តុលាការខេត្តបន្ទាយមានជ័យសម្រេចបញ្ជូនសមាជិកសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ម្នាក់ និងប្រជាពលរដ្ឋ៤នាក់ទៀតទៅឃុំខ្លួនបណ្ដោះអាសន្ននៅពន្ធនាគារខេត្តបន្ទាយមានជ័យ នៅរសៀលថ្ងៃទី២ មិថុនា ពាក់ព័ន្ធនឹងការចុះចែកស្បៀងអាហារដល់ពលរដ្ឋក្រីក្រ។ មន្ត្រីសង្គមស៊ីវិល ចាត់ទុករឿងនេះថា ជាការគំរាមកំហែង និងប៉ះពាល់សិទ្ធសេរីភាពរបស់ពលរដ្ឋដែលចូលរួមសកម្មភាពមនុស្សធម៌។
សមត្ថកិច្ចសម្រេចបញ្ជូនសមាជិកសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធនៅក្រុងប៉ោយប៉ែតលោក វន វ័ន្ត និងប្រជាពលរដ្ឋ ៤នាក់ទៀតទៅឃុំខ្លួននៅពន្ធនាគារខេត្តបន្ទាយមានជ័យ ដោយចោទប្រកាន់ពីបទរុករានដីព្រៃដោយខុសច្បាប់។ ការឃុំខ្លួននេះធ្វើឡើងក្រោយពេលមន្ត្រីតុលាការបានសាកសួរពួកគាត់អស់រយៈពេល ២ថ្ងៃ។ សមាជិកអង្គការសង្គមស៊ីវិល និងពលរដ្ឋក្រីក្រទាំងនេះត្រូវបានអាជ្ញាធរចាប់ខ្លួន ក្នុងពេលពួកគាត់ចុះផ្ដល់ជំនួយមនុស្សធម៌ដល់ពលរដ្ឋក្រីក្រ២គ្រួសារនៅឃុំទួលពង្រ ស្រុកម៉ាឡៃ ខេត្តបន្ទាយមានជ័យ កាលពីថ្ងៃទី៣០ឧសភា។
ថ្មីៗនេះលោក វន វ័ន្ត ត្រូវបានប៉ូលិសនៃអធិការនគរបាលក្រុងប៉ោយប៉ែតបង្ខំឱ្យគាត់ធ្វើកិច្ចសន្យាបញ្ឈប់ធ្វើសកម្មភាពមនុស្សធម៌ម្ដងរួចមកហើយ ពាក់ព័ន្ធនឹងរឿងលោកចុះស្រង់ឈ្មោះប្រជាពលរដ្ឋក្រីក្រ ដើម្បីផ្ញើទៅម្ចាស់ជំនួយផ្ដល់ស្បៀងអាហារ។
កន្លងមកលោក វន វ័ន្ត ក៏ធ្លាប់ជាតំណាងសហគមន៍ដីធ្លីផ្លូវរថភ្លើងនៅសង្កាត់ផ្សារកណ្ដាលក្រុងប៉ោយប៉ែតដែរ។ បន្ថែមពីនេះលោកតែងដឹកនាំប្រជាពលរដ្ឋតវ៉ាទាមទារឱ្យអាជ្ញាធរក្រុងប៉ោយប៉ែតដោះស្រាយទំនាស់ដីធ្លីរបស់ពួកគាត់ជាង១០០ លើករួចមកហើយ ប៉ុន្តែរហូតមកដល់ពេលនេះពុំមានដំណោះស្រាយនៅឡើយទេ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក(Adhoc) លោក ស៊ឹង សែនករុណា ប្រាប់អាស៊ីសេរីនៅរសៀលថ្ងៃទី៣ មិថុនាថា សមាគមរបស់លោកបានតាមដានរឿងនេះតាំងពីថ្ងៃដំបូងមក ដោយមើលឃើញថា ពលរដ្ឋទាំង ៥នាក់នោះមិនបានប្រព្រឹត្តខុសច្បាប់អ្វីឡើយ។ មន្ត្រីសង្គមស៊ីវិលរូបនេះចាត់ទុកការឃុំខ្លួនពលរដ្ឋទាំងនោះថា ជាការគំរាមកំហែង និងបន្ទច់បង្អាក់ដល់ប្រជាពលរដ្ឋដែលឈឺឆ្អាលការងារសង្គម ធ្វើឱ្យពួកគាត់មានការភ័យខ្លាច៖ «ខ្ញុំគិតថា ក្នុងរឿងនេះមិនមានច្បាប់ណាចែងពីការធ្វើអំណោយក្នុងន័យសប្បុរសធម៌ជាបទល្មើសទេ។ អីចឹងបើច្បាប់មិនចែងថា វាជាបទល្មើសហេតុអីត្រូវមានការចោទប្រកាន់ ហើយយើងចេះតែបំភ្លៃវាទៅជារឿងចេតនាផ្សេងផ្ទុយពីចេតនាដើម នៃអ្នកដែលធ្វើសកម្មភាពសប្បុរសធម៌ហ្នឹង អ្នកទាំងអស់ហ្នឹងទេ ជាអំពើខុសច្បាប់ទៅវិញ»។
លោក ស៊ឹង សែនករុណា អំពាវនាវសុំឱ្យតុលាការបើកការស៊ើបអង្កេតរឿងនេះស៊ីជម្រៅ និងស្នើឱ្យដោះលែងពួកគាត់ឱ្យមានសេរីភាពវិញជាបន្ទាន់។
អាស៊ីសេរីមិនអាចទាក់ទងព្រះរាជអាជ្ញាអមសាលាដំបូងខេត្តបន្ទាយមានជ័យ លោក កើត សុវណ្ណរេត ដើម្បីសុំអត្ថាធិប្បាយជុំវិញការចាប់ខ្លួនពលរដ្ឋនេះបានទេនៅថ្ងៃទី៣ មិថុនា ដោយអ្នកទទួលទូរស័ព្ទមិននិយាយ។
ប៉ុន្តែនាយករងខុទ្ទកាល័យលោកនាយករដ្ឋមន្ត្រី ហ៊ុន សែន គឺ លោក ប៉ាន ខែមប៊ុនថន ដែលជាអ្នកប្ដឹងឱ្យអាជ្ញាធរចាត់វិធានការទៅលើពលរដ្ឋទាំង៥នាក់នោះ បានបង្ហោះវីដេអូឃ្លីបបកស្រាយរឿងនេះក្នុងបណ្ដាញសង្គមហ្វេសប៊ុក កាលពីថ្ងៃទី២ មិថុនា ថា ការចាប់ខ្លួននេះជារឿងត្រឹមត្រូវ ព្រោះលោកចោទថា ពួកគេជាមេខ្លោងដឹកនាំពលរដ្ឋទៅទន្ទ្រានដីព្រៃយកធ្វើជាកម្មសិទ្ធិដោយខុសច្បាប់៖ «ការវាស់វែងបែងចែកដីបង្កើតកម្លាំងកាប់ទន្ទ្រានដីព្រៃកន្លងមក អស់លោកដែលនិន្ទាដែលថា នេះហើយ តែងតែចោទប្រកាន់រដ្ឋាភិបាលថា ការដឹកនាំធ្វើឱ្យបាត់ព្រៃឈើ ឱ្យរលំរលាយអីចេះអីចុះគឺជាការចោទប្រកាន់។ ប៉ុន្តែនៅពេលយើងអនុវត្តវិធានការច្បាប់ទៅលើអ្នកកាប់បំផ្លាញព្រៃឈើទៅលើ អ្នកទន្ទ្រានដីខុសច្បាប់ដែលយើងបានឃើញជាក់ស្ដែង តែបែរគេចោទថា យើងធ្វើបាបប្រជាពលរដ្ឋស្លូតត្រង់គេចោទថា យើងផ្ដាច់ការទៅវិញ»។
ជុំវិញការចោទប្រកាន់នេះ សាច់ញាតិរបស់ជនជាប់ឃុំទាំងនោះហាក់មានការភ័យខ្លាចដោយពួកគាត់មិនហ៊ានផ្ដល់សម្ភាសន៍ដល់អ្នកយកព័ត៌មានវិទ្យុអាស៊ីសេរី អំពីការចាប់ខ្លួនប្ដីរបស់ពួកគាត់នោះទេ៖ «រឿងហ្នឹងខ្ញុំអត់សូវដឹងដែរ គ្រាន់តែខ្ញុំទៅអើតៗគាត់គេយកទៅណា។ អត់ផងបងគេមិនគំរាមខ្ញុំអីផង គេឱ្យទៅមើលអីធម្មតា ខ្ញុំទៅសួរសុខទុក្ខបាន ២ដង។ ខ្ញុំអត់សូវដឹងដែរបង ប៉ុណ្ណឹងបានហើយខ្ញុំរវល់»។
ប៉ុន្តែប្រពន្ធរបស់លោក វន វ័ន្ត គឺលោកស្រី ស៊ុំ សុធី ប្រាប់អាស៊ីសេរីកាលពីថ្ងៃទី១ មិថុនាថា ប្ដីរបស់គាត់បានយកអង្ករ ប្រេងឆា ទឹកត្រី និងទឹកស៊ីអ៊ីវមួយចំនួន ដែលជាជំនួយរបស់សប្បុរសជនចុះចែកដល់ជូនប្រជាពលរដ្ឋក្រីក្រនៅទីជនបទដាច់ស្រយាលនៅឃុំទួលពង្រ។ បន្ថែមពីនេះលោកស្រីថា ប្ដីគាត់មិនបានទន្ទ្រានព្រៃយកដីធ្វើជាកម្មសិទ្ធដូចការចោទប្រកាន់របស់អាជ្ញាធរឡើយ។
មន្ត្រីសិទ្ធិមនុស្ស លោក ស៊ឹង សែនករុណា យល់ថា ការចាប់ខ្លួនពលរដ្ឋតាមបញ្ជាបុគ្គលមានអំណាចណាមួយដោយពុំបានស៊ើបអង្កេតស៊ីជម្រៅនោះ គឺជារឿងមិនត្រឹមត្រូវ និងជារឿងអយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។