ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ជំរុញទៅតុលាការខេត្តរតនគិរី គួរទម្លាក់ចោលការចោទប្រកាន់លើរូបលោក និងក្រុមការងាររបស់លោកការចោទពីបទក្បត់ជាតិ និងបទញុះញង់នេះ គឺធ្ងន់ធ្ងរណាស់សម្រាប់ក្រុមលោកដែលជាអ្នកសកម្មជនសិទ្ធិមនុស្ស។ មន្ត្រីសង្គមស៊ីវិលរិះគន់ថា ការចោទប្រកាន់លើក្រុមលោក ថេង សាវឿន ហាក់មានចរិតនយោបាយច្រើនជាងការអនុវត្តច្បាប់។
លោក ថេង សាវឿន រក្សាជំហរ នឹងចូលបំភ្លឺនៅតុលាការខេត្តរតនគិរី ក្នុងសវនាការជំនុំជម្រះក្ដី នៅថ្ងៃទី០៨ ខែមករា ខាងមុខ។ ការបន្តនីតិវិធីរបស់តុលាការនេះ ហាក់ផ្ទុយពីការណែនាំរបស់លោក ហ៊ុន សែន ដែលស្នើទៅតុលាការឱ្យទម្លាក់បទចោទពីលោក ថេង សាវឿន។
លោក ថេង សាវឿន ប្រាប់វិទ្យុអាស៊ីសេរីថ្ងៃទី២១ ខែធ្នូថា ករណីតុលាការបន្តលើកយកសំណុំរឿងរបស់លោកទៅជំនុំជម្រះជារឿងធ្ងន់ធ្ងរចំពោះរូបលោក។ លោកនៅតែប្រកាន់ជំហរ ការរៀបចំសិក្ខាសាលាដើម្បីបណ្ដុះបណ្ដាលដល់កសិករកន្លងមកមិនមែនជាការប្រព្រឹត្តបទទោសបទល្មើសពីបទក្បត់ជាតិ និងបទញុះញង់ឡើយ។ អ្នកការពារសិទ្ធិកសិកររូបនេះ ជំរុញទៅតុលាការខេត្តរតនគិរីទម្លាក់បទចោទប្រកាន់នេះ។
លោក ថេង សាវឿន៖«ពួកយើងខ្ញុំអំពាវនាវផងដែរ ដល់តុលាការខេត្តរតនគិរី សូមមេត្តាធ្វើយ៉ាងណាទម្លាក់ចោលការចោទប្រកាន់ពួកខ្ញុំមិនបានប្រព្រឹត្តកំហុស។ ការចោទរហូតធ្ងន់ធ្ងររួមគំនិតក្បត់ និងញុះញង់ឱ្យប្រព្រឹត្តបង្កភាពវឹកវរប៉ះពាល់ដល់សង្គមធ្ងន់ធ្ងរនោះទេ»។
សាលាដំបូងខេត្តរតនគិរី ចេញដីកាកោះហៅ លោក ថេង សាវឿន លោក ញ៉ិល ភាព និងលោក ថាន់ ហាច ឱ្យចូលទៅសាលាដំបូងខេត្តរតនគិរី នៅព្រឹកថ្ងៃទី៨ ខែមករា ខាងមុខ ដើម្បីជំនុំជម្រះពីបទរួមគំនិតក្បត់ និងបទញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ តុលាការចោទប្រកាន់ថា លោក ថេង សាវឿន និងបក្ខពួក បានបានប្រព្រឹត្តនីចំណុចភូមិជ្រី សង្កាត់យក្សឡោម ក្រុងបានលុង ខេត្តរតនគិរី កាលបីថ្ងៃទី១៣ និងថ្ងៃទី១៤ ខែឧសភា ឆ្នាំ២០២៣។
ទាក់ទងរឿងនេះដែរ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា សង្កេតឃើញថា ការចោទប្រកាន់លើលោក ថេង សាវឿន ឃើញមានការសម្របសម្រួលក្រៅប្រព័ន្ធតុលាការ រហូតមានការជួបលោក ហ៊ុន សែន ប៉ុន្តែ ការដែលតុលាការនៅតែបន្តនីតិវិធីដូចនេះ ចង់បង្ហាញថា តុលាការមិនស្ថិតក្រោមសម្ពាធរបស់អ្នកនយោបាយ។ ទោះយ៉ាងណាក្ដី អ្នកការពារសិទ្ធិមនុស្សរូបនេះ យល់ថា ការបំពេញការងាររបស់អ្នកការពារសិទ្ធិមនុស្ស មិនគួររងការចោទប្រកាន់តាមផ្លូវតុលាការឡើយ។
លោក រស់ សុដ្ឋា៖«អង្គការសង្គមស៊ីវិល ឬក៏សិទ្ធិនយោបាយណាមួយក៏មិនអាចពាក់ព័ន្ធក្បត់ជាតិដែរណា ពួកខ្ញុំជាអ្នកគេហៅថា ការពារសិទ្ធិមនុស្ស ជាការបង្ក្រាបផ្លូវនយោបាយច្រើនជាង»។
នគរបាលខេត្តក្រចេះ កាលពីថ្ងៃទី១៧ ឧសភា បានឃាត់ខ្លួន លោក ថេង សាវឿន និងសមាជិករបស់លោក ១៦នាក់ផ្សេងទៀត នៅពេលពួកគេធ្វើដំណើរពីខេត្តរតនគិរី ឆ្ពោះទៅរាជធានីភ្នំពេញ។ តុលាការខេត្តរតនគិរី ចោទប្រកាន់ថា លោក ថេង សាវឿន និងក្រុមរបស់លោក បានលួចជួបជុំគ្នានៅខេត្ត រតនគិរី ក្នុងគោលដៅនយោបាយ ញុះញង់ឱ្យកសិករបះបោរ ឈានទៅដល់ការផ្ដួលរំលំរដ្ឋាភិបាល។ ទោះយ៉ាងណាក្ដី ក្រោយពេលលោក ថេង សាវឿន បង្ហោះសារសុំទោស និងបានទៅជួបអតីតនាយករដ្ឋមន្ត្រី ហ៊ុន សែន កាលពីថ្ងៃទី១៧ មិថុនា លោក ហ៊ុន សែន ណែនាំឲ្យរដ្ឋមន្ត្រីក្រសួងយុត្តិធម៌ ធ្វើការជាមួយតុលាការខេត្តរតនគិរី លើកលែងការចោទប្រកាន់ លើបុគ្គលិកសមាគមសម្ព័ន្ធសហគមន៍កសិករកម្ពុជា។
ជុំវិញការបន្តនីតិវិធីរបស់លោកតុលាការនៅពេលនេះ លោក ថេង សាវឿន ប្រាប់ថា សារសារភាពរបស់លោក មិនមែនមានន័យអាចធ្វើឱ្យផុតពីបទចោទ ឬទោសទណ្ឌឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។