ស្នងការនគរបាលក្រុងភ្នំពេញអះអាងថា សមត្ថកិច្ចនៅមិនទាន់រកឃើញ និងចាប់ខ្លួនឧកញ៉ា លី សាម៉េត បាននៅឡើយទេ ក្រោយពេលដែលឧកញ៉ា និងជាទីប្រឹក្សាលោក ហ៊ុន សែន រូបនេះ ត្រូវបានលោក ហ៊ុន សែន ទម្លាយពីរឿងឆបោកប្រាក់រាប់លានដុល្លារ។ អ្នកឃ្លាំមើលជំរុញឱ្យរដ្ឋាភិបាល ស្រាវជ្រាវលើមន្ត្រីនិងអ្នកនៅក្បែរថ្នាក់ដឹកនាំផ្សេងទៀត ដោយគ្មានការលើកលែង ដើម្បីបង្ហាញពីតម្លាភាពនៃការអនុវត្តច្បាប់។
អ្នកនាំពាក្យស្នងការដ្ឋាននគរបាលក្រុងភ្នំពេញ លោក សំ វិច្ឆិកា ប្រាប់វិទ្យុអាស៊ីសេរី នៅថ្ងៃទី៩ ខែតុលា ថា មកដល់ពេលនេះ សមត្ថកិច្ចនៅមិនទាន់ចាប់ខ្លួន លោក លី សាម៉េត បាននៅឡើយទេ បន្ទាប់ពីឆ្មក់ចូលត្រួតពិនិត្យគេហដ្ឋានរបស់លោក នៅក្នុងខណ្ឌឫស្សីកែវ កាលពីថ្ងៃទី៨ ខែតុលា ប៉ុន្តែមិនឃើញលោក លី សាម៉េត នៅក្នុងផ្ទះឡើយ។ លោក សំ វិច្ឆិកា បន្តថា បច្ចុប្បន្នសមត្ថកិច្ចកំពុងស្រាវជ្រាវកំណត់តម្រុយទីតាំងរត់គេចខ្លួនរបស់លោក លី សាម៉េត។
លោក សំ វិច្ឆិកា៖ «អ៊ីចឹងជាមួយនឹងកិច្ចការនេះ យើងនឹងអនុវត្តយ៉ាងតឹងរ៉ឹង បើឃើញគាត់នៅទីណា យើងនឹងអនុវត្តតាមផ្លូវច្បាប់»។
គ្រូទាយតាមអនឡាញ លោក លី សាម៉េត ឬខ្លះហៅថាគ្រូមា ដែលមានគោរមងារជាឧកញ៉ា ត្រូវបានប្រធានព្រឹទ្ធសភា លោក ហ៊ុន សែន តែងតាំងជាទីប្រឹក្សាផ្ទាល់ កាលពីឆ្នាំ២០២២។ ជាញឹកញាប់ លោក លី សាម៉េត តែងតែចេញមុខជាមួយលោក ដួង តារា ជំនួយការផ្ទាល់របស់លោក ហ៊ុន សែន ក្នុងភាពជាតំណាងរបស់លោក ហ៊ុន សែន នៅក្នុងកម្មវិធីមួយចំនួន។
កាលពីថ្ងៃទី៧ ខែតុលា លោក ហ៊ុន សែន បានបង្ហោះសារនៅលើហ្វេសប៊ុក ដោយអះអាងថា លោក លី សាម៉េត តែងប្រើឈ្មោះរបស់លោក ដើម្បីឆបោកលុយគេ ដោយក្នុងនោះ មានការបោកលុយពីឈ្មោះ សុខ ឡេង ចំនួន ១០លានដុល្លារអាមេរិកកាលពីឆ្នាំ២០២២ និងក្រោយមក ពីអនុប្រធានក្រុមការងារថ្នាក់កណ្តាលរបស់គណបក្សប្រជាជនកម្ពុជា ចុះមូលដ្ឋានខេត្តព្រះវិហារ លោក មួង ឃីម ចំនួន ២៣ម៉ឺនដុល្លារ។
លោក ហ៊ុន សែន អះអាងទៀតថា លោកបានទទួលវីដេអូពីអភិបាលស្រុកល្វាឯម លោក កន សុខកាយ ដោយប្រាប់ថា លោក លី សាម៉េត បានយកប្រាក់ពីលោកចំនួន ៣០ម៉ឺនដុល្លារ ដើម្បីរត់ការឱ្យបានតំណែងជាអភិបាលក្រុងអរិយក្សត្រ។
ក៏ប៉ុន្តែ មួយថ្ងៃក្រោយមក លោក កន សុខកាយ ត្រូវបានលោកនាយករដ្ឋមន្ត្រី ហ៊ុន ម៉ាណែត បញ្ចប់តំណែងពីអភិបាលស្រុកល្វាឯម ក្រោមហេតុផលថា “ប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ”។
ពាក់ព័ន្ធរឿងនេះ ប្រធានស្ដីទីគណបក្សសង្គ្រោះជាតិ លោក សម រង្ស៊ី បានសរសេរនៅលើបណ្ដាញសង្គមហ្វេសប៊ុក ថា ករណីឧកញ៉ា លី សាម៉េត គឺជាករណីពាលស៊ីពាល ដោយនៅពេលឈ្លោះប្រកែកគ្នា និងលែងមានប្រយោជន៍ លោក លី សាម៉េត នឹងត្រូវលោក ហ៊ុនសែន កម្ចាត់ចោល។
ក៏ប៉ុន្តែ អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា ករណីចាត់វិធានការចំពោះលោក លី សាម៉េត នេះ មិនជាប់ពាក់ព័ន្ធនឹងវិវាទចែកផលប្រយោជន៍គ្នានោះទេ។
លោក សុខ ឥសាន៖ «យើងដឹងហើយថា អ្នកប្រព្រឹត្តិបទល្មើសហ្នឹង វាមានល្បិចច្រើនណាស់ ក្នុងការលាក់បាំងអំពើទុច្ចរិតរបស់ខ្លួន ខ្លាចមេដឹកនាំដឹង។ ឥឡូវមេដឹកនាំដឹងហើយ គាត់ប្រតិកម្មភ្លាម ហើយឱ្យយកលុយហ្នឹង ទៅសងគេវិញមួយចំនួនហើយ»
ក្នុងចំណាត់ការបន្ទាន់លើលោក លី សាម៉េត ក្រសួងយុត្តិធម៌បានសម្រេចបង្កកទ្រព្យសម្បត្តិឧកញ៉ារូបនេះ ខណៈលោក ហ៊ុន សែន ជំរុញឱ្យអ្នកចាញ់បោកលោក លី សាម៉េត ប្ដឹងឬទាមទារសំណងត្រឡប់ទៅវិញ។
អ្នកឃ្លាំមើលបញ្ហាសិទ្ធិមនុស្ស និងសង្គម លោក ស៊ឹង សែនករុណា សង្កេតឃើញថា មនុស្សនៅក្បែរខ្លួនលោក ហ៊ុន សែន ជាច្រើននាក់ទៀត ក៏ធ្លាប់មានការទម្លាយពាក់ព័ន្ធនឹងអំពើពុករលួយ ការឆបោកលុយកាក់ និងទំនុកចិត្តប្រជាពលរដ្ឋផងដែរ។ លោកយល់ឃើញថា អំពើពុករលួយ ដែលលាក់បាំងអស់រយៈពេលច្រើនឆ្នាំ ហើយទើបតែត្រូវទម្លាយដោយថ្នាក់ដឹកនាំបែបនេះ ហាក់មានភាពមិនប្រក្រតី និងអាចពាក់ព័ន្ធជាមួយមន្ត្រីក្នុងជួររដ្ឋាភិបាលផ្សេងទៀត។
លោក ស៊ឹង សែនករុណា៖«វាជារឿងមួយដែលឃើញក្នុងរូបភាពក្នុងប៉ុន្មានករណីហ្នឹង ប៉ុន្តែយើងមិនដឹងថា រាប់រយនាក់ជំនួយការ ទីប្រឹក្សាអីទាំងអស់ហ្នឹង មិនដឹងថាអ្នកនោះប៉ុន្មាននាក់ទៀត ដែលគេប្រព្រឹត្តនូវអំពើប្រហាក់ប្រហែលគ្នាហ្នឹង។ យើងមិនរិះគន់ទេ ជាមួយនឹងអ្នកដែលគេថា គេធ្វើល្អ ប៉ុន្តែអ្នកដែលប្រព្រឹត្តអំពើអាក្រក់ហ្នឹងក៏វាប្រហែលគ្នាហ្នឹង ក៏មិនតិចដែរ»។
លោក លី សាម៉េត គឺជាអគ្គនាយករងក្រុមហ៊ុនអេងឌីប៉ូ អភិវឌ្ឍន៍ និងថែមទាំងមានអ្នកកាសែតផ្ទាល់ខ្លួនជាច្រើននាក់ ចាំផ្សាយព័ត៌មានល្អៗពីលោក។ កាលពីឆ្នាំ២០១៨ ឧកញ៉ា លី សាម៉េត ធ្លាប់មានរឿងទំនាស់ដីធ្លីជាមួយអតីតអភិបាលខេត្តកណ្ដាល លោក ម៉ៅ ភិរុណ រហូតដល់មានការស្បថស្បែនៅព្រះអង្គដងកើ និងបានគេចខ្លួនមិនចូលដោះស្រាយនៅតុលាការជាច្រើនដង។
លោក ស៊ឹង សែនករុណា លើកឡើងថា ការអនុវត្តច្បាប់តាមចាប់ខ្លួនលោក លី សាម៉េត របស់រដ្ឋាភិបាលនេះ ហាក់បង្ហាញពីការអនុវត្តច្បាប់មានស្ដង់ដារ២ ដោយចំពោះអ្នករិះគន់លើរដ្ឋាភិបាល អាជ្ញាធរមានសមត្ថភាពតាមចាប់ខ្លួនយកមកកាត់ទោស ទោះបីពួកគេនៅក្រៅប្រទេសក៏ដោយ ខណៈករណីឧកញ៉ា លី សាម៉េត អាជ្ញាធរបែរជាមិនអាចចាប់ខ្លួនបានភ្លាមៗឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។