អង្គការលើកលែងទោសអន្តរជាតិ (Amnesty International) អំពាវនាវឲ្យអាជ្ញាធរកម្ពុជាបញ្ឈប់អំពើរំលោភបំពានឥតស្រាកស្រាន្តមកលើក្រុមអ្នកការពារសិទ្ធិមនុស្សជាយុវជន និងពលរដ្ឋដទៃទៀតដែលបានចូលរួមសម្ដែងមតិរបស់ពួកគេដោយសន្តិវិធីពាក់ព័ន្ធនឹងរឿងនយោបាយ។ ការអំពាវនាវនេះ កើតមានឡើងក្រោយរបបលោកនាយករដ្ឋមន្ត្រី ហ៊ុន សែន បង្កើនយុទ្ធនាការចាប់ខ្លួនក្រុមយុវជន និងពលរដ្ឋយ៉ាងហោចណាស់ ១៦នាក់ ក្នុងរយៈពេលជាង ១ខែ ចុងក្រោយនេះ។
នាយិកាអង្គការលើកលែងទោសអន្តរជាតិ (Amnesty International) ទទួលបន្ទុកផ្នែកយុទ្ធនាការប្រចាំតំបន់ អ្នកស្រី មីង យូហា (Ming Yu Ha) ថ្លែងក្នុងសេចក្ដីថ្លែងការណ៍របស់អង្គការនេះ ផ្សាយនៅថ្ងៃទី១០ កញ្ញា ថា នៅកម្ពុជា ជាជាងលើកទឹកចិត្តមនុស្សជំនាន់ក្រោយជាយុវជនឲ្យអាចចូលរួមបានពេញលេញនៅក្នុងការកំណត់ជោគវាសនាអនាគតរបស់ប្រទេសជាតិ រដ្ឋាភិបាលលោកនាយករដ្ឋមន្ត្រី ហ៊ុន សែន បែរជាតាំងចិត្តកម្ចាត់ចោលទាំងស្រុងនូវរាល់សំឡេងរិះគន់ប្រឆាំងនឹងការគ្រប់គ្រងរបស់លោកក្នុងចំណោមគ្រប់មជ្ឈដ្ឋានទាំងអស់នៃពលរដ្ឋកម្ពុជា រាប់ចាប់តាំងពីព្រះសង្ឃ រហូតដល់អ្នកសិល្បៈផង។ អ្នកស្រីលើកឡើងថា សកម្មភាពចាប់ខ្លួនមនុស្សទាំងអស់នេះ គឺជាទង្វើដ៏«គម្រក់»ហើយជាការវាយប្រហារទាំងស្រុងមកលើក្រុមយុវជននៅកម្ពុជា។
អង្គការលើកលែងទោសអន្តរជាតិ ចាត់ទុកមនុស្សចំនួន ១០នាក់ដែលត្រូវបានអាជ្ញាធរកម្ពុជាចាប់ឃុំខ្លួនដាក់ពន្ធនាគារមួយរយៈពេលចុងក្រោយនេះថា គឺជា «អ្នកទោសមនសិការ» ដែលមានន័យថា ពួកគេត្រូវបានឃុំខ្លួនដោយសារតែពួកគេគ្រាន់តែអនុវត្តសិទ្ធិរបស់ពួកគេដោយសន្តិវិធីដូចដែលត្រូវបានការពារដោយច្បាប់។ មនុស្សទាំង១០នាក់ដែលត្រូវអង្គការអន្តរជាតិមួយនេះ ចាត់ទុកថា ជា«អ្នកទោសមនសិការ» រួមមាន៖ ក្រុមយុវជនអង្គការមាតាធម្មជាតិ យុវជន ថុន រដ្ឋា កញ្ញា ឡុង គន្ធា កញ្ញា ភួង កែវរស្មី អ្នកនិពន្ធបទចម្រៀងរ៉ែប យុវជន គា សុគន្ធ ប្រធានសហភាពសហជីពកម្ពុជា លោក រ៉ុង ឈុន ក្រុមយុវជនខ្មែរថាវរៈ លោក ហ៊ុន វណ្ណៈ អ្នកនាង ឈឿន ដារ៉ាវី ព្រះសង្ឃ កើត សារ៉ាយ អនុប្រធានសមាគមនិស្សិតបញ្ញវន្តខ្មែរ លោក មាន ព្រហ្មមុន្នី ព្រមទាំងសកម្មជនយុវជនពីររូបផ្សេងទៀត គឺលោក ថា ឡាវី និងកញ្ញា អេង ម៉ាឡៃ ហៅ សូ មេត្តា។
អង្គការលើកលែងទោសអន្តរជាតិ គូសបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ អាជ្ញាធរកម្ពុជា បានបើកការបង្រ្កាបជាប្រព័ន្ធមកលើសិទ្ធិនៃការប្រមូលផ្តុំដោយសន្តិវិធី តាមរយៈការហាមប្រាមមិនឲ្យមានការប្រមូលផ្តុំជាសាធារណៈ ការវាយប្រហារ និងចាប់ដាក់គុករាល់ក្រុមអ្នកតវ៉ាដោយសន្តិវិធី។ អង្គការនេះ បន្តថា បើទោះបីជាមានការបង្ក្រាបយ៉ាងធ្ងន់ធ្ងរបែបនេះក៏ដោយ ក៏ការតវ៉ានានាដឹកនាំដោយក្រុមយុវជនបានកើតមានឡើងជាប្រចាំនៅទូទាំងក្រុងភ្នំពេញ ចាប់តាំងពីមានការចាប់ខ្លួនលោក រ៉ុង ឈុន និងការណ៍ដែលអាជ្ញាធរបានឆ្លើយតបដោយប្រើកម្លាំងជ្រុលហួសហេតុ និងសកម្មភាពបំភិតបំភ័យនានា។
នាយិកាអង្គការលើកលែងទោសអន្តរជាតិរូបនេះថា ក្រុមយុវជនកម្ពុជាទាំងនេះ កំពុងផ្ញើសារយ៉ាងជាក់ច្បាស់ថា ពួកគេនឹងមិននៅសម្ងំស្ងៀមឡើយ ពួកគេនឹងមិនភ័យខ្លាច ហើយថា ពួកគេទទួលរងនូវភាពអយុត្តិធម៌សង្គមគ្រប់គ្រាន់ហើយ។ អ្នកស្រីថ្លែងបន្តថា ក្រុមសកម្មជនជាយុវជនដ៏ក្លាហានទាំងនេះ កំពុងតែងើបឈរឡើងដើម្បីឧត្ដមគតិនៃយុត្តិធម៌ សមភាព និងសិទ្ធិមនុស្ស ដែលសកម្មភាពទាំងអស់នេះរបស់ពួកគេ ត្រូវតែទទួលបាននូវការការពារ និងការលើកទឹកចិត្ត។
ជាថ្មីម្តងទៀត អង្គការលើកលែងទោសអន្តរជាតិ អំពាវនាវឲ្យអាជ្ញាធរកម្ពុជា ដោះលែងអ្នកទោសមនសិការទាំងអស់នេះ ជាបន្ទាន់ និងដោយឥតលក្ខខណ្ឌដែលអង្គការនេះថា ពួកគេត្រូវបានឃុំខ្លួនដោយខុសច្បាប់នៅកម្ពុជា។
I am very concerned at reports that the authorities are labelling peaceful activities by NGOs Khmer Thavrak & Mother Nature as illegal. I am also receiving reports of planned searches of other NGOs, & that Human Rights Defenders are being arrested & imprisoned
មិនមែនមានតែអង្គការលើកលែងទោសអន្តរជាតិនេះទេ ដែលបានចេញមុខអំពាវឲ្យអាជ្ញាធរកម្ពុជា ប្រញាប់ដោះលែងក្រុមយុវជន និងពលរដ្ឋទាំងនេះជាបន្ទាន់នោះ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា អ្នកស្រី រ៉ូណា ស្ម៊ីត (Rhona Smith) និងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកក្រុមអ្នកការពារសិទ្ធិមនុស្សអ្នកស្រី ម៉ារី ឡល័រ (Mary Lawlor) សុទ្ធតែធ្លាប់បានបង្ហាញពីកង្វល់ជុំវិញការកើនឡើងករណីចាប់ខ្លួនមនុស្សដ៏ឥតស្រាកស្រាន្តនេះដែរ។ មន្ត្រីជំនាញសិទ្ធិមនុស្សរបស់អង្គការសហប្រជាជាតិទាំងពីររូបនេះ បានក្រើនរំឭកអាជ្ញាធរកម្ពុជាអំពីកាតព្វកិច្ចដែលកម្ពុជាត្រូវតែធានាឲ្យបាននូវការគោរព និងការការពារសិទ្ធិមនុស្ស ព្រមទាំងបង្កើតឲ្យបាននូវបរិយាកាសដែលពលរដ្ឋគ្រប់រូបអាចអនុវត្តសិទ្ធិរបស់ពួកគេបាន។
ក៏ប៉ុន្តែ កង្វល់ និងការអំពាវនាវរបស់ពួកគេចុងក្រោយនេះ ត្រូវតំណាងកម្ពុជានៅអង្គការសហប្រជាជាតិប្រចាំក្រុងហ្សឺណែវ ប្រទេសស្វីស បែរជាឆ្លើយតបដោយជំរុញឲ្យអ្នករាយការណ៍ពិសេសរបស់អង្គការសហប្រជាជាតិគោរពឲ្យបានខ្ជាប់ខ្ជួននូវក្រមសីលធម៌ និងអាណត្តិរបស់ពួកគេទៅវិញ។ តំណាងកម្ពុជាដដែលថា កម្ពុជាគោរព និងផ្តល់តម្លៃចំពោះសេរីភាពនៃការបញ្ចេញមតិ ការបង្កើតសមាគម និងការប្រមូលផ្តុំដោយសន្តិវិធីដែលស្របតាមច្បាប់ ក៏ប៉ុន្តែ ថាការអនុវត្តសិទ្ធិរបស់អ្នកទាំងនោះជារឿងខុសច្បាប់ ដោយដកស្រង់មាត្រា៣១ នៃរដ្ឋធម្មនុញ្ញ ដែលបានគូសបញ្ជាក់ថា ការប្រើប្រាស់សិទ្ធិ និងសេរីភាពផ្ទាល់ខ្លួនរបស់បុគ្គលណាម្នាក់ មិនត្រូវឲ្យប៉ះពាល់ដល់សិទ្ធិនិងសេរីភាពរបស់អ្នកដទៃឡើយ។ តំណាងកម្ពុជាប្រចាំអង្គការសហប្រជាជាតិនៅទីក្រុងហ្សឺណែវ ចោទអ្នករាយការណ៍ពិសេសអង្គការសហប្រជាជាតិ ថាមានចេតនាផ្តល់កម្លាំងចិត្តឲ្យក្រុមខ្លះដែលបានត្រៀមខ្លួនជាស្រេចក្នុងការកេងចំណេញពីស្ថានភាពបែបនេះ សម្រាប់របៀបវារៈលាក់កំបាំងរបស់ពួកគេ។
មិនមែនជារឿងចម្លែកទេ ដែលជារឿយៗមន្ត្រីគ្រប់ជាន់ថ្នាក់នៃរដ្ឋាភិបាល តែងលើកយកអំណះអំណាងនៃពាក្យថា គោរពច្បាប់ និងឯករាជ្យរបស់ស្ថាប័នតុលាការមកនិយាយកប់ៗមាត់។ ក៏ប៉ុន្តែ ពាក្យថា កម្ពុជាជារដ្ឋគោរពច្បាប់ និងមានស្ថាប័នតុលាការឯករាជ្យនេះ មិនត្រូវបានមតិជាតិ និងអន្តរជាតិ ជឿជាក់ ឬទទួលស្គាល់ឡើយ។ ជាក់ស្តែង ក្នុងឆ្នាំ២០២០នេះ កម្ពុជាជាប់លេខបាតតារាងក្នុងចំណោម១២៨ប្រទេស ថាជាប្រទេសពូកែខាងរំលោភច្បាប់ជាងគេ ចេញផ្សាយដោយអង្គការគម្រោងយុត្តិធម៌ពិភពលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។