យុវជនចលនាមាតាធម្មជាតិ ហួសចិត្តចំពោះភាពយឺតយ៉ាវមិនទាន់ឆ្លើយតបលិខិតស្នើសុំចេញទៅទទួលពានរង្វាន់ រ៉ៃត៍ ឡាយលីហូដ (Right Livelihood) នៅប្រទេសស៊ុយអែត (Sweden) ពីក្រសួងយុត្តិធម៌។ មន្ត្រីអង្គការសង្គមស៊ីវិលអះអាងថា ក្រសួងយុត្តិធម៌គួរអនុញ្ញាតឱ្យពួកគេបានចេញទៅទទួលពានរង្វាន់ ដើម្បីលើកកម្ពស់គំរូភាពការងារស្ម័គ្រចិត្តការពារបរិស្ថាននៅកម្ពុជា។
យុវជនចលនាមាតាធម្មជាតិ ស្នើឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធិ គួរអន្តរាគមន៍ទៅតុលាការ អនុញ្ញាតឱ្យពួកគេធ្វើដំណើរទៅប្រទេសស៊ុយអែត ឱ្យបានឆាប់ ខណៈការប្រារព្ធពិធីប្រគល់ពានរង្វាន់អន្តរជាតិ Right Livelihood កាន់តែខិតជិតមកដល់។
យុវជនចលនាមាតាធម្មជាតិ លោក ថុន រដ្ឋា ប្រាប់វិទ្យុអាស៊ីសេរីនៅថ្ងៃទី២០ ខែតុលា លោកហួសចិត្តនៅពេលមន្ត្រីរបស់ក្រសួងយុត្តិធម៌ ប្រាប់លោកថា ឯកសារដែលលោកស្នើសុំឱ្យរដ្ឋមន្ត្រីក្រសួងយុត្តិធម៌ អនុញ្ញាតឱ្យរូបលោក កញ្ញា ភួន កែវរស្មី និងកញ្ញា ឡុង គន្ធា ធ្វើដំណើរទៅប្រទេសស៊ុយអែត ដើម្បីទទួលពានរង្វាន់ដែលមានតម្លៃប្រហាក់ប្រហែលពានរង្វាន់អន្តរជាតិ ណូបែល សន្តិភាព មិនទាន់បានទៅដល់ដៃរដ្ឋមន្ត្រីក្រសួងយុត្តិធម៌ ខណៈការដាក់ញត្តិធ្វើឡើងតាំងតែពីថ្ងៃទី៦ ខែតុលា។ លោកបន្តថា ដោយសារវត្តមានក្រុមយុវជនចលនាមាតាធម្មជាតិទៅទទួលពានរង្វាន់នៅលើឆាកអន្តរជាតិ អាចនឹងឆ្លុះបញ្ចាំងអំពីការលើកកម្ពស់ការគោរពសិទ្ធិមនុស្ស និងលំហសេរីភាពការងារសង្គមស៊ីវិលនៅកម្ពុជាផងនោះ ដូច្នេះក្រសួងយុត្តិធម៌គួរផ្ដល់ការអនុញ្ញាតឱ្យពួកលោកបានចេញទៅទទួលពានរង្វាន់ឱ្យបានឆាប់ៗ ជាជាងបន្តពន្យារពេល ឬមិនអនុញ្ញាតដែលនាំឱ្យរដ្ឋាភិបាលកាន់តែមានកេរ្តិ៍ឈ្មោះមិនល្អនៅលើឆាកអន្តរជាតិ។
លោក ថុន រដ្ឋា៖ «យើងសំណូមពរឱ្យឯកឧត្ដមរដ្ឋមន្ត្រីយុត្តិធម៌ហ្នឹង គួរណាស់តែពន្លឿនថា ឆ្លើយព្រម ឬមិនព្រមហ្នឹង គួរណាស់តែលឿនក្នុងការឆ្លើយ ទោះបីជាគាត់មិនព្រម ប៉ុន្តែបើគាត់ឆ្លើយយឺតពេលអាហ្នឹងស្នើហ្នឹងគាត់មិនព្រមដដែល ដែលធ្វើឱ្យមានការរិះគន់ពីមជ្ឈដ្ឋានជាតិ អន្តរជាតិ ពីមហាជន ជុំវិញអ្វីដែលគាត់បានធ្វើ ដែលមិនឱ្យយុវជនចលនាមាតាធម្មជាតិ គាត់មានឱកាសទទួលពានរង្វាន់កិត្តិយសនេះសម្រាប់ពិភពលោកបាន»។
ប្រតិកម្មរបស់យុវជនចលនាមាតាធម្មជាតិបែបនេះ ធ្វើឡើងក្រោយពី មន្ត្រីរដ្ឋបាលក្រសួងយុត្តិធម៌ បានឆ្លើយតបទៅកាន់ក្រុមយុវជនថា ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ មិនទាន់បានពិនិត្យញត្តិរបស់ក្រុមយុវជនចលនាមាតាធម្មជាតិនៅឡើយទេ ដោយសារជាប់រវល់បំពេញការងារផ្សេងៗ។ ការឆ្លើយតបនេះ ធ្វើឡើងនៅពេលសកម្មជនចលនាមាតាធម្មជាតិ លោក ថុន រដ្ឋា និងកញ្ញា ភួន កែវរស្មី បានទៅដល់ក្រសួងយុត្តិធម៌ នៅថ្ងៃទី២០ ខែតុលា ដើម្បីតាមដានការដាក់ញត្តិសុំចេញទៅទទួលពានរង្វាន់នៅប្រទេសស៊ុយអែត ដែលពួកគេបានដាក់ទៅក្រសួងយុត្តិធម៌ កាលពីថ្ងៃទី៦ ខែតុលា។
ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ លោក ច្រឹង ខ្មៅ កាលនៅថ្ងៃទី២ ខែតុលា បានសម្រេចមិនអនុញ្ញាតឱ្យយុវជនចលនាមាតាធម្មជាតិទាំង៣នាក់នេះបានធ្វើដំណើរចេញទៅក្រៅប្រទេសដើម្បីទទួលពានរង្វាន់នោះឡើយ ដោយលើកហេតុផលថា គ្មានភាពចាំបាច់។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង យល់ឃើញថា ក្រុមយុវជនចលនាមាតាធម្មជាតិគ្មានចេតនា ចង់គេចវេសពីការឃ្លាំមើលរបស់តុលាការឡើយ ដូច្នេះក្រសួងយុត្តិធម៌ គួរអនុញ្ញាតឱ្យពួកគេបានចេញទៅទទួលពានរង្វាន់ឱ្យបានឆាប់ ដើម្បីឱ្យពួកគេរៀបចំឯកសារ។
លោក យង់ គិមអេង៖ «ខ្ញុំមិនដឹងថា ភាពមមាញឹកនៅក្នុងក្រសួង មានទំហំប៉ុណ្ណាទេ ខ្ញុំអាចគិតថាមមាញឹកខ្លាំង ប៉ុន្តែទោះជាយ៉ាងណាក៏ដោយ ក៏តាមរយៈក្រសួងមួយៗ មានមន្ត្រីច្រើនតាមខ្ញុំដឹង រដ្ឋលេខាធិការអីហ្នឹងច្រើនមែនទែន បើអ៊ីចឹងទេគួរតែឆ្លើយតបឱ្យបានទាន់ពេលវេលា អាចសម្រួលឱ្យពួកគាត់បានទៅទទួលពានរង្វាន់ ខ្ញុំគិតថាជាកិត្តិយសរបស់រដ្ឋាភិបាលដែរ ព្រោះអ្នកទទួលក៏ជាខ្មែរដែរ»។
គណៈកម្មាធិការជ្រើសរើសអ្នកទទួលរង្វាន់អង្គការ Right Livelihood មកពីប្រទេស៧៦ប្រទេស និង១៤៣សញ្ជាតិ បានសម្រេចផ្ដល់ពានរង្វាន់អន្តរជាតិ Right Livelihood ដែលមានតម្លៃប្រហាក់ប្រហែលនឹងពានរង្វាន់ ណូបែល សន្តិភាព ទៅឱ្យចលនាមាតាធម្មជាតិ កាលពីថ្ងៃទី២៩ ខែកញ្ញា ចំពោះវីរភាពដ៏ក្លាហានរបស់ពួកគេ លើកិច្ចការពារបរិស្ថាន លើកកម្ពស់សិទ្ធិមនុស្សនៅកម្ពុជា បើទោះបីជាត្រូវប្រឈមមុខនឹងការបង្ក្រាបជាបន្តបន្ទាប់ពីសំណាក់រដ្ឋាភិបាលយ៉ាងណាក្ដី។ អង្គការ Right Livelihood បានតម្រូវឱ្យសកម្មជនចលនាមាតាធម្មជាតិ៣នាក់ រួមមានកញ្ញា ភួន កែវរស្មី កញ្ញា ឡុង គន្ធា និងលោក ថុន រដ្ឋា តំណាងឱ្យចលនាមាតាធម្មជាតិ ធ្វើដំណើរទៅទទួលពានរង្វាន់អន្តរជាតិ នៅទីក្រុងស្តុកហ៊ូម (Stokholm) ប្រទេសស៊ុយអែត ដោយត្រូវធ្វើដំណើរចាប់ពីថ្ងៃទី២៤ ខែវិច្ឆិកា និងត្រឡប់មកកម្ពុជាវិញនៅថ្ងៃទី១ ខែធ្នូ ឆ្នាំ២០២៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។