កូនប្រុសសកម្មជនគណបក្សសង្គ្រោះជាតិដែលជនមិនស្គាល់មុខលបគប់ដុំថ្មបណ្ដាលឱ្យរបួសធ្ងន់កាលពីថ្ងៃទី២៧មេសានោះ មិនទាន់បានធូរស្រាលពីរបួសនៅឡើយទេ ក្រោយពេលទៅព្យាបាលអស់មួយយប់។ ម្ដាយជនរងគ្រោះព្រួយបារម្ភខ្លាចរបួសកូនកាន់តែដុនដាបធ្វើឱ្យគ្មានលទ្ធភាពព្យាបាលជំងឺនៅពេលខាងមុខ។
ម្ដាយយុវជនរងគ្រោះ កាក់ សុវណ្ណឆៃ គឺលោកស្រី ព្រុំ ចាន់ថា ប្រាប់អាស៊ីសេរីនៅព្រឹកថ្ងៃទី២៨ ខែមេសាថា កូនរបស់គាត់ត្អូញត្អែរថា ឈឺក្បាលនិងវិលមុខខុសប្រក្រតីពេញមួយយប់ក្រោយពេលចេញពីមន្ទីរពេទ្យមកសម្រាកនៅផ្ទះ។ ស្ត្រីវ័យ ៤៩ ឆ្នាំរូបនេះ ព្រួយបារម្ភខ្លាចស្ថានភាពជំងឺរបស់កូនគាត់កាន់តែធ្ងន់ធ្ងរ ធ្វើឱ្យក្លាយទៅបន្ទុកនៅក្នុងគ្រួសារបន្ថែមទៀត។ លោកស្រីត្រៀមលក់ម៉ូតូមួយគ្រឿងដែលកំពុងប្រើប្រាស់រាល់ថ្ងៃ ដើម្បីយកប្រាក់ព្យាបាលរបួសឱ្យកូន ពីព្រោះនៅពេលនេះលោកស្រីគ្មានប្រាក់នោះទេ ដោយសារចាប់តាំងពីផ្ទុះជំងឺកូវីដ១៩ខ្លាំងនៅរាជធានីភ្នំពេញមក លោកស្រីមិនបានធ្វើការអ្វីឡើយ៖ «គប់អីចឹងបើបើសិនជាតែម្ដងមិនអីទេខ្លាចលោកវានៅរ៉ាំរ៉ៃឬក៏នៅមើលអីទៀត បញ្ចូលឈាមអីទៀត ព្រោះម្សិលគាត់បាត់បង់ឈាមច្រើនណាស់ ។ពេទ្យថា ដែរបើសិនជាវាបាត់បង់ឈាមច្រើនអីចឹងអាចនឹងបញ្ចូលឈាមអាចនឹងអី ហើយគេអត់មានឈាមទេទាល់តែពេទ្យធំៗ។ខ្ញុំមិនដឹងគិតយ៉ាងណាទេឥឡូវនេះ ចាំមើលស្ថានភាពគាត់តិចសិន ខ្ញុំអាចនឹងលក់អស់ទៀតហើយ ព្រោះខ្ញុំមានភារៈច្រើនណាស់ ណាមួយប្ដីខ្ញុំផង ម្ដាយខ្ញុំផង ជរាឈឺចាំតែហូបចាំតែចាក់ថ្នាំ ព្រោះគាត់ទឹកនោមផ្អែម ហើយរាល់ថ្ងៃបង្គោលគ្រួសារតែខ្ញុំម្នាក់គត់ » ។
លោកស្រី ព្រុំ ចាន់ថា ក៏ត្រៀមប្ដឹងរឿងហិង្សាលើកូនលោកស្រីនេះទៅការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា ដើម្បីឱ្យជួយអន្តរាគមន៍ដល់គាត់ក្នុងពេលឆាប់ៗ នេះដែរ។
យុវជន កាក់ សុវណ្ណឆៃ អាយុ ១៦ ឆ្នាំ គឺជាកូនរបស់សមាជិកក្រុមប្រឹក្សារាជធានីភ្នំពេញជាប់ឆ្នោតគណបក្សសង្គ្រោះជាតិលោក កាក់ កម្ភារ ដែលកំពុងជាប់ឃុំនៅពន្ធនាគារព្រៃស។ យុវជនរូបនេះត្រូវបានជនល្មើសមានគ្នា ២ នាក់ជិះម៉ូតូលបគប់នឹងដុំថ្មពីក្រោយខ្នង បណ្ដាលឱ្យបែកក្បាលខាងឆ្វេងដេរ ២០ ថ្នេរ ក្នុងពេលដែលរូបគេកំពុងធ្វើដំណើរជាមួយម្ដាយនៅភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ នៅព្រឹកថ្ងៃទី២៧ ខែមេសា។
លោកស្រី ព្រុំ ចាន់ថា បានដាក់ពាក្យប្ដឹងទៅប៉ូលិសសង្កាត់បឹងទំពុនទី១ហើយ កាលពីរសៀលថ្ងៃទី២៧ ខែមេសា ដើម្បីឱ្យសមត្ថកិច្ចតាមចាប់ជនល្មើសមកផ្ដន្ទាទោសតាមច្បាប់។ លោកស្រីប្រាប់ថា រហូតមកដល់ពេលនេះ ប៉ូលិសមិនទាន់ផ្ដល់ដំណឹងពីការស្រាវជ្រាវចាប់ជនល្មើសថាយ៉ាងណានៅឡើយទេ។
ទាក់ទងនឹងបញ្ហានេះ អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ប្រាប់អាស៊ីសេរីថា សមត្ថកិច្ចកំពុងស្រាវជ្រាវតាមរយៈកាមេរ៉ាសុវត្ថិភាព ដើម្បីរកមុខសញ្ញាជនប្រព្រឹត្តមកផ្ដន្ទាទោសតាមច្បាប់ហើយ៖ «ករណីវាមិនបានដូចអ្វីដែលយើងចង់បានទេ ក្នុងដែនសមត្ថកិច្ចធ្វើការ គឺយើងធ្វើការ តាមជាក់ស្ដែងយើងស្រាវជ្រាវយើងមាននីតិវិធីបោះយើងស្រាវ។ អីចឹងយើងមិនអាចចង់បានថាដាក់មួយថ្ងៃបានភ្លាមនោះទេ ពេលខ្លះក៏វាលឿនទៅពេលខ្លះក៏វាយឺតទៅអាហ្នឹងមិនមែនតែស្រុកយើងទេ។ ករណីជាទូទៅដូចនៅប្រទេសមួយចំនួនក៏ដូចគ្នាដែរ មិនមែនករណីទាំងអស់សុទ្ធតែចាប់បានលឿន ហើយមិនមែនតែករណីទាំងអស់សុទ្ធតែរកឃើញទេ » ។
ទោះជាយ៉ាងណា ប្រធានផ្នែកសិទ្ធិមនុស្សនៃសមាគមការពារសិទ្ធិអាដហុក (Adhoc) លោក នី សុខា យល់ថា សមត្ថកិច្ចគួរតែចាប់ជនល្មើសមកផ្ដន្ទាទោសឱ្យបានឆាប់ ដើម្បីកុំឱ្យជនបង្ក ចេះតែដើរវាយធ្វើបាបគេតាមអំពើចិត្តទៀត។ លោកជឿថា អាជ្ញាធរអាចចាប់ជនល្មើសបានយ៉ាងងាយស្រួល ប្រសិនបើសមត្ថកិច្ចមានចេតនាស្រាវជ្រាវពិតប្រាកដ ពីព្រោះនៅទីតាំងកើតហេតុមានកាមេរ៉ាសុវត្ថិភាពជាច្រើនកន្លែងបង្ហាញមុខរបស់ជនបង្ក៖ «បើតាមខ្ញុំមើលសមត្ថកិច្ចស្រុកខ្មែរក៏មានសមត្ថភាពគ្រាន់បើដែរ ប៉ុន្តែសមត្ថភាពគាត់ហ្នឹងវាដោយរឿងអានេះហើយធ្វើឱ្យមហាជនដាក់ការសង្ស័យថាមកពីមានការរើសអើងមកពីមានការគិតថាក្រុមនេះក្រុមនោះហើយតាមមើល។ អីចឹងហើយបានជាខ្ញុំចង់បញ្ជាក់ថា បើសិនសមត្ថកិច្ចដើម្បីជម្រះកុំមានការសង្ស័យ សមត្ថកិច្ចត្រូវតែខិតខំធ្វើម៉េចរកឱ្យឃើញជនប្រព្រឹត្តមកផ្ដន្ទាទោសទៅអាហ្នឹងគេលែងសង្ស័យហើយ » ។
យុវជន កាក់ សុវណ្ណឆៃ ធ្លាប់ត្រូវបានប៉ូលិសចាប់ឃុំខ្លួននៅប៉ុស្តិ៍នគរបាលចាក់អង្រែលើ ខណ្ឌមានជ័យ ម្ដងរួចមកហើយ ដោយអាជ្ញាធរចោទថា រូបគេលបចូលទៅយកទង់គណបក្សសង្គ្រោះជាតិនៅទីស្នាក់ការកណ្ដាលគណបក្សនេះដែលអាជ្ញាធរហាមឃាត់។ ក្នុងពេលចាប់ខ្លួននោះ ប៉ូលិសបានប្រើហិង្សា និងដាក់ខ្នោះដៃយុវជនរូបនេះទៀតផង។ ទង្វើបែបនេះរបស់អាជ្ញាធរត្រូវបានក្រុមអ្នកការពារសិទ្ធិមនុស្សរិះគន់ថាជា អំពើទារុណកម្ម និងជាការរំលោភសិទ្ធិមនុស្សធ្ងន់ធ្ងរ។
ចាប់តាំងពីឆ្នាំ២០២០ រហូតមកដល់ពេលនេះ មានសកម្មជន និងសាច់ញាតិសកម្មជនគណបក្សសង្គ្រោះជាតិប្រហែល ៣០ នាក់ហើយ ដែលត្រូវបានជនមិនស្គាល់មុខលបវាយឲ្យរបួស ហើយករណីទាំងនេះភាគច្រើនកើតឡើងនៅភ្នំពេញ។ រហូតមកដល់ពេលនេះ មានតែជនល្មើស ២ នាក់ ប៉ុណ្ណោះនៅខេត្តកំពង់ឆ្នាំង ដែលអាជ្ញាធរចាប់ខ្លួនបាន ហើយ ករណីក្រៅពីនេះគ្មានជនប្រព្រឹត្តណាត្រូវបានអាជ្ញាធររកឃើញ ឬក៏ចាប់ខ្លួនឲ្យយកមកទទួលទោសនោះទេ។ សកម្មជន និងមន្ត្រីជាន់ខ្ពស់គណបក្សសង្គ្រោះជាតិ បានចាត់ទុកករណីទាំងនេះថា ជាអំពើហិង្សាខាងនយោបាយក្នុងបំណងគំរាមកំហែងដល់សកម្មជនបក្សប្រឆាំងឱ្យបញ្ឈប់សកម្មភាពនយោបាយរបស់ពួកគេតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។