ក្រុមយុវជនដែលបង្កើតកម្មវិធីទូរស័ព្ទសម្រាប់ដោះស្រាយបញ្ហាចតយានជំនិះ គ្រោងបញ្ចេញកម្មវិធីនេះ ឱ្យប្រើប្រាស់សាកល្បងលើកទីមួយ ក្នុងពេលឆាប់ៗនេះ។ ពួកគេសង្ឃឹមថា បន្ទាប់ពីកម្មវិធីនេះដាក់ដំណើរការ នឹងអាចជួយដល់ពលរដ្ឋកម្ពុជាក្នុងការស្វែងរក និងទូទាត់ថ្លៃសេវាចតយានជំនិះ កាន់តែងាយស្រួលជាងមុន និងជាការរួមចំណែកមួយក្នុងការជំរុញវិស័យបច្ចេកវិទ្យាឱ្យរីកចម្រើនទៅមុខ។
សំចត ដែលជាកម្មវិធីទូរស័ព្ទដៃ សម្រាប់ជួយដល់អ្នកស្វែងរកទីតាំងចតយានជំនិះ និងម្ចាស់ទីតាំងចំណត ក្នុងការកក់ទីកន្លែងសម្រាប់ចត និងគ្រប់គ្រងទីកន្លែងចត គ្រោងនឹងដំណើរការកម្មវិធីសាកល្បងលើកទី១ របស់ពួកគេ នៅក្នុងរយៈពេលពីរខែខាងមុខទៀត។
ស្ថាបនិកម្នាក់ក្នុងចំណោម បួននាក់របស់កម្មវិធី “សំចត” លោក ព្រំ វិសាល ឱ្យដឹងថា នៅក្នុងកម្មវិធីសាកល្បងលើកទីមួយនេះ ពួកគេនឹងបញ្ចូលរាល់មុខងារសំខាន់ៗទាំងអស់ ដែលចាំបាច់សម្រាប់វិស័យចតយានជំនិះ។
"បាទ! នៅក្នុង Beta Testing Version (ជំនាន់សាកល្បង) ពួកយើងក៏បញ្ចូលនូវ ស្ទើរតែគ្រប់មុខងារទាំងអស់ដូចជាមុខងារក្នុងការចតយានយន្ត មុខងារក្នុងការស្វែងរកកន្លែងចតយានយន្ត និងការបង់ សាច់ប្រាក់តាមរយៈ Online។ មុខងារទាំងអស់នេះគឺចាំបាច់ណាស់ ក្នុងការប្រើប្រាស់សម្រាប់ការចេញនូវកម្មវិធីសំចតជាលើកដំបូង បន្ទាប់ពីនោះយើងនឹងបន្ថែមនូវមុខងារផ្សេងៗទៀតផងដែរបន្ទាប់ពីមុខងារទាំងអស់នោះដំណើរការបានល្អ"
លោក ព្រំ វិសាល បន្ថែមទៀតថា ទន្ទឹមនឹងការបញ្ចេញនូវកម្មវិធីសាកល្បងលើកទីមួយនេះ ក្រុមលោកក៏មានគម្រោងថ្មីៗបន្ថែមទៀត សម្រាប់កម្មវិធីសំចត ដើម្បីឱ្យកម្មវិធីនេះកាន់តែល្អប្រសើរ និងមានស្តង់ដារ។
បច្ចុប្បន្នកម្មវិធីសំចតបានបង្ហាញអំពីមុខងារធំៗចំនួនប្រាំមួយ សម្រាប់ជាអត្ថប្រយោជន៍ដល់អ្នកចតយានជំនិះ និងម្ចាស់ទីតាំងចត។
មុខងារទាំងនោះមានដូចជា ការធានាផ្នែកសុវត្ថិភាព ការកាត់បន្ថយការប្រើប្រាស់សំបុត្រចតយានជំនិះ តាមរយៈការប្រើប្រាស់កូដ QR សម្រាប់ផ្ទៀងផ្ទាត់សំបុត្រជំនួសវិញ។
ការប្រើ QR Code ដែលរក្សាទុកនៅក្នុងទូរស័ព្ទនេះ ក៏ជួយទៅដល់អ្នកចតយានជំនិះ ឱ្យចំណេញពេលវេលានៅពេលចូលចត និងចាកចេញពីកន្លែងចត ហើយម្យ៉ាងទៀតវិធីនេះអាចជួយដោះស្រាយបញ្ហាបាត់សំបុត្រចតយានជំនិះផងដែរ។
បន្ថែមពីលើនេះកម្មវិធីសំចតបានគិតទៅដល់ការគ្រប់គ្រងប្រាក់ចំណេញ និងការវិភាគទិន្នន័យ កន្លែងចតយានជំនិះ សម្រាប់ម្ចាស់ទីតាំងចតយានជំនិះអាចប្រើប្រាស់ដើម្បីគ្រប់គ្រង និងពង្រីកអាជីវកម្មចតយានជំនិះបាន។
មកទល់ពេលនេះកម្មវិធីសំចត មានដៃគូសហការពីខាងក្រៅមួយចំនួនហើយ។ ទោះជាយ៉ាងណា ក្រុមការងាររបស់សំចតនៅត្រូវការដៃគូសហការណ៍ជាច្រើនទៀត ដែលមានជំនាញផ្នែកពាណិជ្ជកម្ម និងបច្ចេកវិទ្យា ដើម្បីមកជួយអភិវឌ្ឍន៍កម្មវិធីនេះឱ្យកាន់តែប្រសើរ។
លោក ព្រំ វិសាល សង្កេតឃើញថា កម្មវិធីសំចតទទួលបានការគាំទ្រច្រើនពីពលរដ្ឋនៅក្នុងស្រុក ជាពិសេសគឺនៅពេលដែលពួកគេបានផ្សព្វផ្សាយវីដេអូនៅលើបណ្ដាញសង្គមហ្វេសប៊ុក ស្តីពី បញ្ហាប្រឈម និងដំណោះស្រាយ ក្នុងការចតយានជំនិះ។
"អំឡុងពេលដែលយើងចូលរួមជាមួយកម្មវិធី SmartStart ពួកយើងបាន Post (ផ្សាយ) វីដេអូមួយនៅលើបណ្ដាញសង្គមហ្វេសប៊ុក ហើយក៏ទទួលបាននូវមតិល្អៗ ហើយក៏ទទួលបានចំណាប់អារម្មណ៍ពីបងប្អូនដែលប្រើប្រាស់បណ្ដាញសង្គម ហើយគាត់កំពុងតែរង់ចាំ និងរំពឹងថាបានប្រើប្រាស់កម្មវិធី"សំចត" ឆាប់ៗនេះ"
ស្ថាបនិកកម្មវិធី “សំចត” គ្រោងដាក់ដំណើរការកម្មវិធីនេះ សម្រាប់ទូរស័ព្ទដែលដំណើរការប្រព័ន្ធអែនដ្រយ (Android) និងប្រព័ន្ធអាយអូអេស (IOS)។ កម្មវិធីនេះនឹងដាក់ឱ្យប្រើប្រាស់ដោយឥតគិតថ្លៃ។
កាលពីចុង ខែមករា ឆ្នាំ២០១៩ ក្រុម “សំចត” ត្រូវបានគណៈកម្មការក្នុងកម្មវិធី SmartStart Young Innovator Program ដែលរៀបចំដោយក្រុមហ៊ុន Smart និង Impact Hub Phnom Penh បានជ្រើសរើសជាអ្នកឈ្នះ ក្នុងវគ្គជម្រើសប្រាំក្រុមចុងក្រោយ។
នាយកប្រតិបត្តិក្រុមហ៊ុន Smart លោក ថូម៉ាស ហ៊ុន (Thomas Hundt) បានថ្លែងកោតសរសើរចំពោះគំនិតអាជីវកម្មដំបូងរបស់ក្រុម “សំចត” តាមរយៈសេចក្ដីប្រកាសព័ត៌មាន និងបានចាត់ទុកថា នេះជាសញ្ញាវិជ្ជមានមួយ សម្រាប់ទស្សនៈវិស័យរួម ក្នុងការបង្កើតសេដ្ឋកិច្ចឌីជីថលឱ្យមាននិរន្តរភាព។
បន្ទាប់ពីឈ្នះក្នុងការប្រកួត ក្រុម “សំចត” ទទួលបានឱកាសទៅទស្សនកិច្ចនៅប្រទេសសិង្ហបុរី និងបានធ្វើទស្សនកិច្ចសិក្សានៅក្រុមហ៊ុនបច្ចេកវិទ្យាធំៗ ដូចជា ក្រុមហ៊ុន ហ្គូហ្គល (Google) ម៉ៃក្រូសូហ្វ (Microsoft) និងក្រុមហ៊ុន លីងអ៊ីន (LinkedIn) ផងដែរ។
ស្ថាបនិកកម្មវិធីសំចត លោក ព្រំ វិសាល សង្ឃឹមថាពលរដ្ឋខ្មែរនឹងជួយគាំទ្រស្នាដៃរបស់ពួកគេ នៅពេលដែលកម្មវិធីនេះដាក់ឱ្យប្រើប្រាស់ជាលើកដំបូង។
"ពួកយើងជឿថា "សំចត" នឹងអាចជួយ ឱ្យប្រជាពលរដ្ឋខ្មែរ មានភាពងាយស្រួល ក្នុងការចតយានយន្ត ជាមួយនឹងបច្ចេកវិទ្យាដ៏ទំនើប និងធ្វើអោយប្រទេសកម្ពុជាមានភាពជឿនលឿនជាងមុន។ សម្រាប់បងប្អូនដែលមិនស្គាល់កម្មវិធី "សំចត" ពួកគាត់អាចស្វែងរកពួកយើងនៅលើបណ្ដាញសង្គមហ្វេសប៊ុក ក៏ដូចជាបណ្ដាញសង្គមផ្សេងៗទៀតផងដែរ"
បន្ថែមពីលើនេះ លោក ព្រំ វិសាល ក៏អំពាវនាវដល់អ្នកវិនិយោគ និងដៃគូសហការដែលមានជំនាញផ្នែកពាណិជ្ជកម្ម និងបច្ចេកវិទ្យាដើម្បីមកជួយអភិវឌ្ឍន៍កម្មវិធី “សំចត” ឱ្យកាន់តែរីកចម្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។