សេចក្ដីអំពាវនាវរបស់ក្រុមប្រឹក្សាជាតិតស៊ូ នៅថ្ងៃទី០៩ មេសា លើកឡើងថា ការប្រឈមវិបត្តិសេដ្ឋកិច្ចរបស់កម្ពុជានៅពេលនេះ មិនមែនជាកំហុសរបស់ពលរដ្ឋឡើយ តែដោយសារការដំឡើងពន្ធរបស់សហរដ្ឋអាមេរិកមួយផ្នែក និងមកពីការដឹកនាំផ្ដាច់ការពុករលួយនៃរដ្ឋាភិបាលត្រកូល «ហ៊ុន» ។
អ្នកនាំពាក្យក្រុមប្រឹក្សាជាតិតស៊ូ លោក គឹម សុខ ប្រាប់អាស៊ីសេរីនៅថ្ងៃទី១០មេសា ថា កម្ពុជាមានសង្ឃឹមតិច ក្នុងការចរចាទទួលបានជោគជ័យ ដើម្បីសុំឱ្យសហរដ្ឋអាមេរិកបន្ធូរបន្ថយពន្ធ ដោយសារមានការរកឃើញថា ទំនិញកម្ពុជានាំចេញទៅសហរដ្ឋអាមេរិក ភាគច្រើនផលិតនៅប្រទេសចិន ហើយបន្លំដាក់ស្លាកសម្គាល់ជាទំនិញកម្ពុជា និងដោយសារកម្ពុជាដឹកនាំបែបផ្ដាច់ការ និងលម្អៀងទៅប្រទេសចិនកុម្មុយនិស្ដ។
ការចរចាទ្វេភាគី រវាងអាមេរិកនិងកម្ពុជា កម្ពុជាក៏នៅតែមានសង្ឃឹមតិច ក្នុងការបានបន្ធូរបន្ថយពន្ធពីសហរដ្ឋអាមេរិក ប្រសិនបើរដ្ឋាភិបាលកម្ពុជាក្រុមគ្រួសារ ហ៊ុន មិនធ្វើរឿង៣ដើម្បីលួងចិត្តសហរដ្ឋអាមេរិកទេ។ ទី១ ស្ដារប្រជាធិបតេយ្យ ទី២ កម្ចាត់ពួកម៉ាហ្វៀ ហើយនិងទី៣ ធ្វើអព្យាក្រឹតយោធាជាមួយបណ្ដារដ្ឋបរទេស ជាពិសេស ការជម្រះការសង្ស័យលើមូលដ្ឋានទ័ពជើងទឹករាម ដែលសហរដ្ឋអាមេរិកចោទប្រកាន់ពាក់ព័ន្ធនឹងចិន។
— លោក គឹម សុខ
ការលើកឡើងនេះ ធ្វើឡើងបន្ទាប់ពីរដ្ឋាភិបាលសហរដ្ឋអាមេរិកប្រកាសផ្អាកការអនុវត្តពន្ធ៤៩% ក្នុងរយៈពេល៩០ថ្ងៃ ហើយអាមេរិកគិតពន្ធត្រឹមតែ១០% ជាបណ្ដោះអាសន្ន លើទំនិញនាំចូលពីកម្ពុជា និងបណ្ដាប្រទេសមួយចំនូនទៀត លើកលែងតែប្រទេសចិន ដែលសហរដ្ឋអាមេរិកសម្រេចយកពន្ធ១២៥%។
លោកនាយករដ្ឋមន្ត្រី ហ៊ុន ម៉ាណែត បានចេញសេចក្ដីសម្រេចនៅថ្ងៃទី១០មេសា បង្កើតក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក។ លោក ហ៊ុន ម៉ាណែត បានចាត់តាំងលោកឧបនាយករដ្ឋមន្ត្រី ស៊ុន ចាន់ថុល ជាប្រធាន រដ្ឋមន្ត្រីក្រសួងពាណិជ្ជកម្ម អ្នកស្រី ចម និម្មល ជាអនុប្រធាន និងសមាជិក៧នាក់ផ្សេងទៀត។ ក្រុមការងារនេះ មានភារកិច្ចសម្របសម្រួល ចរចា និងជំរុញទំនាក់ទំនងពាណិជ្ជកម្មទ្វេភាគីកម្ពុជា-សហរដ្ឋអាមេរិក និងជំរុញការវិនិយោគរបស់សហរដ្ឋអាមេរិកនៅកម្ពុជា សិក្សាវាយតម្លៃ លើកយោបល់ និងធ្វើរបាយការណ៍នៃលទ្ធផលការងារជូននាយករដ្ឋមន្ត្រី។
ជុំវិញបញ្ហានេះ វិទ្យុអាស៊ីសេរី មិនអាចទាក់ទងសុំការបំភ្លឺបន្ថែមពីអ្នកនាំពាក្យក្រសួងសេដ្ឋកិច្ច និងហិរញ្ញវត្ថុលោក មាស សុខសេនសាន និងអ្នកនាំពាក្យគណបក្សប្រជាជនកម្ពុជាលោក សុខ ឥសាន បានទេនៅថ្ងៃទី១០មេសា។ ប៉ុន្តែលោក ហ៊ុន ម៉ាណែត ធ្លាប់អះអាងថា ការដំឡើងពន្ធពីសហរដ្ឋអាមេរិកលើទំនិញកម្ពុជា អាចបង្កផលប៉ះពាល់ដល់កម្ពុជា។
អ្នកជំនាញការបរទេសជំរុញទៅរដ្ឋាភិបាល លោក ហ៊ុន ម៉ាណែត យករយៈពេល៣ខែនេះ កែលម្អការគោរពសិទ្ធិមនុស្ស និងប្រជាធិបតេយ្យ ដែលជាបញ្ហាសហរដ្ឋអាមេរិកតែងតែលើកឡើង ដើម្បីយកទៅចរចាសុំអាមេរិកបន្ធូរបន្ថយពន្ធ៤៩% វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។