តើមានមូលហេតុអ្វីបានជាស្ត្រីខ្លះមានរដូវមិនទៀងទាត់ ហើយតើអាចមានបញ្ហាអ្វីខ្លះដល់សុខភាពដែរឬទេ?
ជាធម្មតាក្មេងស្រីដែលគ្រប់ការមករដូវ ឬមកខែជាលើកដំបូង គឺនៅអាយុចន្លោះពី ១២ ទៅ ១៣ឆ្នាំ។ ប៉ុន្តែមានក្មេងស្រីខ្លះគ្រប់ការមករដូវមានវ័យក្មេងមែនទែន ដែលខ្លះទើបតែមានអាយុបាន ៩ ឬ ១០ឆ្នាំក៏មាន ហើយនៅជាមួយគ្នានេះក៏មានក្មេងស្រីខ្លះមករដូវយឺតរហូតដល់អាយុ ១៥ ឬ ១៦ឆ្នាំ។
តើអ្វីទៅដែលហៅថារដូវ ហេតុអ្វីបានជាស្រ្តីមានរដូវ ? ចំពោះសំណួរនេះ លោកស្រីវេជ្ជបណ្ឌិត វង ដាវី ប្រធានគ្លីនិកសមាគមថែទាំសុខភាពគ្រួសារកម្ពុជា ហៅកាត់ថា រ៉ាក់ (RHAC) បានមានប្រសាសន៍ពន្យល់ថា ៖ «រដូវគឺជាការរបេះធ្លាក់នៃស្រទាប់ភ្នាសស្តើងនៅក្នុងតួស្បូន ដែលកើតឡើងដោយសារតែអកម៉ូនស្ត្រី ហើយដែលអកម៉ូននេះមានពីរ គឺ អេស្ត្រូហ្សេន និង ប្រូហ្សេតេរ៉ូន។ ការរបេះធ្លាក់នេះបង្កបានជាការហូរឈាមយឺតៗចេញពីតួស្បួនតាមទ្វារមាសជារៀងរាល់ខែ ជាទូទៅការហូរឈាមនេះមានរយៈពេលពី ៣ ទៅ ៥ថ្ងៃជាធម្មតា»។
ឯកសារក្នុងទំព័រវ៉ឹបសាយថ៍ womenhealth.comបានឲ្យដឹងថា ប្រសិនបើក្មេងស្រីដែលមានអាយុ ១៦ឆ្នាំ ហើយមិនឃើញមានធ្លាក់ឈាមរដូវទេនោះ មាតាបិតា ឬអ្នកអាណាព្យាបាលត្រូវតែយកកុមារីនោះទៅជួបពិគ្រោះជាមួយគ្រូពេទ្យ ដើម្បីពិនិត្យរកមូលហេតុច្បាស់លាស់។ អត្ថបទក្នុងទំព័រវ៉ឹបសាយថ៍ដដែលបន្តថា ជាទូទៅគេអាចចំណាំបានថា ក្មេងស្រីដែលចាប់ផ្តើមឡើងសុដន់ ឬ ដោះ និងមានដុះរោមនៅប្រដាប់ភេទ និងនៅក្រោមក្លៀក ក្មេងស្រីនោះនឹងមានរដូវដំបូងប្រមាណជា ២ឆ្នាំក្រោយមក។
ការមករដូវប្រចាំខែរបស់ស្ត្រីនេះ គឺមានការប្រែប្រួលពីម្នាក់ទៅម្នាក់ ខ្លះមកច្រើនខ្លះមកតិច និងខ្លះមកយូរថ្ងៃ ឬមករយៈពេលខ្លី។
លោកស្រីវេជ្ជបណ្ឌិត វង ដាវី បានពន្យល់អំពីវគ្គរដូវ និងមូលហេតុនៃការមករដូវមិនទៀងទាត់ ៖ «វគ្គរដូវធម្មតា គឺ ២៨ថ្ងៃ ប៉ុន្តែមានស្រ្តីខ្លះអាចប្រែប្រួលពី ២៤ថ្ងៃ ទៅ ៣៧ថ្ងៃ គឺជាការធម្មតាដែរ ដែលជួនកាលស្រ្តីហ្នឹងអាចប្រែប្រួលទៅតាមអាយុ អារម្មណ៍ និងផ្លូវចិត្ត។ ហើយចំពោះរដូវមិនទៀងទាត់ គឺក្នុងករណីស្ត្រីរដូវតិចជាង ២១ថ្ងៃ ឬលើសពី ៣៧ថ្ងៃឡើងទៅ យើងចាត់ទុកថាមិនធម្មតា។ ហើយក្នុងករណីហ្នឹងឯង គឺថាសុំឲ្យស្រ្តីយើងទាំងអស់គ្នាត្រូវមកជួបពិគ្រោះជាមួយគ្រូពេទ្យ»។
លោកស្រីវេជ្ជបណ្ឌិត វង ដាវី បានថ្លែងផ្តល់យោបល់ថា នៅពេលមករដូវម្តងៗ ស្ត្រីត្រូវកត់ចំណាំថ្ងៃខែ និងតាមដានពិនិត្យមើលសភាពនៃការធ្លាក់ឈាម ហើយបើឃើញមានសញ្ញាណាមួយមិនធម្មតា ស្ត្រីត្រូវទៅជួបពិគ្រោះជាមួយវេជ្ជបណ្ឌិតជំនាញខាងរោគស្ត្រីជាបន្ទាន់។
ឯកសារក្នុងទំព័រវ៉ឹបសាយថ៍ womenhealth.com ដដែលបន្តថា ស្ត្រីពេញវ័យមានវគ្គរដូវនៅចន្លោះពី ២១ ទៅ ៣៥ថ្ងៃ ប៉ុន្តែចំពោះក្មេងស្រីជំទង់វិញ វគ្គរដូវគឺក្នុងចន្លោះពី ២១ថ្ងៃ ទៅ ៤៥ថ្ងៃ។
លោកស្រីវេជ្ជបណ្ឌិត វង ដាវី បានមានប្រសាសន៍បញ្ជាក់ផងដែរ ក្នុងលក្ខណៈដែលស្ត្រីមានរដូវពុំទៀងទាត់ គឺរដូវមកតិចជាង ២១ថ្ងៃ ឬលើសពី ៣៧ថ្ងៃឡើងទៅ ស្ត្រីនោះត្រូវតែមកពិគ្រោះជាមួយវេជ្ជបណ្ឌិតជំនាញ។
លោកស្រីវេជ្ជបណ្ឌិត វង ដាវី មានប្រសាសន៍បញ្ជាក់ដូច្នេះ ៖ «យើងតាមដានមើលទៀត តើធ្លាក់មកពីក្នុងស្បូន ឬពីកន្លែងណាផ្សេងទៀត យើងត្រូវគិត ក្រែងលោមិនមែនជារដូវ យើងគិតទៅជំងឺមហារីក ដុំពកនៅមាត់ស្បូន ឬមានស្នាមរបួសនៅទ្វារមាសដោយការប៉ះទង្គិច ឬមានឫសដូងបាត។ មួយទៀត បើសិនការធ្លាក់ឈាមហ្នឹងមកពីស្បូនវិញ ហើយយើងត្រូវមើលទៀត ប្រសិនបើមានការខ្ជាក់មេជីវិតញី ដែលភាគច្រើនជាវិបត្តិសរីរាង្គនោះ អាចមានដុះដុំក្នុងស្បូន ឬក៏យើងមានសល់កម្ទេចកម្ទីអី ក្រោយពីរលូតកូន ឬក្រោយសម្រាលកូនហើយធ្លាក់សុកមិនអស់ ឬក៏យើងមានរលាកស្បូនរ៉ាំរ៉ៃ មហារីកស្បូន ដុំស្បូន ឬក៏កូនក្រៅស្បូន។ ប៉ុន្តែជួនកាលក៏អាចមានវិបត្តិអកម៉ូនដែរ»។
ចំពោះស្ត្រីស្ថិតក្នុងវ័យបន្តពូជ ប្រសិនបើមានការធ្លាក់ឈាមរដូវមិនទៀងទាត់ លោកស្រីវេជ្ជបណ្ឌិត វង ដាវី បានមានប្រសាសន៍រៀបរាប់អំពីមូលហេតុជាច្រើនទៀត ដែលអាចបណ្តាលឲ្យមានការធ្លាក់ឈាម ៖ «ជួនកាលទៀតស្រ្តីហ្នឹងឯងមានការតានតឹងក្នុងផ្លូវចិត្តខ្លាំងពេក ឬក៏ឡើងទម្ងន់ ស្រកទម្ងន់ ជួនកាលមានជំងឺពកក ឬក៏មានផ្ទៃពោះ ឬក៏មានដុំកន្សោមពង ហ្នឹងចំពោះស្រ្តីនៅក្នុងវ័យបន្តពូជ។ ជួនកាលទៀតអាចស្រ្តីហ្នឹងមានជំងឺឈាម... ជាកត្តាមួយឲ្យយើងមានដែរ»។
ក្នុងលក្ខណៈស្ត្រីស្ថិតក្នុងវ័យជិតអស់រដូវវិញ លោកស្រីវេជ្ជបណ្ឌិត វង ដាវី ក៏បានឲ្យដឹងផងដែរអំពីហេតុផលមួយចំនួនយ៉ាងដូច្នេះ ៖ «បើសិនជាស្ត្រីជិតអស់រដូវ ឬលែងមានរដូវតែម្ដង បើសិនជាមានធ្លាក់ឈាម ហ្នឹងយើងអត់គិតទៅរឿងរដូវទេ ព្រោះយើងអស់រដូវហើយ អ៊ីចឹងយើងត្រូវគិតជាជំងឺវិញ។ ស្រ្តីដែលអស់រដូវច្រើនតែមានមហារីកស្រទាប់ស្តើងរបស់ស្បូននៅផ្នែកខាងក្នុងស្បូន ជួនកាលមានមហារីកមាត់ស្បូន ជួនកាលមានរលាកមាត់ស្បូន ជួនកាលមានដុះដុំសាច់ក្នុងមាត់ស្បូនក៏មានដែរ»។
អត្ថបទក្នុងទំព័រវ៉ឹបសាយថ៍ womenhealth.com បន្តថា នៅពេលចាប់ផ្តើមមានរដូវហើយ ស្ត្រីនឹងបន្តមានរហូតដល់ស្ត្រីនោះអស់រដូវតែម្តង ដែលមានអាយុចន្លោះពី ៤៥ឆ្នាំ ដល់ ៥៥ឆ្នាំ ដែលភាសាអង់គ្លេស ហៅថា Menopause ឬលើកលែងតែស្ត្រីនោះមានផ្ទៃពោះ ដែលត្រូវបាត់រដូវមួយរយៈ ក៏ប៉ុន្តែក្រោយសម្រាលកូនរួចហើយ ស្ត្រីនឹងបន្តការមានរដូវជាធម្មតាឡើងវិញ។
ហើយចំពោះក្មេងស្រីដែលចាប់ផ្តើមមានរដូវ ឯកសារដដែលឲ្យដឹងថា ច្រើនតែមកមិនទៀងទាត់ ក្នុងអំឡុង២ ឬ ៣ឆ្នាំដំបូង ហើយថាកុំឲ្យមានការព្រួយបារម្ភឲ្យសោះ ពីព្រោះរូបរាងកាយរបស់កុមារីនោះ មានការផ្លាស់ប្តូរនិងប្រែប្រួល ទាំងរូបកាយនិងផ្លូវចិត្ត ខណៈដែលកំពុងធំពេញវ័យ៕