ក្រុមសកម្មជនការងារបរិស្ថាន និងសង្គមជិត២០នាក់នៅថ្ងៃទី៤ មិថុនា នាំគ្នាដើរដង្ហែក្បួនដើម្បីរំលឹកខួបនៃការបាត់ខ្លួន ៣ឆ្នាំ របស់សកម្មជននយោបាយលោក វ៉ាន់ឆាឡឺម សាតស័ក្ដិសិទ្ធិ (Wanchalerm Satsaksit)។ មន្ត្រីអង្គការសង្គមស៊ីវិលលើកឡើងថា តុលាការកម្ពុជាគួរពន្លឿននីតិវិធីអំពីការបាត់ខ្លួនសកម្មជននយោបាយថៃរូបនេះ ដើម្បីបង្ហាញការលើកកម្ពស់សិទ្ធិមនុស្ស និងយុត្តិធម៌សង្គម។
សកម្មជនការងារបរិស្ថាន និងសង្គមដែលបានដើរហែក្បួនរំលឹកខួបនៃការបាត់ខ្លួនសកម្មជននយោបាយលោក វ៉ាន់ឆាឡឺម សាតស័ក្ដិសិទ្ធិ លើកឡើងថា ការបាត់ខ្លួនសកម្មជននយោបាយជនជាតិណាក៏ដោយនៅលើទឹកដីកម្ពុជា គឺជាការគំរាមកំហែងទៅដល់សកម្មជនទូទៅ ដែលធ្វើការដើម្បីលើកកម្ពស់ការគោរពសិទ្ធិមនុស្ស និងលទ្ធិប្រជាធិបតេយ្យ។
ក្រុមសកម្មជនបរិស្ថាន និងសង្គមស៊ីវិលទាំងនោះដើរដង្ហែក្បួនជាជួរចេញពីចំណុចបាត់ខ្លួន សកម្មជននយោបាយ និងសិទ្ធិមនុស្សលោក វ៉ាន់ឆាឡឺម ចាប់ពីចំណុចខាងមុខអគារវិមានមេគង្គ រហូតដល់រង្វង់មូលគល់ស្ពានជ្រោយចង្វាដែលមានរយៈចម្ងាយប្រមាណ ៣គីឡូម៉ែត្រ។ ក្រុមយុវជនបានដើរកាន់ក្រដាសរូបមុខលោក វ៉ាន់ឆាឡឺម និងមានកាន់រូបថតរបស់លោកមួយសន្លឹកផ្សេងទៀតជាប់នៅនឹងដៃ ដែលមានពាក្យថា យុត្តិធម៌សម្រាប់ លោក វ៉ាន់ឆាឡឺម។ ក្រៅពីនេះ យុវជនម្នាក់ដែលមានកាន់មីក្រូខ្នាតតូចនៅជាប់ដៃ បានដើរផងនិងនិយាយរៀបរាប់ពីការបាត់ខ្លួនរបស់លោក វ៉ាន់ឆាឡឺម ផងដែរ។
សកម្មជនបរិស្ថាន កញ្ញា ភួន កែវរស្មី លើកឡើងថា គោលបំណងនៃការដើរដង្ហែក្បួននេះ គឺមាន៣ចំណុចសំខាន់ៗ ទី១ គឺដើម្បីរំលឹកខួប៣ឆ្នាំ អំពីការបាត់ខ្លួនសកម្មជននយោបាយ និងសិទ្ធិមនុស្សលោក វ៉ាន់ឆាឡឺម ដែលត្រូវបានគេចាប់បញ្ចូលរថយន្តនៅថ្ងៃទី៤ ខែមិថុនា ឆ្នាំ២០២០។ ទី២ គឺដើម្បីទាមទារឱ្យរដ្ឋាភិបាលកម្ពុជា និងរដ្ឋាភិបាលថៃ មានទំនួលខុសត្រូវចំពោះការបាត់ខ្លួនលោក វ៉ាន់ឆាឡឺម និងទី៣ គឺដើម្បីបង្ហាញពីសាមគ្គីភាពសកម្មជនការងារសង្គម ដែលធ្វើការលះបង់អ្វីគ្រប់យ៉ាងដើម្បីលើកកម្ពស់ការគោរពសិទ្ធិមនុស្ស និងលទ្ធិប្រជាធិបតេយ្យ។ កញ្ញាបន្ថែមថា បើទោះបីជាលោក វ៉ាន់ឆាឡឺម ជាជនជាតិថៃក្ដី ប៉ុន្តែការបាត់ខ្លួនដោយបង្ខំនៅកម្ពុជា គឺជាការគំរាមកំហែងដល់សកម្មជនសិទ្ធិមនុស្សនៅកម្ពុជាផងដែរ។
កញ្ញា ភួន កែវរស្មី៖ «ខ្ញុំសំណូមពរឱ្យធ្វើយ៉ាងណាបន្តស៊ើបអង្កេតរឿងក្ដីទាំងអស់ហ្នឹងដើម្បីបង្ហាញថា តើនរណានៅពីក្រោយខ្នងនៃការបាត់ខ្លួន ថា តើពេលនេះគាត់ស្លាប់ឬរស់ ធ្វើយ៉ាងណាឱ្យគ្រួសារគាត់ ហើយនឹងគាត់ទទួលបានយុត្តិធម៌ ទី១ហ្នឹង គឺបង្ហាញពីសមត្ថភាពរបស់រដ្ឋាភិបាលប្រទេសកម្ពុជាយើង ក៏ដូចជារដ្ឋាភិបាលថៃ ទី២ឱ្យប្រជាពលរដ្ឋស្ងប់ចិត្តថា មិនមែនជាការសហការគ្នារវាងរដ្ឋាភិបាលថៃ ហើយនឹងរដ្ឋាភិបាលកម្ពុជា នៅក្នុងការបាត់ខ្លួនមួយនេះ ព្រោះយើងពិតជាបារម្ភខ្លាំងមែនទែន នៅពេលដែលសកម្មជនសិទ្ធិមនុស្សត្រូវបានបាត់ខ្លួនបែបហ្នឹង»។
លោក វ៉ាន់ឆាឡឺម សាតស័ក្តិសិទ្ធ មានវ័យ ៣៧ឆ្នាំ ត្រូវបានជនប្រដាប់អាវុធមួយក្រុមចាប់ពង្រត់ កាលពីថ្ងៃទី៤ មិថុនា ក្នុងពេលដែលលោកកំពុងដើរតាមផ្លូវទៅទិញម្ហូបអាហារ នៅមុខកន្លែងស្នាក់នៅរបស់លោកនៅក្នុងទីក្រុងភ្នំពេញ។ អ្នករិះគន់រដ្ឋាភិបាលថៃរូបនេះ បានរត់គេចចេញពីប្រទេសកំណើតរបស់ខ្លួន បន្ទាប់ពីរដ្ឋប្រហារយោធា ឆ្នាំ២០១៤ និងបានរស់នៅនិរទេសខ្លួនក្នុងប្រទេសកម្ពុជា ហើយលោកនៅតែបន្តរិះគន់រដ្ឋាភិបាលថៃនៅលើទំព័របណ្ដាញសង្គមរបស់គាត់។កន្លងទៅអាជ្ញាធរថៃបានបដិសេធថា ពួកគេមិនមានជាប់ពាក់ព័ន្ធនឹងការបាត់ខ្លួនសកម្មជននយោបាយនេះទេ។
ដោយឡែកនៅល្ងាចថ្ងៃទី៤ ខែមិថុនា ក្រុមសកម្មជនជាយុវជនដដែល និងព្រះសង្ឃមួយអង្គ បាននាំគ្នាអង្គុយសមាធិនៅខាងមុខស្ថានទូតថៃ ក្នុងរាជធានីភ្នំពេញ ដើម្បីទាមទារឱ្យរដ្ឋាភិបាលថៃ បន្តស៊ើបអង្កេតករណីបាត់ខ្លួនលោក វ៉ាន់ឆាឡឺម ផងដែរ។ ពួកគេបានអង្គុយសមាធិជាជួរសងខាងច្រកចូលស្ថានទូតថៃប្រមាណមួយម៉ោង ដោយបាំងមុខដោយរូបថតលោក វ៉ាន់ឆាឡឺម និងបានដាក់រូបថតលោក វ៉ាន់ឆាឡឺម ដាច់ដោយឡែកមួយសន្លឹកទៀត ជាមួយនឹងទៀននៅលើក្លោងទ្វារចេញចូលស្ថានទូតថៃ។ ក្រៅពីមានមន្ត្រីសង្កេតការណ៍របស់សមាគមការពារសិទ្ធិមនុស្ស លីកាដូ និងមជ្ឈមណ្ឌលការពារសិទ្ធិមនុស្ស CCHR សកម្មភាពរបស់ក្រុមសកម្មជននេះក៏មានស្ថាប័នព័ត៌មានថៃមួយ តាមដានដែរ។ ដោយឡែក កម្លាំងសមត្ថកិច្ចបានចុះសួរនាំអំពីលិខិតអនុញ្ញាតឱ្យជួបជុំពីក្រុមយុវជនដែរ ប៉ុន្តែក្រុមយុវជនបានជម្នះបន្តធ្វើសមាធិរហូតដល់ចប់ទើបបំបែកគ្នាធ្វើដំណើរទៅផ្ទះរៀងៗខ្លួន។
វិទ្យុអាស៊ីសេរីបានទាក់ទងស្ថានទូតថៃដើម្បីសុំការបកស្រាយជុំវិញការរំលឹកខួបនៃការបាត់ខ្លួន លោក វ៉ាន់ឆាឡឺម សាតស័ក្តិសិទ្ធ តាមសារអេឡិចត្រូនិចផងដែរ ប៉ុន្តែគិតមកដល់ម៉ោងផ្សាយនេះ ខាងស្ថានទូតថៃមិនទាន់មានការឆ្លើយតបនៅឡើយ។
ជុំវិញរឿងនេះ បងស្រីរបស់លោក វ៉ាន់ឆាឡឺម គឺលោកស្រី ស៊ីតាណាន់ សាតស័ក្ដិសិទ្ធិ (Sitanun Satsaksit) ក៏ធ្លាប់បានដាក់ពាក្យបណ្ដឹងទៅសាលាដំបូងរាជធានីភ្នំពេញ ដើម្បីស្វែងរកយុត្តិធម៌ជូនប្អូនប្រុសលោកស្រីផងដែរ។ លោកស្រី ស៊ីតាណាន់ បានដាក់ឯកសារចំនួន ១៧៧ទំព័រ និងបានផ្តល់សក្ខីកម្មដល់ចៅក្រមស៊ើបសួរសាលាដំបូងរាជធានីភ្នំពេញកាលពីខែធ្នូ ឆ្នាំ២០២០ ប៉ុន្តែរហូតមកដល់ពេលនេះ តុលាការមិនទាន់មានវិធានការណ៍អ្វីនៅឡើយទេ។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដើម្បីបកស្រាយជុំវិញរឿងនេះបាននៅឡើយ នៅថ្ងៃទី៤ ខែមិថុនា។
ជុំវិញរឿងនេះនាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (Licadho) លោក អំ សំអាត យល់ឃើញថា តុលាការកម្ពុជាគួរតែពន្លឿននីតិវិធីស៊ើបអង្កេតករណីបាត់ខ្លួនសកម្មជននយោបាយ លោក វ៉ាន់ឆាឡឺម ឱ្យបានឆាប់ ដើម្បីផ្ដល់យុត្តិធម៌ទៅដល់គ្រួសាររបស់លោក។
លោក អំ សំអាត៖ «យើងជាអង្គការសង្គមស៊ីវិលធ្វើការលើសិទ្ធិមនុស្សនៅតែទទូចឱ្យអាជ្ញាធរពាក់ព័ន្ធ ក៏ដូចជាតុលាការ ធ្វើការស៊ើបអង្កេត ដើម្បីស្វែងរកព័ត៌មានអំពីការបាត់ខ្លួន លោក វ៉ានឆាឡឺមនេះ ដោយតម្លាភាព និងយុត្តិធម៌ជាពិសេសគឺការផ្ដល់ព័ត៌មានសម្រាប់ក្រុមគ្រួសាររបស់គាត់»។
អង្គការសង្គមស៊ីវិលជាតិ និងអន្តរជាតិ ព្រមទាំងអង្គការសហប្រជាជាតិទទួលបន្ទុកផ្នែកសិទ្ធិមនុស្សកាលពីពេលកន្លងទៅ បានស្នើឲ្យរដ្ឋាភិបាលកម្ពុជា ត្រូវតែស៊ើបអង្កេតដោយម៉ត់ចត់ និងឥតលម្អៀងអំពីការបាត់ខ្លួនដោយបង្ខំរបស់លោក វ៉ាន់ឆាឡឺម។ ស្ថាប័នទាំងនោះលើកឡើងថា រដ្ឋាភិបាលត្រូវផ្ដល់ព័ត៌មាន និងការវិវត្តនៃការស៊ើបអង្កេតលំអិតដើម្បីធានាថា លោក វ៉ាន់ឆាឡឺម សាតស័ក្ដិសិទ្ធិ នៅកន្លែងណា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។