កំពង់ផែកងទ័ពជើងទឹករាមដែលត្រូវបានសាងសង់ ក្រោមជំនួយឧបត្ថម្ភរបស់កងទ័ពរំដោះប្រជាជនចិន នឹងត្រូវបើកសម្ពោធជាផ្លូវការនៅដើមខែមេសា ឆាប់ៗនេះ។ អ្នកតាមដានស្ថានការណ៍លើកឡើងថា កម្ពុជានៅតែត្រូវដោះស្រាយបញ្ហាមន្ទិលសង្ស័យរឿងវត្តមានយោធាចិននៅមូលដ្ឋានទ័ពជើងទឹករាម ព្រោះរឿងនេះនៅតែជាបញ្ហារសើបសម្រាប់សន្តិសុខក្នុងតំបន់។
កម្ពុជានឹងអនុញ្ញាតឱ្យនាវាជប៉ុនចូលចតមុនគេនៅកំពង់ផែកងទ័ពជើងទឹករាម ក្រោយកំពង់ផែនេះត្រូវបានសាងសង់រួច និងសម្ពោធដាក់ឱ្យប្រើប្រាស់ជំហានទី ១ នៅដើមខែមេសា ខាងមុខនេះ។
នេះបើតាមការបញ្ជាក់របស់អគ្គមេបញ្ជាការកងយោធពលខេមរភូមិន្ទលោក វង្ស ពិសេន ក្នុងជំនួបផ្ទាល់ជាមួយនាយការិយាល័យសេនានុព័ន្ធជប៉ុនថ្មីប្រចាំនៅកម្ពុជា លោក ហារ៉ា តាកាស៊ី (Hara Takashi) នៅព្រឹកថ្ងៃទី ១៨ មីនា។
លោក វង្ស ពិសេន គូសបញ្ជាក់ថា ការផ្ដល់អាទិភាពឱ្យនាវាជប៉ុនចូលចតមុនគេ ដែលលោកហៅថា ជា «ប្រវត្តិសាស្ត្រ» នេះ គឺដោយសាររដ្ឋាភិបាលកម្ពុជា និងរដ្ឋាភិបាលជប៉ុន មានគោលជំហរខ្ពស់ក្នុងកិច្ចសហប្រតិបត្តិការទំនាក់ទំនង និងការជឿទុកចិត្តគ្នាទៅវិញទៅមក ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ។
អគ្គបញ្ជាការដ្ឋាននៃកងយោធពលខេមរភូមិន្ទឱ្យដឹងលើទំព័រហ្វេសប៊ុកថា មន្ត្រីជប៉ុនបានឆ្លើយតបទៅលោក វង្ស ពិសេន វិញថា ការយល់ព្រមឱ្យនាវាជប៉ុនចូលចតមុនគេនៅកំពង់ផែរាមនេះ «បង្ហាញពីតម្លាភាពក្នុងការពង្រឹងសន្តិសុខអន្តរជាតិ»។
ជុំវិញរឿងនេះ អ្នកអត្ថាធិប្បាយនយោបាយលោក គឹម សុខ យល់ថា មូលហេតុដែលរដ្ឋាភិបាលកម្ពុជាអនុញ្ញាតឱ្យនាវាជប៉ុនចូលចតមុនគេ ក្រោយការសម្ពោធកំពង់ផែរាមនេះ គឺដើម្បីសម្រួលភាពតានតឹងជុំវិញការចោទប្រកាន់រឿងវត្តមានយោធាចិននៅកំពង់ផែរាម ព្រោះជប៉ុនជាសម្ព័ន្ធមិត្តរបស់អាមេរិក ហើយជប៉ុនមិនមែនជាគូប្រជែងចំពោះមុខរបស់ចិនក្នុងបញ្ហានេះទេ។
ដើម្បីជម្រះឱ្យអស់មន្ទិលសង្ស័យ មានតែដំណោះស្រាយពីរយ៉ាងទេ។ ទីមួយ អ្នកជំនាញរបស់អង្គការសហប្រជាជាតិ មានការចូលរួមពីអ្នកជំនាញយោធាអាមេរិក ជប៉ុន ចិន រុស្ស៊ី ឬអឺរ៉ុប ជាដើម ចូលរួមពិនិត្យរួមគ្នានៅតំបន់កងទ័ពជើងទឹកសមុទ្ររាម។ ដំណោះស្រាយទីពីរ ទាល់តែស្ដារប្រជាធិបតេយ្យកម្ពុជាឡើងវិញ ឱ្យកម្ពុជាមានគណបក្សប្រឆាំង។ គណបក្សប្រឆាំង គឺជាមុខមាត់របស់ប្រជាពលរដ្ឋខ្មែរ ហើយក៏ជាបង្អែកនៃទំនុកចិត្តរបស់សហគមន៍អន្តរជាតិក្នុងការពិនិត្យមើល និងតាមដានការប្រតិបត្តិរវាងរដ្ឋាភិបាលជាមួយនឹងទំនាក់ទំនងយោធានៃបណ្ដាប្រទេសនានា ដូចជា ចិន និងប្រទេសមួយចំនួនទៀត ជាដើម។
— លោក គឹម សុខ អ្នកអត្ថាធិប្បាយនយោបាយ
ប៉ុន្មានឆ្នាំចុងក្រោយនេះ កម្ពុជាក្រោមការដឹកនាំរបស់រដ្ឋាភិបាលនៃក្រុមគ្រួសារត្រកូលហ៊ុន បានរងការចោទប្រកាន់ថា បានចុះកិច្ចព្រមព្រៀងសម្ងាត់ជាមួយចិនក្នុងការអនុញ្ញាតឱ្យកងទ័ពរំដោះប្រជាជនចិនឈរជើងមូលដ្ឋានកងទ័ពជើងទឹករាម ដែលបញ្ហានេះកំពុងបង្កជាកង្វល់ទាក់ទងនឹងបញ្ហាអសន្តិសុខតំបន់ទាំងមូល ព្រោះចិនកំពុងពង្រីកឥទ្ធិពលរបស់ខ្លួន និងទាមទារកាន់កាប់ដែនសមុទ្រចិនខាងត្បូងផ្ដាច់មុខតែម្នាក់ឯង។ កងទ័ពរំដោះប្រជាជនចិន គឺជាអ្នកជួយសាងសង់កំពង់ផែ និងធ្វើទំនើបកម្មមូលដ្ឋានកងទ័ពជើងទឹករាមរបស់កម្ពុជា។
ក្នុងដំណាក់កាលចុងក្រោយនេះ មានតែនាវាចម្បាំងចិនប៉ុណ្ណោះដែលរដ្ឋាភិបាលកម្ពុជាអនុញ្ញាតឱ្យចូលចតនៅកំពង់ផែរាម ខណៈនាវាចម្បាំងរបស់សហរដ្ឋអាមេរិក កាណាដា និងជប៉ុន ជាដើម ត្រូវបានភាគីកម្ពុជាបង្វែរឱ្យទៅចូលចតនៅកំពង់ផែស្វយ័តក្រុងព្រះសីហនុវិញ។ កាលពីថ្ងៃទី ១៧ ខែកុម្ភៈ ថ្មីៗនេះ រូបភាពផ្កាយរណបដែលវិទ្យុអាស៊ីសេរីទទួលបាន បង្ហាញថា មាននាវាចម្បាំង ២ គ្រឿងទៀតរបស់ចិន បានចូលចតនៅកំពង់ផែថ្មី ដែលចិនបានស្ថាបនាក្នុងមូលដ្ឋានទ័ពរាម នៅទល់មុខគ្នានឹងនាវាចម្បាំងចិនពីរគ្រឿងទៀតដែលបានចតនៅទីនោះ តាំងតែពីឆ្នាំមុន។ តាមគម្រោង ភាគីចិននឹងប្រគល់គ្រឿងបរិក្ខារថ្មីៗជាច្រើននៅឯមូលដ្ឋានទ័ពរាម បូករួមទាំងកំពង់ផែ និងនាវាចម្បាំង ២ គ្រឿង ដល់កម្ពុជា។
អ្នកនាំពាក្យកងទ័ពជើងទឹកកម្ពុជាលោក ថោង សូលីម៉ូ បានប្រាប់ទីភ្នាក់ងារសារព័ត៌មាន AP (Associated Press) ថា ពិធីសម្ពោធកំពង់ផែជើងទឹករាមនឹងប្រព្រឹត្តទៅនៅថ្ងៃទី ០២ មេសា ក្រោមអធិបតីភាពរបស់លោកនាយករដ្ឋមន្ត្រី ហ៊ុន ម៉ាណែត។
អគ្គមេបញ្ជាការនៃកងយោធពលខេមរភូមិន្ទលោក វង្ស ពិសេន អះអាងក្នុងជំនួបជាមួយមន្ត្រីយោធាជប៉ុនថា ជំហររបស់ថ្នាក់ដឹកនាំកម្ពុជាគឺនឹងបើកចំហឱ្យនាវាប្រទេសដទៃដែលមកធ្វើទស្សនកិច្ច ឬធ្វើសមយុទ្ធនៅកម្ពុជា ចូលចតនៅកំពង់ផែរាម ក្រោយពីការសម្ពោធដាក់ឱ្យប្រើប្រាស់ជំហានទីមួយ និងបន្ទាប់ពីមានការចូលចតរបស់នាវាជប៉ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។