អង្គការអ្នកសារព័ត៌មានគ្មានព្រំដែន (Reporters Without Borders) វាយតម្លៃថា គណៈកម្មការតាមដានក្រមសីលធម៌ វិជ្ជាជីវៈអ្នកសារព័ត៌មាន ដែលទើបបង្កើតឡើងដោយក្រសួងព័ត៌មាន គឺជាឧបករណ៍ថ្មីមួយទៀតសម្រាប់រដ្ឋាភិបាលលោក ហ៊ុន សែន ប្រើប្រាស់ ដើម្បីធ្វើទុក្ខបុកម្នេញអ្នកសារព័ត៌មាន។
អង្គការអ្នកសារព័ត៌មានគ្មានព្រំដែន បញ្ជាក់ក្នុងសេចក្ដីថ្លែងការណ៍ ចេញកាលពីថ្ងៃទី១១ ខែសីហា ថាអង្គការនេះ សោកស្ដាយ ដែលក្រសួងព័ត៌មានសម្រេចបង្កើតគណៈកម្មការថ្មីមួយនេះ ដោយពុំមានតម្លាភាព ឯករាជ្យភាព និងគណនេយ្យភាព ព្រមទាំងបង្ហាញយ៉ាងច្បាស់ថា គណៈកម្មការនេះ ត្រូវបានបង្កើតឡើង ដើម្បីធ្វើជាឧបករណ៍តាមដាន រិតត្បឹតការងារអ្នកសារព័ត៌មាន។ អង្គការនេះថា ក្នុងការអនុវត្តជាក់ស្តែង គណៈកម្មការនេះ នឹងប្រើប្រាស់សិទ្ធិកោះហៅ និងដាក់ទណ្ឌកម្មលើអ្នកកាសែត ឬអង្គភាពព័ត៌មានណា ដែលរាយការណ៍ព័ត៌មានធ្វើឱ្យរដ្ឋាភិបាលមិនសប្បាយចិត្ត។
នាយកប្រចាំតំបន់អាស៊ី-ប៉ាស៊ីហ្វិក នៃអង្គការអ្នកសារព័ត៌មានគ្មានព្រំដែនលោក ដានីញ៉ែល បាស្ដាត (Daniel Bastard) បានលើកឡើងនៅក្នុងសេចក្ដីថ្លែងការណ៍ថា គឺជាគុណតម្លៃសម្រាប់សង្គមប្រជាធិបតេយ្យ នៅពេលដែលអ្នកសារព័ត៌មានត្រូវទទួលខុសត្រូវចំពោះខ្លឹមសារ សារព័ត៌មាន ដែលពួកគេបានផលិត ឬបានផ្សព្វផ្សាយ។ ប៉ុន្តែលោកថា គណៈកម្មការថ្មីនេះមិនអាចបំពេញការងារដោយឯករាជ្យពីរដ្ឋាភិបាលបានទេ ពុំមានតម្លាភាពចំពោះការចេញសេចក្ដីសម្រេចណាមួយ និងពុំបានផ្ដល់មធ្យោបាយឱ្យអ្នកសារព័ត៌មានបានប្តឹងទាស់ទៅនឹងការដាក់ពិន័យរបស់ស្ថាប័ននេះឡើយ។ លោកថា ផ្ទុយទៅវិញ គណៈកម្មការនេះគឺជាឧបករណ៍មួយទៀតសម្រាប់តាមដាន រិតត្បឹត និងធ្វើទុក្ខបុកម្នេញអ្នកសារព័ត៌មាន ដែលរបបលោក ហ៊ុន សែន ប្រើប្រាស់ក្នុងការបំបិទសំឡេងប្រព័ន្ធផ្សព្វផ្សាយ ដែលហ៊ានរិះគន់គោលនយោបាយរដ្ឋាភិបាល។
កាលពីថ្ងៃទី២ ខែសីហា រដ្ឋមន្រ្តីក្រសួងព័ត៌មានលោក ខៀវ កញ្ញារីទ្ធ បានសម្រេចបង្កើតគណៈកម្មការថ្មីមួយ ដែលមានភារកិច្ចតាមដាន វាយតម្លៃ និងលើកសរសើរ ការអនុវត្តក្រមសីលធម៌ វិជ្ជាជីវៈ អ្នកសារព័ត៌មាន និងស្ថាប័នសារព័ត៌មាន។
គណៈកម្មការនេះ មានសមាសភាព ១៥រូប ដឹកនាំដោយរដ្ឋលេខាធិការក្រសួងព័ត៌មានជាប្រធាន និងភាគច្រើនជាសមាជិកជារដ្ឋលេខាធិការ អនុរដ្ឋលេខាធិការ ទីប្រឹក្សាក្រសួងព័ត៌មាន ព្រមទាំងតំណាងសមាគមអ្នកកាសែត ៥ រូប ជាសមាជិក។ មន្រ្តីក្រសួងព័ត៌មានអះអាងថា គណៈកម្មការនេះនឹងជួយលើកទឹកចិត្ត និងតម្រង់ទិសអ្នកសារព័ត៌មាន ឱ្យទទួលខុសត្រូវនូវរាល់អ្វី ដែលគេបានផលិត និងផ្សព្វផ្សាយ។
ប៉ុន្តែចំពោះអ្នកសារព័ត៌មានវិញបារម្ភថា គណៈកម្មការនេះអាចជាមធ្យោបាយ ឬឧបករណ៍សម្រាប់ធ្វើទុក្ខបុកកម្នេញអ្នកសារព័ត៌មានឯករាជ្យ ព្រោះស្ថាប័ននេះមានតួនាទីចេញការសរសើរផង និងដាក់ពិន័យផង។ លើសពីនេះ ពុំមានការបញ្ជាក់ឱ្យបានច្បាស់នៅឡើយទេថា តើការដាក់ពិន័យនេះ ធ្វើឡើងដោយរបៀបណា?
កម្ពុជារងការិះគន់ជារឿយៗថាបានធ្វើទុក្ខបុកម្នេញអ្នកសាព័ត៌មាន និងស្ថាប័នព័ត៌មាន ដែលហ៊ានរិះគន់រដ្ឋាភិបាល។ ដោយសារហេតុផលនេះកម្ពុជាជាប់ចំណាត់ថ្នាក់ទី ១៤៤ ក្នុងចំណោមប្រទេស ១៨០ ក្នុងសន្ទស្សន៍សេរីភាពសារព័ត៌មានពិភពលោក ឆ្នាំ២០២១ របស់អង្គការអ្នកសារព័ត៌មានគ្មានព្រំដែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។