ជនមិនស្គាល់មុខ២នាក់ បានជិះម៉ូតូ ដេញតាមគប់ចៅសង្កាត់រងជាប់ឆ្នោតរបស់គណបក្សប្រឆាំងម្នាក់ បណ្តាលឲ្យរបួសដៃ និងទ្រូង ក្រោយពេលលោក ចេញពីកន្លែង ប្រារព្ធទិវាគ្រូបង្រៀនពិភពលោក នៅទីលានប្រជាធិបតេយ្យវិញ។ សមាគមគ្រូបង្រៀនកម្ពុជាឯករាជ្យ ថ្កោលទោសការលបវាយប្រហារ លើអ្នកចូលរួមទិវាគ្រូបង្រៀន។
ចៅសង្កាត់រងទី១ ជាប់ឆ្នោត នៅសង្កាត់បឹងទំពុន២ ខណ្ឌមានជ័យ មកពីគណបក្សសង្គ្រោះជាតិ លោក ខឿន វីរ៉ាត់ ឲ្យដឹងថា ជនស៊ីវិល២នាក់ បានជិះម៉ូតូ តាមរ៉ឺម៉កកង់បី (Pass App) របស់លោក ហើយធ្វើសកម្មភាពគប់ដុំថ្ម មួយទំហឹង តម្រង់ក្បាលរបស់លោក តែ លោកគេចផុត បណ្ដាលឲ្យត្រូវដៃ ទ្រូង និងខ្ទាត់ទៅចំប្រពន្ធរបស់លោក កំពុងជិះខាងក្រោយ។
លោក ខឿន វីរ៉ាត់ ចាត់ទុកហិង្សានេះ ជាទង្វើប៉ុនប៉ងសម្លាប់ ព្រោះដុំថ្ម ដែលជនស៊ីវិលលបគប់លោក គឺទំហំធំ ហើយតម្រង់គប់ឲ្យចំក្បាល។ ក្រៅពីនេះ លោក យល់ថា ហិង្សានេះ ក៏ជារូបភាពគំរាមកំហែង លើសកម្មជនបក្សប្រឆាំង និង គំរាមលោកផ្ទាល់ ឲ្យបញ្ឈប់សកម្មភាពចូលរួមតស៊ូមតិអហិង្សា។
លោក ខឿន វីរ៉ាត់ ឲ្យដឹងទៀតថា ក្រោយធ្វើសកម្មភាពហិង្សារួច ជនស៊ីវិល ២នាក់ ដែលជិះម៉ូតូម៉ាក ស្កុបពី (Scoppy) យ៉ាងលឿន ទៅបាត់។ ចៅសង្កាត់រងជាប់ឆ្នោតរូបនេះ នឹងមិនដាក់ពាក្យប្ដឹងប៉ូលិសទេ ព្រោះលោកគ្មានជំនឿលើនគរបាល។ លោក សង្កេតឃើញ សកម្មជនបក្សប្រឆាំងរងគ្រោះច្រើននាក់ហើយ ដែលដាក់ពាក្យប្ដឹង តែសមត្ថកិច្ច មិនដែលចាប់ជនល្មើសបានទេ តែផ្ទុយទៅវិញ ជនរងគ្រោះខ្លះ ក្នុងនោះមាន លោក ហេង ច័ន្ទសុទ្ធី បែរត្រូវសមត្ថកិច្ច ចាប់ដាក់ពន្ធនាគារទៅវិញ។
លោក បញ្ជាក់ថា សុខចិត្តដាក់បណ្ដឹង និង រាយការណ៍ពីករណីហិង្សានេះ ទៅអង្គការសិទ្ធិមនុស្ស លីកាដូ វិញ។ លោក ខឿន វីរ៉ាត់ សម្ដែងការព្រួយបារម្ភសុវត្ថិភាព ក្រោយរងហិង្សានេះ តែលោក នៅរក្សាជំហរ ឆន្ទៈ សកម្មភាពតស៊ូមតិដោយអហិង្សា ទាមទារសិទ្ធិ តាមរដ្ឋធម្មនុញ្ញដដែល ដោយគ្មានការរាថយឡើយ៖ « អំពាវនាវទៅរដ្ឋាភិបាល សុំពិចារណាឡើងវិញ ឈប់គុំកួន សងសឹកខ្មែរ និងខ្មែរទៅ ហើយអាណិតប្រជាពលរដ្ឋស្លូតត្រង់ ដែលគ្នាតែចង់បានរស់នៅដោយមានការគោរពសិទ្ធិ ស្មើភាពគ្នា ចំពោះមុខច្បាប់។ ទី១ សិទ្ធិរបស់ពួកគាត់ ដែលត្រូវធានាដោយរដ្ឋធម្មនុញ្ញ។ អ៊ីចឹង គ្រាន់តែគោរពរដ្ឋធម្មនុញ្ញទៅ គឺគោរពសិទ្ធិពលរដ្ឋហើយ។ ទី២ កុំលើកទឹកចិត្តឲ្យ ជនល្មើសរួចខ្លួន។ គេហៅថា វប្បធម៌និទ្ទណ្ឌភាព ឲ្យជនដែលប្រព្រឹត្តិហ្នឹង រួចខ្លួនបន្តទៅទៀត។ រដ្ឋាភិបាលត្រូវមានចំណាត់ការច្បាស់លាស់ វែកមុខរកជនល្មើសមកផ្ដន្ទាទោសតាមច្បាប់»។
សមាជិកបក្សប្រឆាំងរូបនេះ អះអាងថា ជនមិនស្គាល់មុខ បានលបធ្វើបាបលោកច្រើនលើកច្រើនសារមកហើយ ដោយកន្លងមក ពួកគេធ្វើសកម្មភាពលួចចាក់ទម្លាយកង់ម៉ូតូកង់បី យកកាំបិតវះពូករ៉ឺម៉កម៉ូតូកង់បី និងលួចកាច់កញ្ចក់ម៉ូតូរបស់លោកជាដើម។
ជុំវិញករណីនេះ អាស៊ីសេរី មិនអាចសុំការបញ្ជាក់ពីអ្នកនាំពាក្យនគរបាលរាជធានីភ្នំពេញ លោក សាន សុខសីហា និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានទេ នៅថ្ងៃទី៥ តុលា ដោយសារទូរស័ព្ទរោទ៍ មិនមានអ្នកទទួល។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី ថ្កោលទោស ចំពោះហិង្សាលើអ្នកចូលរួមទិវាគ្រូបង្រៀន ៥ តុលា។ អ្នកស្រី ឲ្យដឹងថា លោក ខឿន វីរ៉ាត់ បានចូលរួមទិវាគ្រូបង្រៀន នៅទីលានប្រជាធិបតេយ្យ ដោយសារ លោក ចង់សម្ដែងការដឹងគុណចំពោះគ្រូបង្រៀន។
អ្នកស្រី អ៊ុក ឆាយាវី បន្តថា ការប្រារព្ធទិវាគ្រូបង្រៀន នៅថ្ងៃទី០៥ តុលា មិនរងការរំខានពីអាជ្ញាធរទេ តែអ្នកស្រី សោកស្ដាយ ចំពោះការកំហិតលក្ខខណ្ឌ ដ៏តឹងរ៉ឹង របស់អាជ្ញាធរ ដែលបណ្ដាលឲ្យគ្រូបង្រៀន និងអ្នកចូលរួមខ្លះមិនហ៊ានមកចូលរួម។ អ្នកស្រី ឲ្យដឹងទៀតថា មន្ត្រីរបស់ក្រសួងអប់រំ បានទៅ ទទួលយកញត្តិយឺតយ៉ាវ ជាងការកំណត់ពេលវេលាគ្នា បណ្ដាលឲ្យអ្នកចូលរួមមួយចំនួន ចង់ដើរ យកញត្តិ ទៅដាក់នៅក្រសួងអប់រំ៖ « យើងអត់ឃើញស្ថានភាពជ្រួលច្របល់ ឲ្យប៉ះទង្គិចគ្នា ជារូបភាពមួយ ដែលថា មានរបួសស្នាម ឬក៏យ៉ាងម្ដេចទេ តែពេលខ្លះ ពួកគាត់ ( អ្នកចូលរួម ) មានការស្រែក និងហួសចិត្ត មិនសប្បាយចិត្ត ដែលកំណត់ដែនឲ្យដើរ អ៊ីចឹង ណា»។
អ្នកចូលរួមទិវាគ្រូបង្រៀន នៅទីលានប្រជាធិបតេយ្យ គឺជាគ្រូបង្រៀន សហជីព កម្មករ អ្នករត់រ៉ឺម៉កកង់បីយុវជន សរុបមានគ្នា ប្រមាណ ៥០នាក់។ សមាគមគ្រូបង្រៀនកម្ពុជាឯករាជ្យ បានបញ្ចប់ទិវាគ្រូបង្រៀន ក្រោយពេលអាជ្ញាធរ ចុះមកទទួលញត្តិ។ ចំណែក ក្រសួងអប់រំ ក៏បានប្រារព្ធទិវាគ្រូបង្រៀន ០៥ តុលា នៅវិទ្យាស្ថានជាតិអប់រំ ពេញមួយថ្ងៃដែរ ក្រោមប្រធានបទ គ្រូបង្រៀនឆ្លាតវៃ ដើម្បីការអប់រំឌីជីថល (Digital)។
នៅថ្ងៃទិវាគ្រូបង្រៀន ៥ តុលា នេះដែរ ក្រុមសាច់ញាតិរបស់គ្រូបង្រៀន និងជាសមាជិកបក្សប្រឆាំង ដែលអាជ្ញាធរ បានចាប់ដាក់ពន្ធនាគារ ពីបទញុះញង់ បាននាំគ្នា ទៅដាក់ញត្តិនៅក្រសួងអប់រំ ទាមទារឲ្យជួយអន្តរាគមន៍ ដោះលែងគ្រូបង្រៀនទាំងអស់ នៅថ្ងៃទិវាគ្រូបង្រៀន ៥ តុលា ដែរ។ គ្រូបង្រៀន និង ជាមន្ត្រីជាប់ឆ្នោត នៅតាមមូលដ្ឋានរបស់គណបក្សសង្គ្រោះជាតិ ដែលកំពុងជាប់ពន្ធនាគារ មានដូចជា លោក រ៉ុង ឈុន លោក កែវ ថៃ លោក ស៊ុន ធន់ លោក ពៀត ម៉ាប់ លោក ជុំ ចាន់ និង លោក គង់ សំអាន។
មន្ត្រីក្រសួងអប់រំ បានចេញមកទទួលយកញត្តិ តែមិនបានសន្យា ជាមួយសាច់ញាតិ របស់គ្រូបង្រៀនទាំងអស់នោះទេ។ ប្រពន្ធរបស់ លោកគ្រូ ស៊ុន ធន់ គឺ លោកស្រី សេង ចាន់ថន ប្រាប់ថា ពួកគាត់ ទៅដាក់ញត្តិ នៅក្រសួងអប់រំ ឲ្យជួយ ដោយសារ ចំថ្ងៃទិវាគ្រូបង្រៀន ហើយលោកស្រី សង្ឃឹមថា ក្រសួងអប់រំ នឹងជួយអន្តរាគមន៍ ដោះលែងគ្រូបង្រៀន កំពុងជាប់ឃុំ និងផ្ដល់ក្របខណ្ឌ ឲ្យគ្រូបង្រៀនទាំងអស់ឡើងវិញ។
បន្ទាប់ពីដាក់ញត្តិនៅក្រសួងអប់រំរួច ក្រុមសាច់ញាតិ មានបំណងដើរ ទៅដាក់ញត្តិ នៅស្ថានទូតសហភាពអឺរ៉ុប តែអាជ្ញាធរ និងក្រុមកងសន្តិសុខក្រុងភ្នំពេញ ជាច្រើននាក់ រារាំងជាប់ មិនឲ្យដើរថ្មើជើង ទៅដាក់ញត្តិនោះទេ ក្រោមហេតុផលថា មិនបានសុំច្បាប់ ពីអាជ្ញាធរ។ លោកស្រី សេង ចាន់ថន ប្រាប់ថា ក្រុមស្ត្រី ជាប្រពន្ធរបស់គ្រូបង្រៀន គ្មានកម្លាំង និងមិនហ៊ានប្រើកម្លាំងបាយ រុញច្រាន ជាមួយអាជ្ញាធរទេ ខ្លាចរងការវាយធ្វើបាប ដូច្នេះក្រុមស្ត្រីអ្នកតវ៉ា បានបង្ខំចិត្តឡើងជិះរ៉ឺម៉កកង់បី ទៅស្ថានទូតសហភាពអឺរ៉ុប។ មន្ត្រីសហភាពអឺរ៉ុប បានទទួលយកញត្តិរបស់ក្រុមស្ត្រីតវ៉ា និងសន្យា ជួយតាមលទ្ធភាពដែលមាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។