តុលាការ ចេញដីកាបង្គាប់សមត្ថកិច្ចនាំខ្លួនអ្នកជំនាញកសិកម្ម លោក នី ណាក់ ទៅឃុំខ្លួនបណ្ដោះអាសន្ននៅមណ្ឌលអប់រំកែប្រែទី១ (ម១) ឬហៅថា ពន្ធនាគារព្រៃស ពីបទបរិហារកេរ្តិ៍ជាសាធារណៈ និងញុះញង់ឲ្យមានការរើសអើង។ មន្ត្រីអង្គការសង្គមស៊ីវិលថា ការសម្រេចឃុំខ្លួន លោក នី ណាក់ ជាលើកទី២នេះ នឹងធ្វើឲ្យរដ្ឋាភិបាលកម្ពុជារងការរិះគន់បន្ថែមទៀត ពីសាធារណជនជាតិ-អន្តរជាតិ អំពីការរំលោភសិទ្ធិសេរីភាពជាមូលដ្ឋាន ជាពិសេសសេរីភាពបញ្ចេញមតិ។
ចៅក្រមស៊ើបសួរសាលាដំបូងរាជធានីភ្នំពេញ លោក ញឹម ពិសាល សម្រេចឃុំខ្លួន អ្នកជំនាញកសិកម្ម លោក នី ណាក់ នៅពន្ធនាគារព្រៃស ឬមណ្ឌលអប់រំ កែប្រែទី១ (ម១)។ តុលាការចោទប្រកាន់ លោក នី ណាក់ ពីបទមិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិម បរិហារកេរ្តិ៍ជាសាធារណៈ និងញុះញង់ឲ្យមានការរើសអើង។
សាលាដំបូងរាជធានីភ្នំពេញ បានសាកសួរ លោក នី ណាក់ កាលពីរសៀលថ្ងៃទី៥ ខែមករា រហូតដល់ម៉ោងប្រមាណ៨យប់ ទើបតុលាការសម្រេចបញ្ជូនខ្លួនលោក នី ណាក់ ទៅឃុំនៅក្រសួងមហាផ្ទៃបណ្ដោះអាសន្នមួយយប់សិន រហូតដល់ថ្ងៃសៅរិ៍ ទី៦ មករា ទើបសមត្ថកិច្ច បញ្ជូនទៅឃុំនៅពន្ធនាគារព្រៃស។
ភរិយាលោក នី ណាក់ គឺលោកស្រី សុខ ស៊ីណែត ប្រាប់វិទ្យុអាស៊ីសេរីថា លោក ហេង សួរ រដ្ឋមន្ត្រីក្រសួងការងារជាអ្នកនៅពីក្រោយករណីចាប់ខ្លួនប្តីរបស់លោកស្រី។
លោកស្រី សុខ ស៊ីណែត៖ «ទៅខាងតុលាការគេថា ព័ត៌មាននោះជាព័ត៌មានមិនពិត យកព័ត៌មានមិនពិតទៅផ្សព្វផ្សាយ ព្រោះអីដែលថា កាត់ដីឲ្យហេង សួរ នោះ មិនមែន ហេង សួរ ដែលធ្វើការនៅក្រសួងការងារទេ គឺ ហេង សួរ ផ្សេងទៀតគាត់ថា អីចឹង»។
លោក ហេង សួរ បានប្តឹងលោក នី ណាក់ ពីបទបរិហារកេរ្តិ៍ និងផ្សាយព័ត៌មានមិនពិតបន្ទាប់ពីលោក នី ណាក់ បានសរសេរក្នុងទំព័រ (Facebook) លោកថា លោកឈ្មោះហេង សួរ មិនដឹងធ្វើអ្វីជូនជាតិ ទើបទទួលបានទទួលដីព្រៃជាច្រើនហិកតារនៅខេត្តកំពត។ ទោះបីជាយ៉ាងណា លោក នី ណាក់ មិនបានបញ្ជាក់ថា លោក ហេង សួរ ជារដ្ឋមន្ត្រីក្រសួងការងារនោះទេ។ កន្លងមកលោកនាយករដ្ឋមន្ត្រី ហ៊ុន ម៉ាណែត និង លោក ហេង សួរ បានបដិសេធថា ឈ្មោះ ហេង សួរ ដែលទទួលបានដីនៅកំពត មិនមែន ហេង សួរ ជារដ្ឋមន្ត្រីក្រសួងការងារឡើយ។
ជុំវិញការចាប់ខ្លួនលោក នី ណាក់ នេះ នាយកទទួលបន្ទុកកិច្ចការទូទៅ នៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការសម្រេចឃុំខ្លួនលោក នី ណាក់ នឹងរងការរិះគន់ពីសាធារណជនជាតិ និងអន្តរជាតិថា រដ្ឋាភិបាលកំពុងតែរឹតត្បិតសិទ្ធិសេរីភាពជាមូលដ្ឋាន។
លោក អំ សំអាត៖ «ការចែកមិនដាច់រវាងអ្វីជាសេរីភាពមូលដ្ឋាន សេរីភាពក្នុងការបញ្ចេញមតិ អ្វីជាបទល្មើសនៅក្នុងការចោទប្រកាន់ ហ្នឹងហើយដែលនាំឲ្យមានការរិះគន់បន្ថែមទៀតពីសហគមន៍ជាតិ-អន្តរជាតិ ទៅលើបញ្ហានេះ ។ ហើយមួយទៀតវាជះឥទ្ធិពលមិនល្អដែរ សម្រាប់សេរីភាពក្នុងការបញ្ចេញមតិ ប្រទេសកម្ពុជាយើងដូច ដែលកន្លងមក គេតែងតែរិះគន់ថា សេរីភាពក្នុងការបញ្ចេញមតិស្ថិតនៅក្នុងការរឹតត្បិត»។
ការចោទប្រកាន់ និងការឃុំខ្លួន លោក នី ណាក់ ធ្វើឡើងក្រោយពីលោក តែងតែបញ្ចេញមតិលើបណ្ដាញសង្គម (Facebook) ចំអកពីភាពអសកម្មរបស់រដ្ឋាភិបាល។
លោក នី ណាក់ ក៏ធ្លាប់ត្រូវបានអតីតរដ្ឋមន្ត្រីក្រសួងកសិកម្ម លោក វ៉េង សាខុន ប្ដឹងពីបទញុះញង់ ដាក់ពន្ធនាគារ ១៨ខែ កន្លងទៅហើយ ករណីលោកសរសេររិះគន់យុទ្ធនាការរបស់ក្រសួងកសិកម្ម និងឌឺដងរឿងទិញម៉ាស់ពាក់ឱ្យកូនមាន់ក្នុងគ្រាមានអាសន្ន ខណៈកម្ពុជា និងពិភពលោក ផ្ទុះជំងឺកូវីដ១៩ កាលពីចុងឆ្នាំ២០១៩។
កាលពីខែកញ្ញា ឆ្នាំ២០២៣ ជនមិនស្គាល់មុខមួយក្រុមមានគ្នាប្រមាណ៨នាក់ បានជិះម៉ូតូបុកម៉ូតូលោក នី ណាក់ ឱ្យដួល និងចុះព្រួតគ្នាវាយលោកឲ្យបែកក្បាលរបួសធ្ងន់ នៅពេលលោក និងប្រពន្ធរបស់លោកកំពុងធ្វើដំណើរតាមផ្លូវ។ មកទល់នឹងពេលនេះ អាជ្ញាធរនៅមិនទាន់ចាប់ខ្លួនជនបង្កមកផ្ដន្ទាទោសបាននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។