លោក ហ៊ុន ម៉ាណែត ច្រានចោលការលើកឡើងថា ទំនាក់ទំនងកម្ពុជា-ចិនកំពុងធ្លាក់ចុះ ក្រោយមានសារព័ត៌មានអន្តរជាតិមួយចំនួនបានចុះផ្សាយថា ចិនបានដកថយ ឬមិនគាំទ្រគម្រោងព្រែកជីកហ្វូណនតេជោ ដែលមានតម្លៃប្រមាណ ១ពាន់ ៧រយលានដុល្លារ។
លោក ហ៊ុន ម៉ាណែត បានលើកឡើងបែបនេះ កាលពីថ្ងៃទី១២មេសា។ លោកបានអះអាងថា ប្រទេសចិន តែងតែគោរពសិទ្ធិកម្ពុជា និងមិនលូកលាន់កិច្ចការផ្ទៃក្នុងកម្ពុជា។
ក្នុងពេលឆាប់ៗខាងមុខនេះ ឯកឧត្តមប្រធានាធិបតីចិន នឹងធ្វើទស្សនកិច្ចផ្លូវរដ្ឋនៅទីនេះ ក៏ជាសារបញ្ជាក់បន្ថែមទៀត។ អ៊ីចឹង សូមបញ្ជូនព័ត៌មានទៅអស់លោកអ្នកសារព័ត៌មានអន្តរជាតិផ្សេងៗ ដែលធ្វើការវិភាគ សូមវិភាគទៀតចុះ។ អ្វីដែលជាក់ស្ដែង ទំនាក់ទំនងនៅតែបន្តរឹងមាំ ហើយដើរទៅតាមគង្លងជួយគ្នាទៅវិញទៅមក។
— លោក ហ៊ុន ម៉ាណែត
ចំណែកសារព័ត៌មានចិន ស៊ិនហួ (Xinhua) ចុះផ្សាយនៅថ្ងៃទី១៤មេសាថា លោក ស៊ី ជីនពីង ចាប់ផ្ដើមបំពេញទស្សនកិច្ចទៅប្រទេសវៀតណាមម៉ាឡេស៊ី និងកម្ពុជា ពីថ្ងៃចន្ទរហូតដល់ថ្ងៃសុក្រ ដើម្បីពង្រឹងទំនាក់ទំនងឱ្យកាន់តែស៊ីជម្រៅ និងជជែកពីកិច្ចសហប្រតិបត្តិការបន្ថែមនាពេលខាងមុខ រវាងចិននិងប្រទេសនៅតំបន់អាស៊ីអាគ្នេយ៍ រាប់ចាប់តាំងពីបញ្ហាហេដ្ឋារចនាសម្ព័ន្ធ ពាណិជ្ជកម្ម និងការធ្វើការងារជាមួយគ្នាដើម្បីពង្រឹងការជឿទុកចិត្តគ្នា។
សារព័ត៌មានរដ្ឋចិនបន្តថា ដំណើរទស្សនកិច្ចរបស់លោក ស៊ី ជីនពីង ដើម្បីឆ្លុះបញ្ចាំងពីចក្ខុវិស័យមហាសាលរបស់ចិន ក្នុងការកសាងសហគមន៍មួយជោគវាសនាមួយ ជាមួយបណ្ដាប្រទេសជិតខាង ជាពិសេសនៅក្នុងសម័យកាលពិភពលោកកំពុងស្ថិតក្នុងភាពមិនប្រាកដប្រជា។
លោក ស៊ី ជីនពីង នឹងបំពេញទស្សនកិច្ចកម្ពុជានៅថ្ងៃទី១៧ដល់ថ្ងៃទី១៨ខែមេសា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។