អង្គការមូលនិធិបង្ការរបួសអាស៊ីប្រចាំកម្ពុជា បង្កើតកម្មវិធីប្រកួតប្រជែង ជ្រើសរើសឃុំ សង្កាត់ គំរូចំនួន៣ ក្នុងចំណោម ឃុំ សង្កាត់ចំនួន១៨ ក្នុងរាជធានីភ្នំពេញ និងខេត្តពីរផ្សេងទៀត គឺខេត្តកណ្ដាល និងខេត្តកំពង់ស្ពឺ ដើម្បីធ្វើជាគំរូល្អក្នុងការជំរុញឱ្យប្រជាពលរដ្ឋពាក់មួយសុវត្ថិភាព។ កម្មវិធីនេះធ្វើឡើងនៅព្រឹកថ្ងៃទី ២១ មករា ក្រុងភ្នំពេញ។
មន្ត្រីឃុំ-សង្កាត់ សាទរចំពោះកម្មវិធីប្រកួតប្រជែងនេះ ប៉ុន្តែមន្ត្រីទាំងនោះលើកឡើងពីបញ្ហាប្រឈមមួយចំនួនបណ្ដាលឱ្យប្រជាពលរដ្ឋមិនពាក់មួកសុវត្ថិភាព។
មន្ត្រីឃុំ-សង្កាត់ដែលចូលរួមប្រកួតជ្រើសរើស ឃុំ-សង្កាត់គំរូដើម្បីជំរុញឱ្យពលរដ្ឋពាក់សុវត្ថិភាព លើកឡើងថា នឹងរិះរកមធ្យោបាយធ្វើយ៉ាងណា ឲ្យប្រជាពលរដ្ឋនៅតាមសហគមន៍ជនបទ និងតំបន់ដាច់ស្រយាលពាក់មួកសុវត្ថិភាព។
ចៅសង្កាត់ច្បារអំពៅទី១ ក្រុងភ្នំពេញ លោក ពៅ ហួត និយាយថា ការបង្កើតកម្មវិធីលើកទឹកចិត្ត ឃុំ សង្កាត់ឱ្យចូលរួមផ្សព្វផ្សាយការពាក់មួកសុវត្ថិភាពនេះ គឺជាយន្តការមួយល្អហើយអាចជួយទប់ស្កាត់ ការស្លាប់ និងការរងរបួសដោយសារមិនពាក់មួកសុវត្ថិភាព នៅពេលមានគ្រោះថ្នាក់ចរាចរណ៍។
លោកនិយាយថា អ្វីដែលជាបញ្ហានោះ គឺត្រង់ថា ពលរដ្ឋគិតថាលុយសំខាន់ជាងជីវិត ម្ល៉ោះហើយ ការចំណាយលុយទិញមួយសុវត្ថិភាពពាក់ គឺជាអ្វីដែលពលរដ្ឋគិតថាមិនចាំបាច់ និងមិនមានប្រយោជន៍សម្រាប់ពួកគាត់៖ «មានការលំបាកដោយសារប្រជាពលរដ្ឋ លោកខ្វះការយល់ដឹងពីច្បាប់ចរាចរណ៍ផ្លូវគោកថ្មី និងជួនពេលខ្លះពលរដ្ឋនៅតាមសហគមន៍ គាត់មិនមានថវិកាគ្រប់គ្រាន់សម្រាប់ទិញមួកសុវត្ថិភាពទេ»។
ទោះបីជាយ៉ាងណាក៏ដោយ លោក ពៅ ហួត បញ្ជាក់ជំហរថា លោកនឹងជំរុញឱ្យពលរដ្ឋក្នុងមូលដ្ឋាន ឱ្យយល់ពីតម្លៃនៃការពាររបស់មួកសុវត្ថិភាព។ លោកថាការប្រកួតប្រជែងជ្រើសរើស ឃុំ សង្កាត់គំរូនេះ ក៏ជាលើកទឹកដល់មន្ត្រីឃុំ សង្កាត់ទាំងអស់ឱ្យមានភាពក្លៀវក្លា ដើម្បីបំពេញការងាររបស់ខ្លួនឱ្យអស់ពីចិត្ត។
ប្រធានអង្គការមូលនិធិបង្ការរបួសអាស៊ីប្រចាំកម្ពុជា លោក គឹម បញ្ញា បញ្ជាក់ថា ការប្រឡងប្រណាំងនេះ មានបំណងធ្វើឱ្យឃុំ-សង្កាត់គោលដៅទាំង១៨ កាន់តែមានសុវត្ថិភាព និងមានអ្នកប្រើប្រាស់ផ្លូវ ប្រកបដោយចំណេះដឹង និងមានឥរិយាបថល្អផ្នែកសុវត្ថិភាពចរាចរណ៍៖ «ពេលខ្លះសូម្បីតែក្នុងកិច្ចប្រជុំក្រុមប្រឹក្សាឃុំ - សង្កាត់របស់គាត់ ក៏គាត់អាចផ្សព្វផ្សាយបាន ហើយស្ថាប័នរដ្ឋាភិបាល នៅពេលផ្សព្វផ្សាយគោលនយោបាយភូមិឃុំមានសុវត្ថិភាព ក៏លោកអាចផ្សព្វផ្សាយបាន ហើយនៅពេលប្រជុំក្នុងវត្ត ក៏គាត់អាចផ្សព្វផ្សាយបាន។ អ៊ីចឹងឃុំ - សង្កាត់មានភាពងាយស្រួលជាង»។
អង្គការមូលនិធិបង្ការរបួសអាស៊ី បង្កើតគម្រោងមួយឈ្មោះថា “មួកសុវត្ថិភាពមួយ ជួយសង្គ្រោះជីវិតបានមួយ»។ តាមរយៈគម្រោងនេះ គឺជំរុញឱ្យឃុំ សង្កាត់ធ្វើការប្ដេជ្ញាចិត្ត លើកទឹកចិត្ត ប្រជាពលរដ្ឋនៅក្នុងសហគមន៍ ពាក់មួកសុវត្ថិភាពឱ្យបានគ្រប់គ្នា។
ប្រធានអង្គការមូលនិធិបង្ការរបួសអាស៊ី លោក គឹម បញ្ញា មានប្រសាសន៍ថា ក្រុមដែលងាយរងគ្រោះដោយគ្មានមួយសុវត្ថិភាព គឺក្រុមអ្នកជិះម៉ូតូ និងក្រុមអ្នកបើកបរម៉ូតូដោយស្រវឹង និងពលរដ្ឋនៅតាមសហគមន៍។ ពលរដ្ឋសហគមន៍ មិនសូវចិត្តពាក់សុវត្ថិភាពនោះទេ។ លោកបន្ថែមថា ភាគច្រើននៃពលរដ្ឋនៅសហគមន៍ គិតថាខ្លួនជិះម៉ូតូជិតៗ និងក្នុងស្រុកភូមិរបស់ខ្លួន និងគិតថា មួកសុវត្ថិភាពមានតម្លៃថ្លៃ៖ «មានលេសដោះសារច្រើនពេលខ្លះ គាត់ថា ក្ដៅ។ ក្ដៅអីពេលយប់ហ្នឹង ! គាត់ខូចម៉ូដសក់គាត់។ ក្បាលរបស់គាត់សំខាន់ណាស់ ព្រោះវាជាបណ្ដុំនៃប្រព័ន្ធប្រសាទ»។
អ្នករត់ម៉ូតូឌុបម្នាក់នៅផ្លូវ ២៧១ ក្នុងរាជធានីភ្នំពេញ លោក ឈុំ អឿន លើកឡើងថា ការជំរុញឱ្យពលរដ្ឋពាក់មួកសុវត្ថិភាព និងការផ្សព្វផ្សាយចំណេះស្ដីពីការធ្វើដំណើរនៅលើដងផ្លូវ នឹងជួយពលរដ្ឋគ្រប់រូបអាចគេចផុតពីគ្រោះថ្នាក់ចរាចរណ៍។
សម្រាប់លោកវិញ លោកទិញមួកសុវត្ថិភាព ដាក់តាមម៉ូតូជានិច្ចដើម្បីឱ្យភ្ញៀវដែលជិះម៉ូតូ របស់លោក គេចផុតពីការរងរបួសផ្សេងៗ នៅពេលជួបគ្រោះថ្នាក់ចរាចរណ៍ដោយចៃដន្យ និងការពារកុំឱ្យប៉ូលិសចាប់៖ «មួកសុវត្ថិភាពការពារអាយុជីវិតយើង កុំឱ្យជួបគ្រោះថ្នាក់ និងការពារ ដីហុយទៀត»។
ឃុំ-សង្កាត់ចំនួន៣ ដែលទទួលបានជ័យជំនះក្នុងការប្រកួតប្រជែងនឹងទទួលបានរង្វាន់ និងផ្ដល់ឱកាសទៅទស្សនកិច្ចនៅក្រៅប្រទេស ដើម្បីសិក្សាបន្ថែមពីយន្តការលើកកម្ពស់ការពាក់មួកសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។