រដ្ឋមន្ត្រី​ក្រសួង​រ៉ែ​ព្រមាន​ក្រុមហ៊ុន​រុករក​រ៉ែ​ណា​មិន​បាន​អនុវត្ត​តាម​ច្បាប់​កំណត់

រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម ថ្លែង​ក្នុង​ពេល​ចុះ​សំណេះសំណាល​ជាមួយ​ពលរដ្ឋ​នៅ​សហគមន៍​ភូមិ​កោះស្រឡៅ ឃុំ​កោះកាពិ ខេត្ត​កោះកុង កាល​ពី​ថ្ងៃ​ទី​៦ ខែ​ធ្នូ ឆ្នាំ​២០១៦។
រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម ថ្លែង​ក្នុង​ពេល​ចុះ​សំណេះសំណាល​ជាមួយ​ពលរដ្ឋ​នៅ​សហគមន៍​ភូមិ​កោះស្រឡៅ ឃុំ​កោះកាពិ ខេត្ត​កោះកុង កាល​ពី​ថ្ងៃ​ទី​៦ ខែ​ធ្នូ ឆ្នាំ​២០១៦។ (Photo: RFA)

ក្រសួង​រ៉ែ និង​ថាមពល​ព្រមាន​ថា​របប​លោក ហ៊ុន សែន នឹង​ចាត់វិធានការ​លើ​ក្រុមហ៊ុន​រុករក​រ៉ែ​ទាំងឡាយ​ណា​ដែល​មិនបាន​អនុវត្ត​តាម​ច្បាប់​ដែល​បាន​កំណត់​ក្នុង​ការ​ធ្វើ​អាជីវកម្ម​រ៉ែ។

លោក ស៊ុយ សែម រដ្ឋមន្ត្រី​ក្រសួង​រ៉ែ និង​ថាមពល​អះអាង​ថា ក្រសួង​នឹង​មិន​អត់ឱន​ជាដាច់ខាត ពី​ថ្ងៃ​នេះ​តទៅ​បើ​មាន​ក្រុមហ៊ុន​ណា អនុវត្ត​មិនបាន​ត្រឹមត្រូវ​តាម​លក្ខខណ្ឌ​ដែល​កំណត់ ក្នុង​នៅ​ក្នុង​ច្បាប់ ក្នុង​សេចក្ដីប្រកាស ឬ​រំលោភ​អនុក្រឹត្យ​ស្ដីពី​ការ​រុករក​រ៉ែ​ដែល​នាំ​ឲ្យ​មានការ​ប៉ះពាល់​បរិស្ថាន​ធ្ងន់ធ្ងរ។ ការព្រមាន​របស់​លោក ស៊ុយ សែម ធ្វើឡើង​នៅ​ក្នុង​កិច្ច​ប្រជុំ​មួយ​ជាមួយ​តំណាង​ក្រុមហ៊ុន ឯកជន​ចំនួន​២៥ ដែល​វិយោគ​លើ​វិស័យ​រុករក​រ៉ែ នៅ​ថ្ងៃ​ទី២៣ ឧសភា​នេះ។ រដ្ឋមន្ត្រី​ក្រសួង​រ៉ែ និង​ថាមពល​រូប​នេះ​អះអាង​ថា កិច្ច​ការដែល​ពាក់ព័ន្ធ​បរិស្ថាន​ដូចជា​កាកសំណល់ ដែល​មាន​ជាតិពុល ត្រូវ​ទុកដាក់​ឱ្យ​បាន​ត្រឹមត្រូវ ពីព្រោះ​វា​ជា​ការងារ​សំខាន់​ដែល​ត្រូវ​ប្រុងប្រយ័ត្ន​កុំ​ឱ្យ​មានការ​ប៉ះពាល់ ឬ​មាន​ការ​អន្តរាយ​ដល់​ពលរដ្ឋ។

ការព្រមាន​របស់​លោក ស៊ុយ សែម ធ្វើ​ឡើង​បន្ទាប់ពី​មាន​ករណី​ពុល​ទឹក​ព្រែកទេរ នៅ​ខេត្ត​ក្រចេះ កាល​ពី​ដើម​ខែ​ឧសភា ឆ្នាំ​២០១៨ ដែល​បណ្ដាល​ឲ្យ​អ្នកភូមិ ចំនួន​១៨​នាក់​ស្លាប់ និង​ធ្លាក់ខ្លួន​ឈឺ​ជិត​៣០០​នាក់។

រដ្ឋមន្ត្រី​ក្រសួង​ឧស្សាហកម្ម និង​សិប្បកម្ម លោក ចម ប្រសិទ្ធ កាល​ពី​ដើម​សប្ដាហ៍​កន្លង​ទៅ​នេះ​បញ្ជាក់​ថា ការ​ពុល​នោះ​កើត​ចេញពី​អាជីវកម្ម​រុករក​រ៉ែ​មាស នៅ​ប៉ែក​ខាងលើ​នៃ​ព្រែកទេរ ដែល​មាន​ព្រំប្រទល់​រវាង​ខេត្ត​មណ្ឌលគិរី និង​ខេត្ត​ក្រចេះ តាមរយៈ​ការ​ប្រើ​សារធាតុ​គីមី​ឈ្មោះ «ហ្សានីត»។ ប៉ុន្តែ​រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម ឲ្យ​ដឹង​ថា ករណី​ពុល​ស្លាប់​របស់​ពលរដ្ឋ​ទាំង​នោះ ពុំ​មាន​ការ​ពាក់ព័ន្ធ​ទៅ​នឹង​សារធាតុ ហ្សានីត​នោះ​ទេ។

ទោះជា​យ៉ាងណាក៏ដោយ ប្រធាន​អង្គការ​មាតា​ធម្មជាតិ​លោក អាឡិចហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) នៅ​មាន​មន្ទិលសង្ស័យ អំពី​ភាព​មិន​ច្បាស់​លាស់​របស់​រដ្ឋាភិបាល​ក្នុង​ការ​ពិសោធន៍​រក​សារធាតុ​ពុល។ លោក​បន្ត​ថា រហូត​មក​ទល់​ពេលនេះ​សមត្ថកិច្ច​នៅ​មិនទាន់​បើក​ការស៊ើបអង្កេត​ស៊ី​ជ្រៅ​មួយ​ដើម្បី​ស្វែង​រកមុខ ស្ថាប័ន​ពាក់ព័ន្ធ​ទាំងឡាយ​ដែល​ធ្វេស​ប្រហែស​នាំ​ឲ្យ​មាន​ការ​ពុល​ទឹក​ដោយសារ​សារធាតុ​គីមី​នេះ​មក​ទទួលខុសត្រូវ​តាម​ផ្លូវ​ច្បាប់​នៅ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។