ប្រជាសហគមន៍ក្បាលត្រាច នៅស្រុកក្រគរ ខេត្តពោធិ៍សាត់ ចោទអាជ្ញាធរថា មិនអនុញ្ញាតឲ្យពួកគាត់ ប្រារព្ធទិវាសិទ្ធិនារីអន្តរជាតិ ដែលគ្រោងរៀបចំនៅថ្ងៃទី៦ ខែមីនា។ មន្ត្រីសិទ្ធិមនុស្សចាត់ទុកថា ទង្វើរបស់អាជ្ញាធរ គឺជាការបំបិទសិទ្ធិសេរីភាពជាមូលដ្ឋានរបស់ពលរដ្ឋ។
ប្រជាសហគមន៍ក្បាលត្រាច នៅខេត្តពោធិ៍សាត់ សោកស្តាយដែលអភិបាលស្រុកក្រគរ លោក លីវ សេងហីម មិនអនុញ្ញាតឲ្យពួកគាត់ជួបជុំគ្នាប្រារព្ធទិវាសិទ្ធិនារី ៨ មីនា តាមការស្នើសុំដោយលើកហេតុផលថា បារម្ភពីការរាតត្បាតជំងឺកូវីដ-១៩។
តំណាងសហគមន៍ក្បាលត្រាច លោក គុជ វែង ថ្លែងប្រាប់អាស៊ីសេរីថា ប្រជាពលរដ្ឋនៅក្នុងឃុំក្បាលត្រាច មិនបានប្រារព្ធទិវាសិទ្ធិនារីអន្តរជាតិ នៅថ្ងៃទី៦ ខែមីនា តាមគ្រោងទុកនោះទេ ដោយសារតែអាជ្ញាធរមិនអនុញ្ញាត។ លោក គុជ វែង ឲ្យដឹងថា ពួកលោក បានព្យាយាមស្នើសុំរៀបចំទិវាសិទ្ធិនារីអន្តរជាតិ ជាច្រើនលើក ប៉ុន្តែអភិបាលស្រុកក្រគរ លោក លីវ សេងហីម ហាក់ព្យាយាមគេចវេសមិនចង់ជួបពួកគាត់នោះទេ និងចុងក្រោយឆ្លើយប្រាប់ពួកគាត់យ៉ាងខ្លីថា មិនអាចរៀបកម្មវិធីនេះបានទេ ព្រោះកូវីដកំពុងឆ្លងរាតត្បាត។ ពលរដ្ឋរូបនេះអះអាងថា ការលើកហេតុផលរបស់អាជ្ញាធរនេះ មិនសមហេតុផល និងមិនអាចទទួលយកបានឡើយ៖ «ហេតុអីកម្មវិធីការ កម្មវិធីបុណ្យ នៅក្នុងស្រុកខ្ញុំនេះ ប៉ុន្មានបីបួនប្រាំកន្លែងហើយហេតុអីបានគេធ្វើបាន ដោយគាត់មិនហាមឃាត់រឿងខ្លាច កូវីដនេះផង។ ចុះចំណែកខ្ញុំដែលប្រារព្ធបុណ្យជាតិ សម្រាប់សិទ្ធិមនុស្ស សម្រាប់សិទ្ធិ ទាំងអស់គ្នា ហេតុអីមិនឲ្យពួកគាត់ធ្វើ។ នេះខ្ញុំមិនដឹងថា គាត់គិតយ៉ាងម៉េចចំពោះខ្ញុំ»។
ប្រជាសហគមន៍ក្បាលត្រាច គឺជាអតីតអ្នកដែលរងគ្រោះដីធ្លីដ៏យូរអង្វែងជាមួយនឹងក្រុមហ៊ុនភាពីម៉ិច (Pheapimex Group)របស់លោកស្រី ជឹង សុភាព ហៅយាយភូ។ លោក គុជ វែង បញ្ជាក់ថា មូលហេតុដែលលោកចង់ប្រារព្ធទិវាសិទ្ធិនារីអន្តរជាតិនេះ ព្រោះលោកចង់បញ្ច្រាបការយល់ដឹងអំពីសិទ្ធិស្ត្រី និងបញ្ឈប់អំពើហិង្សាក្នុងគ្រួសារ ការរំលោភសេពសន្ថវៈ ការបៀតបៀនលើស្ត្រីជាដើម។
ទាក់ទងរឿងនេះ វិទ្យុអាស៊ីសេរី មិនអាចសុំការឆ្លើយតបពីអភិបាលស្រុកក្រគរ លោក លីវ សេងហីម បានទេ ដោយលោកប្រាប់ថា ស្តាប់មិនបាន៖ « អូ ! ខ្ញុំនៅភ្នំស្តាប់មិនបាន។ ខ្ញុំនៅភ្នំអត់សេវា»។
ទោះជាយ៉ាងណា ទង្វើរបស់អាជ្ញាធរមូលដ្ឋាននេះ គឺជាការអនុវត្តផ្ទាល់ពីការណែនាំរបស់លោកនាយករដ្ឋមន្ត្រីហ៊ុន សែន និងរដ្ឋមន្ត្រីក្រសួងមហាផ្ទៃ លោក ស ខេង ដែលបានប្រកាសបើកឲ្យប្រជាពលរដ្ឋ អ្នកនយោបាយ ធ្វើសកម្មភាពជួបជុំគ្នាឡើងវិញ។ លើសពីនេះ មេដឹកនាំកំពូលទាំងពីររូប ក៏បញ្ជាឲ្យអាជ្ញាធរតាមមូលដ្ឋាន បង្កលក្ខណៈងាយស្រួលដល់ការជួបប្រជុំរបស់គណបក្សនយោបាយ និងប្រជាពលរដ្ឋផងដែរ។
មន្ត្រីឃ្លាំមើលការរំលោភសិទ្ធិមនុស្សនៃអង្គការលីកាដូ (Licadho) ប្រចាំខេត្តពោធិ៍សាត់ លោក ចឹក ចិត្ត្រា ថ្លែងថា អាជ្ញាធរ គួរតែបើកសិទ្ធិឲ្យប្រជាពលរដ្ឋប្រារព្ធទិវានេះ ព្រោះវាជាសិទ្ធិស្របច្បាប់របស់ពលរដ្ឋ៖ «ចំពោះបញ្ហានេះហាក់បីដូចជាមានការរឹតត្បិតសិទ្ធិសេរីភាពរបស់ប្រជាពលរដ្ឋដោយមិនឲ្យគាត់បញ្ចេញសិទ្ធិសេរីភាពរបស់គាត់ក្នុងអំឡុងពេលនៃទិវាសិទ្ធិរបស់គាត់។នេះជារឿងមួយដែលយើងអង្គការសង្គមស៊ីវិល យល់ឃើញថា ការរឹតត្បិតសិទ្ធិសេរីភាពនេះតឹងរ៉ឹង។ យើងសូមស្នើទៅខាងអាជ្ញាធរមូលដ្ឋានទាំងអស់ គួរតែទម្លាក់ចោលនូវចិត្តគំនិតនៃការរឹតត្បិតសិទ្ធិសេរីភាពរបស់ ពួកគាត់នៅតាមមូលដ្ឋាននេះ»។
ជារៀងរាល់ឆ្នាំ ក្រុមអង្គការសង្គមស៊ីវិល សមាគម និងប្រជាសហគមន៍នៅតាមមូលដ្ឋាន តែងប្រារព្ធពិធីផ្សេងៗពីគ្នាដើម្បីរំលឹកខួបនៃទិវាសិទ្ធិនារីអន្តរជាតិ ថ្ងៃទី៨ ខែមីនា។ពួកគាត់ នៅតែទទូចអោយរដ្ឋាភិបាលយកចិត្តទុកដាក់លើកស្ទួយសិទ្ធិស្ត្រីនៅតាមមូលដ្ឋាន និងសិទ្ធិស្ត្រីកំពុងបម្រើការងារគ្រប់វិស័យ ជាពិសេសស្ត្រីសកម្មក្នុងការទាមទារសិទ្ធិសេរីភាព និងយុត្តិធម៌សង្គម។ ទោះជាយ៉ាងណា អាជ្ញាធរនៅតាមមូលដ្ឋានមួយចំនួន ហាក់ពុំសូវមានការយល់ដឹង និងតែងតែរើសអើង ហើយរារាំងក្រុមសង្គមស៊ីវិល និងពលរដ្ឋមិនឲ្យប្រារព្ធទិវាសិទ្ធិនារីអន្តរជាតិឡើយ។ ប្រជាសហគមន៍ក្បាលត្រាច និងមន្ត្រីសង្គមស៊ីវិល ស្នើសុំឲ្យអាជ្ញាធរបញ្ឈប់ការរើសអើង ហើយចាប់ផ្តើមបើកសិទ្ធិសេរីភាពជូនប្រជាពលរដ្ឋឡើងវិញ៕