បញ្ហាសន្តិសុខនៅក្នុងតំបន់ និងសិទ្ធិមនុស្សនៅតែរឿងសំខាន់ដែលសហរដ្ឋអាមេរិកចង់ដឹងពីកម្ពុជា។ ស្ថានទូតសហរដ្ឋអាមេរិកប្រចាំកម្ពុជា បានឱ្យដឹងកាលពីថ្ងៃទី២៥ ខែមេសាថា មន្ត្រីជាន់ខ្ពស់ព្រឹទ្ធសភាសហរដ្ឋអាមេរិក លោក ផល ហ្គ្រោវ បានជួបជាមួយលោកនាយករដ្ឋមន្ត្រី ហ៊ុន ម៉ាណែត លោក ស៊ុន ចាន់ថុល និងមន្រ្តីរដ្ឋាភិបាលដទៃទៀត ដើម្បីពិភាក្សាអំពីទំនាក់ទំនងទ្វេភាគី ទំនាក់ទំនងសេដ្ឋកិច្ច និងសន្តិសុខតំបន់។ ក្រៅពីជួបជាមួយភាគីរដ្ឋាភិបាល មន្ត្រីជាន់ខ្ពស់ព្រឹទ្ធសភាសហរដ្ឋអាមេរិករូបនេះ ក៏បានជួបជាមួយមន្ត្រីសង្គមស៊ីវិល រួមទាំងអ្នកធ្វើការផ្នែកសុខភាពសាធារណៈផងដែរ។
លោកនាយករដ្ឋមន្ត្រី ហ៊ុន ម៉ាណែត បានសរសេរលើហ្វេសប៊ុករបស់លោកដែរថា ជំនួបនេះ បានពិភាក្សាការងារ ស្តីពីកិច្ចសហប្រតិបត្តិការអនាគតរវាងកម្ពុជា-សហរដ្ឋអាមេរិក។ ថ្មីៗនេះ សហរដ្ឋអាមេរិកបានប្រកាសយកពន្ធលើទំនិញរបស់កម្ពុជាចំនួន ៤៩ភាគរយ និងយកពន្ធលើបន្ទះសូឡារបស់កម្ពុជាជាង៣៥០០ភាគរយ ហើយអាមេរិកតែងតែបង្ហាញកង្វល់ពីវត្តមានយោធាចិននៅកំពង់ផែយោធារាម។
វិទ្យុអាស៊ីសេរី មិនអាចសុំបញ្ជាក់បន្ថែមពីអ្នកនាំពាក្យនាយករដ្ឋមន្ត្រី លោក មាស សោភ័ណ្ឌ បានទេនៅថ្ងៃទី២៥ ខែមេសា។
រីឯប្រធានសមាគមការពារសិទ្ធិមនុស្សអាដហុក (ADHOC) លោក នី សុខា ដែលបានជួបលោក ផល ហ្គ្រោវ បានឱ្យដឹងថា លោក ផល ហ្គ្រោវ បានសួរនាំពាក់ព័ន្ធការផ្ដាច់ជំនួយUSAID និងបញ្ហាមួយចំនួនទៀត។ លោក នី សុខា បានប្រាប់ទៅលោក ផល ហ្គ្រោវ ថា ការផ្ដាច់ជំនួយUSAIDធ្វើឱ្យប៉ះពាល់ធ្ងន់ធ្ងរដល់តួអង្គលើកកម្ពស់សិទ្ធិមនុស្ស ប្រជាធិបតេយ្យនៅកម្ពុជា ខណៈកម្ពុជាកំពុងប្រឈមបញ្ហាសិទ្ធិមនុស្ស និងប្រជាធិបតេយ្យ។ លោកឱ្យដឹងថា សមាគមអាដហុក ព្រួយបារម្ភជាខ្លាំងចំពោះការបិទវិទ្យុអាស៊ីសេរី និងវិទ្យុវីអូអេ។
កាលណាស្ថាប័នយើងមានផលប៉ះពាល់ អ៊ីចឹងអ្នកទទួលផលដែលយើងបានធ្វើរាល់ឆ្នាំ ដូចជាការអប់រំពង្រឹងសិទ្ធិអំណាច ពង្រឹងប្រជាធិបតេយ្យទៅដល់ជនងាយរងគ្រោះនៅតាមមូលដ្ឋាន គឺថាយើងខកខានអត់បានធ្វើដែលមួយឆ្នាំៗយើងធ្វើរាប់ម៉ឺននាក់។
— លោក នី សុខា
លោក នី សុខា បានបញ្ជាក់ថា លោកបានប្រាប់ទៅមន្ត្រីជាន់ខ្ពស់ព្រឹទ្ធសភាអាមេរិកថា វិទ្យុអាស៊ីសេរី វិទ្យុវីអូអេ និងអង្គការសង្គមស៊ីវិល គឺជាតួអង្គសំខាន់ក្នុងការជំរុញឱ្យមានការគោរពសិទ្ធិមនុស្ស និងប្រជាធិបតេយ្យនៅកម្ពុជា។ លោក នី សុខា ឱ្យដឹងទៀតថា លោក ផល ហ្គ្រោវ បានឆ្លើយតបថា លោកគាំទ្រការបង្ហាញកង្វល់នេះ និងសោកស្ដាយ ហើយសន្យាថា លោកនឹងលើកបញ្ហាទាំងនេះទៅប្រាប់ព្រឹទ្ធសភាសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។