ប្រជាពលរដ្ឋមកពីសហគមន៍រងគ្រោះដីធ្លីចំនួន៤នៅខេត្តកោះកុងខកចិត្តដែលក្រសួងរៀបចំដែនដីមិនផ្ដល់ដំណោះស្រាយបញ្ហាដីធ្លីតាមការស្នើរបស់ពួកគាត់ ហើយក្រសួងបែរជាគំរាមកំហែង និងបង្ខំឱ្យពួកគាត់ទទួលយកដំណោះស្រាយរបស់ក្រសួងទៅវិញ។ មន្ត្រីសង្គមស៊ីវិលលើកឡើងថាក្រសួងមិនគួរគំរាមកំហែងពលរដ្ឋ និងគួរផ្ដល់សំណងសមរម្យដល់ពួកគាត់។
ប្រជាពលរដ្ឋប្រមាណ៤០នាក់មកពីសហគមន៍ចំនួន៤រួមមានសហគមន៍ក្រុម១៩៧ សហគមន៍ក្រុម១៧៥ សហគមន៍ក្រុម៨៤៣ និងសហគមន៍ព្រលាន ដែលមានជម្លោះដីធ្លីជាមួយឧកញ៉ា លី យ៉ុងផាត់ និងឧកញ៉ា ហេង ហ៊ុយ នៅថ្ងៃទី២៨ ខែឧសភា ធ្វើដំណើរពីខេត្តកោះកុងដើម្បីស្វែងរកដំណោះស្រាយនៅក្រសួងរៀបចំដែនដី នគរូបនីយកម្ម និងសំណង់។
តំណាងសហគមន៍១៧៥ លោកស្រី ផាវ ញ៉ើង បានឱ្យដឹងថា លោកស្រីមកជួបក្រសួងរៀបចំដែនដីដើម្បីស្នើសុំឱ្យរដ្ឋាភិបាលចុះបញ្ជីកម្មសិទ្ធិដីធ្លីចំនួន ១៧គ្រួសារដែលពួកគាត់ព្រមដោះដូរដីជាមួយក្រុមហ៊ុនរបស់ឧកញ៉ា ហេង ហ៊ុយ ប៉ុន្តែពួកគាត់មិនទាន់ទទួលបានប្លង់កម្មសិទ្ធិដីធ្លីនៅឡើយ។
លោកស្រី ផាវ ញ៉ើង បន្តថា ភាគីក្រសួងមិនមានឆន្ទៈក្នុងការដោះស្រាយជូនពលរដ្ឋនោះទេ តែផ្ទុយទៅវិញបែរជាព្យាយាមដាក់សម្ពាធឱ្យពលរដ្ឋទទួលយកតាមការកំណត់របស់ក្រសួង និងគំរាមមិនឱ្យពួកគាត់លើកឡើងពីបញ្ហាទាំងនេះជាមួយសារព័ត៌មានទៀតផង។
លោកស្រី ផាវ ញ៉ើង៖ «ហើយអ៊ីចឹងគាត់ថា គាត់អត់ដោះស្រាយទៀតទេ បើអត់ក៏អត់ទៅទៅឱ្យដើរប្ដឹងណាក៏ប្ដឹងទៅបើមិនសុខចិត្ត តែខ្ញុំថាខ្ញុំអត់ដើរប្ដឹងណា ខ្ញុំនៅតែនិយាយខ្ញុំនៅតវ៉ា បើគាត់គិតថាចង់ដាក់គុកដាក់ច្រវាក់ខ្ញុំទៀត ខ្ញុំក៏ដាក់ទៅព្រោះខ្ញុំអត់ទាន់បានធ្វើខុសច្បាប់ទេ ហើយចេះតែផ្សព្វផ្សាយថាដោះឱ្យខ្ញុំរួច ខ្ញុំថាអត់ទាន់ដោះទេ យកដីរបស់ខ្ញុំទៅឱ្យ ហេង ហ៊ុយ»។
ចំណែកតំណាងសហគមន៍ក្រុម១៩៧ លោកស្រី ដេត ហួរ ឱ្យដឹងថា បច្ចុប្បន្នពលរដ្ឋជាង១រយ (១២២) គ្រួសារនៅតែទាមទារឱ្យក្រសួងដែនដីផ្ដល់ដីសម្បទានសង្គមកិច្ចមកឱ្យពួកគាត់។ លោកស្រីថា ចាប់តាំងពី លោក ហេង ហ៊ុយ យកដីស្រែចម្ការពួកគាត់ដោយគ្មានសំណងមក ពួកគាត់បានបាត់បង់មុខរបររហូតដល់ឱ្យកូនៗ ឈប់រៀនទាំងវ័យក្មេងដើម្បីស្វែងរកការងារចិញ្ចឹមជីវិត។
លោកស្រី ដេត ហួរ ទទូចដល់ក្រសួងរៀបចំដែនដីទទួលយកសំណូមពររបស់ពួកគាត់ និងបែងចែកដីដល់គ្រួសារដែលបានបាត់បង់ដីធ្លីនេះឱ្យបានឆាប់ ព្រោះពួកគាត់មិនអាចទ្រាំនឹងការអូសបន្លាយផ្ដល់ដំណោះស្រាយរបស់ក្រសួងតទៀតបានទេ។
លោកស្រី ដេត ហួរ៖ «ហើយរឿងគោលនយោបាយការដោះស្រាយនេះសូមលោកឱ្យពន្លឿនក្នុងការដោះស្រាយឱ្យបានឆាប់ៗ ដើម្បីឱ្យប្រជាពលរដ្ឋឈប់ទាមទារ ហើយដើម្បីឱ្យប្រជាពលរដ្ឋមានដីអាស្រ័យផលជាក់ស្ដែង ពីព្រោះយើងក្រីក្រខ្លាំងមែនទែន ពួកយើងអត់មានដីអាស្រ័យផលទេ ប្រឈមនឹងជំពាក់បំណុលធនាគារ ហើយកូនៗ បាត់បង់ការសិក្សាទៅចំណាកស្រុក»។
វិទ្យុអាស៊ីសេរី នៅពុំទាន់អាចទាក់ទង អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត និងអភិបាលខេត្តកោះកុង អ្នកស្រី មិថុនា ភូថង ដើម្បីសុំការឆ្លើយតបចំពោះបញ្ហានេះបានទេនៅថ្ងៃទី២៨ ខែឧសភា។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា តួនាទីរបស់មន្ត្រីមន្ត្រីរាជការដែលទទួលបានប្រាក់ខែពីពលរដ្ឋគឺជាអ្នកបម្រើពលរដ្ឋ ដូច្នេះលោកថាមន្ត្រីនានាមិនគួរគំរាមកំហែង ឬបង្ខិតបង្ខំឱ្យពលរដ្ឋទទួលយកគ្រប់ការសម្រេចចិត្តរបស់ខ្លួននោះទេ។ លោក នី សុខា បន្តថាក្រសួងគួរដល់ពេលដោះស្រាយបញ្ហាឱ្យគ្រួសាររងគ្រោះពីជម្លោះដីធ្លីនៅខេត្តកោះកុងដើម្បីឱ្យពួកគាត់ទទួលបានសំណងសមរម្យ។
លោក នី សុខា៖ «ប្រមែប្រមូលព័ត៌មានប្រមែប្រមូលបញ្ហាហ្នឹងមកដាក់លើតុ ដោះស្រាយដោយតម្លាភាពដោយសុចរិតភាពពិនិត្យមើលអ្វីដែលជាការទាមទាររបស់ប្រជាពលរដ្ឋ ហើយទៅហ្នឹងការកាន់កាប់របស់ប្រជាពលរដ្ឋទៅហ្នឹងបញ្ហាទាំងអស់ហ្នឹង ខ្ញុំគិតថាមិនមែនអីលំបាកនៅក្នុងការដោះស្រាយទេ ប្រសិនបើអាជ្ញាធរមានឆន្ទៈពិតប្រាកដក្នុងការដោះស្រាយរឿងហ្នឹង»។
សហគមន៍ក្រុម៨៤៣គ្រួសារ និងសហគមន៍ព្រលានក្រុម២៤៣គ្រួសារ បានអះអាងថា ក្រុមហ៊ុនស្ករអំពៅកោះកុងស៊ូហ្គើរ (Koh Kong Sugar) និង កោះកុង ផ្លេនថេស៊ិន (Koh Kong Plantation Industry) របស់លោកឧកញ៉ា លី យ៉ុងផាត់ ស្ថិតក្នុងស្រុកស្រែអំបិល បុទុមសាគរ និងស្រុកថ្មបាំង ខេត្តកោះកុងបានរំលោភយកដីពួកគាត់អស់រយៈពេលជាង២០ឆ្នាំមកហើយ។
សហគមន៍ក្រុម១៩៧គ្រួសារ សហគមន៍ក្រុម១៧៥គ្រួសារ មកពីឃុំជីខលើ និងជីខក្រោម ស្រុកស្រែអំបិល ខេត្តកោះកុង តែងតែមកតវ៉ានៅរាជធានីភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី នគរូបនីយកម្ម និងសំណង់ និងក្រសួងស្ថាប័នរដ្ឋផ្សេងទៀត ឱ្យជួយដោះស្រាយវិវាទដីធ្លីរបស់ពួកគាត់ ដោយបានអះអាងថា ក្រុមហ៊ុន ហេង ហ៊ុយ បានរំលោភយកដីធ្លីពួកគាត់ តាំងពីឆ្នាំ២០០៧។ ប៉ុន្តែការឡើងមកតវ៉ារបស់ពួកគាត់កន្លងមកនេះ បែរជាត្រូវបានអាជ្ញាធរចាប់ខ្លួន និងផ្ដន្ទាទោសពួកគាត់៩នាក់ឱ្យជាប់ពន្ធនាគារមួយរយៈពីបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍» និង បទ «បរិហារកេរ្តិ៍» ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។