សាក្សីដែលបានឃើញហេតុការណ៍ផ្ទាល់ភ្នែកអះអាងថា ជនភៀសខ្លួនម៉ុងតាញ៉ា ចំនួន ៣៦នាក់ ត្រូវប៉ូលិសក្នុងខេត្តរតនគិរី ចាប់ខ្លួននៅតាមផ្លូវចេញពីខេត្តនេះឆ្ពោះទៅរាជធានីភ្នំពេញ។
ជនភៀសខ្លួនទាំង ៣៦នាក់នោះ ត្រូវមន្ត្រីអង្គការសិទ្ធិមនុស្សបញ្ជាក់ថា បានបាត់ខ្លួនខណៈពលរដ្ឋខ្មែរជួយជម្លៀសពួកគេពីកន្លែងលាក់ខ្លួនក្នុងព្រៃខេត្តរតនគិរី បំណងទៅកាន់ទីក្រុងភ្នំពេញ ដើម្បីស្វែងរកការគាំពារពីការិយាល័យសិទ្ធិមនុស្សអង្គការសហប្រជាជាតិ។
សាក្សីបញ្ជាក់ថា ជនភៀសខ្លួនចំនួន ៣៦នាក់រួមទាំងពលរដ្ឋខ្មែរអ្នកជូនដំណើរម្នាក់ផង ត្រូវបានសមត្ថកិច្ចប៉ូលិសខេត្តរតនគិរី ចាប់ខ្លួន ហើយបញ្ជូនចេញទៅប្រទេសវៀតណាម ភ្លាមៗតាមច្រកព្រំដែនស្រុកអូរយ៉ាដាវ។
សាក្សីដែលបានឃើញហេតុការណ៍អះអាងថា ជនភៀសខ្លួនចំនួន ៣៦នាក់ និងអ្នកនាំផ្លូវម្នាក់ជិះក្នុងរថយន្តដឹកជញ្ជូនអ្នកដំណើរម៉ាកសាំយ៉ុង ពីរគ្រឿង ចេញពីស្រុកលំផាត់ ត្រូវប៉ូលិសប្រមាណ ១០នាក់ស្ទាក់ចាប់នៅតាមដងផ្លូវជាតិលេខ៧៨អា ចំណុចផ្លូវឡើងទួលភ្នំកូនមុំ ក្នុងស្រុកកូនមុំ កាលពីវេលាម៉ោងប្រមាណ ១យប់ឆ្លងចូលថ្ងៃទី២៦ ខែកុម្ភៈ។ បន្ទាប់មក ក្រុមសមត្ថកិច្ចបានជួលរថយន្តមួយគ្រឿងបន្ថែម មកដឹកជញ្ជូនមនុស្សទាំង ៣៧នាក់ឆ្លងចូលទៅទឹកដីប្រទេសវៀតណាម។
មន្ត្រីឃ្លាំមើលសិទ្ធិមនុស្សសមាគមអាដហុក (adhoc) ខេត្តរតនគិរី លោក ឆាយ ធី មានប្រសាសន៍បញ្ជាក់ថា លោកបានអង្កេតករណីនេះបន្ទាប់ពីមានសេចក្តីរាយការណ៍ថា ជនភៀសខ្លួនម៉ុងតាញ៉ា បានបាត់ខ្លួនកាលពីរាត្រីរំលងអាធ្រាត្រថ្ងៃទី២៥ ឆ្លងចូលថ្ងៃទី២៦ ខែកុម្ភៈ។ លោកកត់សម្គាល់ថា សាក្សីក្នុងហេតុការណ៍នេះបានទទួលស្គាល់ថា ម៉ុងតាញ៉ា និងអ្នកនាំផ្លូវពិតជាត្រូវចាប់ខ្លួន៖ «ថ្ងៃនេះយើងបានស៊ើបអង្កេតបឋមមួយ យើងបានព័ត៌មានពីប្រភពសាក្សីផង ប្រភពសុំមិនបញ្ចេញឈ្មោះផង បញ្ជាក់ថា ក្រុមចារ៉ាយ ភៀសខ្លួនវៀតណាម គឺត្រូវបានដឹកជញ្ជូនទៅតាមព្រំដែនស្រុកអូរយ៉ាដាវ»។
អ្នកភូមិខ្មែរដែលជួយលាក់បំពួនម៉ុងតាញ៉ា នៅស្រុកអូរយ៉ាដាវ ឲ្យដឹងថា អ្នកភូមិជនជាតិដើមចារ៉ាយ-ខ្មែរឈ្មោះ ក្លាន ហឺន រស់នៅភូមិសោមត្រក គឺជាអ្នករៀបចំគម្រោងនាំផ្លូវដឹកជញ្ជូនម៉ុងតាញ៉ា បីក្រុមមានមនុស្ស ៣៦នាក់ ពីស្រុកអូរយ៉ាដាវ និងស្រុកលំផាត់ កាលពីរាត្រីថ្ងៃទី២៥ ខែកុម្ភៈ។ ក៏ប៉ុន្តែ ពួកគេ និង ក្លាន ហឺន មិនអាចទាក់ទងតាមទូរស័ព្ទបានទៀត ក្រោយពេល ក្លាន ហឺន បញ្ជាក់ចុងក្រោយថា រថយន្តពួកគេបានមកដល់ជិតទីរួមស្រុកលំផាត់។
ទាក់ទិនករណីចាប់ខ្លួនម៉ុងតាញ៉ា នេះ អធិការប៉ូលិសស្រុកកូនមុំ លោក ភោគ បូរិទ្ធ មានប្រសាសន៍បញ្ជាក់ថា លោកមិនបានដឹងពីករណីនេះទេ។
ចំណែកអ្នកនាំពាក្យសាលាខេត្តរតនគិរី លោក មឹង ស៊ីនាត ថ្លែងថា មិនមានក្រុមសមត្ថកិច្ចណាមួយនៃអាជ្ញាធរខេត្ត អះអាងពីការចាប់ខ្លួនម៉ុងតាញ៉ា និងអ្នកនាំផ្លូវនោះទេ៖ «ដូចចោរលួចសេះអ៊ីចឹង សួរទៅខាងណាក៏គេអត់ដឹងដែរហ្នឹង បើមានខ្ញុំជម្រាបជូនហើយហ្នឹង»។
ទាក់ទិនការបាត់ខ្លួននេះដែរ ប្អូនបង្កើតរបស់ ក្លាន ហឺន គឺលោក ក្លាន ដុំ អាយុ ៣៨ឆ្នាំទទួលស្គាល់ថា បងប្រុសគាត់បានបាត់ខ្លួនមិនដឹងមូលហេតុ។ នៅថ្ងៃទី២៨ ខែកុម្ភៈ លោកបានមកកាន់ការិយាល័យសមាគមអាដហុក ដើម្បីផ្តល់ព័ត៌មាននេះ៖ «បងស្រីប្រពន្ធគាត់ថា ខ្ញុំទូរស័ព្ទអត់ចូលសោះ ឯងជួយរកបងឯងមើល។ តាំងពីមុនៗ គាត់ចេញទៅណាគាត់ទូរស័ព្ទចូលថានៅកន្លែងនេះៗ គាត់អត់បារម្ភ»។
ទោះជាយ៉ាងណាក៏ដោយ ប្រធានប៉ូលិសអន្តោប្រវេសន៍ច្រកទ្វារព្រំដែនអន្តរជាតិស្រុកអូរយ៉ាដាវ លោក ឡុង រុក្ខា មានប្រសាសន៍បញ្ជាក់ថា មិនមានជនអន្តោប្រវេសន៍ ឬជនភៀសខ្លួនណាម្នាក់ត្រូវបញ្ជូនចេញតាមច្រកទ្វារព្រំដែននេះទេ ចាប់ពីដើមសប្ដាហ៍រហូតដល់ថ្ងៃទី២៨ ខែកុម្ភៈ។ លោកថា មិនអាចធ្វើទៅរួចឡើយ ប្រសិនការបញ្ជូនជនបរទេសណាមួយឆ្លងដែនដោយមិនមានលិខិតស្នាមបញ្ជាក់ត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។