ប្រធានអង្គការប្រជាធិបតេយ្យខ្មែរនៅក្នុងប្រទេសអូស្ដ្រាលី (KDO) លោក ស៊ឹង សែនករុណា ប្រាប់អាស៊ីសេរីនៅថ្ងៃទី២៤មីនា ថា ការបញ្ចៀសមិនឱ្យសាច់ញាតិ និងមិត្តិភក្ដិទៅទទួលស្វាគមន៍ចំពោះការមានសេរីភាពឡើងវិញនៃអ្នកទោសនយោបាយ និងបង្កការលំបាកសម្រាប់មន្ត្រីអង្គការសិទ្ធិមនុស្សជាតិនិងអន្តរជាតិ រួមទាំងអ្នកសារព័ត៌មាន មិនបានចុះទៅឃ្លាំមើលនិងទៅយកព័ត៌មានផ្ទាល់នៅមុខពន្ធនាគារ គឺជារូបភាពរឹតត្បិតសេរីភាព។
គេមិនខ្វល់ពីនីតិវិធីអនុវត្តឱ្យត្រឹមត្រូវទេ អ៊ីចឹងហើយបានជាយើងរិះគន់ថា ការធ្វើអំពើមិនត្រឹមត្រូវហ្នឹងហើយ ដែលរបបដឹកនាំនយោបាយបច្ចុប្បន្នហ្នឹង តែងធ្វើអ្វីដោយកំបាំង ក្នុងទីកំបាំង ខ្លាចការពិត ដោយមិនហ៊ានបើកចំហ ឱ្យប្រជាពលរដ្ឋ ឬអ្នកគាំទ្រសេរីភាពសារព័ត៌មាន ឬអ្នកតាមដានបញ្ហាសង្គមនិងនយោបាយ អាចទទួលបាននូវការផ្ដល់ព័ត៌មានពីសកម្មជននយោបាយ និងសកម្មជនសង្គមដែលកំពុងរងទុក្ខទោស គាបសង្កាត់ និងការឃុំខ្លួន។
— លោក ស៊ឹង សែនករុណា
ការលើកឡើងនេះ បន្ទាប់ពីមន្ត្រីគណបក្សភ្លើងទៀនចំនួន៣រូប ត្រូវបានដោះលែងឱ្យមានសេរីភាពឡើងវិញ ក្រោយអនុវត្តទោសគ្រប់រយៈពេល២ឆ្នាំតាមកាលកំណត់ ប៉ុន្តែការដោះលែងនោះ ត្រូវបានគេមើលឃើញថា ធ្វើឡើងខុសប្រក្រតីនៃនីតិវិធីរដ្ឋបាល។
វិទ្យុអាស៊ីសេរីមិនអាចសុំការបំភ្លឺពីអ្នកនាំពាក្យអគ្គនាយកដ្ឋានពន្ធនាគារលោក ឃៀង សុណាឌីន បានទេនៅថ្ងៃទី២៤ មីនា ដោយសារទូរស័ព្ទហៅចូលច្រើនដងគ្មានអ្នកទទួល។
មន្ត្រីបក្សប្រឆាំងទាំង៣រូបនោះ រួមមានប្រធានចលនាយុវជនគណបក្សភ្លើងទៀនលោក ខឿន វីរ៉ាត់ និងអនុប្រធានចលនាស្ដ្រីគណបក្សភ្លើងទៀនអ្នកស្រី នូ សិទ្ធារី ត្រូវបានមន្ត្រីពន្ធនាគារព្រៃសដោះលែងនៅកណ្ដាលយប់ម៉ោង១អធ្រាត្យថ្ងៃទី២៤មីនា ខណៈប្រធានប្រតិបត្តិគណបក្សភ្លើងទៀនខេត្តកំពង់ចាមលោក តូច ថឹង ក៏ត្រូវបានដោះលែងពីពន្ធនាគារខេត្តពោធិ៍សាត់ក្នុងថ្ងៃជាមួយគ្នា ប៉ុន្តែលោកត្រូវដោះលែងនៅពេលព្រឹក ខុសកាលកំណត់ដែលត្រូវដោះលែងនៅម៉ោង២រសៀល។
លោក ខឿន វីរ៉ាត់ លើកឡើងថា លោកត្រូវបានមន្ត្រីពន្ធនាគារដោះលែងនិងដឹកទៅដល់ផ្ទះនៅកណ្ដាលយប់ជ្រៅ។ លោក ខឿន វីរ៉ាត់ លើកឡើងបែបនេះ នៅពេលលោកទៅស្រោចទឹកនៅវត្តធម្មត្រ័យ ហៅវត្តព្រៃស ដោយមានក្រុមថ្នាក់ដឹកនាំនិងសកម្មជនគណបក្សកម្លាំងជាតិទៅជាមួយ នៅរសៀលថ្ងៃទី២៤មីនា។
អរគុណពន្ធនាគារ ដែលយកចិត្តទុកដាក់ខ្ពស់ ដែលដោះលែងខ្ញុំនៅម៉ោង១យប់រំលងអធ្រាត្យ យប់ថ្ងៃទី២៤។ គាត់ធ្វើការបានល្អ។
— លោក ខឿន វីរ៉ាត់
សាលាដំបូងរាជធានីភ្នំពេញ ប្រកាសសាលក្រមផ្តន្ទាទោសលោក ខឿន វីរ៉ាត់ លោក តូច ថឹង និងអ្នកស្រី នូ សិទ្ធារី ឱ្យជាប់ពន្ធនាគាររយៈពេល២ឆ្នាំកាលពីចុងខែមីនាឆ្នាំ២០២៣ ពីបទប្រើប្រាស់លិខិតក្លែងតាមបណ្ដឹងក្រសួងមហាផ្ទៃ ពាក់ព័ទ្ធនឹងការសុំបង្កើតគណបក្សបេះដូងជាតិកាលពីឆ្នាំ២០២១។
លោក ខឿន វីរ៉ាត បានប្រកាសរក្សាជំហរដដែលដើម្បីស្ដារលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។ លោកបន្តថា នឹងពិចារណាចូលរួមជាមួយគណបក្សកម្លាំងជាតិ ដែលលោកចាត់ទុកថា ជាគណបក្សមានជំហរច្បាស់លាស់ កើតចេញពីអ្នកប្រជាធិបតេយ្យពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។