មេធាវីអន្តរជាតិភ្ញាក់ផ្អើលចំពោះការបំពាននីតិវិធីយ៉ាងសម្បើមសូម្បីតែក្នុងសវនាការខ្លីមួយក្នុងសំណុំរឿងកញ្ញា សេង ធារី កាលពីថ្ងៃទី៧ ខែធ្នូ។
លោក ចារិត ហ្កិនស័រ (Jared Genser) ជាមេធាវីអន្តរជាតិជនជាតិអាមេរិក និងជាមិត្តភក្តិជិតស្និទ្ធរបស់កញ្ញា សេង ធារី ដែលបានទៅផ្តល់កម្លាំងចិត្ត និងតាមដានសវនាការដោយផ្ទាល់ ប្រាប់វិទ្យុអាស៊ីសេរីក្រោយសវនាការនោះថា សាលាដំបូងរាជធានីភ្នំពេញ បានរំលោភបំពាននីតិវិធីជាច្រើន។ នីតិវិធីទាំងនោះ រួមមាន ការហាមឃាត់អ្នកកាសែតបរទេស មិនឲ្យចូលស្តាប់សវនាការ ដោយសារយកលេសថា មិនបានចុះឈ្មោះជាមុន ការរករឿងកញ្ញា សេង ធារី មិនចង់ឲ្យចូលបន្ទប់សវនាការ ដោយសារតែកញ្ញាស្លៀកពាក់សម្លៀកបំពាក់ជាអប្សរា និងបង្គាប់ឲ្យកញ្ញាដូរសម្លៀកបំពាក់នេះចេញ នៅពេលចូលសវនាការលើកក្រោយជាដើម។
លោក ចារិត ហ្កិនស័រ ថាចំណុចទាំងពីរនេះមន្រ្តីតុលាការរំលោភច្បាប់កម្ពុជាដែលចែងថាសវនាការសំណុំរឿងព្រហ្មទណ្ឌត្រូវបើកចំហរជាសាធារណៈស្របពេលដែលកម្ពុជាពុំមានច្បាប់ណាចែងហាមឃាត់ការស្លៀកសម្លៀកបំពាក់អប្សរាចូលក្នុងសវនាការនោះឡើយ។
មេធាវីអន្តរជាតិរូបនេះថាការធ្វើបែបនេះគឺជាការបំពានសិទ្ធិរបស់កញ្ញា សេង ធារី និងជនជាប់ចោទដទៃទៀតក្នុងការទទួលបានសវនាការជាសាធារណៈ។
ជាងនេះទៅទៀតលោកកត់សម្គាល់ឃើញភាពមិនប្រក្រតីក្នុងករណីជូនដំណឹងអំពីដីការបស់តុលាការដល់កញ្ញា សេង ធារី និងកូនក្តីដទៃទៀត។ លោកថា ក្នុងថ្ងៃសវនាការនោះមេធាវីជាច្រើនរបស់កូនក្តីដទៃទៀតបានត្អូញត្អែថា មិនបានទទួលដីកាកោះដើម្បីឡើងសវនាការនេះទេ។មួយទៀតលោកថាដល់ថ្ងៃសវនាការទៅហើយ តុលាការដូរចៅក្រម ដោយមិនជូនដំណឹងកូនក្តីមុន។
ចុងក្រោយលោកថាតុលាការបានបំបែកសំណុំរឿងធំដែលមានជនជាប់ចោទ ៤២ នាក់នោះទៅជាសំណុំរឿងបីផ្សេងគ្នា។ ក្នុងនោះកញ្ញា សេង ធារី ត្រូវតុលាការកំណត់ឲ្យឡើងសវនាការតែម្នាក់ឯងនៅថ្ងៃទី២៨ ខែធ្នូ ដែលនៅចន្លោះថ្ងៃបុណ្យអន្តរជាតិ។ លោក ចារិត ហ្កិនស័រ ថាការបើកសវនាការកៀកថ្ងៃសម្រាកបុណ្យអន្តរជាតិនេះធ្វើឲ្យលោកបារម្ភអំពីការថយចុះការតាមដានដំណើរការក្តីព្រោះពលរដ្ឋនៅលើពិភពលោកត្រូវឈប់សម្រាកបុណ្យនេះ។
ទោះជាយ៉ាងនេះក្ដី លោកអំពាវនាវឲ្យពលរដ្ឋខ្មែរនៅក្នុងប្រទេស នាំគ្នាតាមដានរឿងក្តីនេះឲ្យបានច្រើនកុះករនៅថ្ងៃទី២៨ ខែធ្នូ ខាងមុខ ហើយលោកនឹងព្យាយាមចូលរួមសវនាការនោះទៀត បើលោកអាចលៃបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។