អ្នកការពារសិទ្ធិមនុស្សថ្កោលទោសប្រធានសន្តិសុខខណ្ឌដូនពេញ ដែលបានប្រើអំពីហិង្សាលើពលរដ្ឋម្នាក់ដែលជាអ្នកគាំទ្រគណបក្សសង្គ្រោះជាតិ អំឡុងពេលសាលាឧទ្ធរណ៍បើកសវនាការរឿងក្តីលោក កឹម សុខា កាលពីព្រឹកថ្ងៃទី២៧ មីនា។ អ្នកការពារសិទ្ធិមនុស្សចាត់ទុកទង្វើបែបនេះថា ជាការរំលោភបំពានច្បាប់ ដែលមិនអាចទទួលយកបាន និងទាមទារឱ្យអាជ្ញាធរក្រុងភ្នំពេញចាត់វិធានការតាមផ្លូវច្បាប់ ចំពោះជនដៃដល់រូបនោះ។
អ្នកការពារសិទ្ធិមនុស្សអះអាងថា សកម្មភាពរបស់អ្នកគាំទ្រគណបក្សសង្គ្រោះជាតិម្នាក់ ដែលគូសគំនូសនៅលើផ្លូវដើម្បីសម្ដែងការមិនពេញចិត្ត ចំពោះចំណាត់ការផ្លូវច្បាប់លើលោក កឹម សុខា នោះ មិនមែនជាបទល្មើសនោះទេ ផ្ទុយទៅវិញ ការប្រើអំពើហិង្សាលើសកម្មជនបក្សសង្គ្រោះជាតិ ដោយមេកងសន្តិសុខខណ្ឌដូនពេញទៅវិញទេ ទើបជាបទល្មើសហិង្សាដោយចេតនា។ កាលពីព្រឹកថ្ងៃទី២៧ មីនា ខណៈសាលាឧទ្ធរណ៍កំពុងបើកសវនាការសំណុំរឿងលោក កឹម សុខា ប្រជាពលរដ្ឋជាច្រើននាក់ បានប្រមូលផ្ដុំគ្នានៅខាងក្រៅបរិវេណតុលាការ ដើម្បីបង្ហាញការគាំទ្រចំពោះមេបក្សប្រឆាំងរូបនេះ។ អ្នកគាំទ្រគណបក្សសង្គ្រោះជាតិម្នាក់ គឺលោក ប៉ែន ចាន់ បានគូសលេខ ០ បូក ០ ស្មើ ៨ នៅលើផ្លូវក្បែរសាលាឧទ្ធរណ៍ ហើយក៏ត្រូវបានសន្តិសុខខណ្ឌដូនពេញម្នាក់ ស្រែកគំហកឱ្យលុបចេញវិញជាបន្ទាន់។ នៅពេលដែលលោក ប៉ែន ចាន់ កំពុងតែនិយាយឆ្លើយឆ្លងជាមួយសន្តិសុខខណ្ឌដូនពេញម្នាក់នោះ រំពេចនោះស្រាប់តែប្រធានសន្តិសុខខណ្ឌដូនពេញ លោក គឹម វុត្ថា ក្នុងឯកសណ្ឋានស៊ីវិល គ្មាននិយាយអ្វីមួយម៉ាត់ បានចេញមុខមកទះកំផ្លៀង លោក ប៉ែន ចាន់ មួយដៃទាំងកម្រោល នៅក្នុងចំណោមហ្វូងមនុស្ស និងបានគំរាមទះភ្លៀងថែមទៀត ប្រសិនបើលោកមិនព្រមលុបគំនូសនោះចេញទេនោះ។ នេះមិនមែនជាលើកទីមួយទេ ដែល លោក គឹម វុត្ថា ប្រើប្រាស់អំពើហិង្សាទៅលើបាតុករ។
ប្រធានគ្រប់គ្រងការិយាល័យសិទ្ធិមនុស្សអង្គការលីកាដូ (Licadho) លោក អំ សំអាត ថ្លែងថា បុគ្គលណាក៏ដោយទោះបីជាពលរដ្ឋ មន្ត្រីរាជការ ឬកងកម្លាំងប្រដាប់អាវុធក្តី សុទ្ធតែត្រូវបានហាមឃាត់ដោយច្បាប់មិនឱ្យប្រព្រឹត្តអំពើហិង្សានោះទេ ព្រោះវាជាបទល្មើសដែលមានចែងនៅក្នុងក្រមព្រហ្មទណ្ឌ។ លោកថាទង្វើរបស់ប្រធានសន្តិសុខខណ្ឌដូនពេញនោះ គឺជាអំពើហិង្សាដោយចេតនា ដែលអាជ្ញាធរត្រូវនាំខ្លួនជននោះមកផ្ដន្ទាទោសតាមផ្លូវច្បាប់ ដើម្បីលុបបំបាត់អំពើនិទ្ទណ្ឌភាពនៅកម្ពុជា។ «»
លោកបន្តថា មន្ត្រីនគរបាលយុត្តិធម៌ ឬសេនាធិការចំណុះឱ្យមន្ត្រីនគរបាលយុត្តិធម៌ ចាំបាច់ត្រូវតែមានការអប់រំណែនាំឱ្យបានត្រឹមត្រូវទាក់ទងនឹងក្រមសីលធម៌ ការដោះស្រាយបញ្ហា និងការអនុវត្តច្បាប់ ហើយពេលមានបញ្ហាម្តងៗ មន្ត្រីទាំងនោះត្រូវព្យាយាមឱ្យអស់លទ្ធភាពដើម្បីសម្របសម្រួល និងរកដំណោះស្រាយដោយសន្តិវិធី មិនមែនអាងអំណាច និងហិង្សានិយមបែបនេះទេ។ លោកជំរុញឱ្យអាជ្ញាធរក្រុងភ្នំពេញចាត់វិធានការតាមផ្លូវច្បាប់ចំពោះជនដែលបានបង្កហិង្សា ដើម្បីឱ្យស្របទៅនឹងអ្វីដែលលោកនាយករដ្ឋមន្ត្រី ហ៊ុន សែន កំពុងតែនិយាយអំពីពាក្យថា សន្តិភាពនោះ។ «»
មន្ត្រីនាំពាក្យសាលារាជធានីភ្នំពេញ លោក ម៉េត មាសភក្តី ថ្លែងដោយខ្លីថា នេះជាករណីបុគ្គល ហើយសាលារាជធានីភ្នំពេញមិនគាំទ្រឡើយចំពោះការប្រើអំពើហិង្សានេះ។ «»
អំពើហិង្សាប្រព្រឹត្តដោយមេកងសន្តិសុខខណ្ឌដូនពេញនោះ បានធ្វើឱ្យមហាជនជាច្រើនសម្ដែងការខឹងសម្បា និងសរសេរនៅលើបណ្ដាញសង្គមហ្វេសប៊ុក (Facebook) ដោយចាត់ទុកជននោះ ថាជាមនុស្សគ្មានសីលធម៌ ជាជនបាតដៃទីបី ខ្លះទៀតនាំគ្នាជេរប្រទេច ដាក់បណ្ដាសា ប្រៀបប្រដូចទៅនឹងសត្វតិរច្ឆាន ឬក៏ប្រៀបប្រដូចទៅនឹងលោក ហ៊ុន សែន តែម្ដងដែលចូលចិត្តដឹកនាំតាមបែបហិង្សានិយម ហើយក៏មានខ្លះទៀតសរសេរថា គង់មានថ្ងៃណាមួយពួកជនទាំងនេះនឹងទទួលរងបាបកម្មរបស់ខ្លួនជាក់ជាមិនខាន។
ប្រធានមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង ថ្លែងថា លោករន្ធត់ចិត្តជាខ្លាំង នៅពេលឃើញមេកងសន្តិសុខខណ្ឌដូនពេញប្រើអំពើហិង្សាលើពលរដ្ឋបែបនេះ។ លោកថា កម្ពុជាជាប្រទេសប្រកាន់យករបបនយោបាយប្រជាធិបតេយ្យ ឱ្យតម្លៃលើសិទ្ធិមនុស្ស និងយកពុទ្ធសាសនាជាសាសនារបស់រដ្ឋ មិនគួរណាអាជ្ញាធរជ្រើសរើសយកមធ្យោបាយបែបហិង្សាបែបនេះមកដោះស្រាយបញ្ហានោះទេ។ «»
អ្នកការពារសិទ្ធិមនុស្សរូបនេះ ក្រើនរំលឹកដល់ថ្នាក់ដឹកនាំនៃរបបក្រុងភ្នំពេញថា ការប្រើអំពើហិង្សាមិនមែនជាជម្រើសល្អសម្រាប់ដោះស្រាយបញ្ហានោះទេ តែវានឹងធ្វើឱ្យមហាជនមានកំហឹងកាន់តែខ្លាំងទៅលើការដឹកនាំរបស់អាជ្ញាធរ ដែលនឹងអាចនាំទៅរកការក្រោកប៉ះបោររបស់ពលរដ្ឋប្រឆាំងនឹងរដ្ឋអំណាច ឬក៏ការផ្លាស់ប្ដូររបបដោយចលនាមហាជន។ «»
លោក ប៉ា ងួនទៀង អះអាងទៀតថា ដំណោះស្រាយដ៏ល្អបំផុតចំពោះរឿងនេះ គឺពង្រឹងការអនុវត្តច្បាប់ចំពោះមន្ត្រី ឬអាជ្ញាធរណាដែលហ៊ានប្រើអំពើហិង្សាលើពលរដ្ឋ ហើយការងារនេះ គឺលោកនាយករដ្ឋមន្ត្រី ហ៊ុន សែន ត្រូវតែធ្វើជាគំរូដល់មន្ត្រីឯទៀត តាមរយៈការដាក់ចេញនូវបញ្ជាតឹងរ៉ឹងឱ្យអាជ្ញាធរបញ្ឈប់ការប្រើអំពើហិង្សាក្នុងការដោះស្រាយបញ្ហាជាមួយពលរដ្ឋ ហើយបើមានមន្ត្រីណាមិនគោរពតាមទេនោះ ត្រូវដាក់ទោសទណ្ឌពួកគេឱ្យធ្ងន់ធ្ងរតាមច្បាប់។
ការប៉ះទង្គិចគ្នារវាងពលរដ្ឋ និងកងកម្លាំងសន្តិសុខសាលារាជធានីភ្នំពេញ ជាពិសេស កម្លាំងខណ្ឌដូនពេញ តែងកើតមានជាហូរហែនៅរាល់ពេលមានការជួបប្រជុំ ឬការតវ៉ាដោយសន្តិវិធីម្ដងៗ។ អាជ្ញាធរតែងលើកឡើងថា ការជួបប្រជុំ ឬការតវ៉ារបស់ពលរដ្ឋធ្វើឡើងដោយខុសច្បាប់ ឬមិនមានការអនុញ្ញាត ហើយជាញឹកញាប់ ក្រុមសន្តិសុខសាលារាជធានីភ្នំពេញ ដែលស្លៀកពាក់ឯកសណ្ឋាន និងមានពាក់មួកសុវត្ថិភាពផង គឺជាអ្នកចេញមុខបង្ក្រាបក្រុមពលរដ្ឋ។
គណបក្សសង្គ្រោះជាតិធ្លាប់បានស្នើទៅក្រសួងមហាផ្ទៃឱ្យលុបបំបាត់កម្លាំងសន្តិសុខទាំងនោះចោល កាលពីចុងឆ្នាំ២០១៦ ដោយយល់ឃើញថា កម្លាំងនោះជាកម្លាំងខុសច្បាប់ដែលតែងប្រើអំពើហិង្សាលើសកម្មជនដីធ្លី សកម្មជននយោបាយ មន្ត្រីអង្គការសង្គមស៊ីវិល និងប្រជាពលរដ្ឋ។ ទោះជាយ៉ាងណា សំណើនេះត្រូវបានក្រសួងមហាផ្ទៃបដិសេធ ដោយក្រសួងលើកឡើងថា ការប៉ះទង្គិចទាំងឡាយកាលពីពេលកន្លងទៅ គឺដោយសារក្រុមមន្ត្រីអង្គការសង្គមស៊ីវិល ឬសកម្មជនគណបក្សសង្គ្រោះជាតិ មិនស្ដាប់តាមការណែនាំរបស់សមត្ថកិច្ច ឬបង្កភាពអនាធិបតេយ្យក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។