ពលរដ្ឋស្រុកពួក ខេត្តសៀមរាប ដង្ហែញត្តិទៅដាក់នៅសាលាឃុំខ្នាត ដើម្បីស្នើដល់អាជ្ញាធរឲ្យបញ្ឈប់សកម្មភាពធ្វើទុក្ខបុកម្នេញដល់ការរស់នៅរបស់ពលរដ្ឋក្នុងតំបន់នេះ។ មន្ត្រីអង្គការសង្គមស៊ីវិល លើកឡើងថា តំបន់នេះ ស្ថិតនៅឆ្ងាយពីតំបន់ប្រាសាទ និងស្នើដល់រដ្ឋាភិបាល កំណត់សិទ្ធិរបស់អាជ្ញាធរអប្សរា ឲ្យបានច្បាស់លាស់។
ពលរដ្ឋ ប្រមាណ៤រយនាក់ នៅឃុំខ្នាត ស្រុកពួក ខេត្តសៀមរាប នៅថ្ងៃទី១៦ ធ្នូ ប្រមូលផ្ដុំគ្នាតាមភូមិនីមួយៗ ហើយដង្ហែញត្តិទៅដាក់នៅសាលាឃុំ ស្នើសុំឲ្យអាជ្ញាធរបញ្ឈប់សកម្មភាពរបស់អាជ្ញាធរជាតិអប្សរា ដែលបង្កការលំបាកដល់ការរស់នៅរបស់ពលរដ្ឋ។ ពួកគាត់បាននាំគ្នាកាន់រូបថតក្រុមគ្រួសារថ្នាក់ដឹកនាំរដ្ឋាភិបាល រួមមានរូបលោកនាយករដ្ឋមន្ត្រី ហ៊ុន ម៉ាណែត លោក ហ៊ុន សែន និងភរិយារបស់លោក ហើយបានកាន់បដា ពណ៌ស ដែលពួកគាត់បានសរសេរថា យើងទាំងអស់គ្នា មិនឲ្យអាជ្ញាធរអប្សរាបន្តគាបសង្កត់ពួកគាត់ទៀតទេ។
សំឡេងពលរដ្ឋ៖ «យើងត្រូវតែហ៊ានតស៊ូប្រយុទ្ធប្រឆាំងជាមួយអាជ្ញាធរអប្សរា ព្រោះអាជ្ញាធរអប្សរាមិនបានមក ជួយប្រជាពលរដ្ឋ និងជីវភាពរបស់ប្រជាពលរដ្ឋយើងទេ មែនទេបងប្អូន?មែន ឬមិនមែន?យើងមិនគាំទ្រឲ្យអាជ្ញាធរអប្សរាមកគ្រប់គ្រងនៅតំបន់យើងទៀតមែនទេបងប្អូន?ជ័យយោសន្តិភាព»។
ពលរដ្ឋម្នាក់ នៅឃុំខ្នាត ស្រុកពួក លោក ផាត សាទាល ប្រាប់វិទ្យុអាស៊ីសេរី នៅថ្ងៃទី១៦ ខែធ្នូ ថា កត្តា ដែលនាំឲ្យពលរដ្ឋជាច្រើនរយនាក់ ប្រមូលផ្ដុំគ្នា ដង្ហែញត្តិទៅដាក់នៅសាលាឃុំនៅថ្ងៃនេះ គឺបណ្ដាលមកពីអាជ្ញាធរជាតិអប្សរា បានដើរអង្កេតការណ៍នៅក្នុងតំបន់លោកទាំងយប់ទាំងថ្ងៃ ហើយនៅពេលពលរដ្ឋជួសជុលផ្ទះ ដែលចាស់ទ្រុឌទ្រោម ឬចែកដីឲ្យកូនចៅ ដែលទើបរៀបការក្ដី ក៏ត្រូវសុំច្បាប់ពីអាជ្ញាធរជាតិអប្សរា ប៉ុន្តែការសុំច្បាប់ទាំងនោះត្រូវចំណាយពេលច្រើន និងយឺតយ៉ាវក្នុងការឆ្លើយតប។
លោក ផាត សាទាល៖ «ធ្វើអាបុកអណ្ដូងទឹកក៏មិនបាន ធ្វើទ្រនំមាន់ក៏មិនបាន ធ្វើផ្ទះ ឬប្ដូរស័ង្កសីផ្ទះចាស់ក៏មិនបាន ថាអត់បានទាំងអស់ហ្មង ធ្វើថ្នល់ក៏ត្រូវសុំច្បាប់វា(អាជ្ញាធរជាតិអប្សរា)ដែរ ដាក់ច្បាប់ទៅហើយ តែ៣ខែហើយ អត់មានចេញច្បាប់ឲ្យសោះ បាទ។ អត់បានដូចតែគ្នា បើនិយាយទៅឲ្យដូចនិយាយថា កូនទំលើក្បាលម៉ែឪ»។
ពលរដ្ឋនៅឃុំខ្នាត ស្រុកពួក ម្នាក់ទៀត គឺលោក សំ អុល ប្រាប់វិទ្យុអាស៊ីសេរីថា មូលហេតុ ដែលពលរដ្ឋដាក់ញត្តិនៅថ្ងៃនេះ គឺដោយសារតែអាជ្ញាធរជាតិអប្សរា ហាមឃាត់មិនឲ្យជួសជុលផ្ទះ តសំយ៉ាបផ្ទះ និងសាងសង់បង្គន់អនាម័យជាដើម ដែលជាហេតុធ្វើឲ្យប៉ះពាល់ក្នុងការរស់នៅរបស់ពលរដ្ឋក្នុងតំបន់ និងបង្កឲ្យមានផលប៉ះពាល់ផ្នែកសេដ្ឋកិច្ចផងដែរ។
លោក សំ អុល៖ «អង្គការយូណេស្កូឲ្យគាត់ចុះត្រួតពិនិត្យបង្គោលព្រំប្រទល់អប្សរាត្រង់ណា ដែលគាត់សមរម្យ ដែលគួរតែគ្រប់គ្រង កុំឲ្យគាត់គ្រប់គ្រងហួសហេតុប៉ះពាល់ដល់ប្រជាពលរដ្ឋធ្ងន់ធ្ងរ។ ខ្ញុំសង្ឃឹមថា អង្គការយូណេស្កូ ដែលជាប្រទេសសេរីមួយ សង្ឃឹមថាគាត់ចុះជួយប្រជាពលរដ្ឋ ដែលជួបរងទុក្ខវេទនាពីការគ្រប់គ្រងរបស់អាជ្ញាធរជាតិអប្សរា»។
ពលរដ្ឋឲ្យដឹងថា អាជ្ញាធរឃុំមិនបានចេញមកទទួលញត្តិស្នើសុំកិច្ចអន្តរាគមន៍នៅថ្ងៃនេះទេ ប៉ុន្តែមានអភិបាលស្រុកពួក ខេត្តសៀមរាបលោក ស៊ិន ចាន់ថុល ចេញមកទទួលញត្តិ។ អភិបាលស្រុកពួក លើកឡើងថា លោកបានទទួលបញ្ហានេះ ហើយលោកសន្យាថា ក្នុងពេលឆាប់ៗខាងមុខនេះ នឹងមានការឆ្លើយតបត្រឡប់ទៅវិញ ប៉ុន្តែលោកមិនបានកំណត់ថ្ងៃណាមួយជាក់លាក់នោះទេ។
ទន្ទឹមនឹងនេះ ពលរដ្ឋអះអាងថា ពួកគាត់នឹងមិនបញ្ឈប់ការទាមទារនេះទេ ពួកគាត់នឹងបន្តការដាក់ញត្តិនៅតាមស្ថាប័នរដ្ឋឯទៀត ដូចជា សាលាខេត្តសៀមរាប និងអាជ្ញាធរជាតិអប្សរា រហូតដល់មានដំណោះស្រាយ ដែលអាចទទួលយកបានសម្រាប់ពួកគាត់។
វិទ្យុអាស៊ីសេរី នៅពុំ ទាន់អាចទាក់ទង អ្នកនាំពាក្យអាជ្ញាធរជាតិអប្សរា លោក ឡុង កុសល ដើម្បីសុំការឆ្លើយតបការលើកឡើងរបស់ពលរដ្ឋនេះ បាននៅឡើយទេ នៅថ្ងៃទី១៦ ខែធ្នូ ដោយទូរស័ព្ទចូលច្រើនដងតែគ្មានអ្នកទទួល។
ទោះជាយ៉ាងណា អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្ស នៃអង្គការលីកាដូ (LICADHO) ខេត្តបាត់ដំបង លោក អ៊ិន គង់ជិត ប្រាប់វិទ្យុអាស៊ីសេរីថា លោកបានចុះទៅអង្កេតនៅតំបន់នោះ ហើយបានសង្កេតឃើញថា ឃុំខ្នាត ស្រុកពួក ខេត្តសៀមរាប ដែលពលរដ្ឋដាក់ញត្តិនៅថ្ងៃនេះ គឺស្ថិតនៅឆ្ងាយពីតំបន់ប្រសាទ ហើយពលរដ្ឋភាគច្រើននៅតំបន់នេះ សុទ្ធតែជាអ្នកភូមិចាស់រស់នៅតាំងពីដូនតាមក។ លោកបន្ថែមថា ការដាក់ញត្តិស្នើសុំកិច្ចអន្តរាគមន៍ពីអាជ្ញាធរនេះ ជាសិទ្ធិមូលដ្ឋានរបស់ពលរដ្ឋ។ លោកស្នើដល់រដ្ឋាភិបាលបង្កើតកិច្ចពិភាក្សាជាមួយពលរដ្ឋនៅតំបន់នេះ ដើម្បីដឹងពីតម្រូវការរបស់ពួកគាត់។
លោក អ៊ិន គង់ជិត៖ «យើងឃើញថា មន្ត្រីអាជ្ញាធរអប្សរាក្ដី អាជ្ញាធររដ្ឋបាលខេត្តក្ដី អាជ្ញាធររដ្ឋាភិបាលក្ដី តែងតែនិយាយអំពីគោលការណ៍ស្ម័គ្រចិត្ត ប៉ុន្តែបើគោលការណ៍ស្ម័គ្រចិត្តម្ដេចមិនផ្ដល់សិទ្ធិឲ្យគាត់ចាត់ចែង ការកែសម្រួល ជួសជុលសាងសង់លំនៅឋានរបស់គាត់ ដែលសំណង់ខ្លះចាស់ទ្រុឌទ្រោមហើយត្រូវការការជួសជុល ត្រូវការកែលម្អ អញ្ចឹងសុខចិត្តឲ្យពួកគាត់រស់នៅដោយប្រឈមនឹងហានិភ័យនៃគ្រោះថ្នាក់ នៃសំណង់ផ្ទះពួកគាត់ដែលចាស់ៗហ្នឹងហា»។
ទាក់ទងនឹងបញ្ហានេះ អង្គការយូណេស្កូ កាលពីយប់ថ្ងៃទី១៥ ខែវិច្ឆិកា បានចេញសេចក្ដីប្រកាសព័ត៌មានថា អង្គការយូណេស្កូ បារម្ភអំពីការផ្លាស់ទីលំនៅរបស់ពលរដ្ឋដោយបង្ខំ។
អង្គការយូណេស្កូ អំពាវនាវឱ្យរដ្ឋាភិបាលកម្ពុជាធានាគោរពសិទ្ធិពលរដ្ឋរស់នៅតំបន់អង្គរ ដោយត្រូវអនុវត្តតាមសំណើរបស់អង្គការលើកលែងទោសអន្តរជាតិ ដែលបានលាតត្រដាងអំពីការរំលោភសិទ្ធិមនុស្សរបស់អាជ្ញាធររដ្ឋាភិបាល។ ករណីនេះ អង្គការយូណេស្កូសម្រេចឱ្យអាជ្ញាធររដ្ឋាភិបាលកម្ពុជាត្រូវដាក់របាយការណ៍ជាថ្មីពីស្ថានភាព នៃការអភិរក្សរមណីយដ្ឋានអង្គរនៅថ្ងៃទី១ ខែកុម្ភៈ ឆ្នាំ២០២៤។ យូណេស្កូថែមទាំងតម្រូវឱ្យអាជ្ញាធរកម្ពុជាបញ្ចូលការឆ្លើយតបនឹងសំណើរបស់អង្គការលើកលែងទោសអន្តរជាតិចូលក្នុងរបាយការណ៍ជាតិនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។