សមត្ថកិច្ចខេត្តបន្ទាយមានជ័យនៅព្រឹកថ្ងៃទី១៣ ខែកុម្ភៈ បានឃាត់ខ្លួនចាងហ្វាងកាសែតខ្មែរជាយដែនម្នាក់ ក្រោយពីមានបណ្តឹងពីមន្ត្រីរាជការពីររូប។ មន្ត្រីសង្គមស៊ីវិលព្រួយបារម្ភការធ្វើទុក្ខបុកម្នេញលើអ្នកកាសែតជាបន្តបន្ទាប់ ពីរដ្ឋាភិបាលបានបិទវិទ្យុសំឡេងប្រជាធិបតេយ្យវីអូឌី (VOD)។ មន្ត្រីសង្គមស៊ីវិល ព្រួយបារម្ភពីការគាបសង្កត់សិទ្ធិសេរីភាពអ្នកសារព័ត៌មាន តាមរយៈការគំរាមកំហែងតាមប្រព័ន្ធតុលាការជាបន្តបន្ទាប់។
ការលើកឡើងនេះ ក្រោយពីសមត្ថកិច្ចខេត្តបន្ទាយមានជ័យ បានឃាត់ខ្លួនចាងហ្វាងសារព័ត៌មានអនឡាញខ្មែរជាយដែនម្នាក់គឺលោក អ៊ុង ថាប់វាំង ហើយបញ្ជូនទៅតុលាការនៅថ្ងៃ១៣ ខែកុម្ភៈ ពីបទបរិហារកេរ្តិ៍ជាសាធារណៈ និងញុះញង់ ឱ្យមានការរើសអើងផ្អែកតាមបណ្តឹងរបស់ប្រធានមន្ទីរពេទ្យបង្អែកក្រុងប៉ោយប៉ែតលោក ឱក ទីនណា និងមន្ត្រីពន្ធដារនៅក្រុងប៉ោយប៉ែត គឺលោក សឿង សីហា។ ពាក់ព័ន្ធនឹងរឿងអំពើពុករលួយ របស់មន្ត្រីរាជការទាំងនោះ។
ចាងហ្វាងសារព័ត៌មានខ្មែរជាយដែន លោក អ៊ុង ថាប់វាំង បានថ្លែងមុនពេលចាប់ខ្លួនថា ចំណាត់ការពាក្យបណ្តឹងនេះ ហាក់លឿនបន្តិច ធ្វើឱ្យលោកត្រៀមខ្លួនមិនទាន់ក្នុងការពឹងពាក់មេធាវី និងដាក់ពាក្យស្នើសុំកិច្ចអន្តរាគមន៍ ទៅក្លឹបអ្នកកាសែតកម្ពុជា។
លោកថា ដើមបណ្តឹងក្នុងសំណុំរឿងនេះ មុននឹងប្តឹងលោកទៅតុលាការ គួរតែស្នើសុំឱ្យលោកកែតម្រូវព័ត៌មាន ឬផ្សាយឡើងវិញជាមុនសិន ខណៈដែលព័ត៌មានរបស់លោកបានផ្សព្វផ្សាយ មានប្រភពច្បាស់លាស់។ លោកបញ្ជាក់ថា លោកបានសរសេរលិខិតស្នើសុំកិច្ចអន្តរាគមន៍ទៅ ក្លឹបអ្នកកាសែតកម្ពុជារួចហើយ៖
«ដោយសារមន្ត្រីទាំងអស់នោះ គាត់អត់បានសិក្សាពីផ្លូវច្បាប់នៃរបបសារព័ត៌មានមានទេ លោកនឹកឃើញអីលោកចាប់ផ្តើមប្តឹង។ វាគួរតែសិក្សាពីរបបសារព័ត៌មានមុនសិន មុននឹងប្តឹងអ្នកកាសែតអាជីពដូចរូបខ្ញុំ»។
ការប្តឹងផ្តល់នេះ ធ្វើឡើងក្រោយពីស្ថាប័នសារព័ត៌មានជាយដែនបានផ្សាយអត្ថបទមួយ កាលពីចុងឆ្នាំ២០២១ ដោយលាតត្រដាង ពីរឿងអាស្រូវ ប្រធានមន្ទីរពេទ្យបង្អែកក្រុងប៉ោយប៉ែតលោក ឱក ទីនណា និងបក្ខពួកថា បានព្រឹត្តិអំពើពុករលួយជាប្រព័ន្ធនិងបង្កើតឲ្យមានបក្ខពួកនិយមជាដើម។ រីឯបុគ្គលិករងគ្រោះមួយចំនួនបានដាក់ពាក្យបណ្ដឹងទៅអង្គភាពប្រឆាំងអំពើពុករលួយ តែមកដល់ពេលនេះពុំទាន់ឃើញមានដំណោះស្រាយនៅឡើយទេ។
សារព័ត៌មានខ្មែរជាយដែន បានស្រង់ប្រភពពីបុគ្គលិកមន្ទីរពេទ្យជាច្រើននាក់ដោយសុំមិនបញ្ចេញឈ្មោះ ដោយពួកគេមិនពេញចិត្តការដឹកនាំរបស់ប្រធានមន្ទីរពេទ្យរូបនេះ និងបក្ខពួក ប្រើពាក្យសំដីមិនសមរម្យ ឃុបឃិតគ្នាប្រព្រឹត្តអំពើពុករលួយជាប្រព័ន្ធ។
រីឯអត្ថបទមួយទៀត សារព័ត៌មានក្នុងស្រុកមួយនេះ បានស្រង់ប្រភពពីពលរដ្ឋ ដោយចោទមន្ត្រីពន្ធដារក្រុងប៉ោយប៉ែតលោក សឿង សីហា ថាធ្វើឲ្យស្មុគស្មាញលើឯកសារបង់ពន្ធ ដើម្បីជំរិតរកផលប្រយោជន៍កាលពីខែកក្កដា ឆ្នាំ២០២២កន្លងទៅ។
វិទ្យុអាស៊ីសេរីនៅមិនទាន់អាចទាក់ទងសុំការបំភ្លឺរឿងនេះ ពីតំណាងអយ្យការអមសាលាដំបូងខេត្តបន្ទាយមានជ័យ លោក សំរឹទ្ធ សុខុន បាននៅឡើយទេ នៅថ្ងៃទី១៣ ខែកុម្ភៈ។ ចំណែក ស្នងការខេត្តបន្ទាយមានជ័យលោក សិទ្ធ ឡោះ ក៏វិទ្យុអាស៊ីសេរីមិនទាន់អាចទាក់ទងបានដែរ នៅថ្ងៃដដែលនេះ ដោយទូរសព្ទចូលច្រើនដង តែគ្មានអ្នកលើក។
ក៏ប៉ុន្តែក្រឡាបញ្ជីលោក កែវ សារី ប្រាប់វិទ្យុអាស៊ីសេរីយ៉ាងខ្លីថា ស្ថាប័នអយ្យការបានកោះហៅ លោក អ៊ុង ថាប់វាំង ក៏ប៉ុន្តែគាត់បានស្នើសុំពន្យារពេល ដោយសារមិនទាន់រកមេធាវីបាន។ លោកបញ្ជាក់ថា ការចាប់ខ្លួននេះ អាចជាសំណុំរឿងផ្សេងទៀត ព្រោះរឿងដែលលោកកាន់ គឺតម្រូវឱ្យគាត់ចូលខ្លួនបំភ្លឺ នៅថ្ងៃទី១៦ ខែកុម្ភៈ ដែលមានចែងក្នុងដីកា។ លោកបដិសេធមិនអធិប្បាយលម្អិត ពីអង្គហេតុនៃសំណុំរឿងផ្សេងទៀតនោះឡើយ៖
«ប្រហែលមានរឿងអីផ្សេង ព្រោះរឿងហ្នឹងមានអីទេ? រឿងដែលចោទប្រកាន់នេះ គឺចូលថ្ងៃកំណត់ថ្ងៃចេញដីកាតើបង»។
វិទ្យុអាស៊ីសេរីនៅមិនទាន់អាចទាក់ទងសុំការបំភ្លឺរឿងនេះ ពីប្រធានក្លឹបអ្នកកាសែតកម្ពុជា លោក ពុយ គា បាននៅឡើយទេនៅថ្ងៃទី១៣ ខែកុម្ភៈ។
ជុំវិញរឿងនេះ មន្ត្រីនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា អាជ្ញាធរពុំគួរយកច្បាប់ព្រហ្មទណ្ឌ មកអនុវត្តលើអ្នកសារព័ត៌មាន យ៉ាងតក់ក្រហល់បែបនេះទេដែលលោកចាត់ទុកថា ជាការដាក់សម្ពាធលើសេរីភាពអ្នកសារព័ត៌មាន៖
«គួរតែមានការទុកលទ្ធភាពឱ្យអ្នកសារព័ត៌មានរូបហ្នឹងគាត់ បានស្វែងរកមេធាវីការពារក្តី ឬការពារខ្លួន ឱ្យត្រឹមត្រូវតាមផ្លូវច្បាប់ ឱ្យទទួលបានសិទ្ធិទទួលបានយុត្តិធម៌។ ជៀសវាងមិនទាន់អនុវត្តច្បាប់សារព័ត៌មានបានស្រួលបួលផង បែរជាមានវិធានការផ្សេងៗ»។
នៅល្ងាចថ្ងៃដដែលនេះ តុលាការខេត្តបន្ទាយមានជ័យមិនទាន់បញ្ជូនខ្លួន ចាងហ្វាងកាសែតខ្មែរជាយដែនលោក អ៊ុង ថាប់វាំង ទៅពន្ធនាគារនៅឡើយទេ ដោយបញ្ជូនគាត់ទៅឃុំខ្លួននៅស្នងការនគរបាលខេត្តបន្ទាយមានជ័យ។
របាយការណ៍របស់សម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចារកឃើញថា រយៈពេល៣ខែចុងឆ្នាំ២០២១ អ្នកកាសែតជាង១០នាក់រងការចាប់ខ្លួន និងចោទប្រកាន់តាមផ្លូវតុលាការ។ ចំណែក តុលាការខេត្តព្រះវិហារក៏កាត់ទោសអ្នកកាសែត៨នាក់ឲ្យជាប់ពន្ធនាគារ កាលពីខែតុលា តាមបណ្ដឹងរបស់ម្ចាស់ឃ្លាំងឈើមួយកន្លែងក្នុងខេត្តនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។