ជនជាតិវៀតណាម នៃខេត្តឡុងអាន (Long Ann) បានចាប់បុរសម្នាក់ជាប្រធានអង្គការសិទ្ធិកុមារ ស៊ី រ៉ៃត៍ (C Rights) កាលពីរសៀលថ្ងៃទី៤ ខែកក្កដា នេះ។
ការចាប់ខ្លួននេះធ្វើឡើងនៅពេលដែលលោក ផែន ប៊ុនធឿន បាននាំកុមារ និងយុវជនប្រមាណ ៤០នាក់ ចុះមើលបង្គោលព្រំដែនលេខ២០៣ នៅចំណុចភូមិធ្លកថ្មី ឃុំត្នោត ស្រុកកំពង់រោទិ៍ ខេត្តស្វាយរៀង។
យុវជនឈ្មោះ យឺន និវត្តន៍ ដែលបានចូលរួមទៅតំបន់ព្រំដែននោះ បានឲ្យដឹងថា ពលរដ្ឋវៀតណាមបាននាំគ្នាមួយក្រុមចូលមកវាយពួកគេក្នុងទឹកដីខ្មែរ។ ក្រុមជនជាតិវៀតណាម ទាំងនោះ បានប្រើដំបង និងដុំដីក្នុងពេលប៉ះទង្គិចនោះ ហើយពលរដ្ឋវៀតណាម មួយចំនួនកាន់កាំបិតនៅនឹងដៃផង។ បន្ទាប់ពីដេញវាយ ត្រូវក្បាលប្រធានអង្គការនោះហើយ ជនជាតិវៀតណាម បាននាំបុរសនោះចូលក្នុងទឹកដីរបស់គេបាត់ទៅ។ ទោះយ៉ាងណាករណីនេះពួកគេបានប្ដឹងទៅអាជ្ញាធរខ្មែរ តែរហូតមកដល់ម៉ោងប្រមាណ ៧យប់ថ្ងៃដដែល ពួកគេនៅពុំទាន់ទទួលបានដំណឹងថា យ៉ាងណានៅឡើយ។
ចំណែកអាជ្ញាធរក្នុងមូលដ្ឋានក៏ពុំទាន់អាចទាក់ទងដើម្បីបញ្ជាក់ព័ត៌មានបន្ថែមបាននៅឡើយដែរ។
ទីតាំងដែលពលរដ្ឋវៀតណាម ចាប់ខ្លួនប្រធានអង្គការខ្មែរនេះ គឺជាទីតាំងតែមួយដែលពលរដ្ឋខ្មែរ និងវៀតណាម បានប៉ះប្រយុទ្ធគ្នាមួយប្រាវបណ្ដាលឲ្យរបួសរៀងៗខ្លួន កាលពីថ្ងៃទី២៨ ខែមិថុនា។ ការប៉ះទង្គិចគ្នានេះ នៅពេលដែលពលរដ្ឋវៀតណាម រារាំងមិនឲ្យខ្មែរចូលទៅពិនិត្យព្រំដែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។