លោកនាយករដ្ឋមន្ត្រី ហ៊ុន សែន បង្គាប់បញ្ជាឱ្យស្ថាប័នសារព័ត៌មានក្នុងស្រុក ចូលរួមប្រយុទ្ធប្រឆាំងព័ត៌មានក្លែងក្លាយ ដែលលោកចោទប្រកាន់ទាំងគ្មានភស្តតាងថា បង្កើតឡើងដោយ អ្នកនយោបាយប្រឆាំង និងជនឆ្លៀតឱកាសមួយចំនួនក្នុងបំណងបង្កភាពចលាចលដើម្បីផ្តួលរំលំរដ្ឋាភិបាលរបស់លោក។ អ្នកនយោបាយប្រឆាំង និងអ្នកជំនាញផ្នែកសារព័ត៌មានយល់ថា សាររបស់លោក ហ៊ុន សែន នេះ គឺឆ្លៀតឱកាសបំបិទសេរីភាពសារព័ត៌មានឯករាជ្យ និងសំឡេងអ្នកប្រឆាំង ដែលលាតត្រដាងភាពអសកម្មនិងកំហុសរបស់រដ្ឋាភិបាល។
លោកនាយករដ្ឋមន្ត្រី ហ៊ុន សែន អះអាងថា ក្នុងពេលប្រទេសកម្ពុជាកំពុងរងគ្រោះដោយវិបត្តិជំងឺកូវីដ -១៩នេះ ក្រុមអ្នកនយោបាយប្រឆាំង និងក្រុមឱកាសនិយមមួយចំនួន បានប្រើប្រាស់ព័ត៌មាន ក្លែងក្លាយ បំភ្លៃការពិត ក្នុងបំណងអូសទាញប្រទេសជាតិឱ្យធ្លាក់ចូលក្នុងភ្លើងសង្គ្រាម។ ទោះជាយ៉ាងណា លោក ហ៊ុន សែន អះអាងថា រដ្ឋាភិបាលរបស់លោកបានបង្ក្រាបព័ត៌មានក្លាយក្លែង ហើយស្ថាប័នព័ត៌មានខ្លះចូលរួមផ្សាយព័ត៌មានពិត និងបកស្រាយឱ្យពលរដ្ឋបានយល់ដឹងទាន់ពេលវេលា។
ការលើកឡើងនេះ ធ្វើឡើងតាមរយៈសារលិខិតចំនួន ៣ទំព័រ ផ្ញើជូនវេទិកានិពន្ធនាយកសារព័ត៌មានកម្ពុជា ដែលរៀបចំឡើង នៅថ្ងៃទី១៩ ខែធ្នូ ក្រោមប្រធានបទស្ដីពី «តួនាទីសារព័ត៌មានក្នុងបរិបទជំងឺរាតត្បាតសកល និងព័ត៌មានក្លែងក្លាយ»។
ក្នុងសារលិខិតនោះ លោក ហ៊ុន សែន អំពាវនាវឱ្យស្ថាប័នសារព័ត៌មាន និងអ្នកសារព័ត៌មាន បន្តចូលរួមប្រយុទ្ធប្រឆាំងព័ត៌មានក្លែងក្លាយតាមរយៈការផ្សព្វផ្សាយព័ត៌មានពិត និងបកស្រាយឱ្យបានទាន់សភាពការណ៍ដើម្បីបន្សាបនិងបំផ្លាញព័ត៌មាន ដែលលោកចាត់ទុកថា ជាព័ត៌មានរបស់ក្រុមប្រឆាំង ក្រុមឱកាសនិយមដែលកំពុងជ្រកក្រោមស្លាកស្ថាប័នសារព័ត៌មានធ្វើសកម្មភាពខុសច្បាប់។
ឆ្លើយចំពោះការចោទប្រកាន់នេះ សកម្មជនគណបក្សសង្គ្រោះជាតិ ដែលកំពុងភៀសខ្លួននៅឯប្រទេសថៃ លោក រុន ចន្ធី លើកឡើងថា វាជារឿងអស់សំណើចដែលលោក ហ៊ុន សែន ចង់ឱ្យអ្នកសារព័ត៌មានប្រយុទ្ធប្រឆាំងព័ត៌មានក្លែង ប៉ុន្តែលោក ហ៊ុន សែន ខ្លួនឯង កំពុងប្រឌិតរឿងចោទប្រកាន់ទាំងគ្មានមូលដ្ឋាន ដើម្បីទុក្ខបុកម្នេញលើអ្នកនយោបាយប្រឆាំង និងអ្នកសារព័ត៌មានឯករាជ្យ។ លោកបន្តថា សាររបស់លោក ហ៊ុន សែន នេះ ក៏មានចេតនាបំភិតបំភ័យឱ្យស្ថាប័នព័ត៌មានក្នុងស្រុក ត្រូវផ្សព្វផ្សាយការពារនិងលើកតម្កើងរបបរបស់គាត់ បើពុំនោះទេ ពួកគេនឹងត្រូវចាប់ខ្លួន ឬបិទស្ថាប័ន៖ «ជាពិសេសក្រុមគាត់តែម្ដង ( ក្រុមរដ្ឋាភិបាល ) ដែលមានការកាប់បំផ្លាញព្រៃឈើ លក់ថ្នាំញៀន អ្នកក្រវេទនា គេរំលោភបំពានដីធ្លីផ្សេងៗ តែអ្នកសារព័ត៌មានរបស់របបលោក ហ៊ុន សែន នេះ មិនបានផ្សព្វផ្សាយការពិតដើម្បីឱ្យប្រជាពលរដ្ឋ បានដឹងបានលឺនោះទេ មានតែបំភ្លើសព័ត៌មាន ឃើញតែព័ត៌មានល្អៗឬក៏មានព័ត៌មានលើកជើងរបបដឹកនាំរបស់លោក ហ៊ុន សែន គឺជាព័ត៌មានបានឆ្លុះបញ្ចាំរូបភាពពិតនៅក្នុងសង្គម។ ខ្ញុំថា ព័ត៌មានក្លែងក្លាយនេះ កើតចេញពីមន្ត្រីពុករលួយ ឈ្មួញទុច្ចរិត ឬក៏អ្នកសារព័ត៌មានដែលមិនមានវិជ្ជាជីវៈ មិនមែនកើតចេញពីបក្សប្រឆាំងទេ។ ក្រុមអ្នកនយោបាយប្រឆាំង រិះគន់រដ្ឋាភិបាល ផ្អែកទៅលើរូបភាពកើតឡើងជាក់ស្ដែងនៅក្នុងសង្គម»។
ចំណែកនាយកផ្នែកប្រព័ន្ធផ្សព្វផ្សាយ នៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) គឺ លោក អ៊ិត សូធឿន មានប្រសាសន៍ថា សាររបស់លោក ហ៊ុន សែន នេះ គឺបង្ហាញថា អ្នកសារព័ត៌មានដែលមានវិជ្ជាជីវៈត្រឹមត្រូវ គឺពិតជាមានតួនាទីសំខាន់ក្នុងការផ្តល់ព័ត៌មានពិត រហ័សនិងច្បាស់លាស់ជូនសាធារណជន។ ដូច្នេះលោក ស្នើសុំឱ្យរដ្ឋាភិបាល ត្រូវបើកលំហសេរីភាពសារព័ត៌មាន និងជំរុញឱ្យមន្ត្រីពាក់ព័ន្ធរបស់រដ្ឋាភិបាល ត្រូវឆ្លើយឆ្លងផ្ដល់ព័ត៌មានឱ្យបានត្រឹមត្រូវ និងទាន់ពេលដល់អ្នកសារព័ត៌មានវិញផងដែរ។ លោកបន្តថា ចំពោះការចោទប្រកាន់អ្នកនយោបាយប្រឆាំងថា ជាអ្នកបង្កើតព័ត៌មានក្លែងក្លាយនោះ គឺជាទស្សនៈយល់ឃើញរបស់លោកនាយករដ្ឋមន្ត្រី ប៉ុន្តែលោកសុំមិនបកស្រាយឡើយ ព្រោះគ្មានការស្រាវជ្រាវរឿងនេះច្បាស់លាស់នោះឡើយ៖ «ត្រូវបែកចែកឱ្យដាច់រវាងព័ត៌មានក្លែងក្លាយ និងព័ត៌មានរិះគន់ដើម្បីស្ថាបនា មានន័យថា ព័ត៌មានបង្ហាញអំពីចំណុចខ្វះខាត។ នៅពេលដែលយើងនិយាយអំពីព័ត៌មានមិនពិត ឬក្លែងក្លាយនេះ លុះត្រាតែរឿងនោះ វាមិនពិតមែន ប៉ុន្តែយើងផ្សាយព័ត៌មានអំពីចំណុចអសកម្មរបស់រដ្ឋាភិបាល តែជារឿងពិតនោះ វាគឺជារឿងពិតដូច្នេះជៀសវាងការចាត់ទុកព័ត័មានបែបនេះ ថាជាព័ត៌មានក្លែងក្លាយ»។
លោក អ៊ិត សូធឿត កត់សម្គាល់ឃើញថា កន្លងមក មានព័ត៌មានមិនពិត ឬក្លែងក្លាយមួយចំនួនដែរ ប៉ុន្តែមិនបានបង្កចលាចលក្នុងសង្គមនោះទេ ព្រោះពលរដ្ឋមានការយល់ដឹងហើយព័ត៌មានទាំងនោះ បានសាបទៅវិញដោយខ្លួនឯង។ អ្នកជំនាញសារព័ត៌មានរូបនេះ ស្នើសុំឱ្យរដ្ឋាភិបាល បញ្ឈប់ការប្រើប្រាស់វិធានការច្បាប់ ដើម្បីដាក់ទណ្ឌកម្មលើអ្នកប្រឆាំង និងអ្នករិះគន់ដោយសារការបញ្ចេញមតិស្របច្បាប់របស់ពួកគេ។
ជាមួយគ្នានេះ នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី គាំទ្រសាររបស់ប្រមុខរដ្ឋាភិបាល ដែលអំពាវនាវឱ្យអ្នកសារព័ត៌មាន ចូលរួមប្រយុទ្ធប្រឆាំងព័ត៌មានក្លែងក្លាយ ឬព័ត៌មានបំពុលសង្គម ប៉ុន្តែលោក បញ្ជាក់ថា មកទល់ពេលនេះ គ្មានមូលដ្ឋាន ឬភស្តុតាងណាមួយបង្ហាញថា ព័ត៌មានក្លែងក្លាយ បង្កើតឡើយដោយក្រុមអ្នកនយោបាយប្រឆាំង ឬជនឱកាសនិយមណានោះទេ៖ «ខ្ញុំចង់ឃើញឆន្ទៈ ឬសកម្មភាពជាក់ស្ដែងរបស់ភាគីរដ្ឋាភិបាលដែរ ដើម្បីចូលរួមប្រយុទ្ធប្រឆាំងព័ត៌មានក្លែងក្លាយ ជាពិសេស ការស្ដែងឱ្យឃើញសកម្មភាពទាំងអស់នេះ វាគួរតែមានកិច្ចសហប្រតិបត្តិការជាមួយស្ថាប័នព័ត៌មាន ហើយនិងការគាំទ្រ និងការពារដល់អ្នកសារព័ត៌មាន ជាពិសេសអ្នកសារព័ត៌មានវិជ្ជាជីវៈ អ្នកសារព័ត៌មានសេរីជាដើម ដើម្បីជួយជំរុញឱ្យមានការផ្ទៀងផ្ទាត់ព័ត៌មានទាំងអស់ហ្នឹង ដោយសបញ្ជាក់ថា ព័ត៌មានណាក្លែងក្លាយ ឬព័ត៌មានណាត្រូវបានប្រឌិត ដើម្បីបំផ្លាញសង្គមយើង»។
គិតចាប់ពីខែមករា មកដល់ថ្ងៃទី១៩ ខែធ្នូ មានសកម្មជននយោយបាយ សកម្មជនសិទ្ធិមនុស្ស អ្នកសារព័ត៌មាន ព្រះសង្ឃ និងយុវជន ប្រមាណ៥០នាក់ហើយ ត្រូវបានអាជ្ញាធររបបក្រុងភ្នំពេញ ចាប់ខ្លួនដាក់ពន្ធនាគារដោយសារការអនុវត្តសិទ្ធិសេរីភាពស្របច្បាប់របស់ពួកគេទាំងនៅក្នុងសង្គម និងនៅលើប្រព័ន្ធអ៊ីនធឺណិត។
អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់ចេញសេចក្ដីថ្លែងការណ៍ថា ក្រោមច្បាប់សិទ្ធិមនុស្សអន្តរជាតិ រដ្ឋាភិបាលកម្ពុជាមានកាតព្វកិច្ចការពារសិទ្ធិសេរីភាពបញ្ចេញមតិ រួមទាំងសិទ្ធិស្វែងរក ទទួលបាន និងចែករំលែកព័ត៌មានគ្រប់ប្រភេទ។ ជាមួយគ្នានេះ រដ្ឋាភិបាលទទួលខុសត្រូវក្នុងការផ្ដល់ព័ត៌មានចាំបាច់សម្រាប់ការពារ និងលើកស្ទួយសិទ្ធិទាំងឡាយ រួមទាំងសិទ្ធិសុខភាពផងដែរ។ អង្គការអន្តរជាតិមួយនេះ លោកស្នើឱ្យរដ្ឋាភិបាលបរទេស និងម្ចាស់ជំនួយ ជំរុញរដ្ឋាភិបាលកម្ពុជា ឱ្យបញ្ឈប់ការយាយី និងការចោទប្រកាន់អ្នកសារព័ត៌មាន និងប្រព័ន្ធផ្សព្វផ្សាយដែលគ្រាន់តែបំពេញការងាររបស់ពួកគេ ក្នុងការរាយការណ៍អំពីអ្វីដែលរដ្ឋាភិបាលកំពុងនិយាយ និងធ្វើការពាក់ព័ន្ធនឹងវិបត្តិជំងឺកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។