ការស្នើនេះ ខណៈលោក ហ៊ុន សែន លើកឡើងថា លោកមានការឈឺចាប់ ដែលត្រូវប្រឈមនឹងទុក្ខធ្ងន់ពីរដំណាលគ្នា គឺភរិយានិងបងប្រុសរបស់លោក កំពុងឈឺធ្ងន់ ហើយត្រូវស្ថិតក្នុងការសង្គ្រោះពីគ្រូពេទ្យ។
អតីតតំណាងរាស្ដ្រគណបក្សសង្គ្រោះជាតិលោក អ៊ុំ សំអាន ប្រាប់អាស៊ីសេរីនៅថ្ងៃទី២៥ មីនា ថា ពលរដ្ឋដែលរងគ្រោះស្ថិតក្រោមការដឹកនាំរបស់លោក ហ៊ុន សែន និងកូនប្រុសរបស់លោក គឺលោកនាយករដ្ឋមន្ត្រី ហ៊ុន ម៉ាណែត ក៏ចេះឈឺចាប់ដែរ ក្នុងនោះរួមមានក្រុមគ្រួសារនិងកូនចៅរបស់មន្ត្រី និងសកម្មជនបក្សប្រឆាំង សកម្មជនសិទ្ធិមនុស្ស និងបរិស្ថាន ដែលត្រូវអាជ្ញាធររបបលោក ហ៊ុន សែន ចាប់ខ្លួនបញ្ជូនទៅឃុំឃាំងក្នុងពន្ធនាគារដោយអយុត្តិធម៌។
អាហ្នឹងយើងឃើញថា គាត់មិនចេះឈឺចាប់ចំពោះអ្នកដទៃ ដែលព្រាត់ប្រាសគ្រួសារ បែរជាឱ្យគេជួយឈឺចាប់ចំពោះតែក្រុមគ្រួសារខ្លួនឯង មនុស្សអ៊ីចឹង មនុស្សអត្មានិយម។ ប៉ុន្តែយ៉ាងណាក៏ដោយ ក៏យើងយល់ថា ការឈឺចាប់ដោយសារតែក្រុមគ្រួសាររបស់ខ្លួនអាចព្រាត់ប្រាស ឬលាចាកលោក ឬមានជំងឺហ្នឹង ជារឿងធម្មតារបស់មនុស្ស ដែលយើងជាខ្មែរដូចគ្នា គួរតែចូលរួមការឈឺចាប់។ សុំទោស បើបងប្រុសរបស់គាត់លាចាកលោកទៅ ក៏យើងចូលរួមរំលែកទុក្ខផងដែរ។
— លោក អ៊ុំ សំអាន
លើសពីនេះ លោកថា នៅមានក្រុមគ្រួសាររបស់មេដឹកនាំសហជីពលោក ជា វិជ្ជា សកម្មជនព្រៃឈើលោក ឈុត វុទ្ធី អ្នកវិភាគនយោបាយបណ្ឌិត កែម ឡី និងអតីតតំណាងរាស្ដ្រគណបក្សសង្គ្រោះជាតិលោក លិម គិមយ៉ា ដែលត្រូវឃាតករបាញ់សម្លាប់ រួមក្រុមគ្រួសារជនរងគ្រោះស្លាប់ជាង១០នាក់ក្នុងហេតុការណ៍គប់គ្រាប់បែកកាលពីឆ្នាំ១៩៩៧ជាដើម ក៏ចេះឈឺចាប់ដោយសារការព្រាត់ប្រាសគ្រួសារដែរ។
ការលើកឡើងពីមន្ត្រីបក្សប្រឆាំងនេះ ធ្វើឡើងបន្ទាប់ពីប្រធានព្រឹទ្ធសភាលោក ហ៊ុន សែន បង្ហោះសារលើហ្វេសប៊ុក អមដោយរូបថតភរិយារបស់លោកកំពុងសម្រាកព្យាបាលនៅមន្ទីរពេទ្យ និងរូបថតបងប្រុសច្បងរបស់លោក នៅថ្ងៃទី២៥មីនាថា លោកកំពុងមានទុក្ខធ្ងន់ ដោយសារអ្នកស្រី ប៊ុន រ៉ានី ឆ្លងកាត់ការវះកាត់ដោយគ្រោះថ្នាក់។
លោក ហ៊ុន សែន បន្តថា ទន្ទឹមគ្នា ក្រុមគ្រួសារលោក ក៏ត្រៀមទទួលយកការឈឺចាប់មួយទៀត ដោយសារលោក ហ៊ុន សាន អាចលាចាកលោកនេះ ក្នុងពេលខ្លីខាងមុខ ដោយសារឈឺធ្ងន់និងសន្លប់អស់រយៈពេល២៤ម៉ោង។
ក្រោយពីលោក ហ៊ុន សែន បង្ហោះសារជួបទុក្ខនេះ បានធ្វើឱ្យអ្នកប្រើប្រាស់ហ្វេសប៊ុកមួយចំនួន ចូលទៅសរសេរក្នុងខ្ទង់ខាំមិនត៍ (Comment) ជូនពរនិងត្រៀមចូលរួមរំលែកទុក្ខ ប៉ុន្តែក៏មានអ្នកប្រើប្រាស់ហ្វេសប៊ុកខ្លះទៀត ចូលសរសេរសារថា ការកើតចាស់ឈឺស្លាប់ជាច្បាប់ធម្មជាតិ និងបានទទូចឱ្យលោក ហ៊ុន សែន ឈប់លោភលន់និងជិះជាន់អ្នកទន់ខ្សោយបន្តទៀត។
ជុំវិញបញ្ហានេះ ប្រធានអង្គការប្រជាធិបតេយ្យខ្មែរប្រចាំប្រទេសអូស្ដ្រាលីលោក ស៊ឹង សែនករុណា លើកឡើងថា ជាសីលធម៌ និងជាខ្មែរដូចគ្នា លោកមិនគាំទ្រចំពោះការឆ្លៀតឱកាសវាយប្រហារ និងសើចចំអកទៅដល់គ្រួសារមួយ ដែលកំពុងជួបទុក្ខឡើយ។
ការកើតចាស់ឈឺស្លាប់ហ្នឹង វាចៀសអត់ផុតទេ អ៊ីចឹងក្នុងនាមយើងនៅមានជីវិត នៅមានអំណាច នៅមានតួនាទី យើងគប្បីប្រព្រឹត្តនូវអំពើល្អ អំពើត្រឹមត្រូវ អំពើដែលគេសាទរចំពោះការដឹកនាំមួយ ដែលគេអាចទទួលយកបានពីគ្រប់ភាគី ពីគ្រប់និន្នាការទាំងអស់ហ្នឹង។ អាហ្នឹងជាអំពើមួយ ដែលមេដឹកនាំ និងមនុស្សទាំងឡាយត្រូវកសាងឡើង ចៀសវាងប្រព្រឹត្តអំពើអាក្រក់ឱ្យអ្នកណាម្នាក់ឈឺចាប់។
— លោក ស៊ឹង សែនករុណា
លោក ហ៊ុន សែន មិនបានបញ្ជាក់ថា លោក ហ៊ុន សាន និងអ្នកស្រី ប៊ុន រ៉ានី ឈឺធ្ងន់ដោយសារជំងឺអ្វីឡើយ។ ប៉ុន្តែកាលពីខែកុម្ភៈ ឆ្នាំ២០២៤ លោក ហ៊ុន សែន ធ្លាប់អះអាងថា ភរិយារបស់លោកត្រូវចូលសង្គ្រោះក្នុងមន្ទីរពេទ្យ បន្ទាប់ពីដួលក្នុងបន្ទប់សម្រាក ធ្វើឱ្យប៉ះពាល់ក្បាល។ លោកក៏ទម្លាយនៅពេលនោះថា ភរិយារបស់លោក ក៏មានជំងឺឈឺចង្កេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។