ក្រុមកូដករណាហ្គាវើលដ៍ (Naga World) ចាត់ទុកការសាកសួររបស់ចៅក្រមនៃសាលាដំបូងរាជធានីភ្នំពេញ ពាក់ព័ន្ធនឹងសំណុំរឿងញុះញង់ថា មិនឈរលើគោលការណ៍ឯករាជ្យ និងមានចេតនាការពារដើមចោទ។ ការលើកឡើងនេះ គឺបន្ទាប់ពីដើមចោទក្នុងសំណុំរឿងនេះឆ្លើយយករួចខ្លួន និងមិនមានភស្តុតាងច្បាស់លាស់ ដាក់បន្ទុកលើតំណាងសហជីពណាហ្គាវើលដ៍ នៅព្រឹកថ្ងៃទី៣ ខែមេសា។
ចៅក្រមសាលាដំបូងរាជធានីភ្នំពេញ អ្នកស្រី សឿង ចរិយា បន្តការសាកសួរសមត្ថកិច្ច ដែលជាដើមបណ្ដឹងសំណុំរឿងញុះញង់បង្កភាពវឹកវរធ្ងន់ធ្ងរដល់សន្តិសុខសង្គម គឺប្រធានការិយាល័យប្រឆាំងភេរវកម្ម នៃស្នងការដ្ឋាននគរបាលរាជធានីភ្នំពេញ លោក សំ វ៉ាន់ឌី និងអនុប្រធាននាយកដ្ឋានប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញ លោក សេង ស៊ីណា ប៉ុន្តែពួកគាត់មិនបានផ្ដល់ចម្លើយសមស្របតាមភស្តុតាង ដែលមាននោះទេ។ ក្រុមកូដករ និងមន្ត្រីសង្គមស៊ីវិលយល់ឃើញថា បើគ្មានភស្តុតាងច្បាស់លាស់ទេ គួរតែដោះលែងកញ្ញា ឈឹម ស៊ីថរ និងទម្លាក់បទចោទលើតំណាងសហជីពទាំងអស់ឱ្យមានសេរីភាពឡើងវិញ។ តំណាងកូដករក្រុមហ៊ុនណាហ្គាវើលដ៍ចំនួន ៩នាក់ រួមមាន កញ្ញា ឈឹម ស៊ីថរ កញ្ញា ឈឹម សុខន និងមនុស្សមួយចំនួនទៀត ចូលស្ដាប់ក្នុងបន្ទប់សវនាការ។
សមាជិកសហជីពទ្រទ្រង់សិទ្ធិការងារ នៃក្រុមហ៊ុនបនល្បែងណាហ្គាវើលដ៍ កញ្ញា ឈឹម សុខន ប្រាប់វិទ្យុអាស៊ីសេរី នៅថ្ងៃទី៣ មេសាថា នៅក្នុងបន្ទប់សាកសួរ ចៅក្រមបានសួរទៅ លោក សេង ស៊ីណា និង លោក សំ វ៉ាន់ឌី ដែលជាដើមបណ្ដឹងថា ភស្តុតាង ដែលក្រុមកូដករប្រជុំគ្នានៅក្នុងប្រព័ន្ធទំនាក់ទំនងបណ្ដាញសង្គម ហ្សូម (Zoom) នោះ ពិតជាបានលើកឡើងអំពីការធ្វើបាតុកម្មប្រឆាំងរដ្ឋាភិបាលមែន ឬអត់ ហើយមុនពេលពួកគាត់ចុះទៅបង្ក្រាបក្រុមកូដករ តើមានបានជូនដំណឹងឱ្យពួកគេជាមុន ឬទេ? ប៉ុន្តែពួកគាត់ទាំងពីរឆ្លើយថា មិនដឹងទេ ព្រោះរបាយការណ៍ ដែលប្រមូលបានមានច្រើនទំព័រ ធ្វើឱ្យពួកគាត់មិនអាចចាំបាន។ ចំណែកចៅក្រមមិនបានសួរដេញដោលទៀតនោះទេ ក៏សន្និដ្ឋានថា ពួកគេបានប្រឆាំងរដ្ឋាភិបាលមែន។ កញ្ញាបញ្ជាក់ថា មូលហេតុ ដែលកញ្ញា ឈឹម ស៊ីថរ និងសមាជិកសហជីពទាំងអស់ប្រជុំគ្នាតាមប្រព័ន្ធ ហ្សូម (Zoom) ដោយសារមានជំងឺកូវីដ១៩ រាតត្បាត ធ្វើឱ្យពួកគេមិនអាចចេញមកប្រជុំគ្នាដោយផ្ទាល់បាន ហើយរឿងទាំងនេះមិនអាចយកមកចោទប្រកាន់ថា ពួកគេមានបំណងចង់ផ្ដួលរលំរដ្ឋាភិបាលបានឡើយ។
កញ្ញា ឈឹម សុខន៖«ពេលមេធាវីសួរគាត់ថា កន្លែងណាខ្លះដែរប៉ូលិសបញ្ជាក់ពួកគាត់ពិតជាបានញុះញង់គាត់ឆ្លើយអត់កើតដោយសារវាមានច្រើនទំព័រអត់អាចចាំទាំងអស់ វាមើលឃើញថា គាត់ភាគីដើមបណ្ដឹងយ៉ាងហោចណាស់ ក៏គាត់ក្ដោបបានសំណុំរឿងមានចំណុចសំខាន់ណាដែរ គាត់ចោទបងជាបទញុះញង់ណាអូនវាអត់មានសោះ វាអត់មានវែកញែកឱ្យច្បាស់នៅកន្លែងហ្នឹងទេ»។
លោក សេង ស៊ីណា និងលោក សំ វ៉ាន់ឌី ជាដើមបណ្ដឹង ដែលប្ដឹងតំណាងក្រុមកូដករណាហ្គាវើលដ៍។ ក្រុមកូដករអះអាងថា ពួកគេមានវិវាទការងារជាមួយថៅកែក្រុមហ៊ុនណាហ្គាវើលដ៍មិនមែនមានវិវាទជាមួយអាជ្ញាធរទេ។ ដូច្នេះអាជ្ញាធរមិនគួរប្រឌិតភស្តុតាង ដើម្បីចោទពួកគេនោះឡើយ។
ស្រដៀងគ្នានេះដែរ កូដករណាហ្គាវើលដ៍ម្នាក់ទៀត គឺលោកស្រី ឃ្លាំង សុបិន្ត ថ្លែងថា ក្នុងសវនាការ ចៅក្រមហាក់មិនចង់ឱ្យដើមបណ្ដឹងឆ្លើយសំណួរ ដែលក្រុមមេធាវីបានសួរសមត្ថកិច្ច អំពីភស្តុតាងដែលថា កូនក្ដីលោកបានប្រមូលផ្ដុំគ្នាច្រើនបង្កឱ្យភ្ញៀវបរទេសភ័យខ្លាច មិនហ៊ានមកកម្សាន្តបរិវេណខាងមុខក្រុមហ៊ុនណាហ្គាវើលដ៍។ ប៉ុន្តែលោកស្រីថា ក្នុងការសួរដេញដោលសមត្ថកិច្ចនោះ មិនមានភស្តុតាងណាមួយច្បាស់លាស់ដាក់បន្ទុកទៅលើក្រុមកូដករឡើយ។
លោកស្រី ឃ្លាំង សុបិន្ត៖«ការដេញដោលខាងមេធាវីមិនសូវបានសិទ្ធិនិយាយពេញមាត់ពេញកទេពីព្រោះដោយសារខាងតំណាងអយ្យការក៏ដូចជាចៅក្រមគាត់នៅតែព្យាយាមការពារខាងដើមបណ្ដឹងពីព្រោះខាងដើមបណ្ដឹងនិយាយអីក៏បានដល់ពេលខាងណេះនិយាយល្មមៗគាត់ឡើងជំទាស់ហើយរបៀបថាប្រើភាសាស៊កសៀតឌឺដងតាមរយៈអ្នកច្បាប់ដែរអ៊ីចឹង»។
នៅក្នុងសវនាការនេះមានការឃ្លាំមើលពីមន្ត្រី ស្ថានទូតអូស្ត្រាលី (Australia) មន្ត្រីស្ថានទូតអាមេរិក (USA) និងអ្នកសង្កេតការណ៍អង្គការសហប្រជាជាតិ (UN)។
ទោះជាយ៉ាងណាក្ដី នៅខាងក្រៅឯណោះវិញ មានកូដករប្រមាណ ៤០នាក់ ឈរចាំលើកទឹកចិត្តដល់តំណាងរបស់ពួកគេ មិនតែប៉ុណ្ណោះ ពួកគេបាននាំគ្នាលើករូបថត កញ្ញា ឈឹម ស៊ីថរ ភ្ជាប់ដោយពាក្យថា ប្រជាធិបតេយ្យសហជីព សមាជិកជាអ្នកសម្រេចចិត្តគ្មាននរណាញុះញង់ទេ។ លើសពីនេះ មានមន្ត្រីសង្គមស៊ីវិលមួយចំនួនចូលរួមឃ្លាំមើល និងមានអាជ្ញាធរស្លៀកពាក់ឯកសណ្ឋាន និងស្លៀកពាក់ស៊ីវិលប្រមាណ ២០នាក់ឈរយាមនៅខាងមុខសាលាដំបូងរាធានីភ្នំពេញ។ សវនាការនេះមាន ៤ស្ថាប័ន្ថចូលបំភ្លឺ រួមមាន នាយកដ្ឋានប្រឆាំងបទល្មើសបច្ចេកវិទ្យា នៃស្នងការដ្ឋានរាជធានីភ្នំពេញ ការិយាល័យប្រឆាំងភេរវកម្មនៃស្នងការដ្ឋានរាជធានីភ្នំពេញ និង ២ស្ថាប័នទៀត ដែលនឹងត្រូវបន្តការសាកសួរ នៅថ្ងៃទី១១ ខែមេសាខាងមុខ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្ស (ADHOC) លោក ស៊ឹង សែនករុណា មានប្រសាសន៍ថា តុលាការគួរតែស្រាវជ្រាវលើសំណុំរឿងនេះបន្ថែម ពីព្រោះការឆ្លើយរបស់ដើមបណ្ដឹងមិនអាចយកជាការបានទេ។ លោកថា ម្យ៉ាងទៀត បើគ្មានភស្តុតាងច្បាស់លាស់ តុលាការគួរតែដោះលែងកញ្ញា ឈឹម ស៊ីថរ និងសមាជិកសហជីពផ្សេងទៀតឱ្យមានសេរីភាពឡើងវិញ។
លោក ស៊ឹង សែនករុណា៖«ការណ៍នេះខ្ញុំក៏បានចូលឃ្លាំមើលសវនាការដែរ យើងឃើញមានច្រើនដែលមតិសង្ស័យមួយចំនួនអ៊ីចឹងផលប្រយោជន៍នេះហ្នឹងទៅដល់ជនជាប់ចោទអ៊ីចឹងគួរពិចារណាដើម្បីសម្រេចសេចក្ដីលើទម្លាក់បទចោទឱ្យខាងក្រុមហ៊ុនមានធ្វើយ៉ាងមានដំណោះស្រាយជូនក្រុមកូដករដែលកំពុងរងគ្រោះទាំងអស់នោះ»។
សមត្ថកិច្ចចាប់ខ្លួនកញ្ញា ឈឹម ស៊ីថរ ជាលើកទីពីរ កាលពីខែវិច្ឆិកា ឆ្នាំ២០២២ បញ្ជូនទៅពន្ធនាគារព្រៃសវិញ ក្រោយពី កញ្ញា វិលត្រឡប់មកពីការចូលរួមកិច្ចប្រជុំនៅប្រទេសអូស្ត្រាលី (Australia) ក្រោមបទចោទថា ល្មើសបម្រាមតុលាការ។ រីឯកូដករប្រមាណ១០នាក់ទៀត ត្រូវបានតុលាការកោះហៅឱ្យចូលបំភ្លឺជាបន្តបន្ទាប់ ក្រោយពេលពួកគេទាមទារថៅកែក្រុមហ៊ុនបនល្បែងណាហ្គាវើលដ៍ឱ្យដោះស្រាយវិវាទការងារ។ ក្រុមកូដករស្នើដល់រដ្ឋាភិបាលឱ្យឈប់ដាក់សម្ពាធលើកូដករ ដោយរុញទៅម្ចាស់ក្រុមហ៊ុនបនល្បែងណាហ្គាវើលដ៍ចេញមកដោះស្រាយបញ្ចប់វិវាទការងារមួយនេះឱ្យបានឆាប់រហ័ស។
កន្លងមក សហរដ្ឋអាមេរិក និងស្ថានទូតអូស្ត្រាលី រួមទាំងសហព័ន្ធសហជីពអន្តរជាតិស្នើដល់រដ្ឋាភិបាលកម្ពុជា ឱ្យដោះលែងកញ្ញា ឈឹម ស៊ីថរ និងទម្លាក់ចោលការចោទប្រកាន់លើសហជីពកម្មករទាំងអស់ និងបើកឱ្យពួកគេប្រើសិទ្ធិសេរីភាពបង្កើតសមាគម និងការជួបប្រជុំដោយសន្តិវិធី។ ពួកគេមើលឃើញថា ការបន្តធ្វើទុក្ខបុកម្នេញលើក្រុមកូដករណាហ្គាវើលដ៍ និងការចាប់ខ្លួនកញ្ញា ឈឹម ស៊ីថរ គឺរដ្ឋាភិបាលកម្ពុជាអនុវត្តផ្ទុយពីច្បាប់រដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។