លោក រ៉ុង ឈុន បានចាត់ទុកចំណាត់ការរបស់តុលាការនេះថា ជាការធ្វើទុក្ខបុកម្នេញដើម្បីរាំងខ្ទប់មិនឱ្យលោកធ្វើការងារបម្រើផលប្រយោជន៍សង្គមជាតិបន្តទៅទៀត។ លោកថា ការងាររបស់លោកកន្លងមក គឺដើម្បីសង្គមជាតិ និងប្រជាពលរដ្ឋ ហើយពុំមែនជាការប្រព្រឹត្តខុសច្បាប់អ្វីឡើយ។
យើងមិនអាចទទួលយកបានទេវាជារឿងអយុត្តិធម៌ សម្រាប់ខ្ញុំ ហើយបើគេចង់រឹបអូសហើយអាហ្នឹងមិនដឹងធ្វើម៉េចទេ មានតែឱ្យគេយកទៅយើងក៏មិនដឹងត្រូវធ្វើម៉េចដែរ។ ពីព្រោះយើងគ្រាន់តែចូលរួមកិច្ចការសង្គម ការងារនយោបាយ ហើយយើងចង់ឱ្យសង្គមយើងមួយមានប្រជាធិបតេយ្យ មានសេរីភាពពិតប្រាកដ ហើយប្រជាពលរដ្ឋមានជីវភាពមានការធ្វើល្អប្រសើរដូចជាយើងរួមចំណែកជួយរដ្ឋាភិបាលអីចឹង។
— លោក រ៉ុង ឈុន
ប្រតិកម្មរបស់លោក រ៉ុង ឈុន នេះធ្វើឡើងបន្ទាប់ពីចៅក្រមនៃសាលាដំបូងរាជធានីអ្នកស្រី យី សុខវួច បានបង្ខំឱ្យលោកលក់ផ្ទះរបស់លោក ដែលមានទំហំទទឹង៤ម៉ែត្រ និងបណ្ដោយ១៦ម៉ែត្រ និងមាន៤បន្ទប់ នៅ រាជធានីភ្នំពេញ។ អ្នកស្រី យី សុខវួច បានបញ្ជាក់នៅក្នុងដីកាចុះថ្ងៃទី២៧ខែមីនា ដែលលោក រ៉ុង ឈុន ទើបតែទទួលបាន កាលពីរសៀលថ្ងៃទី២៣ខែមេសាថា ការបង្ខំឱ្យលក់ផ្ទះនេះ គឺដើម្បីយកប្រាក់សងទៅដើមបណ្ដឹង ដែលជាគណៈកម្មាធិការចម្រុះកិច្ចការព្រំដែន ដែលមានមេធាវី២រូប គឺ លោក ឈុត បូរ៉ាវុធ និង លោក គួន សារឿន ជាតំណាងដើមបណ្ដឹង។
កាលពីថ្ងៃទី១៨ខែសីហាឆ្នាំ២០២១ អ្នកស្រី យី សុខវួច បានប្រកាសសាលក្រមបង្គាប់ឱ្យលោក រ៉ុង ឈុន កញ្ញា ស កណិការ និងលោក តុន និមល រួមគ្នាសងសំណងការខូចខាត ចំនួន ៤០០លានរៀល ឬស្មើប្រមាណ ១០ម៉ឺនដុល្លារ ទៅគណៈកម្មាធិការចម្រុះកិច្ចការព្រំដែន ពាក់ព័ន្ធនឹងសេចក្ដីថ្លែងការណ៍អំពីបញ្ហារបស់កសិករខ្មែរ ដែលបានបាត់បង់ដីធ្លីនៅតំបន់ព្រំដែនក្នុងខេត្តត្បូងឃ្មុំ ទៅឱ្យប្រទេសវៀតណាម។
ចំណាត់ការរបស់តុលាការនេះគឺស្របពេលដែល លោក រ៉ុង ឈុន សកម្មក្នុងការងារសង្គមនឹងនយោបាយ ដូចជាការចូលរួមជាមួយថ្នាក់ដឹកនាំគណបក្សកម្លាំងជាតិ ចុះពង្រឹងសកម្មជនគណបក្សនៅតាមមូលដ្ឋាន និងចុះជួបពលរដ្ឋដែលមានបញ្ហាដីធ្លី បញ្ហារបស់កម្មករនិងគ្រូបង្រៀនជាដើម។
ប្រធានអង្គការប្រជាធិបតេយ្យខ្មែរនៅប្រទេសអូស្ត្រាលី (KDO) លោក ស៊ឹង សែនករុណា ប្រាប់វិទ្យុអាស៊ីសេរីថា វិធានការរបស់តុលាការនេះមិនមែនជាការអនុវត្តច្បាប់នោះទេ គឺធ្វើឡើងដោយសារតែលោក រ៉ុង ឈុន ជាមនុស្សលេចធ្លោក្នុងការងារជួយសង្គមជាតិ ដែលជាឆ្អឹងទទឹងករបស់រដ្ឋាភិបាលក្រុងភ្នំពេញ។
បាទវាជាការពិតការធ្វើទុក្ខបុកម្នេញទៅលើសកម្មជននយោបាយ សកម្មជនសង្គមបច្ចុប្បន្នហ្នឹង យើងឃើញហើយតុលាការគឺជាឧបករណ៍ គឺជាអាវុធមួយរបស់គណបក្សកាន់អំណាចបច្ចុប្បន្នឬជាមេដឹកនាំបច្ចុប្បន្នដើម្បីយកមកប្រើប្រាស់ក្នុងការធ្វើទុក្ខបុកម្នេញគំរាមកំហែង បំបាក់ស្មារតីអ្នកដែលហ៊ានបញ្ចេញមតិដើម្បីផលប្រយោជន៍របស់ប្រទេសជាតិហ្នឹងឯងបាទ។
— លោក ស៊ឹង សែនករុណា
កាលពីខែសីហា ឆ្នាំ២០២១ ចៅក្រមសាលាដំបូងរាជធានីភ្នំពេញលោក លិ សុខា បានប្រកាសសាលក្រមផ្ដន្ទាទោសលោក រ៉ុង ឈុន ឱ្យជាប់ពន្ធនាគារ ២ឆ្នាំ និងបង់ប្រាក់ពិន័យចូលរដ្ឋ ២លានរៀលពីបទ «ញុះញង់បង្កឱ្យមានភាពវឹកវរ ធ្ងន់ធ្ងរដល់សន្តិសុខសង្គម» ពាក់ព័ន្ធនឹងបញ្ហាប្រជាពលរដ្ឋ បាត់បង់ដីធ្លីនៅព្រំដែនក្នុងខេត្តត្បូងឃ្មុំ។
ក្រៅពីជាប់ពន្ធនាគារនិងបង់ប្រាក់ពិន័យចូលរដ្ឋហើយ លោកចៅក្រម លិ សុខា ក៏បានបង្គាប់ឱ្យលោក រ៉ុង ឈុន កញ្ញា ស កណិកា និងលោក តុន និមល សងការខូចខាតចំនួន ៤០០លានរៀល ឬស្មើប្រមាណ ១០ម៉ឺនដុល្លារទៅគណៈកម្មាធិការចម្រុះកិច្ចការព្រំដែនថែមទៀត។
កាលពីខែវិច្ឆិកា ឆ្នាំ២០២១ សាលាឧទ្ធរណ៍ភ្នំពេញបានតម្កល់សាលក្រមតុលាការជាន់ទាបមួយនេះ ដោយបន្ថយទោសជាប់ពន្ធនាគារពី ២ឆ្នាំ មកនៅត្រឹមជាង ១៥ខែ ហើយបានដោះលែង លោក រ៉ុង ឈុន ចំណែកឯទោស ដែលនៅសល់ត្រូវព្យួរ។
លើសពីនេះ លោក រ៉ុង ឈុន ក៏កំពុងជាប់បណ្ដឹងនៅតុលាការមួយទៀត ក្រោមបទ «មិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិមលើបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»ដែលប្រព្រឹត្តនៅប្រទេសកម្ពុជា ក្នុងឆ្នាំ២០២៤ ដោយសារសកម្មភាពការងាររបស់លោក។
លោក រ៉ុង ឈុន អះអាងថា បើទោះបីជាតុលាការធ្វើទុក្ខបុកម្នេញមកលើរូបលោកដោយអយុត្តិធម៌បែបនេះក្ដី ក៏លោកនៅតែធ្វើការងារជួយដល់សង្គមជាតិ ពលរដ្ឋ និងការងារនយោបាយទៅមុខទៀតដោយមិនងាករេឡើយ។ អតីតសមាជិកជាន់ខ្ពស់នៃគណៈកម្មការជាតិរៀបចំការបោះឆ្នោត ហៅកាត់ គ.ជ.ប រូបនេះក៏អំពាវនាវឱ្យពលរដ្ឋកុំបាក់ទឹកចិត្តដោយសារតែវិធានការរបស់តុលាការមកលើរូបលោក ហើយត្រូវបន្តការងាររបស់ខ្លួនដើម្បីជួយសង្គមជាតិទៅមុខទៀត៕