សមត្ថកិច្ច​ខេត្ត​ស្វាយរៀង​រារាំង​អង្គការ​សង្គម​ស៊ីវិល​មិន​ឲ្យ​បង្រៀន​ប្រជា​សហគមន៍​អំពី​របៀប​ចិញ្ចឹម​មាន់

0:00 / 0:00

សហគមន៍​កសិករ​ស្រុក​រមាសហែក ​ខេត្ត​ស្វាយរៀង​ចោទ​នគរបាល​ឃុំ​អំពិល ​ស្រុក​រមាសហែក​ថា បាន​រារាំង​មន្ត្រី​សង្គម​ស៊ីវិល​មិន​ឲ្យ​បើក​វគ្គ​បណ្តុះបណ្តាល​របៀប​ចិញ្ចឹម​មាន់​ដល់​សហគមន៍​មូលដ្ឋាន។ តំណាង​សហគមន៍​កសិករ​ចាត់​ទុក​ការ​រារាំង​នេះ​ជា​ការ​រឹតត្បិត​សិទ្ធិ​សេរីភាព​ពលរដ្ឋ ខណៈ​ដែល​ពួក​គេ​បាន​ជូន​ដំណឹង និង​សុំ​ការ​អនុញ្ញាត​ពី​អាជ្ញាធរ​ភូមិ​ឃុំ និង​មន្ទីរ​កសិកម្ម​ស្រុក​រួច​ហើយ។

សហគមន៍​កសិករ​ស្រុក​រមាសហែក ឲ្យ​ដឹង​នៅ​ថ្ងៃ​ទី​១៧ កញ្ញា​ថា សមត្ថកិច្ច​ ៦នាក់ ពាក់​ឯកសណ្ឋាន​នគរបាល​ ​បាន​ហាមឃាត់​វគ្គ​បណ្តុះបណ្តាល​របៀប​ចិញ្ចឹម​មាន់​ដល់​សហគមន៍ នៅ​ព្រឹក​ថ្ងៃ​ទី១៧ ​កញ្ញា​ ​ដោយ​លើក​ហេតុផល​ថា​ សហគមន៍​កសិករ​ស្រុក​រមាសហែក​ និង​ សមាគម​សម្ព័ន្ធ​កសិករ​កម្ពុជា (CCFC) ​មិន​ទាន់​សុំ​ច្បាប់​អនុញ្ញាត​ពី​សាលា​ខេត្ត​ស្វាយរៀង​នៅឡើយ​ទេ។

តំណាង​សហគមន៍​ កសិករ​ស្រុក​រមាសហែក​លោកស្រី ខៀវ សារ៉ុន ឲ្យ​ដឹង​ថា ពួកគេ​បាន​ជូន​ដំណឹង​ទៅ​អាជ្ញាធរ​មូលដ្ឋាន និង​សុំ​ច្បាប់​អនុញ្ញាត​ពី​មន្ទីរ​កសិកម្ម​ស្រុក​រួចហើយ កាល​ពី​ថ្ងៃ​ទី១២ កញ្ញា​មុន​ផ្តើម​បើក​វគ្គ​បណ្តុះបណ្តាល​នេះ ក៏​ប៉ុន្តែ​សមត្ថកិច្ច​នៅតែ​ហាមឃាត់​ឲ្យ​ពួកគេ​ឲ្យ​រំសាយ​ជាបន្ទាន់​។ ​លោកស្រី​ថា ពួកគេ​បាន​រំសាយ​វគ្គ​បណ្តុះបណ្តាល​ ត្រឹម​ម៉ោង ១០ព្រឹក​ និង​សម្រេច​ដើរ​ពិនិត្យមើល​ទ្រុង​មាន់​តាម​ផ្ទះ​អ្នកភូមិ ​ក៏​មាន​សមត្ថកិច្ច​តាម​ឃ្លាំមើល​ពួកគេ​ទៀតផង។ លោកស្រី​បន្ថែម​ថា គ្រាន់​តែ​បង្រៀន​ចិញ្ចឹម​មាន់​ដល់​ពលរដ្ឋ​បែរ​តម្រូវ​ឲ្យ​ពូក​គេ​សុំ​ច្បាប់​ពី​អាជ្ញាធរ​ភូមិ​ឃុំ​ រហូតដល់​អាជ្ញាធរ​ខេត្ត និង​មន្ទីរ​កសិកម្ម​ ​បង្ក​ភាពស្មុកស្មាញ​ច្រើន​ដស់​សហគមន៍​កសិករ​ក្នុង​ការទទួលបាន​ចំណេះ​ដឹង៖ «»

ស្ត្រី​ដដែល​បន្ថែម​ថា វគ្គ​បណ្តុះបណ្តាល​របៀប​ចិញ្ចឹម​មាន់​ផ្តល់​ប្រយោជន៍​ច្រើន​ដល់​ពលរដ្ឋ​ឲ្យ​ស្វែង​យល់​ពី​វិធីសាស្ត្រ​ចិញ្ចឹម​មាន់​ក្នុង​បំណង​លើក​កម្ពស់​ជីវភាព​កសិករ ក៏​ប៉ុន្តែ​សកម្មភាព​នេះ បែរ​ជា​មាន​ការ​រំខាន​ពី​អាជ្ញាធរ​ទៅ​វិញ​ធ្វើឲ្យ​ពលរដ្ឋ​មិន​ទទួល​បាន​ការបណ្តុះបណ្តាល​ឲ្យ​បាន​ពេញលេញ។ លើស​ពី​នេះ ពួក​គេ​កម្រ​បាន​ចុះ​បណ្តុះបណ្តាល​ផ្ទាល់​នៅ​សហគមន៍​មូលដ្ឋាន​ពី​របៀប​ចិញ្ចឹម​មាន់ និង​ ​ដាំ​បន្លែ ​ដោយសារ​មាន សមត្ថកិច្ច​រារាំង​ច្រើន​លើក​ច្រើន​សារ និង​ធ្លាប់​ចោទ​ពួកគេ​ថា ជា​បក្ស​ក្រុម​ប្រឆាំង។

ពលរដ្ឋ​ចូលរួម​វគ្គ​បណ្តុះបណ្តាល​រស់នៅ​ឃុំ​ឈើ​ទាល ស្រុក​ស្វាយជ្រុំ លោកស្រី អ៊ិន ​សូត្រ ​បន្ទោស​ថា ​អាជ្ញាធរ​មិន​បាន​បម្រើ​ពលរដ្ឋ​ដោយ​ស្មោះត្រង់​ទេ ​បែរជា​ប្រើ​អំណាច​ រឹតត្បិត​សិទ្ធិសេរីភាព​ពួក​គេ​មិន​ឲ្យ​ទទួលបាន​ការអប់រំ ​ដើម្បី​លើកកម្ពស់​សេដ្ឋកិច្ច​គ្រួសារ៖ «»

ឆ្លើយតប​ការចោទប្រកាន់​នេះ​ ​មេ​ប៉ុស្តិ៍​រដ្ឋបាល​ ​ឃុំ​អំពិល​ ញ៉ាញ់ ថែម លើក​ឡើង​ថា មូលហេតុ​ដែល​នគរបាល​ហាមឃាត់ ដោយសារ​សហគមន៍​កសិករ​ និង​សមាគម​សម្ព័ន្ធ​កសិករ​កម្ពុជា​មិន​បាន​សុំ​ច្បាប់​អនុញ្ញាត​ពី​អាជ្ញាធរ​ខេត្ត។ លោក​ថា តាម​ផ្លូវ​ច្បាប់​សមាគមន៍ និង​អង្គការ​សង្គម​ស៊ីវិល​ណា​ក្តី មុន​បើក​វគ្គ​បណ្តុះបណ្តាល​ ត្រូវ​ស្នើសុំ​ច្បាប់​ពី​អាជ្ញាធរ​ភូមិ ឃុំ អភិបាល​ស្រុក និង​ការិយាល័យ​កសិកម្ម​ស្រុក រហូត​ដល់​មន្ទីរ​កសិកម្ម​ខេត្ត និង​អភិបាល​ខេត្ត​ជា​មុន​សិន ទើប​មាន​សិទ្ធិ​បើក​វគ្គ​បណ្តុះបណ្តាល​បាន៖ «»

អ្នកគ្រប់គ្រង​បច្ចេកទេស​ការិយាល័យ​ស៊ើបអង្កត ​នៃ​អង្គការ​សិទ្ធិ​មនុស្ស ​លីកាដូ ​លោក អំ សំអាត ចោទ​សួរ​ទៅ​អាជ្ញាធរ​ខេត្ត​ស្វាយរៀង​ថា អាជ្ញាធរ​គាំទ្រ​ពលរដ្ឋ​មាន​ជីវភាព​ប្រសើរ ឬ​ក៏​ទុក​ពលរដ្ឋ​មិន​ឲ្យ​ទទួល​បាន​ចំណេះដឹង​ពី​របៀប​ចិញ្ចឹម​មាន់ បង្កើត​ប្រាក់​ចំណួល​ក្នុង​គ្រួសារ? លោក​ថា ការ​បើក​វគ្គ​បណ្តុះបណ្តាល​នេះ មិន​ខុស​ច្បាប់​នោះ​ទេ ហើយ​អាជ្ញាធរ​គួរសម្របសម្រូល ​ឲ្យ​ពលរដ្ឋ​ទទួល​បាន​ការ​បណ្តុះបណ្តាល​នេះ​ឲ្យ​បាន​ពេញលេញ៖ «»

លោក អំ សំអាត ចាត់​ទុក​ការ​រារាំង​នេះ​ថា ជា​ការ​រឹតត្បិត​សិទ្ធិ​សេរីភាព​ពលរដ្ឋ​ក្នុង​ការ​ជួបជុំ និង​ ការ​ទទួល​បាន​ចំណេះ​ដឹង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។