ថ្នាក់ដឹកនាំសហជីពក្រុមហ៊ុនកាស៊ីណូណាហ្គាវើលដ៍៥នាក់ ខកចិត្តចំពោះភាគីក្រុមហ៊ុនដែលនៅតែបន្តបដិសេធមិនឱ្យមានវត្តមានសហជីពក្នុងកន្លែងការងារ និងនៅតែមិនព្រមទទួលយកកម្មករជាង២០០នាក់ឱ្យចូលធ្វើការវិញនៅក្នុងជំនួបចរចានៅថ្ងៃទៅទី៦ ខែមេសា។
តំណាងប្រតិភូចរចា កញ្ញា សុន ស្រីពេជ្រ ប្រាប់វិទ្យុអាស៊ីសេរីថាការចរចាលើកនេះ ក៏មិនខុសលើកមុនៗនោះឡើយ ដោយភាគីក្រុមហ៊ុននៅតែប្រកាន់ជំហរបដិសេធមិនព្រមចរចាលក្ខខណ្ឌទាំងពីរចំណុចដំបូងដែលក្រុមកូដករទាមទារនោះទេ។ កញ្ញាបន្ត បើភាគីក្រុមហ៊ុនមិនបានគោរពតាមការចរចាទៅតាមដំណាក់កាលនីមួយៗ ក្រុមសហជីពក៏មិនព្រមការចរចានៅចំណុចបន្ទាប់ទៀតបាននោះទេ៖ «ពួកខ្ញុំនៅតែមានឆន្ទៈចូលរួមការអញ្ចើញរបស់ក្រសួង។ ប៉ុន្តែភាគីខាងក្រុមហ៊ុនមិនថាជម្រើសដោះដូររបស់កម្មករម៉េច ដែលយើងថាអាចសមគួរត្រូវពិចារណាហើយភាគីក្រុមហ៊ុនតែបដិសេធរហូត។ យើងមើលឃើញថា ការប្រជុំប៉ុន្មានលើក ប៉ុន្មានសារហើយនៅតែគ្មានលទ្ធផល ដោយសារតែចំណុចអាទិភាពទីមួយដែលកម្មករលើកឡើងមតិភាគច្រើនហ្នឹង ក្រុមហ៊ុនតែងបដិសេធរាល់ការប្រជុំ »។
កញ្ញា បន្ថែមថា ក្រៅពីការចរចានៅមានភាពតានតឹងគ្មានដំណោះស្រាយពីភាគីក្រុមហ៊ុន ក្រុមសហជីពក៏បានសួរដេញដោលទៅកាន់ក្រសួងការងារ និងភាគីក្រុមហ៊ុនដែលបានកាត់ឈ្មោះក្រុមសហជីពចេញកន្លែងធ្វើការដោយមានការធានាដោយច្បាប់។ ជាការឆ្លើយតបកញ្ញាថា ភាគីក្រុមហ៊ុនបានលើកហេតុផលថាដោយសារតែវិបត្តិជំងឺកូវិដ-១៩ ទើបក្រុមហ៊ុនស្នើទៅកាន់អធិការកិច្ចការងារដើម្បីបញ្ឈប់បុគ្គលិកជាកញ្ចប់ការងាររួម។ ក្រុមកូដករ និងសហជីពថាការលើកឡើងនេះមិនសមហេតុផលឡើយ ព្រោះក្នុងចំណោមបុគ្គលិកដែលត្រូវក្រុមហ៊ុនបញ្ឈប់ជាង២០០នាក់នោះ សុទ្ធសឹងតែមានឈ្មោះក្នុងរចនាសម្ព័ន្ធរបស់សហជីពដែលមានកិច្ចគាំពារពិសេសដោយច្បាប់ជាតិ និងអន្តរជាតិ។
ទោះជាយ៉ាងណា ក្រុមសហជីពឱ្យដឹងថាក្រសួងការងារទុកពេលឱ្យភាគីចរចាទាំងសងខាងពិចារណាឡើងវិញ ដោយនឹងមានការជួបជជែកចរចាជាថ្មីទៀតនៅថ្ងៃទី២១មេសា ខាងមុខ។ ក្រុមសហជីព ថាពួកគេនឹងបន្តចូលរួមចរចាជានិច្ច និងទទូចឱ្យក្រសួងការងារឈរនៅចំណុចកណ្ដាលជំរុញដល់ភាគីក្រុមហ៊ុនពន្លឿនការចរចាដោយភាពស្មោះត្រង់ និងតម្លាភាពស្របតាមច្បាប់ស្ដីពីការងារ។
ទោះយ៉ាងណា ក្រុមកូដករណាហ្គាវើលដ៍បញ្ជាក់ជំហរថា បើភាគីក្រុមហ៊ុននៅតែមានចេតនាចង់បំបាត់សំឡេងសហជីពបែបនេះ ពួកគាត់នឹងនៅតែបន្តចេញធ្វើកូដកម្មដោយសន្តិវិធី បើទោះបីរងការបង្ក្រាបហិង្សាពីក្រុមអាជ្ញាធរយ៉ាងណាក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។