ក្រសួងការបរទេសកម្ពុជា ប្រកាសនៅថ្ងៃទី១១មេសាថា ប្រធានាធិបតីចិនលោក ស៊ី ជីនពីង (Xi Jinping) នឹងមកបំពេញទស្សនកិច្ចនៅកម្ពុជានេះ តបតាមការអញ្ជើញពីព្រះមហាក្សត្រខ្មែរព្រះករុណាព្រះបាទសម្ដេច នរោត្តម សីហមុនី។ ដំណើរទស្សនកិច្ចរបស់ប្រធានាធិបតីចិននេះ នឹងធ្វើឡើងចំខួប៥០ឆ្នាំ នៃថ្ងៃប៉ុលពតដែលគាំទ្រដោយប្រទេសចិន ចូលគ្រប់គ្រងទីក្រុងភ្នំពេញ នៅថ្ងៃទី១៧ ខែមេសា ឆ្នាំ១៩៧៥។
ក្រសួងការបរទេសបញ្ជាក់ថា មេដឹកនាំចិននឹងចូលគាល់ព្រះមហាក្សត្រ ជួបប្រធានព្រឹទ្ធសភាលោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត ដើម្បីពង្រឹងទំនាក់ទំនងទ្វេភាគី និងផ្លាស់ប្ដូរយោបល់ជុំវិញបញ្ហាសំខាន់ៗ ក្នុងតំបន់ និងអន្តរជាតិ។ ក្រៅពីការរឹតចំណងមិត្តភាពដែកថែប និងភាពជាដៃគូយុទ្ធសាស្រ្ដគ្រប់ជ្រុងជ្រោយ ប្រទេសទាំងពីរ គ្រោងចុះហត្ថលេខាលើឯកសារជាច្រើនផងដែរ។
ជុំវិញបញ្ហានេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី មើលឃើញថា មេដឹកនាំចិន អាចឆ្លៀតឱកាសជួបជាមួយមេដឹកនាំកម្ពុជា ជជែកពីវិធីរកដំណោះស្រាយជុំវិញសង្គ្រាមពាណិជ្ជកម្មរវាងចិនជាមួយសហរដ្ឋអាមេរិក និងដើម្បីប្រកាសពីគោលជំហររបស់ចិនជាថ្មី គាំទ្ររដ្ឋាភិបាលក្រុងភ្នំពេញ ដែលដឹកនាំដោយគណបក្សប្រជាជនកម្ពុជា។
ខ្ញុំគិតថា ប្រធានបទនៃការដំឡើងពន្ធគយ ក៏អាចក្លាយជាប្រធានបទសំខាន់មួយ នៅក្នុងជំនួបជាមួយលោក ស៊ី ជីនពីង ជាមួយលោក ហ៊ុន ម៉ាណែត ក៏ដូចជា ឥស្សរជននយោបាយជាន់ខ្ពស់របស់គណបក្សប្រជាជនកម្ពុជាផងដែរ។ ធ្វើយ៉ាងណា ដើម្បីស្វែងរកវិធីកាត់បន្ថយហានិភ័យសម្ពាធពាណិជ្ជកម្ម ជាពិសេសការដំឡើងពន្ធ (លើចិន) ១៤៥%ពីសហរដ្ឋអាមេរិក។
— លោក សេង វណ្ណលី
ក្រៅពីកម្ពុជា លោក ស៊ី ជីនពីង ក៏នឹងបំពេញទស្សនកិច្ចនៅម៉ាឡេស៊ី និងវៀតណាមដែរ។ សារព័ត៌មានអន្តរជាតិធំៗ ដូចជា Reuters នៅចក្រភពអង់គ្លេស បានចុះផ្សាយថា មេដឹកនាំចិនកំពុងព្យាយាមបញ្ចុះបញ្ចូលមេដឹកនាំនៅអឺរ៉ុប ឱ្យរួមដៃគ្នាជាមួយចិន ដើម្បីប្រឆាំងទៅនឹងការដំឡើងពន្ធពីសហរដ្ឋអាមេរិក ខណៈប្រទេសជាង៧០ រួមទាំងកម្ពុជា បានស្នើសុំចរចាជាមួយសហរដ្ឋអាមេរិក បន្ទាប់ពីប្រធានធិបតីអាមេរិក លោក ដូណាល់ ត្រាំ បានប្រកាសដំឡើងពន្ធ៤៩% ពីកម្ពុជា។
អ្នកសិក្សាកិច្ចការសង្គម និងនយោបាយ លោក ប៉ោ មករា ប្រាប់អាស៊ីសេថា ដំណើរទស្សនកិច្ចរបស់លោក ស៊ី ជីនពីង នៅកម្ពុជា នឹងធ្វើឱ្យកម្ពុជាកាន់តែពិបាកទៅចរចាជាមួយសហរដ្ឋអាមេរិក ដើម្បីសុំបន្ធូរបន្ថយពន្ធ ស្របពេលកម្ពុជាក៏គ្មានដើមទុនអ្វីយកទៅនិយាយជាមួយអាមេរិក បើពិនិត្យលើទំហំផ្លាស់ប្ដូរពាណិជ្ជកម្មរវាងប្រទេសទាំងពីរ។
កម្ពុជាគ្មានតម្លៃមួយណា យកទៅចរចាជាមួយសហរដ្ឋអាមេរិកទេ អ៊ីចឹង អត្រាសម្ពាធនៃការចរចា មានលទ្ធផលតិចតួចបំផុត។ ហើយអ្វីដែលកម្ពុជា អាចចរចាបាន វាពាក់ព័ន្ធនឹងសិទ្ធិសេរីភាព និងលំហប្រជាធិបតេយ្យ។ ប្រសិនបើកម្ពុជាបើកលំហប្រជាធិបតេយ្យ និងសិទ្ធិសេរីភាព អាហ្នឹង ជាជ្រុងមួយ ក្នុងការយកទៅចរចា។
— លោក ប៉ោ មករា
ក្រសួងពាណិជ្ជកម្មកម្ពុជា ប្រកាសនៅថ្ងៃទី១០មេសា ថា កម្ពុជាទទួលបានការឆ្លើយតបជាវិជ្ជមានពីសហរដ្ឋអាមេរិក ហើយថា ភាគីទាំងពីរនឹងជួបចរចាគ្នាក្នុងពេលឆាប់នេះ។ ប៉ុន្តែសម្រាប់ក្រុមអ្នកឃ្លាំមើល និងមន្ត្រីបក្សប្រឆាំងលើកឡើងថា កម្ពុជាអាចបរាជ័យច្រើនជាងជោគជ័យ ក្នុងការចរចារឿងពន្ធជាមួយសហរដ្ឋអាមេរិក ដោយសារកម្ពុជារងការរិះគន់ថា លម្អៀងទៅចិនដែលជាសត្រូវរបស់អាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។