោប៉ៅគេហើយមិនងាយខ្វេះមកវិញទេ»។
អាជីវករក្នុងខេត្តព្រះសីហនុស្នើដល់អាជ្ញាធរផ្ដល់ទីតាំងថ្មីសម្រាប់ឱ្យពួកគាត់លក់ដូរអាចរកចំណូលប្រចាំថ្ងៃបានសមរម្យ ឬណែនាំឱ្យឈ្មួញម្ចាស់ដីបញ្ចុះតម្លៃថ្លៃជួលដី ដើម្បីអាចទប់ទល់ជីវភាពសេដ្ឋកិច្ចគ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។