មន្ត្រីសង្គមស៊ីវិលស្នើឲ្យសមត្ថកិច្ចគួរអប់រំណែនាំពលរដ្ឋ ដែលបញ្ចេញមតិតាមបណ្ដាញសង្គមហ្វេសប៊ុកជាមុនសិន មុននឹងអនុវត្តតាមច្បាប់ប្រឆាំងនឹងពួកគេ។ ការលើកឡើងនេះ ក្រោយពេលសមត្ថកិច្ចខេត្តព្រះវិហារ ចាប់ខ្លួនអ្នកប្រើប្រាស់ហ្វេសប៊ុកម្នាក់ពីបទញុះញង់ និងជេរប្រមាថថ្នាក់ដឹកនាំរដ្ឋាភិបាល ដោយសារតែការបញ្ចេញមតិតាមបណ្ដាញសង្គម។
ក្រុមមន្ត្រីសិទ្ធិមនុស្សលើកឡើងថា ក្នុងសង្គមប្រជាធិបតេយ្យ រដ្ឋាភិបាលគួរបើកសិទ្ធិទូលំទូលាយដល់ពលរដ្ឋក្នុងបញ្ចេញមតិ។
ប្រធានសមាគមការពារសិទ្ធិមនុស្ស អាដហុក លោក នី សុខា ថ្លែងថា លោកមិនគាំទ្រការបញ្ចេញមតិ ដែលធ្វើឱ្យប៉ះពាល់ស្ថានភាពសង្គមនោះទេ ប៉ុន្តែ ករណីពលរដ្ឋសាមញ្ញម្នាក់រិះគន់បញ្ហាសង្គមមិនអាចធ្វើឱ្យប៉ះពាល់ធ្ងន់ធ្ងរដល់សង្គម ហើយការចាប់ខ្លួនអ្នកហ៊ានបញ្ចេញមតិ នឹងធ្វើប៉ះពាល់ដល់សិទ្ធិបញ្ចេញមតិ៖ « ដូច្នេះអ្នកដែលខាតបង់ គឺរដ្ឋាភិបាលទៅវិញទេ ព្រោះថា រដ្ឋាភិបាលនឹងបាត់ព័ត៌មានមួយចំនួនពិសេសគឺព័ត៌មានពិតៗ មួយចំនួន ដែលពលរដ្ឋចង់បញ្ចេញមតិបែរជាគាត់ភ័យខ្លាចគាត់មិនហ៊ាននិយាយដោយសារគាត់ឃើញមានការចាប់ខ្លួនជាហូរជាហែ»។
សមត្ថកិច្ចខេត្តព្រះវិហារបានចាប់ខ្លួនអ្នកប្រើប្រាស់បណ្ដាញសង្គមម្នាក់ ដែលមានគណនេយ្យហ្វេសប៊ុកឈ្មោះ ស្លាបប៉ាកការទេវរាជ កាលពីថ្ងៃទី២៦ ខែកក្កដា ស្ថិតក្នុងភូមិស្វាយប៉ាត ឃុំរំដោះ ស្រុករវៀង។ យុវជន ផុន កុលចំរើន អាយុ ៣២ ឆ្នាំមានស្រុកកំណើតនៅភូមិសៀមរាប សង្កាត់សៀមរាប ក្រុងសៀមរាប ខេត្តសៀមរាប ប៉ុន្តែ បានទៅរស់នៅខេត្តកោះកុង និងរត់គេចខ្លួនទៅខេត្តព្រះវិហារនៅរយៈពេលចុងក្រោយ បន្ទាប់ពីការមានការព្រមានពីមន្ត្រីរដ្ឋាភិបាលនៃការបង្ហោះសាររបស់លោកតាមបណ្ដាញសង្គមហ្វេសប៊ុក។ លោកត្រូវបានអាជ្ញាធរចោទប្រកាន់ពីបទញុះញង់ និងជេរប្រមាថប្រមុខរាជរដ្ឋាភិបាល។
មុនពេលមានការចាប់ខ្លួនលោក ផុន កុលចំរើន បានបង្ហោះសារ និងវីដេអូតាមហ្វេសប៊ុករិះគន់ពីហានិភ័យនៃការចាក់វ៉ាក់សាំងចិន ផែនការចាក់វ៉ាក់សាំង និងរិះគន់ការដឹកនាំប្រទេសរបស់លោក ហ៊ុន សែន។
ជុំវិញបញ្ហានេះ អាស៊ីសេរីបានព្យាយាមសុំការបំភ្លឺពីអភិបាលខេត្តព្រះវិហារ លោក ប្រាក់ សុវណ្ណ អ្នកនាំពាក្យសាលាខេត្តព្រះវិហារ លោក យ៉ុង គឹមហឿង អ្នកនាំពាក្យនគរបាលជាតិ លោក ឆាយ គឹម ខឿន ប៉ុន្តែទូរស័ព្ទចូលគ្មានអ្នកទទួល។
ទោះយ៉ាងណាក្ដី អធិការរងស្រុករវៀង លោក ថោង សុខ ឱ្យអាស៊ីសេរីដឹងថ្ងៃទី២៩ ខែកក្កដាថា សមត្ថកិច្ចបានបញ្ជូនយុវជនរូបនេះទៅតុលាការរួចហើយ ក្រោយការចាប់ខ្លួនកាលពីថ្ងៃទី២៦ ខែកក្កដា។
ពាក់ព័ន្ធនឹងការចាប់ខ្លួននេះដែរ នាយរងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត សង្កេតឃើញថា ពេលនេះសេរីភាពនៃការបញ្ចេញមតិរបស់ពលរដ្ឋតាមប្រព័ន្ធអ៊ីនធើណែតកំពុងជួបហានិភ័យ។ លោកស្នើអាជ្ញាធរដែលជាអ្នកអនុវត្តច្បាប់គួរមានការអប់រំផ្សព្វផ្សាយបន្ថែមទៀត ឲ្យពលរដ្ឋចេះដឹងពីសិទ្ធិសេរីភាពតាមប្រព័ន្ធអ៊ីនធើណែត ដើម្បីចៀសវាងរំលោភច្បាប់ទាំងគ្មានចេតនា៖ «មិនមានព័ត៌មានគ្រប់គ្រាន់មិនទទួលបានព័ត៌មាន មិនទទួលបានព័ត៌មានអីដល់ពេលគាត់បញ្ចេញមតិទៅអាចភណ្ឌច្រឡំអាចនឹងខុសអីជាដើម ចំណុចនេះហើយ ដែលទាមទារឱ្យមានការផ្សព្វផ្សាយ អប់រំបន្ថែមក្នុងការប្រើប្រាស់តាមបណ្ដាញសង្គម ឬក៏អ៊ិនធើណែត ដើម្បីឱ្យអ្នកប្រើប្រាស់ហ្នឹង ប្រើប្រាស់ទៅមានប្រសិទ្ធភាពហើយត្រូវគោលដៅ»។
គិតមកដល់ពេលនេះ សកម្មជនបក្សប្រឆាំងសកម្មជនបរិស្ថាន សកម្មជនដីធ្លី និងអ្នកប្រើប្រាស់បណ្ដាញសង្គមចំនួន៨៣នាក់ហើយត្រូវរដ្ឋាភិបាលលោក ហ៊ុន សែន ចាប់ខ្លួនដែលភាគច្រើនរងការចោទប្រកាន់ពីបទញុះញង់ និងរួមគំនិតក្បត់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។