ពលរដ្ឋ និងសង្គមស៊ីវិលខកចិត្តដែលក្រសួងយុត្តិធម៌អំពាវឱ្យពលរដ្ឋបញ្ឈប់បង្ហោះរឿងអយុត្តិធម៌នៅលើបណ្ដាញសង្គម និងងាកមកដាក់ពាក្យបណ្ដឹងទៅកាន់ក្រសួងផ្ទាល់វិញ។ ពួកគាត់ថា កន្លងមកការដាក់ញត្តិ និងការស្នើសុំដំណោះស្រាយពីក្រសួងស្ថាប័នរដ្ឋគឺកម្រទទួលបានយុត្តិធម៌។
ការឆ្លើយតបរបស់ពលរដ្ឋ និងសង្គមស៊ីវិលធ្វើឡើងក្រោយ រដ្ឋលេខាធិការ និងជាអ្នកនាំពាក្យក្រសួងយុត្តិធម៌លោក សេង ឌីណា លើកឡើងនៅក្នុងសន្និសីទសារព័ត៌មានស្ដីពីលទ្ធផលសន្និបាតបូកសរុបលទ្ធផលការងារវិស័យយុត្តិធម៌ឆ្នាំមុន កាលពីថ្ងៃទី១៥ ខែមីនា ដោយអំពាវនាវឱ្យពលរដ្ឋដាក់បណ្ដឹងតាមលេខទូរស័ព្ទ ឬទៅក្រសួងផ្ទាល់ដើម្បីរាយការណ៍ពីករណីអយុត្តិធម៌ ជាជាងការបង្ហោះសារលើបណ្ដាញសង្គម។
ក្រសួងថា រាយការណ៍មកក្រសួងយុត្តិធម៌ដើម្បីឆាប់បានដោះស្រាយ
លោក សេង ឌីណា ថា កន្លងមកពលរដ្ឋជាច្រើនតែងរិះគន់ និងលើកឡើងនៅលើបណ្ដាញសង្គមហ្វេសប៊ុកថា ប្រព័ន្ធតុលាការមិនមានភាពអយុត្តិធម៌ ទើបក្រសួងបានបង្កើតយុទ្ធនាការជំរុញ និងពន្លឿនការដោះស្រាយរឿងក្ដីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការដោយដាក់លេខទូរស័ព្ទឱ្យពលរដ្ឋរាយការណ៍។ លោកថា ការរាយការណ៍មកក្រសួងយុត្តិធម៌ផ្ទាល់គឺឆាប់បានទទួលយុត្តិធម៌ជាងការលើកឡើងនៅតាមបណ្ដាញសង្គម។
លោក សេង ឌីណា៖ «ចង់លើកទឹកចិត្តឱ្យមានការដាក់បណ្ដឹងមកតាមយន្តការផ្លូវការវាងាយស្រួលជាងការដាក់នៅតាមហ្វេសប៊ុកៗ យើងដឹងថា ដល់មិនដល់ពេលណា បើសិនជាអាចមកដល់ក្រុមការងារក៏ចេះតែយកមកពិនិត្យមើលទៅ ក៏ប៉ុន្តែបណ្ដឹងដែលដាក់មកយុទ្ធនាការហើយគឺយើងមានចុះលេខបណ្ដឹងចុះអីត្រឹមត្រូវ ហើយយើងមានការតាមដាន»។
ទោះយ៉ាងណា ពលរដ្ឋនៅរាជធានីភ្នំពេញ កញ្ញា ខែម ស្រីមុំ លើកឡើងថាមូលហេតុដែលយុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការរបស់ក្រសួងយុត្តិធម៌មិនមានប្រសិទ្ធភាព ហើយពលរដ្ឋនៅតែបន្តលើកឡើងពីបញ្ហារបស់ពួកគាត់នៅលើបណ្ដាញសង្គមដដែលៗនោះគឺដោយសារតែប្រព័ន្ធតុលាការនៅតែបម្រើឱ្យអ្នកមានលុយមានអំណាច និងបក្ខពួករបស់ពួកគេប៉ុណ្ណោះ។
ពលរដ្ឋថា បើមិនដូរមន្ត្រីតុលាការនឹងគ្មានយុត្តិធម៌ទេ
កញ្ញា ខែម ស្រីមុំ ថាប្រព័ន្ធតុលាការនឹងមានភាពឯករាជ្យ និងអាចរកយុត្តិធម៌ជូនពលរដ្ឋបាន លុះត្រាតែមានការផ្លាស់ប្ដូរមន្ត្រីតុលាការឡើងវិញ ហើយពួកគេមិនមែនជាសមាជិកគណបក្សនយោបាយណាមួយដូចបច្ចុប្បន្ន។
កញ្ញា ខែម ស្រីមុំ៖ «អ៊ីចឹងពលរដ្ឋអស់ជំនឿហើយ អារឿងពាក់ព័ន្ធទាក់ទងទៅក្រសួងយុត្តិធម៌ក្រុមការងារក្រសួង មានលេខមានអីខលទៅក្រសួងហ្នឹង វាអត់មានប្រសិទ្ធភាពទេ អ៊ីចឹងមិនបាច់ដង្ហោយឱ្យពលរដ្ឋទៅទាក់ទង ប្រសិនបើមានប្រសិទ្ធភាព ពលរដ្ឋមិនបាច់បង្ហោះលើបណ្ដាញសង្គមយំស្រែកពេញបណ្ដាញសង្គមទេ ដោយសារវាអត់ប្រសិទ្ធភាពហ្នឹងហើយបានបានពលរដ្ឋយំស្រែកបង្ហោះតាមបណ្ដាញសង្គមហ្នឹងហើយ»។
តំណាងសហគមន៍ដែលមានជម្លោះដីធ្លីនៅខេត្តកោះកុង លោកស្រី ដេត ហួរ ចាត់ទុកការលើកឡើងរបស់មន្ត្រីជាន់ខ្ពស់របស់ក្រសួងយុត្តិធម៌នេះមិនឆ្លុះបញ្ចាំងពីការពិតនោះទេ។ លោកស្រីថា ជាក់ស្ដែងប្រជាសហគមន៍បានប្រើយន្តការទាមទារយុត្តិធម៌តាមរយៈការដាក់ញត្តិ ការប្ដឹងទៅតុលាការ និងស្នើសុំដំណោះស្រាយពីក្រសួងយុត្តិធម៌ជាច្រើនដង ប៉ុន្តែប្រជាសហគមន៍បែរជាត្រូវបានអាជ្ញាធរចាប់ខ្លួន និងផ្ដន្ទាទោសដាក់ពន្ធនាគារដោយសារពួកគាត់ឡើងទៅដាក់ញត្តិនៅក្រសួងទៅវិញ។
លោកស្រី ដេត ហួរ៖ «ពួកខ្ញុំទៅគ្នាច្រើនចោទថាពួកខ្ញុំញុះញង់ ពួកខ្ញុំបង្កភាពវឹកវរដល់សន្តិសុខសង្គម តែពេលដែលពួកខ្ញុំទៅគ្នាតិច បែរជាខ្លួនដាក់ពន្ធនាគារ ហ្នឹងមានការខកចិត្តខ្លាំងមែនទែន គឺអស់ជំនឿតែម្ដង ព្រោះខ្ញុំឮថាក្រសួងយុត្តិធម៌គាត់តែងធ្វើការអន្តរាគមន៍ គាត់តែងតែប្រកាសឱ្យពួកយើងទៅដាក់ ឬឱ្យពួកយើងទាក់ទង ប៉ុន្តែខ្ញុំមិនអាចទាក់ទងបានដោយសារគេទប់ស្កាត់ចាប់ខ្លួន»។
ពាក់ព័ន្ធនឹងការលើកឡើងពីអយុត្តិធម៌លើបណ្ដាញសង្គមនេះដែរ អតីតឧកញ៉ា លោក ហេង សិទ្ធី ត្រូវបានអាជ្ញាធររុស្ស៊ីសហការជាមួយមន្ត្រីស្ថានទូតខ្មែរ ឃាត់ខ្លួននៅព្រំដែនប្រទេសរុស្ស៊ី (Russia) កាលពីខែមករា ក្រោយពីអតីតឧកញ៉ារូបនេះបានទម្លាយរឿងរ៉ាវអាស្រូវជាបន្តបន្ទាប់ទាក់ទងនឹងរដ្ឋមន្ត្រីក្រសួងមហាផ្ទៃ លោក ស សុខា រដ្ឋមន្ត្រីក្រសួងយុត្តិធម៌ លោក កើត រិទ្ធិ ជាដើមថា ពួកគេបានប្រព្រឹត្តអំពីពុករលួយ និងដើរតួនាទីយ៉ាងសំខាន់ក្នុងការការពារក្រុមឧក្រិដ្ឋជននៅកម្ពុជា។ លោក ហេង សិទ្ធី ក៏បានទម្លាយបណ្ដឹងប្រឆាំងក្មួយបង្កើត លោក ហ៊ុន សែន និងត្រូវជាបងប្អូនជីដូនមួយ នាយករដ្ឋមន្ត្រី ហ៊ុន ម៉ាណែត គឺលោក ហ៊ុន តូ ថា បានបោកលុយលោក និងអ្នកជំនួញចិនអស់រាប់រយលានដុល្លារ។
អត្ថបទដែលទាក់ទង៖
ពលរដ្ឋនៅតំបន់អន្ទង់អាំងថា មន្ត្រីលោក ហ៊ុន ម៉ាណែត គំរាមពួកគាត់មិនឲ្យផ្សព្វផ្សាយបញ្ហាដីធ្លី
សម្ភាសន៍ពលរដ្ឋរងគ្រោះពីជម្លោះដីធ្លីនៅក្បែរតំបន់អន្ទង់អាំងនៃខេត្តពោធិ៍សាត់
វិទ្យុអាស៊ីសេរីមិនអាចសុំការអត្ថាធិប្បាយបញ្ហានេះពីអ្នកនាំពាក្យក្រសួងយុត្តិធម៌ លោក សេង ឌីណា និងអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេ នៅថ្ងៃទី១៦ ខែមីនា។
រីឯមន្ត្រីជាន់ខ្ពស់នៃសមាគមការពារសិទ្ធិមនុស្ស អាដហុក លោក យី សុខសាន្ត មានប្រសាសន៍ថា រដ្ឋាភិបាលគួរតែធានាថា ពលរដ្ឋគ្រប់រូបអាចលើកឡើងពីបញ្ហារបស់ពួកគាត់ដោយសេរី និងតាមគ្រប់មធ្យោបាយទៅកាន់មន្ត្រីពាក់ព័ន្ធ។ លោកថារដ្ឋាភិបាលគួរដល់ពេលកែទម្រង់ប្រព័ន្ធតុលាការ និងក្រសួងយុត្តិធម៌ឱ្យបានឆាប់រហ័ស ព្រោះថា បច្ចុប្បន្នពលរដ្ឋរងគ្រោះជាច្រើននៅតែមិនអាចទទួលបានយុត្តិធម៌នៅឡើយទេ។
លោក យី សុខសាន្ត៖ «យើងមើលឃើញកន្លងមកប្រព័ន្ធយុត្តិធម៌គឺហាក់នៅមិនទាន់ឯករាជ្យចេញពីអ្នកនយោបាយ គឺដោយសារតែវានៅឡូកឡំគ្នាហ្នឹងឯង ដោយសារតែមន្ត្រីមួយចំនួនគឺជាសមាជិកបក្សនយោបាយ អ៊ីចឹងហើយបានជាការកាត់ក្ដី វាមានការលំអៀងទៅលើគ្នាឯង គ្នាអញ ចំណុចហ្នឹងហើយបានជាមិនអាចរកយុត្តិធម៌បាន»។
ទាក់ទងនឹងបញ្ហាយុត្តិធម៌នៅកម្ពុជានេះ គម្រោងយុត្តិធម៌ពិភពលោក (WJP) ដែលជាបណ្ដុំអង្គការអន្តរជាតិបានដាក់ចំណាត់ថ្នាក់កម្ពុជាថាជាប្រទេសអន់ថយផ្នែកនីតិរដ្ឋ និងការធានាយុត្តិធម៌សម្រាប់ពលរដ្ឋ ដោយបានចំណាត់ថ្នាក់កម្ពុជាស្ទើរចុងប៉ូចក្នុងចំណោម ១៤០ប្រទេស នៅប៉ុន្មានឆ្នាំចុងក្រោយនេះ៕