អ្នកជំនាញផ្នែកវិទ្យាសាស្ត្រនយោបាយ និងការបទេសលោក ឯម សុវណ្ណារ៉ា យល់ថា ការត្រៀមមន្ត្រីជាន់ខ្ពស់កម្ពុជាទៅចរចាជាមួយសហរដ្ឋអាមេរិកសុំឱ្យបញ្ចុះពន្ធជាការត្រៀមលក្ខណៈហាក់មិនចំគោលដៅ។ លោកសង្កេតឃើញថា កម្ពុជាមិនមានប្រយោជន៍ពាណិជ្ជកម្មអ្វីធំដុំ ដែលអាចចរចាជាមួយសហរដ្ឋអាមេរិក ដើម្បីសុំឱ្យអាមេរិកបន្ធូរបន្ថយពន្ធឡើយ។ ប៉ុន្តែលោកថា បើកម្ពុជាព្យាយាមស្ដារប្រជាធិបតេយ្យ និងគោរពសិទ្ធិមនុស្ស សហរដ្ឋអាមេរិកទំនងអាចពិចារណាឡើងវិញរឿងបញ្ចុះពន្ធ៤៩%។
លោកបន្តទៀតថា នៅរយៈពេលចុងក្រោយនេះ បើទោះជាប្រទេសវៀតណាម ស្នើសុំមិនយកពន្ធលើទំនិញរបស់សហរដ្ឋអាមេរិកជាថ្នូរសុំមិនឱ្យអាមេរិកដំឡើងពន្ធក្ដី ប៉ុន្តែទីប្រឹក្សារបស់ប្រធានាធិបតីសហរដ្ឋអាមេរិកមិនព្រមទទួលយកសំណើរបស់វៀតណាមឡើយ។
យើងសាទរដែលគាត់ (រដ្ឋាភិបាលស្វែងរកកិច្ចចរចា) យើងជួយជំរុញលើកទឹកចិត្ត។ ក៏ប៉ុន្តែ ត្រូវមានភាពល្អូកល្អិននៅពីខាងក្រៅទៀតទំនាក់ទំនងល្អជិតស្និទ្ធដូចកម្ពុជា-ចិន អ៊ីចឹងណា ហើយកម្ពុជា-អាមេរិកឱ្យល្អអ៊ីចឹងបានយើងស្រណុកនិយាយគ្នា នៅពេលយើងទើបងាកទៅរកគេរៀងការលំបាកបន្តិចដែរបាទ។
— លោក ឯម សុវណ្ណារ៉ា
ការដំឡើងពន្ធ៤៩% លើទំនិញកម្ពុជា នឹងចូលជាធរមាននៅថ្ងៃទី៩ មេសានេះ។ លោកប្រធានាធិបតីលោក ដូណាល់ ត្រាំ អះអាងថា ចំណាត់ការនេះ ដើម្បីស្ដារយុត្តិធម៌ និងតុល្យភាព ក្នុងទំនាក់ទំនងពាណិជ្ជកម្មរបស់សហរដ្ឋអាមេរិក។
លោកនាយករដ្ឋមន្ត្រី ហ៊ុន ម៉ាណែត បានអះអាងថា ក្រៅពីចាត់តាំងមន្ត្រីជាន់ខ្ពស់កម្ពុជា ត្រៀមទៅចរចាដល់ទឹកដីសហរដ្ឋអាមេរិក ហើយរដ្ឋាភិបាលរបស់លោក ក៏ត្រៀមបញ្ចុះពន្ធលើទំនិញរបស់សហរដ្ឋអាមេរិកដែលនាំចូលកម្ពុជាដែរ ដែលទំនិញខ្លះអាចបញ្ចុះទៅដល់៥%។
ពាក្យថា ចរចាគឺគេមិនដែលបញ្ចេញសន្លឹកបៀទាំងអស់ទេ។ អ្នកខ្លះគ្រាន់តែឃើញវៀតណាមធ្លាក់ទៅសូន្យហេតុអីទម្លាក់ត្រឹម៣៥% មក៥%។ ពាក្យថា ចរចាគេចេញសន្លឹកបៀមួយតង់មុនហើយគេបើកឆន្ទៈនៅក្នុងការចរចាបន្តទៀត។
— លោក ហ៊ុន ម៉ាណែត
របាយការណ៍របស់អគ្គនាយកដ្ឋានគយ និងរដ្ឋាករកម្ពុជាបានបង្ហាញថា នៅក្នុងឆ្នាំ២០២៤ កម្ពុជាបាននាំចេញទំនិញ ៩ពាន់លានដុល្លារ ខណៈអាមេរិកនាំទំនិញមកកម្ពុជាវិញត្រឹម២៦៤លានដុល្លារ។
លោក ឯម សុវណ្ណារ៉ា កត់សម្គាល់ថា សព្វថ្ងៃកម្ពុជា ទិញទំនិញពីសហរដ្ឋអាមេរិកតិចតួច ចំណែករោងចក្ររបស់សហរដ្ឋអាមេរិកនៅកម្ពុជា ក៏តិចតួចដែរ។ លោកបន្តថា ប្រសិនកម្ពុជា ចង់បង្កលក្ខណៈឱ្យអ្នកវិនិយោគអាមេរិកមកបណ្ដាក់ទុននៅកម្ពុជា គឺកម្ពុជា ត្រូវចំណាយពេលយូរ ដោយត្រូវធ្វើការងារច្រើនទៀតដូចជា មានច្បាប់ល្អ មានតម្លាភាព គ្មានអំពើពុករលួយ គោរពសិទ្ធិមនុស្ស ប្រជាធិបតេយ្យ និងកាត់បន្ថយឥទ្ធិពលចិនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។