សាច់ញាតិ និងអ្នកឃ្លាំមើលសិទ្ធិមនុស្ស ទាមទារឲ្យដោះលែង ប្រធានប្រតិបត្តិគណបក្សសង្គ្រោះជាតិ ដែលត្រូវបានរបបលោក ហ៊ុន សែន រម្លាយប្រចាំខេត្តសៀមរាបវិញ ក្រោយពេលសាលាដំបូងខេត្តសៀមរាប បានសម្រេចឃុំខ្លួន ពាក់ព័ន្ធនឹងការចែករំលែក (Share) សំណេរដែលមានន័យប្រមាថព្រះមហាក្សត្រ។ អ្នកច្បាប់ថា ការShare និងចូលចិត្ត (Like)តាមបណ្ដាញសង្គមនោះ មិនទាន់មានច្បាប់ផ្ដន្ទាទោសនោះទេ។
សាច់ញាតិរបស់ប្រធានប្រតិបត្តិគណបក្សសង្គ្រោះជាតិ ដែលត្រូវបានរបបលោក ហ៊ុន សែន រម្លាយ ប្រចាំខេត្តសៀមរាប លោក បាន សម្ភីរ ប្រាប់ថា សកម្មជនគណបក្សប្រឆាំងម្នាក់នេះ មិនមានចេតនាណាមួយ ក្នុងការប្រមាថព្រះមហាក្សត្រទេ។ លោកប្រាប់ថា ចេតនារបស់ លោក បាន សម្ភីរ គឺគ្រាន់តែចង់ឲ្យអ្នកលេងហ្វេសប៊ុក វិភាគពីការបង្ហោះនោះ តែប៉ុណ្ណោះ។ «»
ប្រធានសាលាដំបូងខេត្តសៀមរាប និងជាចៅក្រមស៊ើបសួរ លោក ងួន ណារ៉ា កាលពីល្ងាចថ្ងៃទី ២០ ឧសភា បានចេញដីកាបង្គាប់ឲ្យឃុំខ្លួនជនត្រូវចោទ ឈ្មោះ បាន សម្ភីរ អាយុ ៧០ឆ្នាំ រស់នៅភូមិពន្លឺព្រះផុស ឃុំកំពង់ក្ដី ស្រុកជីក្រែង ខេត្តសៀមរាប មានមុខរបរជាជាងកាត់សក់។ លោកត្រូវបានដាក់ឲ្យស្ថិតក្រោមការពិនិត្យពីតុលាការពីបទ «ប្រមាថចំពោះអង្គព្រះមហាក្សត្រ» ដែលបានប្រព្រឹត្តិនៅភូមិពន្លឺព្រះផុស ឃុំកំពង់ក្ដី ស្រុកជីក្រែង ខេត្តសៀមរាប កាលពីថ្ងៃទី១៣ ឧសភា ស្របតាមមាត្រា ៤៣៧ (ស្ទួន) នៃច្បាប់ស្ដីពីវិសោធនកម្មក្រមព្រហ្មទណ្ឌ។ ចៅក្រមស៊ើបសួរ លោក ងួន ណារ៉ា បានបញ្ជាឲ្យសមត្ថកិច្ចនាំខ្លួនជនត្រូវចោទ ទៅពន្ធនាគារខេត្តសៀមរាប រង់ចាំពេលមានសេចក្ដីសម្រេចជាថ្មី ដែលមិនកំណត់ពេលវេលាជាក់លាក់។
ក្នុងហ្វេសប៊ុក ឈ្មោះ បាន សម្ភីរ (Ban Samphy) កាលពីថ្ងៃទី១៣ ឧសភា បានShare វីដេអូខ្លីមួយ ស្ដីពីទុក្ខលំបាករបស់អ្នកភូមិស្រែគរ នៅខេត្តស្ទឹងត្រែង ដែលរងគ្រោះពីការអភិវឌ្ឍទំនប់វារីអគ្គីសនីសេសានក្រោម២ រូបថតលោកនាយករដ្ឋមន្ត្រី ហ៊ុន សែន ជាមួយភរិយា និងរូបដាច់ដោយឡែកមួយទៀត គឺព្រះឆាយាល័ក្ខណ៍ព្រះមហាក្សត្រគង់ក្នុងឡាន។ ការ share នោះ ចេញពីហ្វេសប៊ុកឈ្មោះ Khmer Thatcher ដោយលោក បាន សម្ភីរ មិនបានសរសេរអ្វីបន្ថែមទេ។ ក្នុងហ្វេសប៊ុកឈ្មោះ Khmer Thatcher បានសរសេរថា នេះគឺជាលទ្ធផលរបស់ភេរវជន ហ៊ុន សែន និងស្ដេចក្លែងក្លាយ ឧក្រិដ្ឋកម្មប្រឆាំងនឹងមនុស្សជាតិ។
លោកមេធាវី ផែង ហេង ពន្យល់ថា មិនទាន់មានច្បាប់ណា ចែងអំពីទោសទណ្ឌនៃការ Share ឬLike ក្នុងហ្វេសប៊ុកមានទោសទេ ដូច្នេះផ្អែកតាមរដ្ឋធម្មនុញ្ញ បើគ្មានច្បាប់ចែង គឺគ្មានទោស។ «»
ការចាប់ខ្លួនប្រធានប្រតិបត្តិគណបក្សសង្គ្រោះជាតិ ដែលត្រូវបានរបបលោក ហ៊ុន សែន រម្លាយ គឺជាការចាប់ខ្លួនលើកទីពីរ ក្រោយពេលដែលក្រុមតំណាងរាស្ត្របក្សកាន់អំណាចនាំគ្នា អនុម័ត វិសោធនកម្មក្រមព្រហ្មទណ្ឌដ៏ចម្រូងចម្រាស ពាក់ព័ន្ធនឹងអំពើប្រមាថអង្គព្រះមហាក្សត្រ កាលពីខែកុម្ភៈ ។ កាលពីថ្ងៃទី១៣ ឧសភា សមត្ថកិច្ចបានចាប់ខ្លួន នាយកសាលាបឋមសិក្សាម្នាក់ នៅខេត្តកំពង់ធំ ឈ្មោះ ឃាង ណាវី អាយុ ៥០ឆ្នាំ ក្រោយពីនាយកសាលារូបនោះ បានបញ្ចេញមតិ នៅក្នុងប្រអប់បញ្ចេញមតិ (ខ្ទង់Comment) ក្នុងន័យថា ព្រះមហាក្សត្រ និងសមាជិករាជវង្សដទៃទៀត បានចូលដៃចូលជើងជាមួយរបបលោក ហ៊ុន សែន ក្នុងការរម្លាយគណបក្សសង្គ្រោះជាតិកន្លងមក។
អ្នកនាំពាក្យសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា ស្នើឲ្យសមត្ថកិច្ចពិចារណាម្ដងទៀត ក្នុងការដាក់ទោសពលរដ្ឋ ពាក់ព័ន្ធនឹងទោសប្រមាថព្រះមហាក្សត្រ។ សង្គមស៊ីវិល មើលឃើញថា ច្បាប់ដ៏ចម្រូងចម្រាស ដែលវិសោធនកម្មដាក់ទោសអ្នកប្រមាថព្រះមហាក្សត្រ នៅមិនទាន់ត្រូវបានផ្សព្វផ្សាយឲ្យបានទូលាយទេ ខណៈដែលអ្នកប្រើប្រាស់ហ្វេសប៊ុកខ្លះ អាចនៅមិនទាន់ដឹងពីវិធីប្រើប្រាស់។ «»
ច្បាប់ថ្មីដែលក្រុមតំណាងរាស្ត្រនៃរបបក្រុងភ្នំពេញធ្វើវិសោធនកម្ម ចែងថាប្រសិនបើតុលាការរកឃើញថា ជនត្រូវចោទ ពិតជាបានប្រមាថអង្គព្រះមហាក្សត្រមែន នឹងត្រូវជាប់ពន្ធនាគារពី ១ឆ្នាំទៅ ៥ឆ្នាំ និងពិន័យជាប្រាក់ពី ២លានរៀល ទៅ១០លានរៀល ឬស្មើនឹងប្រាក់ ៥០០ ទៅ ២.៥០០ដុល្លារអាមេរិក។
ក៏ប៉ុន្តែវិសោធនកម្មក្រមព្រហ្មទណ្ឌថ្មីនេះ គេមិនឃើញមានបញ្ញត្តិចែងណាមួយគ្របដណ្ដប់ដល់ការគ្រប់គ្រងប្រព័ន្ធសង្គមហ្វេសប៊ក (Facebook នោះឡើយ។ ជាគោលការណ៍គតិយុត្តិនៅក្នុងប្រទេសដែលមាននីតិរដ្ឋ បើគ្មានច្បាប់ចែងគឺគ្មានទោស៕