អង្គការចំនួនបីបានចេញសេចក្ដីថ្លែងការណ៍រួមគ្នានៅថ្ងៃទី៣ កក្កដា ស្ដីពីអាជ្ញាធររារាំងការហែក្បួនរបស់ខ្មែរកម្ពុជាក្រោម ជាការបិទសិទ្ធិសេរីភាពខាងប្រមូលផ្ដុំ និងសេរីភាពខាងបញ្ចេញមតិ ដូចដែលមានចែងក្នុងរដ្ឋធម្មនុញ្ញមាត្រា៤១ និងមាត្រា១៩ មាត្រា២១ នៃកតិកាសញ្ញាអន្តរជាតិស្ដីពីសិទ្ធិពលរដ្ឋ និងនយោបាយ។
អង្គការទាំងបីនេះរួមមាន មជ្ឈមណ្ឌលសិទ្ធិមនុស្សកម្ពុជា សមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ និងអង្គការក្រុមការងារដើម្បីដោះស្រាយទំនាស់។ សេចក្ដីថ្លែងការណ៍រួមគ្នានេះបញ្ជាក់ថា ការដាក់ពង្រាយនគរបាលបង្ក្រាបកុបកម្មប្រមាណ ១០០នាក់ និងការបិទផ្លូវដើម្បីរារាំងសហគមន៍ខ្មែរក្រោមមិនឲ្យហែក្បួនកាលពីថ្ងៃទី២៤ ខែមិថុនា ឆ្នាំ២០១៧ នោះ គឺជាការឆ្លើយតបមិនសមាមាត្រ ដែលអាចប៉ះពាល់ច្រើនដល់ប្រជាពលរដ្ឋផ្សេងទៀតដែលមានបំណងអនុវត្តសិទ្ធិស្របច្បាប់របស់ខ្លួនក្នុងការប្រមូលផ្ដុំដោយសន្តិវិធី។
ប្រធានសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន សម្ដែងការសោកស្ដាយចំពោះទង្វើអាជ្ញាធរមានសមត្ថកិច្ច ដែលបានហាមឃាត់ក្បួនដង្ហែញត្តិរបស់សមាគមខ្មែរកម្ពុជាក្រោម ទៅកាន់រដ្ឋសភាបែបនេះ។ លោកបញ្ជាក់ថា សកម្មភាពរារាំងនេះជាសកម្មភាពរើសអើងប្រកាន់ពូជសាសន៍ គំរាមកំហែង និងការបំបិទសិទ្ធិសេរីភាពក្នុងការបញ្ចេញមតិរបស់ខ្មែរកម្ពុជាក្រោម ដែលមានដើមកំណើតជាខ្មែរដូចគ្នា។
កាលពីថ្ងៃទី២៤ មិថុនា សហគមន៍ខ្មែរកម្ពុជាក្រោម បានដង្ហែញត្តិចេញពីវត្តចាស់ សង្កាត់ជ្រោយចង្វារ ឆ្ពោះទៅកាន់រដ្ឋសភា តែត្រូវបានសមត្ថកិច្ចរារាំង ហើយបានដង្ហែតាមរថយន្តចំនួន ៣គ្រឿងជំនួសវិញ។ ញត្តិនេះទាមទារឲ្យបញ្ចូលថ្ងៃទី៤ មិថុនា ជាទិវាបុណ្យជាតិនៅប្រទេសកម្ពុជា ដើម្បីប្រារព្ធថ្ងៃទី៤ ខែមិថុនា ឆ្នាំ១៩៤៩ នៅគ្រាដែលប្រទេសបារាំង កាត់ទឹកដីកម្ពុជាក្រោម ទៅឲ្យវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។