មន្ត្រីសង្គមស៊ីវិល និងមន្ត្រីបក្សប្រឆាំងស្នើឱ្យរដ្ឋាភិបាលដោះលែងសកម្មជនសិទ្ធិមនុស្សអន្តរជាតិ កញ្ញា សេង ធារី ដើម្បីគេចពីសម្ពាធអន្តរជាតិជាពិសេសការដកហូតនូវប្រព័ន្ធអនុគ្រោះពន្ធទាំងស្រុងពីសហភាពអឺរ៉ុប។
សំណើរបស់មន្ត្រីសង្គមស៊ីវិល និងមន្ត្រីបក្សប្រឆាំងទាំងនេះ មេធាវីខ្មែរអាមេរិក កញ្ញា សេង ច័ន្ទធារី ឱ្យជាប់ឃុំទាំងអយុត្តិធម៌ក្នុងរយៈពេលពីរឆ្នាំហើយ។
នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា កញ្ញា សេង ធារី កំពុងប្រឈមនឹងបញ្ហាបរិយាកាសនៅក្នុងពន្ធនាគារមិនល្អរួមមានភាពចង្អៀតណែន កង្វះអនាម័យ និងមិនមានរបបអាហារគុណភាពជាដើម។
លោក អំ សំអាត ថា អង្គការសិទ្ធិមនុស្សជាតិ និងអន្តរជាតិស្នើឱ្យរដ្ឋាភិបាលដោះលែងកញ្ញា សេង ធារី គឺដោយសារតែសកម្មភាពរបស់កញ្ញាកន្លងមកមិនមែនជាបទល្មើសនោះទេ តែជាការអនុវត្តសិទ្ធិសេរីភាពរបស់របស់កញ្ញាក្នុងការចូលរួមលើកកម្ពស់ប្រជាធិបតេយ្យ។
លោក អំ សំអាត៖«អ៊ីចឹងខណៈកន្លងមកមានអង្គការអន្តរជាតិ ក្រុមប្រឹក្សាសិទ្ធិមនុស្ស និងអង្គការជាតិ ដែលធ្វើការលើវិស័យសិទ្ធិមនុស្សហ្នឹងគឺ យើងសូមឱ្យកម្ពុជាពិនិត្យទៅលើលទ្ធភាពទៅលើការដោះលែងកញ្ញា សេង ធារី ដើម្បីបន្ធូរបន្ថយជាមួយសកម្មជនសិទ្ធិមនុស្ស សកម្មជននយោបាយអីផ្សេងៗ ដើម្បីបន្ធូរបន្ថយនូវបរិយាកាស ដែលសេសសល់ ឬតានតឹងដោយសារការរិះគន់ពីសហគមន៍អន្តរជាតិ»។
សមត្ថកិច្ចក្រុងភ្នំពេញ បានចាប់ខ្លួនកញ្ញា សេង ធារី កាលពីថ្ងៃទី១៤ ខែមិថុនា ឆ្នាំ២០២២ នៅខាងមុខតុលាការក្រុងភ្នំពេញ ក្រោយតុលាការប្រកាសសាលក្រមកាត់ទោសកញ្ញាឱ្យជាប់ពន្ធនាគារ ៦ឆ្នាំ ដោយចោទពីបទ «រួមគំនិតក្បត់» ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩។
ក្នុងរយៈពេលពីរឆ្នាំមកនេះអង្គការជាតិ និងអន្តរជាតិតែងទាមទារឱ្យរដ្ឋាភិបាលដោះលែងកញ្ញា សេង ធារី ឱ្យមានសេរីភាពឡើងវិញ ក្នុងនោះរួមទាំងមានទាំងប្រធានាធិបតីសហរដ្ឋអាមេរិក លោក ចូ បៃឌិន (Joe Biden) ដែលបានលើកឡើងជាមួយអតីតនាយករដ្ឋមន្ត្រី លោក ហ៊ុន សែន អំឡុងពេលលោកមកបំពេញទស្សនកិច្ចនៅប្រទេសកម្ពុជាកាលពីខែចុងឆ្នាំ២០២២។ ចំណែកសមាជិក ព្រឹទ្ធសភាសហរដ្ឋអាមេរិកចំនួន ១៨រូប កាលពីឆ្នាំមុនក៏បានស្នើរដ្ឋមន្ត្រីការបរទេសសហរដ្ឋអាមេរិកលោក អេនថូនី ប៊្លីនខេន (Antony Blinken) ឱ្យដាក់បញ្ចូលសំណុំរឿងកញ្ញា សេង ធារី ក្នុងសំណុំរឿង «ឃុំខ្លួនពលរដ្ឋអាមេរិកដោយខុសច្បាប់» ផងដែរ។
អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា លោក វ៉េស្លី ហូលហ្សឺរ (Wesley Holzer) ប្រាប់វិទ្យុអាស៊ីសេរីថាក្រសួងការបរទេសសហរដ្ឋអាមេរិក និងស្ថានទូតសហរដ្ឋអាមេរិកបន្តតាមដានយ៉ាងដិតដល់ទៅលើសុខុមាលភាព សុវត្ថិភាព និងករណីឃុំខ្លួនកញ្ញា សេង ធារី ដែលជាពលរដ្ឋអាម៉េរិកាំងនេះ។
ទោះបីជាកញ្ញា សេង ធារី កំពុងជាប់ក្នុងពន្ធនាគារក្ដី ប៉ុន្តែកញ្ញាមិនដែលបោះបង់ការតស៊ូមតិនោះទេ។ ជាក់ស្ដែង កញ្ញាបានធ្វើកូដកម្មបង្អត់អាហារចំនួនបីដង ដោយលើកទីមួយមានរយៈពេលមួយសប្ដាហ៍ កាលពីខែវិច្ឆិកា ឆ្នាំ២០២២ ដើម្បីទាមទារឱ្យតុលាការដោះលែងកញ្ញាឱ្យមានសេរីភាពវិញ និងលើកទីពីរមានរយៈ ១០ថ្ងៃ កាលពីខែកក្កដា ឆ្នាំ២០២៣ ដើម្បីទាមទារឱ្យរដ្ឋាភិបាលរៀបចំការបោះឆ្នោតដោយសេរី និងយុត្តិធម៌ បើកលំហសិទ្ធិសេរីភាពពលរដ្ឋ សិទ្ធិនយោបាយ ហើយដោះលែងកញ្ញា និងអ្នកទោសនយោបាយផ្សេងទៀតជាដើម។
ទីប្រឹក្សាគណបក្សកម្លាំងជាតិលោក រ៉ុង ឈុន ដែលជាអ្នកជិតស្និទ្ធ និងធ្លាប់ធ្វើការងារសង្គមជាមួយកញ្ញា សេង ធារី មានប្រសាសន៍ថា លោកតែងត្រូវមន្ត្រីពន្ធនាគារបដិសេធឱ្យសួរសុខទុក្ខកញ្ញា សេង ធារី ជាច្រើនដង ដោយសារតែលោក មិនមែនជាសាច់ញាតិ និងមេធាវីរបស់កញ្ញា សេង ធារី។
ទីប្រឹក្សាគណបក្សប្រឆាំងរូបនេះបន្តថា រដ្ឋាភិបាលឈាមថ្មី ដែលដឹកនាំដោយលោកនាយករដ្ឋមន្ត្រី ហ៊ុន ម៉ាណែត គួរតែដោះលែងកញ្ញាកញ្ញា សេង ធារី និងអ្នកទោសមនសិការផ្សេងទៀត ដែលកំពុងឃុំខ្លួនដោយអយុត្តិធម៌ឱ្យមានសេរីភាពឡើងវិញ។
លោក រ៉ុង ឈុន៖«យើងដឹងហើយការបាត់បង់ប្រព័ន្ធអនុគ្រោះពន្ធទាំងអឺរ៉ុប ទាំងអាមេរិកនេះ វាធ្វើឱ្យអ្នកវិនិយោគទុនមានការរារែកចិត្តដែរ គេអាចដកក្រុមហ៊ុនពីកម្ពុជាមួយចំនួន ដែលគេគ្រោងនឹងមកវិនិយោគនៅកម្ពុជាក៏គេពិចារណាផងដែរ អីចឹងដើម្បីយើងស្រូបទាញអ្នកវិនិយោគទុនពីកម្ពុជាបានច្រើនយើងត្រូវធ្វើការកែលំអការគោរពសិទ្ធិមនុស្ស»។
វិទ្យុអាស៊ីសេរី ក៏មិនទាន់អាចសុំការឆ្លើយតបរឿងនេះពីអគ្គនាយកដ្ឋានពន្ធនាគារ នៃក្រសួងមហាផ្ទៃ លោក នុត សវនា បានទេ ដោយលោកថា កំពុងជាប់រវល់។
ពាក់ព័ន្ធនឹងករណីស្នើសុំឱ្យដោះលែងកញ្ញា សេង ធារីនេះដែរ អតីតនាយករដ្ឋមន្ត្រី ហ៊ុន សែន ដែលជាឪពុកនាយករដ្ឋមន្ត្រី បច្ចុប្បន្ន ធ្លាប់ប្រកាសជាសាធារណៈថា កញ្ញា សេង ធារី ឬអ្នកទោសណាក៏ដោយ ដែលត្រូវបានបរទេសស្នើសុំឱ្យដោះលែង គឺលោកនឹងបន្តឃុំខ្លួនពួកគាត់បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។