អាជ្ញាធរខេត្តកណ្ដាលអះអាងថា សំណុំរឿងយោធាបាញ់ពលរដ្ឋនៅស្រុកអង្គស្នួលកាលពីថ្ងៃទី៣ មិថុនានោះ បានបញ្ជូនទៅដល់ដៃតុលាការ ដើម្បីអនុវត្តតាមនីតិវិធីច្បាប់ហើយ។ ប៉ុន្តែអាជ្ញាធរនៅតែមិនព្រមឱ្យដឹងថា តើយោធាដែលបាញ់ពលរដ្ឋឱ្យរងរបួសនោះ ត្រូវបានចាប់ខ្លួន ឬចោទប្រកាន់នៅឡើយនោះទេ ខណៈជនរងគ្រោះបានបន្តដង្ហោយរកយុត្តិធម៌ និងសំណង ដើម្បីព្យាបាលរបួស។
អភិបាលខេត្តកណ្ដាល លោក គង់ សោភ័ណ្ឌ អះអាងប្រាប់អាស៊ីសេរីនៅថ្ងៃទី២៤ មិថុនាថា អាជ្ញាធរបានបញ្ជូនសំណុំរឿងហិង្សាដែលយោធាបាញ់ពលរដ្ឋរងរបួសនោះ ដាក់ទៅតុលាការ ដើម្បីបន្តនីតិវិធីរួចហើយ។ លោកបញ្ជាក់ថា ក្រុមយោធាដែលបាញ់លើពលរដ្ឋនោះ អាជ្ញាធរមិនពិបាកកំណត់មុខសញ្ញានោះទេ ព្រោះពួកគេបំពេញការងារក្នុងនាមអង្គភាព។
ទោះជាយ៉ាងនេះក្តី នៅពេលអាស៊ីសេរីសួរថា តើអាជ្ញាធរបានឃាត់ខ្លួនជនប្រព្រឹត្តនោះហើយ ឬនៅ អភិបាលខេត្តរូបនេះបែរជាឆ្លើយថា លោកមិនហ៊ានបញ្ជាក់ចំណុចនេះទេ ដោយបង្វែរឱ្យទៅសួរតុលាការវិញ៖ « វាជាអង្គភាពពិនិត្យក្នុងបេសកម្មការងារអាហ្នឹង ក៏គេនឹងហៅតំណាងអង្គភាពអ្នកទទួលខុសត្រូវ ដូចជាមិនពិបាកអីនឹងកំណត់ទេ ព្រោះកាន់កាំភ្លើងហ្នឹង អ្នកណាកាន់កាំភ្លើងសុទ្ធតែមុខសញ្ញាដែលត្រូវអ្នកកាន់ហើយបាញ់មុខសញ្ញាកំណត់ក្នុងហ្វេសប៊ុកឃើញតើ ប៉ុន្តែខ្ញុំជម្រាបថាវាជាបេសកកម្មអង្គភាពអ៊ីចឹង តំណាងអង្គភាពត្រូវចេញមុខក្នុងការសម្របសម្រួលតាមនីតិវិធីតុលាការអ៊ីចឹងទៅ » ។
លោក គង់ សោភ័ណ្ឌ ឱ្យដឹងទៀតថា ក្នុងសំណុំរឿងនេះ អាជ្ញាធរក៏គ្រោងកោះហៅប្រជាពលរដ្ឋមួយចំនួន ដែលលោកថា មានពាក់ព័ន្ធនឹងការដុតគ្រឿងចក្រ អំឡុងហេតុការណ៍ហិង្សាបាញ់បោះនោះដែរ។ ជាមួយគ្នានេះ លោកអះអាងថា អាជ្ញាធរខេត្តនេះនឹងជួយដោះស្រាយថ្លៃព្យាបាលរបួសជនរងគ្រោះរហូតដល់ធូរស្បើយផងដែរ។
កាលពីថ្ងៃទី៣ មិថុនា ពលរដ្ឋជាង ៣០០នាក់ បានលើកគ្នាទៅឃាត់គ្រឿងចក្រ ដែលក្រុមយោធាបម្រុងយកទៅឈូសឆាយដីស្រែ ដែលកំពុងមានទំនាស់ជាមួយប្រជាពលរដ្ឋនៅភូមិអង្គស្រែពោធិ៍ ឃុំទួលព្រិច ស្រុកអង្គស្នួល ខេត្តកណ្ដាល។ ពេលពលរដ្ឋកំពុងតវ៉ា ស្រាប់តែក្រុមយោធាបានបង្ក្រាបពលរដ្ឋ ដោយបាញ់គ្រាប់កាំភ្លើងពិតបណ្ដាលឱ្យពលរដ្ឋម្នាក់របួសធ្ងន់។
អាស៊ីសេរីបានទាក់ទងទៅអ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ដើម្បីសាកសួរអំពីដំណើរការស៊ើបអង្កេតសំណុំរឿងយោធាបាញ់ពលរដ្ឋនេះ ប៉ុន្តែលោកប្រាប់ដដែលៗថា លោកមិនអាចបកស្រាយរឿងនេះបានទេ ដោយលោករុញឱ្យទៅសួរខាងតុលាការវិញ ។
អ្នកនាំពាក្យតុលាការខេត្តកណ្ដាល លោក សូ សារិន ប្រាប់ថា លោកមិនអាចឆ្លើយបញ្ជាក់ជុំវិញរឿងនេះបានទេ ដោយលោកសុំពិនិត្យមើលជាមុនសិនថា តើសំណុំរឿងនេះបានបញ្ជូនមកតុលាការហើយឬនៅ។ ប៉ុន្តែនៅពេលអាស៊ីសេរីទាក់ទងទៅលោកម្ដងទៀត លោកមិនលើកទូរស័ព្ទនោះទេ ។
ចំណែកអ្នកនាំពាក្យក្រសួងការពារជាតិ លោក អ៊ុក សុវណ្ណ វិញលោកក៏សុំមិនអត្ថាធិប្បាយរឿងនេះដែរ ដោយស្នើសុំពិនិត្យមើលរបាយការណ៍ជាមុនសិន។
ការឆ្លើយដាក់គ្នាពីមួយទៅមួយ និងភាពព្រងើយកន្តើយរបស់អាជ្ញាធរនេះ ធ្វើឱ្យជនរងគ្រោះហាក់អស់សង្ឃឹមចំពោះដំណើរការរកយុត្តិធម៌។
ជនរងគ្រោះក្នុងហេតុការណ៍បាញ់ប្រហារនោះ គឺលោក មុំ ចន្ថា អះអាងថារយៈពេលជិតមួយខែមកហើយ អាជ្ញាធរពុំទាន់ផ្តល់ដំណឹងអំពីការស៊ើបអង្កេត ដើម្បីស្វែងរកជនល្មើសយកមកផ្ដន្ទាទោសតាមច្បាប់នៅឡើយ។ លោកមើលឃើញថា អាជ្ញាធរហាក់ព្រងើយកន្តើយអំពីទុក្ខលំបាក និងការរកយុត្តិធម៌ជូនរូបលោក។ ជនរងគ្រោះរូបនេះរៀបរាប់ទៀតថា របួសរបស់លោកមិនទាន់ជាសះស្បើយទេ ដោយនៅធ្វើទុក្ខឈឺចុកចាប់ស្ទើររាល់ថ្ងៃ ដែលតម្រូវឱ្យគ្រូពេទ្យមកព្យាបាល និងលាងសម្អាតរាល់ថ្ងៃ។ លោកប្រាប់ទៀតថា គ្រួសារលោកបានជំពាក់ប្រាក់គ្រូពេទ្យ ដែលព្យាបាលរបួសនេះប្រមាណ ៥រយដុល្លារហើយ ខណៈជីវភាពគ្រួសារលោកស្ថិតក្នុងភាពត្រដាបត្រដួស។ លោកស្នើឱ្យស្ថាប័នពាក់ព័ន្ធជួយស្វែងរកយុត្តិធម៌ និងផ្តល់សំណងដើម្បីឱ្យលោកមានលទ្ធភាពបង់ថ្លៃព្យាបាលរបួស៖ «ខ្ញុំនៅចាប់ក្នុងមុខរបួសនិងនៅចាប់ក្នុងឆ្អឹង ចេញពីពេទ្យមកអស់លុយព្យាបាលហើយ ជនល្មើសនៅនឹងប៉ុន្តែគេអត់ចាប់អត់ចងអីទេ គេឮថា ដោះស្រាយៗ សំណងឱ្យខ្ញុំហ្នឹង ប៉ុន្តែស្រាប់តែបាត់ឈឹងទៅ ប្រជាពលរដ្ឋនិងខ្ញុំអ្នករងគ្រោះនឹងចង់បានយុត្តិធម៌ដែរហ្នឹង ខ្ញុំចង់ឱ្យអាជ្ញាធររកយុត្តិធម៌ឱ្យនិងដោះស្រាយសំណងឱ្យខ្ញុំ ដើម្បីមើលជំងឺ»។
ជុំវិញរឿងនេះ ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក (ADHOC) លោក នី សុខា មានប្រសាសន៍ថា ករណីក្រុមយោធាបាញ់ពលរដ្ឋនៅស្រុកអង្គស្នួលនេះ ស្ថាប័នពាក់ព័ន្ធមិនពិបាកស្វែងរកជនល្មើសមកផ្ដន្ទាទោសតាមច្បាប់នោះទេ ប្រសិនបើអ្នកស៊ើបអង្កេតប្រកាន់ជំហរឯករាជ្យ និងចង់ស្វែងរកយុត្តិធម៌ពិតប្រាកដជូនជនរងគ្រោះ។ លោកថា ករណីនេះ អង្គភាពយោធាត្រូវទទួលខុសត្រូវសំណងរដ្ឋប្បវេណី ហើយជនដៃដល់ត្រូវទទួលទោសព្រហ្មទណ្ឌតាមច្បាប់។
មន្ត្រីសង្គមស៊ីវិលរូបនេះ ជំរុញឱ្យស្ថាប័នពាក់ព័ន្ធត្រូវពន្លឿនការស៊ើបអង្កេតស្វែងរកជនប្រព្រឹត្តយកមកផ្ដន្ទាទោស ដើម្បីផ្តល់យុត្តិធម៌ដល់ជនរងគ្រោះ និងបង្កើនទំនុកចិត្តដល់ពលរដ្ឋលើស្ថាប័នមានសមត្ថកិច្ច៖ «បើសិនជាសមត្ថកិច្ចពិសេសគឺតុលាការដែលគាត់មានយុត្តិធម៌ គាត់មានឯករាជ្យភាព គាត់ចង់ផ្តល់យុត្តិធម៌ជូនប្រជាពលរដ្ឋពិតប្រាកដខ្ញុំថាមិនពិបាកក្នុងការស៊ើបអង្កេតទេពីព្រោះថារូបភាពនៅក្នុងវីដេអូនេះ មានពិតប្រាកដ ហើយតាមការលើកឡើងរបស់សមត្ថកិច្ចថាមានបញ្ជាពីអង្គភាពទៀត ដូច្នេះខ្ញុំគិតថាច្បាស់ណាស់ គឺអត់មានប្រឡិមប្រឡុំបានទេ»។
ករណីកម្លាំងយោធាចុះបង្ក្រាបពលរដ្ឋរឿងដីធ្លី ឈានដល់ការបាញ់ប្រហារពលរដ្ឋនោះ តែងកើតមានជាញឹកញាប់ ដូចជា នៅខេត្តក្រចេះក្នុងឆ្នាំ២០១៨ និងខេត្តព្រះសីហនុ នៅឆ្នាំ២០១៩ ជាដើម។ ករណីទាំងនោះពលរដ្ឋសុទ្ធតែទទួលរងគ្រាប់កាំភ្លើងពិតរបស់ក្រុមយោធា បណ្ដាលឱ្យរងរបួសធ្ងន់ និងមានករណីខ្លះពលរដ្ឋអះអាងថា ឈានដល់ស្លាប់ផងក៏មាន ដូចជា ករណីនៅខេត្តក្រចេះជាដើម។
សង្គមស៊ីវិល និងពលរដ្ឋ ជាពិសេសជនរងគ្រោះទាមទារឱ្យអាជ្ញាធរស៊ើបអង្កេតករណីហិង្សាបាញ់បោះលើប្រជាពលរដ្ឋនេះដោយត្រឹមត្រូវ តម្លាភាព ដោយវែកមុខជនល្មើសយកមកផ្ដន្ទាទោសតាមច្បាប់ ដើម្បីលុបបំបាត់អំពើនិទណ្ឌភាព។ ពួកគាត់ក៏ស្នើឱ្យអាជ្ញាធរ បញ្ឈប់ការប្រើប្រាស់កម្លាំងប្រដាប់អាវុធបង្កហិង្សាលើជនស្លូតត្រង់បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។