ពលរដ្ឋរងគ្រោះដែលចាញ់បោកក្រុមហ៊ុនភូមិខ្មែរគ្រុប ទាមទារឱ្យរដ្ឋាភិបាល ដោះស្រាយ សំណងខូចខាតជូនពួកគាត់ ក្រោយតុលាការចោទប្រកាន់ជំនួយការផ្ទាល់របស់លោក ហ៊ុន សែន គឺលោក ដួង តារា ពីបទ «ឆបោក»។ លោក ដួង តារា ត្រូវបានពលរដ្ឋចាញ់បោកក្រុមហ៊ុនភូមិខ្មែរគ្រុបនៅខេត្តស្វាយរៀងចោទ ប្រកាន់ថា មានជាប់ពាក់ព័ន្ធទៅនឹងការរកស៊ីឆបោកប្រាក់ពលរដ្ឋជាមួយក្រុមហ៊ុនមួយនេះ។
ពលរដ្ឋរងគ្រោះ ដែលសុំមិនបញ្ចេញឈ្មោះ ដោយបារម្ភពីសុវត្ថិភាព ប្រាប់វិទ្យុអាស៊ីសេរី នៅថ្ងៃទី១៤ ខែតុលានេះ ថា ការចាប់ខ្លួន និងចោទប្រកាន់លើលោក ដួង តារា គឺជារឿងរបស់សមត្ថកិច្ច និងតុលាការ យ៉ាងណាលោកថា ប្រសិនបើសមត្ថកិច្ចចាប់អ្នកពាក់ព័ន្ធឃុំខ្លួនហើយ នៅតែពន្យារពេលរកដំណោះស្រាយឱ្យពួកគាត់ នោះពួកគាត់នឹងបន្តនាំគ្នាតវ៉ារហូតទទួលបានសំណងខូចខាតវិញ។
ពលរដ្ឋរងគ្រោះ៖ «ប្រឈមនឹងរឿងលុយព្រោះជាប់បំណុលធនាគារអ៊ីចឹង។ ការទិញហ្នឹងសុទ្ធតែបង់រំលស់ធនាគារយកលុយនឹងមកទិញអ៊ីចឹង»។
ការថ្លែងរបស់ពលរដ្ឋរងគ្រោះនេះ គឺក្រោយពីព្រះរាជអាជ្ញារងអយ្យការអមសាលាដំបូងរាជធានីភ្នំពេញ លោក ប្លង់ សុផល បានប្រាប់បណ្ដាញព័ត៌មានក្នុង ស្រុកថា រដ្ឋលេខាធិការទីស្ដីការគណៈរដ្ឋមន្ត្រី និងជាជំនួយការជំនិតរបស់ប្រធានព្រឹទ្ធសភាលោក ហ៊ុន សែន គឺលោក ដួង តារា ត្រូវបានតុលាការចោទប្រកាន់ពីបទ «ឆបោក» តាមមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ និង ស្ថិតក្នុងដំណាក់កាលស៊ើបអង្កេត។
ទាក់ទងនឹងការសម្រេចរបស់តុលាការ ថា តើឃុំខ្លួនលោក ដួង តារា ឬយ៉ាងណាវិទ្យុអាស៊ីសេរី នៅមិនទាន់អាចសុំការអត្ថាធិប្បាយពីលោក ប្លង់ សុផល និងអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ បានទេ នៅថ្ងៃទី១៤ ខែតុលា ខណៈ អ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា ទូរស័ព្ទចូលតែគ្មានអ្នកទទួល។
ពលរដ្ឋរងគ្រោះម្នាក់ទៀត បារម្ភខ្លាចការចាប់ខ្លួនលោក ដួង តារា នេះ គឺគ្រាន់តែដើម្បីឱ្យពលរដ្ឋរងគ្រោះស្ងប់ចិត្តខ្លះ ដោយលោកកត់សម្គាល់ថា ករណីបែបនេះ បានកើតឡើងច្រើនហើយ។
ពលរដ្ឋរងគ្រោះ៖ «ហ្នឹងហើយ ធ្លាប់មានក្រុមហ៊ុនផ្សេងៗហើយ ២ទៅ៣ ក្រុមហ៊ុនហើយ ដែលចាប់ខ្លួនហើយ បាត់ឈឹងអត់មានដំណោះស្រាយឱ្យប្រជាពលរដ្ឋរងគ្រោះអ៊ីចឹង។ ពួកខ្ញុំបារម្ភ ហើយទទូចឱ្យខាងច្បាប់ជួយរកដំណោះស្រាយនិងដោះស្រាយឱ្យពួកខ្ញុំអ៊ីចឹង សំខាន់បំផុត ពួកគាត់ដោះស្រាយជាសំណងលុយមកវិញ ព្រោះពួកខ្ញុំនេះ លុយម្នាក់ៗច្រើនម៉ឺនអ៊ីចឹង»។សមត្ថកិច្ចបានឃាត់ខ្លួនជំនួយការជំនិតរបស់ប្រធានព្រឹទ្ធសភាលោក ហ៊ុន សែន និងជារដ្ឋលេខាធិការទីស្ដីការគណៈរដ្ឋមន្ត្រី គឺលោក ដួង តារា កាលពីថ្ងៃទី១០ ខែតុលា ដើម្បីធ្វើការសាកសួរ ពាក់ព័ន្ធនឹងបណ្ដឹងរបស់ប្រជាពលរដ្ឋ។
ការឃាត់ខ្លួនលោក ដួង តារា នេះ ធ្វើឡើងបន្ទាប់ពីមានផ្ទុះរឿងអាស្រូវពាក់ព័ន្ធនឹងករណីឆបោកលុយពលរដ្ឋជាច្រើនគ្រួសារក្នុងគម្រោងវិនិយោគដីធ្លី និងផ្ទះល្វែង របស់ក្រុមហ៊ុនភូមិខ្មែរគ្រុប (Phum Khmer Group) នៅខេត្តស្វាយរៀង ខណៈ ប្អូនប្រុសបង្កើតរបស់លោក ដួង តារា គឺលោក ដួង វីរ៉ាត់ ជាម្ចាស់ភាគហ៊ុនធំ នៅក្នុងក្រុមហ៊ុននោះ ត្រូវសមត្ថកិច្ចចាប់ខ្លួនកាលពីពេលថ្មីៗនេះ។
ក្រៅពីលោក ដួង តារា ទីប្រឹក្សាផ្ទាល់ម្នាក់ទៀតរបស់លោក ហ៊ុន សែន គឺលោក លី សាម៉េត ដែលលោក ហ៊ុន សែន បញ្ជាឱ្យតុលាការបង្កកទ្រព្យសម្បត្តិ និងសមត្ថកិច្ចឃ្លាំមើលកាលពីថ្ងៃទី៧ ខែតុលា មកដល់ពេលនេះ សមត្ថកិច្ចមិនទាន់ចាប់ខ្លួនបាននៅឡើយទេ។ លោក ហ៊ុន សែន អះអាងថា លោក លី សាម៉េត តែងប្រើឈ្មោះរបស់លោក ដើម្បីឆបោកលុយគេរាប់លានដុល្លារ។
អ្នកឃ្លាំមើលបញ្ហាសិទ្ធិមនុស្ស និងសង្គម លោក ស៊ឹង សែនករុណា ប្រាប់វិទ្យុអាស៊ីសេរីនៅថ្ងៃទី១៤ ខែតុលា ថា ការចាប់ខ្លួនលោក ដួង តារា និងឧកញ៉ាមួយចំនួនទៀតកន្លងមក គឺគ្រាន់តែជាមធ្យោបាយ រំងាប់អារម្មណ៍ពលរដ្ឋរងគ្រោះមួយគ្រាៗសិនតែប៉ុណ្ណោះ ប៉ុន្តែមិនបានដោះស្រាយឱ្យទាន់សភាពការណ៍ជូនពលរដ្ឋដែលបានចាញ់បោកក្រុមហ៊ុនឧកញ៉ា និងមន្ត្រីធំៗទាំងនោះទេ។
លោកថា ប្រជាពលរដ្ឋរងគ្រោះ ត្រូវការទាំងចាប់ជនឆបោកឱ្យទៅទទួលខុសត្រូវ នៅចំពោះមុខច្បាប់ និងជាពិសេស ត្រូវការចាំបាច់បំផុតឱ្យរដ្ឋាភិបាល និងតុលាការដោះស្រាយលុយសំណងជូនពួកគាត់វិញ ដើម្បីរំដោះការជំពាក់បំណុលវ័ណ្ឌក និងជីវភាពក្រីក្ររបស់ពួកគាត់។
លោក ស៊ឹង សែនករុណា៖«ឃើញដូចករណី ឡេង ចាន់ណា អីជាដើម យើងឃើញរាប់លានដុល្លារមិនដឹងយកទៅណា ហើយដំណោះស្រាយនីតិវិធីតុលាការហ្នឹង វែងអន្លាយ អូសបន្លាយប្រើប្រាស់ពេលវេលាអ៊ីចឹង។ ជនរងគ្រោះនៅតែដេកទន្ទឹងរង់ចាំរហូតដល់ធ្លាក់ខ្លួនឈឺ មានវិបត្តិផ្លូវចិត្តអីជាដើម អាហ្នឹងហើយដែលជាបញ្ហា។ អ៊ីចឹងទន្ទឹងហ្នឹង យើងក៏ចង់ឃើញអំពីការចាត់វិធានការពិតប្រាកដ ទាំងការទទួលទោស ទាំងការសងសំណងទៅដល់ប្រជាពលរដ្ឋធ្វើម៉េចឱ្យបានឆាប់»។
ក្រៅពីករណីឆបោកនេះ មនុស្សជំនិតរបស់លោក ហ៊ុន សែន គឺលោក ដួង តារា ក៏ធ្លាប់មានប្រវត្តិរឿងអាស្រូវ ពាក់ព័ន្ធនឹងរឿងស្នេហាត្រីកោណ ជាមួយប្រពន្ធរបស់អតីតរដ្ឋលេខាធិការក្រសួងវប្បធម៌ និងវិចិត្រសិល្បៈ លោក ថៃ នរៈសត្យា កាលពីឆ្នាំ២០១៩ដែរ។ ក្រោយពីបែកធ្លាយរឿងអាស្រូវនេះ លោក ថៃ នរៈសត្យា បានអស់តំណែងភ្លាមៗមួយរំពេច ខណៈលោក ដួង តារា មួយឆ្នាំក្រោយមកត្រូវលោក ហ៊ុន សែន តែងតាំងជារដ្ឋលេខាធិការនៃទីស្ដីការគណៈរដ្ឋមន្ត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។