ប្រធានព្រឹទ្ធសភាលោក ហ៊ុន សែន បន្តចោទប្រកាន់ជាថ្មីលើក្រុមគណបក្សប្រឆាំង ថាកំពុងព្យាយាមធ្វើឱ្យផ្ទៃក្នុងគណបក្សប្រជាជនកម្ពុជាបែកបាក់គ្នា ជាពិសេស ក្នុងចំណោមក្រុមនិយមខាងអតីតរដ្ឋមន្ត្រីក្រសួងផ្ទៃលោក ស ខេង ជាមួយក្រុមរបស់លោក។
អតីតតំណាងរាស្រ្ដគណបក្សសង្គ្រោះជាតិលោក អ៊ំ សំអាន លើកឡើងថា លោក ហ៊ុន សែន ខ្លួនឯងជាអ្នកធ្វើឲ្យផ្ទៃក្នុងបក្សកាន់អំណាចបែកបាក់គ្នា ដោយសារតែមហិច្ឆតាប្រមូលយកអំណាចក្នុងបក្សមកក្ដោបក្ដាប់តែម្នាក់ឯង ដើម្បីត្រៀមផ្ទេរទៅឱ្យកូន ហើយបន្តព្យាយាមផាត់ចោលឥទ្ធិពលនៃមេដឹកនាំបក្សសំខាន់ៗ ដទៃទៀតដូចជា លោក ស ខេង និងលោក សាយ ឈុំ ជាដើម។
ចុងក្រោយលោក ហ៊ុន សែន សុខចិត្តទៅដណ្ដើមតំណែងលោក សាយ ឈុំ ដើម្បីធ្វើជាប្រធានព្រឹទ្ធសភា ហើយសុខចិត្តឱ្យលោក សាយ ឈុំ ដើរទាត់ខ្យល់ គ្មានការងារធ្វើទៅ។ ហើយលោក ស ខេង ឱ្យទៅធ្វើជាឧត្តមទីប្រឹក្សាព្រះមហាក្សត្រអីទៅ ប៉ុន្តែអត់មានតំណែងអីកាន់ទាំងអស់។ យ៉ាងហោចណាស់ គួរតែឱ្យលោក ស ខេង ធ្វើជាប្រធានរដ្ឋសភា ឬធ្វើជាអនុប្រធានព្រឹទ្ធសភា បន្ទាប់ពីគាត់ (ហ៊ុន សែន) អីទៅ បានសម។
— លោក អ៊ំ សំអាន
ការលើកឡើងរបស់មន្ត្រីបក្សប្រឆាំងនេះ បន្ទាប់ពីលោក ហ៊ុន សែន បានចូលរួមក្នុងពិធីបំពាក់ឋានន្តរស័ក្ដិ ថ្នាក់នាយឧត្តមសេនីយ៍ផុតលេខផ្កាយមាស៥ ដល់លោក ទៀ បាញ់ និងអ្នកស្រី ម៉ែន សំអន នៅថ្ងៃទី២១ មីនា ដែលធ្វើឱ្យអ្នកពាក់ផ្កាយ៥ កើនដល់៥នាក់ ក្នុងនោះ មានលោក ហ៊ុន សែន លោក ជា ស៊ីម និងលោក ហេង សំរិន ប៉ុន្តែផាត់ចោល លោក ស ខេង ដែលជាអ្នកមានឥទ្ធិពលបំផុតមួយក្នុងបក្សកាន់អំណាច។
ប៉ុន្តែលោក ហ៊ុន សែន បកស្រាយថា ការមិនផ្ដល់ឋានន្តរស័ក្ដិផ្កាយ៥ដល់លោក ស ខេង ដោយសារលោក ស ខេង ជាអ្នកកាន់ខាងមន្ត្រីស៊ីវិល។ លោកថែមទាំងព្រមានតាមកម្ទេចក្រុមគណបក្សប្រឆាំង ដែលលោកចោទថា ជាអ្នកតាមបំបែកបំបាក់ផ្ទៃក្នុងបក្សកាន់អំណាច។
អ្នកដែលធ្លាប់បំបែកបំបាក់គណបក្សប្រជាជនទាំងប៉ុន្មាន គឺបែកខ្លួនឯងទាំងអស់។ ខ្ញុំហ៊ាននិយាយ ខ្ញុំហ៊ានធ្វើ បែកខ្លួនឯងទាំងអស់។ បក្សប៉ុន្មានហើយ ចង់បំបែកគណបក្សប្រជាជន ប៉ុន្តែចង់បញ្ចប់ លទ្ធផលគឺបែកខ្លួនឯងទាំងអស់។ ហើយខ្ញុំនឹងបន្តធ្វើកិច្ចការងារនេះ ដោយមិនទុកឱ្យអ្នកឯងរួចខ្លួនទេ។
— លោក ហ៊ុន សែន
ប៉ុន្តែអ្នកអត្ថាធិប្បាយនយោបាយលោក គឹម សុខ មើលឃើញថា លោក ហ៊ុន សែន ចង់កម្ទេចក្រុមលោក ស ខេង ឱ្យអស់ចេញពីផ្ទៃក្នុងគណបក្សប្រជាជនកម្ពុជា ពីព្រោះលោក ស ខេង មានកម្លាំងធំទាំងនៅក្នុងផ្ទៃបក្សនិងក្នុងក្របខណ្ឌរាជការ។ លោកថា លោក ហ៊ុន សែន មានវ័យកាន់តែចាស់ជរា ដូច្នេះលោកមិនចង់ឱ្យមានឧបសគ្គរារាំងផែនការផ្ទេរតំណែងប្រធានបក្សទៅកូនប្រុសរបសលោកគឺលោកនាយករដ្ឋមន្ត្រី ហ៊ុន ម៉ាណែត នោះទេ។
លោក ហ៊ុន សែន លើកហេតុផលថា លោក ស ខេង ជាស៊ីវិល ហើយចុះលោកតា ជា ស៊ីម លោកតា ហេង សំរិន ជាស៊ីវិលដែរតើ ម្ដេចឱ្យគាត់ពាក់ផ្កាយ៥ទៅបាន? ដូច្នេះ ការមិនឱ្យលោក ស ខេង ពាក់ផ្កាយ៥នេះ មិនមែនមកពីហេតុផល លោក ស ខេង ស៊ីវិលទេ គឺលោក ហ៊ុន សែន ចង់បំបែកផ្ទៃក្នុងគណបក្សប្រជាជនកម្ពុជា ដោយរុញក្រុមលោក ស ខេង ចេញ។ គឺលោក ហ៊ុន សែន ជាអ្នកបំបែកផ្ទៃដោយខ្លួនឯង គ្មានគណបក្សប្រឆាំងឯណាមានលទ្ធភាពចូលទៅបំបែកផ្ទៃក្នុងគណបក្សប្រជាជនកម្ពុជាទេ។
— លោក គឹម សុខ
អ្នកតាមដានបញ្ហានយោបាយលើកឡើងថា លោក ហ៊ុន សែន បានប្រើប្រាស់គ្រប់ឧបាកលទុច្ចរិតដោយរំលោភច្បាប់ជាតិនិងអន្តរជាតិ និងរំលោភសិទ្ធិមនុស្សធ្ងន់ធ្ងរ ក្នុងការតាមកម្ទេចគណបក្សប្រឆាំង មិនឱ្យចូលរួមការបោះឆ្នោត ដូចជាការរំលាយគណបក្សសង្គ្រោះជាតិកាលពីឆ្នាំ២០១៧ និងបន្តប្រើប្រាស់ប្រព័ន្ធតុលាការចាប់ចងមន្ត្រីបក្សប្រឆាំងឥតស្រាកស្រាន្ត និងការតាមទិញទឹកចិត្តមន្ត្រីបក្សប្រឆាំងឱ្យចុះចូលជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។