Opens in new windowកម្មករកម្មការិនីនៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង ប្រមាណជាង ៥០០នាក់ បាននាំគ្នាតវ៉ានៅមុខរោងចក្រ ប្លូរ ភៀល រយៈពេល ៦ថ្ងៃហើយ ដើម្បីឲ្យថៅកែរោងចក្រនេះ ពិចារណាឡើងវិញនូវរាល់ការបញ្ឈប់បុគ្គលិកដោយគ្មានហេតុផលច្បាស់លាស់។
ប៉ុន្តែការតវ៉ានេះ មិនមានដំណោះស្រាយនោះឡើយ។ដោយសារតែគ្មានដំណោះស្រាយនៅថ្នាក់មូលដ្ឋាននោះ កម្មករទាំងនោះបាននាំគ្នាឡើងមកភ្នំពេញ ដើម្បីដាក់ញត្តិនៅក្រសួងការងារ និងរដ្ឋសភា ដើម្បីឲ្យជួយអន្តរាគមន៍។
ក្រសួងការងារ និងរដ្ឋសភា ទទួលយកញត្តិរបស់កម្មកររោងចក្រ ប្លូរ ភៀល ហើយនៅរសៀលថ្ងៃទី២១ កញ្ញា ប៉ុន្តែមិនមានការសន្យាណាមួយជាក់លាក់ ជុំវិញការស្នើសុំរបស់កម្មករនោះទេ។
កម្មកររោងចក្រប្រមាណជាង ២០០នាក់ យកញត្តិមកដាក់នៅក្រសួងការងារ និងបណ្តុះបណ្តាលវិជ្ជាជីវៈ និងរដ្ឋសភា ដើម្បីឲ្យថៅកែរោងចក្រ ប្លូរ ភៀល កុំបញ្ឈប់កម្មករដោយគ្មានហេតុផលជាក់លាក់ និងថា ថៅកែរោងចក្រនេះមិនគោរពច្បាប់ការងារកម្ពុជា។
តំណាងកម្មករ លោក នាល សារ៉ាត់ មាននិយាយថា ថៅកែរោងចក្រនេះបញ្ឈប់កម្មករកម្មការិនីមុនកិច្ចសន្យា និងមិនផ្តល់ដំណឹងជាមុននោះទេ។ លើសពីនេះទៀត ថៅកែរោងចក្រនេះ ធ្វើកិច្ចសន្យាការងារម្តងមួយខែ ហាក់មិនផ្តល់តម្លៃចំពោះកម្មករសោះ៖ «អត់មានប្រាប់ថា ប្អូនឯងហ្នឹងណានៅសល់ ១០ថ្ងៃទៀតដល់កិច្ចសន្យាហើយ ប្អូនឯងដល់ថ្ងៃឈប់ហើយ ប្អូនមកបើកលុយទៅអត់ អត់ប្រាប់ផង។ នៅសល់ ១០ថ្ងៃនៅសល់ ៥ថ្ងៃទៀត ហៅទៅបញ្ឈប់តែម្តង។ ពួកខ្ញុំកម្មករសួរថា ពួកខ្ញុំខុសអី? មូលហេតុអ្វី? បានណែនាំខ្ញុំម្តង ពីរម្តងនៅឲ្យវាមានហេតុផលផងទៅណា»។
លោក នាល សារ៉ាត់ បន្ថែមថា កម្មករទាំងអស់ស្នើសុំឲ្យថៅកែរោងចក្រគោរពតាមលក្ខខណ្ឌនៃច្បាប់ការងារកម្ពុជា។ កម្មករទាំងនោះ ក៏ស្នើដែរឲ្យថៅកែរោងចក្រ គោរពតាមគោលការណ៍មួយចំនួនមានដូចជា ទី១ ត្រូវបន្តកិច្ចសន្យារយៈពេលមួយឆ្នាំបន្ទាប់ពីបញ្ចប់កិច្ចសន្យារយៈពេល ៦ខែ។ ទី២ ត្រូវបញ្ឈប់រដ្ឋបាលពីររូបចេញពីរោងចក្រ គឺលោក ឡុង សាវី និង មាស ដារ៉ា។ ទី៣ ត្រូវឲ្យកម្មករជាង ២០នាក់ដែលថៅកែបញ្ឈប់ពីការងារ ឲ្យចូលធ្វើការវិញ និងទី៤ ថៅកែត្រូវតែឈប់បញ្ឈប់កម្មករក្នុងរោងចក្រនេះ។
កម្មករទាំងនោះបញ្ជាក់ថា ពួកគេនឹងធ្វើការតវ៉ារហូតដល់មានដំណោះស្រាយ បើទោះក្រសួងការងារ និងរដ្ឋសភា ពុំបានសន្យាថាដោះស្រាយបញ្ហានេះជូនពួកគាត់ក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។