តំណាងពលរដ្ឋនៅឃុំកំពង់ល្ពៅ ថ្លែងសុំមិនបញ្ចេញឈ្មោះថា ដីរបស់គ្រួសារលោកស្រីចំនួន៦ហិកតារបានកាន់កាប់តាំងពីឆ្នាំ១៩៩៦ ហើយបានដាំដំឡូងមីនៅលើដីនោះរហូតមក។ ពលរដ្ឋរូបនេះបញ្ជាក់ថា គ្រួសារគាត់រួមទាំងពលរដ្ឋដទៃទៀតត្រូវការដីនោះដើម្បីដាំដុះរកប្រាក់ចំណូលដោះស្រាយជីវភាព ព្រោះពួកគាត់គ្មានដីផ្សេងក្រៅពីតំបន់នោះឡើយ។
សួរថាឱ្យនាងខ្ញុំទៅរស់នៅណាបើខ្ញុំរស់នៅហ្នឹងកើតនៅហ្នឹង រត់ហើយមកវិញនៅហ្នឹង ហើយឥឡូវម៉ែឪចែកឱ្យនៅ មានប្ដីមានប្រពន្ធហើយក៏នៅហ្នឹង។ បើសិនជាយកដីពួកប្រជាពលរដ្ឋខ្ញុំដែលមានទុក្ខជាង១០០គ្រួសារហ្នឹង សួរថាឱ្យខ្ញុំនៅឯណា? បើកើតនៅអីហ្នឹងហើយមិនដឹងជាផ្លាស់ទីលំនៅទៅណា។ បើសិនជាយកទៅទៀត ពួកខ្ញុំរំពឹងអីរាល់ថ្ងៃហ្នឹង សូមឱ្យជួយរកយុត្តិធម៌ឱ្យនាងខ្ញុំផង។
— តំណាងពលរដ្ឋ
បច្ចុប្បន្នពលរដ្ឋនៅឃុំកំពង់ល្ពៅ បានដាំដុះនៅលើដីដែលមានបញ្ហានោះដោយការភ័យខ្លាច និងស្នើឱ្យអាជ្ញាធរថ្នាក់ជាតិអន្តរាគមន៍ជួយដល់ពួកគាត់ជាបន្ទាន់ ព្រោះពួកគាត់ក្រីក្រគ្មានការងារធ្វើក្រៅពីការដាំដុះនោះទេ។
ក្ដីបារម្ភរបស់ពលរដ្ឋនេះ ធ្វើឡើងបន្ទាប់ពីអាជ្ញាធរស្រុកសំឡូត បានចេញលិខិតបង្ខំឱ្យពួកគាត់រុះរើផ្ទះនិងរោងស្នាក់នៅ ហើយចាកចេញពីដីនោះ យ៉ាងយូរត្រឹមថ្ងៃទី១៩ខែមករាឆ្នាំ២០២៥ជាកំហិត ក្រោមហេតុថា ពួកគាត់រស់នៅលើដីនោះដោយខុសច្បាប់។ ក្នុងលិខិតដែលចុះហត្ថលេខាដោយអភិបាលរងស្រុកសំឡូតលោក សោម មុនី បានគំរាមពលរដ្ឋថា ប្រសិនបើពួកគាត់មិនរុះរើឬចាកចេញពីដីទេនោះ អាជ្ញាធរនឹងចុះរុះរើដោយខ្លួនឯង ហើយចាត់វិធានការតាមច្បាប់ដោយមិនលើកលែងឡើយ។
ទាក់ទងនឹងបញ្ហានេះនាយករដ្ឋបាលស្រុកសំឡូតលោក ប្រាជ្ញ សុវណ្ណមុនី ប្រាប់វិទ្យុអាស៊ីសេរីយ៉ាងខ្លីថា អាជ្ញាធរថ្នាក់ជាតិបានសិក្សាស្រាវជ្រាវលើដីទាំងនោះរួចរាល់ហើយ គឺជាដីសម្បទានសង្គមកិច្ចរបស់រដ្ឋដើម្បីទុកបែងចែកដល់ពលរដ្ឋដែលមានជីវភាពខ្វះខាត។
ហ្នឹងហើយដឹងជាដីសម្បទានសង្គមកិច្ច ហើយខាងក្រសួងគេសិក្សាហើយអស់ហើយ ដើម្បីរៀបចំបែងចែកឱ្យប្រជាពលរដ្ឋខ្វះ។ ប៉ុន្តែថ្ងៃមុនខ្ញុំឃើញប្រជាពលរដ្ឋតវ៉ានៅសាលាស្រុកដែរ ហើយគាត់ប្រជុំដោះស្រាយ ហើយប្រជាពលរដ្ឋបានត្រឡប់ផ្ទះអស់ហើយតើ។
— លោក ប្រាជ្ញ សុវណ្ណមុនី
ប៉ុន្តែពលរដ្ឋទាំងនោះថា ពួកគាត់គឺជាពលរដ្ឋខ្វះខាតពិតប្រាកដ តែអាជ្ញាធរមិនបានបែងចែកដីដល់ពួកគាត់នោះទេ ហើយបម្រុងយកដីនោះទៅចែកឱ្យពលរដ្ឋមកពីនៅតំបន់ផ្សេងទៅវិញ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា ប្រជាពលរដ្ឋទាំងនោះពិតជាបានកាន់កាប់ដីនោះជាច្រើនឆ្នាំមកហើយ ដូច្នេះអាជ្ញាធរពាក់ព័ន្ធគួរតែកាត់ដីទាំងនោះឱ្យពលរដ្ឋកាន់កាប់ស្របច្បាប់ ដោយមិនត្រូវបណ្ដេញពួកគាត់ចេញពីដីបែបនេះឡើយ។
អ៊ីចឹង នៅពេលធ្វើសម្បទានផ្នែកសង្គមកិច្ចរាយការណ៍ជូនខាងក្រសួង ជូនប្រមុខរដ្ឋាភិបាលទៅថា ដីដែលធ្វើសម្បទានសង្គមកិច្ចទំហំប៉ុន្មានពាន់ហ្នឹងមានប្រជាពលរដ្ឋប៉ុន្មានគ្រួសាររស់នៅ ហើយគាត់កាន់កាប់ដីប៉ុន្មាន យើងកាត់ឆ្វៀលទៅ សល់ប៉ុន្មានយើងសម្បទានសង្គមកិច្ចទៅ។ នៅក្នុងស្រុកសំឡូតនេះ សុទ្ធតែជាតំបន់ព្រៃតំបន់បរិស្ថានទាំងអស់ នៅពេលដែលយើងពិនិត្យជាក់ស្ដែងសុទ្ធតែជាផ្ទះ ឬក៏ជាចម្ការរបស់ប្រជាពលរដ្ឋហើយ។ អីចឹង ដើម្បីបញ្ចប់បញ្ហាជម្លោះ យើងមិនចង់ឃើញការដាក់ឱសានវាទបណ្ដេញចេញអីចឹងទេបាទ។
— លោក យិន ម៉េងលី
កន្លងទៅក្រុមពលរដ្ឋបាននាំគ្នាតវ៉ានៅសាលាឃុំកំពង់ល្ពៅ និងសាលាស្រុកសំឡូត ដើម្បីទាមទារឱ្យអាជ្ញាធរបញ្ឈប់បណ្ដេញពួកគាត់ដោយអយុត្តិធម៌បន្តទៀត ហើយងាកមកដោះស្រាយបែងចែកដីជូនពួកគាត់ដើម្បីយកទៅដាំដុះដោយមិនមានការភ័យខ្លាច។ ប៉ុន្តែរហូតមកដល់ពេលនេះគ្មានដំណោះស្រាយនៅឡើយ។
ក្រុមពលរដ្ឋព្រមានថា ប្រសិនបើអាជ្ញាធរមូលដ្ឋាននៅតែមិនដោះស្រាយជូនពួកគាត់ទេនោះ ពួកគាត់នឹងលើកគ្នាទៅតវ៉ារកដំណោះស្រាយនៅតាមក្រសួងពាក់ព័ន្ធនៅរាជធានីភ្នំពេញក្នុងពេលឆាប់ៗខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។