ក្នុងអំឡុងពិធីបុណ្យចូលឆ្នាំខ្មែរប្រពៃណីជាតិកន្លងទៅ មានភ្ញៀវទេសចរជាតិ និងអន្តរជាតិច្រើនម៉ឺននាក់ បានធ្វើដំណើរកម្សាន្តនៅតាមរមណីយដ្ឋាននានាតាមបណ្ដាខេត្តមួយចំនួន។ តើខេត្តណាខ្លះមានភ្ញៀវទេសចរទៅកម្សាន្តច្រើនជាងគេនៅក្នុងឆ្នាំនេះ?
ព្រឹត្តិការណ៍អង្គរសង្ក្រាន្តនៅខេត្តសៀមរាប ដែលរៀបចំអបអរក្នុងពិធីបុណ្យចូលឆ្នាំថ្មីឆ្នាំនេះ បានទាក់ទាញអារម្មណ៍ភ្ញៀវទេសចរ ឲ្យទៅលេងកម្សាន្តច្រើនជាងគេក្នុងចំណោមតំបន់ទេសចរណ៍សំខាន់ៗក្នុងប្រទេសកម្ពុជា។
តាមព័ត៌មានពីអភិបាលខេត្តសៀមរាប លោក ឃឹម ប៊ុនសុង ប្រាប់ថា ភ្ញៀវទេសចរជាតិ និងអន្តរជាតិប្រមាណ ៣០ម៉ឺននាក់ បានទៅទស្សនា និងចូលរួមព្រឹត្តិការណ៍អង្គរសង្ក្រាន្តរយៈពេល ៤ថ្ងៃ គឺចាប់ពីថ្ងៃទី១៣ ដល់ថ្ងៃទី១៦ មេសា។
ព្រឹត្តិការណ៍អង្គរសង្ក្រាន្តនៅខេត្តសៀមរាប បានរៀបចំនៅតំបន់ប្រាសាទអង្គរវត្ត ប្រាសាទបាយ័ន ទីលានជល់ដំរី និងទីតាំងមួយចំនួនទៀត។ កាលពីពិធីបុណ្យចូលឆ្នាំ ឆ្នាំ២០១៣ ក៏មានរៀបចំព្រឹត្តិការណ៍អង្គរសង្ក្រាន្តដែរ ដែលពេលនោះមានភ្ញៀវទេសចរទៅកម្សាន្តជិត ២០ម៉ឺននាក់។ តាមការសន្និដ្ឋានពីមន្ត្រីទេសចរខេត្តសៀមរាប ឲ្យដឹងថា អង្គរសង្ក្រាន្តឆ្នាំនេះទាក់ទាញភ្ញៀវទេសចរច្រើនជាងកាលពីអង្គរសង្ក្រាន្តឆ្នាំមុន ដោយសារតែមានកម្មវិធីប្លែកៗ និងមានការរៀបចំតាំងពិព័រណ៍នំអន្សមយក្សធំលើកដំបូងដែលមិនធ្លាប់មាននៅកម្ពុជា។
ក្រៅពីខេត្តសៀមរាប បណ្ដាខេត្តមួយចំនួននៅជាប់តំបន់ឆ្នេរ ក៏ទាក់ទាញភ្ញៀវទេសចរទៅកម្សាន្តច្រើនដែរ។
អនុប្រធានមន្ទីរទេសចរណ៍ខេត្តព្រះសីហនុ លោក អឿ វិបុល ឲ្យដឹងថា តាមការប៉ាន់ស្មានដំបូង ភ្ញៀវទេសចរជិត ៥ម៉ឺននាក់មកលេងនៅឆ្នេរអូរឈើទាល ខេត្តព្រះសីហនុ និងនៅតាមតំបន់ផ្សេងៗទៀត ដែលលោកនៅមិនទាន់បូកសរុបភ្ញៀវទេសចរទៅកម្សាន្តនៅលើកោះ នៅរមណីយដ្ឋានថ្មរូង និងនៅរមណីយដ្ឋានក្បាលឆាយ ជាដើម៖ «ចំនួនភ្ញៀវទេសចរទាបជាងមុនបន្តិច ដោយសារតែតំបន់ភ្ញៀវទេសចរយើងមានរៀបកន្លែងច្រើន ដូចជានៅលើកោះ ពីមុនភ្ញៀវខ្មែរមិនដែលទៅលេងទេ តែឥឡូវក្នុងមួយពាន់នាក់ មាន ៤០០នាក់ហើយទៅលេង មានន័យថា ៤០ភាគរយទៅលេងនៅលើកោះ ហើយបណ្ដារមណីយដ្ឋានផ្សេងៗមានការរៀបចំកើនឡើងទៅ ក៏អាចរំលែកភ្ញៀវទេសចរដើរលេងច្រើន»។
នៅឯខេត្តកែប ប្រធានមន្ទីរទេសចរណ៍ លោក សោម ចិន្តា ប្រាប់ថា ភ្ញៀវទេសចរជាង ៨ម៉ឺននាក់ទៅលេងនៅទីនោះ គឺច្រើនជាងឆ្នាំមុនជាង១ម៉ឺននាក់។ លោកបន្តថា មូលហេតុដែលកើននេះ ដោយសារតែខេត្តកែប ជាតំបន់អេកូទេសចរណ៍ធម្មជាតិ និងការថែរក្សាសន្តិសុខ សណ្ដាប់ធ្នាប់បានល្អ៖ «នៅខេត្តកែប ហ្នឹងវារក្សាបានល្អ ស្ថិរភាព សន្តិសុខសុវត្ថិភាពល្អ មិនមានការភ័យខ្លាចពីការគ្រោះថ្នាក់ចរាចរណ៍ធំដុំទេ ជារៀងរាល់ឆ្នាំតែងតែអ៊ីចឹង។ ចំណុចទី២ ដោយសារតែខេត្តកែប មានសក្ដានុពលអេកូទេសចរណ៍ធម្មជាតិ»។
ប្រធានមន្ទីរទេសចរណ៍ខេត្តកោះកុង លោក ប៊ុន បៀវ ឲ្យដឹងថា លោកនៅមិនទាន់បូកសរុបតួលេខនៃចំនួនភ្ញៀវទេសចរមកកម្សាន្តនៅខេត្តនេះនៅឡើយទេ។ តែតាមការសន្និដ្ឋាន ចំនួនភ្ញៀវអាចមានការកើនឡើងជាងឆ្នាំមុន ដែលមានចំនួនជាង ១ម៉ឺននាក់។ លោកពន្យល់ថា មូលហេតុដែលភ្ញៀវកើនឡើងនេះ ដោយសារតែកត្តាផ្លូវងាយស្រួល ជួយសម្រួលដល់ការធ្វើដំណើរ។
ចំណែកប្រធានមន្ទីរទេសចរណ៍ខេត្តមណ្ឌលគិរី វិញ ឲ្យដឹងថា ភ្ញៀវទេសចរជាង ១ម៉ឺននាក់ បានធ្វើដំណើរទៅលេងកម្សាន្តនៅទីនោះរយៈពេល៣ថ្ងៃ។ ចំនួននេះកើនឡើងតិចតួច បើធៀបកាលពីឆ្នាំមុន។ លោកកត់សម្គាល់ថា ភ្ញៀវជាតិមានការកើនឡើង ហើយភ្ញៀវអន្តរជាតិមានការថយចុះបន្តិច ដោយសារតែពិបាករកមធ្យោបាយធ្វើដំណើរទៅខេត្តមណ្ឌលគិរី៖ «ភ្ញៀវបរទេសថយចុះបន្តិចវិញ គឺថយ ៣,៣៨ភាគរយ។ តាមការស្រាវជ្រាវរបស់ខ្ញុំ ពាក់ព័ន្ធភ្ញៀវបរទេសនេះ គឺមានការលំបាក ជួនកាលភ្ញៀវបរទេសមកលេងនៅកំពង់ចាម ខេត្តក្រចេះ គាត់ពិបាករកឡានមកខេត្តមណ្ឌលគិរី ពេលខ្លះគាត់អត់ស្គាល់ទីតាំងឡានផ្សេងៗណាមួយផ្សេង។ ទី២ ឡានតាក់ស៊ីមួយចំនួនគាត់អត់ដំណើរការពេលចូលឆ្នាំ»។
ចំណែកនៅខេត្តក្រចេះ វិញ ប្រធានមន្ទីរទេសចរណ៍ខេត្ត លោក រុន ធារ៉ា កត់សម្គាល់ថា ភ្ញៀវទេសចរមកកម្សាន្តនៅខេត្តនេះមានចំនួនជាង ៩ម៉ឺននាក់ ភាគច្រើនជាភ្ញៀវជាតិ។ ចំនួននេះ គឺកើនឡើង ៨,៤១ភាគរយ បើប្រៀបធៀបកាលពីឆ្នាំមុនដែលមានចំនួនជាង ៨ម៉ឺននាក់។ លោកបន្តថា កត្តាដែលភ្ញៀវកើនឡើងនេះ ដោយសារតែជីវភាពពលរដ្ឋធូរធារ និងបញ្ហាផ្លូវងាយស្រួលធ្វើដំណើរ។
យ៉ាងណា ភ្ញៀវទេសចរដែលទៅកម្សាន្តនៅតាមបណ្ដាខេត្តមួយចំនួន បានរិះគន់ថា អាជ្ញាធរហាក់មិនមានវិធានការទប់ស្កាត់តម្លៃសេវាផ្ទះសំណាក់ សណ្ឋាគារ ម្ហូបអាហារ និងថ្លៃសេវាដឹកជញ្ជូន ខណៈដែលនៅតំបន់ខ្លះត្រូវបានឈ្មួញបង្កើនថ្លៃខុសសព្វមួយដងក្នុងអំឡុងពេលបុណ្យចូលឆ្នាំ។
មន្ត្រីទេសចរខ្លះបានពន្យល់ថា អាជ្ញាធរពិបាកនឹងទប់ស្កាត់ការដំឡើងថ្លៃសេវាទាំងនោះ ដោយសារតែតម្រូវការខ្ពស់ និងអ្នកលក់ម្ហូបអាហារខ្លះឈប់សម្រាកបុណ្យចូលឆ្នាំ ទើបធ្វើឲ្យសេវាម្ហូបអាហារឡើងខ្ពស់។ មន្ត្រីសង្គមស៊ីវិលយល់ថា ប្រសិនបើរដ្ឋាភិបាលចង់ទប់ស្កាត់ការដំឡើងតម្លៃសេវាអ្វីផ្សេងៗនៅរដូវបុណ្យទាននោះ អាចធ្វើបាន ប្រសិនបើមានឆន្ទៈចង់ទប់ស្កាត់ពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។