ཨ་རིའི་གྲོས་ཚོཊ་གོང་མར་མི་རིགས་མཐུན་སྒྲིལ་གྱི་ཁྲིམས་ལ་སྐྱོན་བརྗོད་ཀྱི་གྲོས་ཆོད་བཏོན།

ཨ་རིའི་གྲོས་ཚོགས་གོང་མའི་ཆབ་སྲིད་ཚོགས་པ་ཟུང་སྦྲེལ་གྱི་འཐུས་མི་ཁག་ཅིག་གིས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ལ་སྐྱོན་བརྗོད་ཀྱི་གྲོས་ཆོད་ཅིག་འདོན་སྤེལ་གནང་འདུག

གྲོས་ཆོད་ (S. Res. 791) འདོན་སྤེལ་གནང་པ་དེའི་ནང་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ལ་ངོ་རྒོལ་བྱས་པ་དང་། ཁྲིམས་དེས་བོད་མི་དང་། ཡུ་གུར་བ། སོག་པོ། དེ་བཞིན་གནོན་སྐྱོན་ཕོག་པའི་མང་ཚོགས་ཀྱི་རང་དབང་དང་ཐོབ་ཐང་། དེ་དག་གི་ངོ་བོ་དང་རིག་གཞུང་བཅས་པ་རྒྱུན་གནས་ཐུབ་མིན་ཐད་ཐུགས་འཚབ་ཡོད་པ་གསལ་སྟོན་གནང་པ་དང་སྦྲགས། གྲོས་ཆོད་འདིའི་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་རྒྱལ་མཚམས་བརྒལ་ཏེ་དྲག་གནོན་བྱེད་པ་དང་། ཨ་རིའི་མངའ་དབང་ལ་ཚོད་འཛིན། ཨ་རིའི་ནང་གནས་སྡོད་མི་མང་གི་བདེ་འཇགས་དང་རང་དབང་ལ་ཉེན་ཁ་བཟོ་བའི་བྱ་སྤྱོད་རྣམས་མཚམས་འཇོག་བྱེད་དགོས་པའི་དགོས་འདུན་བཏོན་ཡོད་པ་རེད།

གྲོས་ཚོགས་གོང་མའི་འཐུས་མི་འཇེ་ཀི་རོ་སན་ Rosen, Jacky [D-NV] གྱིས་ཕྱི་ཟླ་ ༦ ཚེས་ ༢༤ ཉིན་གྲོས་ཆོད་འདི་འདོན་སྤེལ་ངོ་སྤྲོད་གནང་ཞིང་། གྲོས་ཚོགས་གོང་མའི་འཐུས་མི་འཇོན་ཀར་ཊིསི་ Sen. Curtis, John R. [R-UT] དང་། གྲོས་ཚོགས་གོང་མའི་འཐུས་མི་འཇེཧྥ་མརྐ་ལི་ Sen. Merkley, Jeff [D-OR]* དང་། གྲོས་ཚོགས་གོང་མའི་འཐུས་མི་འཇིམ་སྦེངཀསི་Sen. Banks, Jim [R-IN]* བཅས་ཀྱིས་རྒྱབ་སྐྱོར་གནང་འདུག་ལ། གྲོས་ཆོད་འདི་ཕྱི་འབྲེལ་ལས་དོན་ཚོགས་ཆུང་ལ་མདུན་སྐྱོད་བྱས་འདུག

ཨ་རིའི་གྲོས་ཚོཊ་འོག་མའི་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་གིས་རྒྱ་ནག་གི་ཁྲིམས་གསར་ལ་སྐྱོན་བརྗོད།

ཨ་རིའི་གྲོས་ཚོགས་འོག་མའི་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་ (US House Select Committee on China) གི་ཚོགས་གཙོ་འཇོན་མོ་ལེ་ནར་ (John Moolenaar) ལགས་ཀྱིས་ཕྱི་ཟླ་ ༦ ཚེས་ ༢༩ ཉིན་ཡོངས་ཁྱབ་གསལ་བསྒྲགས་སྤེལ་ཏེ། རྒྱ་ནག་གིས་ཕྱི་ཟླ་ ༧ ཚེས་ ༡ ནས་ལག་བསྟར་བྱེད་རྒྱུའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་ཁྲིམས་ལ་སྐྱོན་བརྗོད་གནང་འདུག དེ་ཡང་ཁོང་གིས་གསུངས་དོན་དུ། ཁྲིམས་འདི་ནི་རྒྱ་ནག་དམར་ཤོག་ཚོགས་པའི་གདུག་རྩུབ་དང་དོགས་ཟོན་གྱི་བྱ་སྤྱོད་སྔར་བས་ཇེ་སྡུག་ཏུ་བཏང་བའི་མཚོན་རྟགས་ཤིག་ཡིན། རྒྱ་ནག་གིས་ཁྲིམས་འདི་བེད་སྤྱོད་བཏང་སྟེ་རྒྱ་ནག་མངའ་ཁོངས་ཀྱི་ཕྱི་ཕྱོགས་སུ་གནས་སྡོད་བྱེད་པའི་རྒྱ་ནག་གི་སྲིད་གཞུང་ལ་དགག་པ་བྱེད་མཁན་རྣམས་ལ་མུ་མཐུད་བསུན་གཙེར་དང་འཇིགས་སྐུལ་བྱེད་རྒྱུའི་འཆར་གཞི་བཟུང་ཡོད། མ་ཟད་ཁྲིམས་འདི་བརྒྱུད་ནས་བོད་པ་དང་། ཡུ་གུར་མི་རིགས། ཆོས་ལ་དད་མོས་ཡོད་མཁན་གཞན་ཁག་དང་། གྲངས་ཉུང་མི་རིགས་སུ་དབྱེ་བའི་མི་ཚོར་བརྡབ་གསིག་དང་གཅར་རྡུང་བྱེད་པ་རྣམས་ཁྲིམས་མཐུན་བཟོ་རྒྱུ་ངེས་པ་ཡིན་ཞེས་དང་། ང་ཚོས་གཟའ་འཁོར་འདིར་ཨ་རིའི་རང་བཙན་གི་ལོ་ ༢༥༠ འཁོར་བའི་དུས་ཆེན་སྲུང་བརྩི་ཞུ་བཞིན་པའི་སྐབས་སུ། རྒྱ་ནག་དམར་ཤོག་ཚོགས་པ་ནི་གོམ་པ་རྒྱབ་བཤིག་བྱེད་ཅིང་། ང་ཚོས་ལོངས་སུ་སྤྱོད་བཞིན་པའི་དཀོན་མཆོག་གིས་གནང་པའི་རང་དབང་གི་ཐོབ་ཐང་ལ་ཁོང་ཚོས་ཡིད་ཆེས་མེད་པ་ཡང་བསྐྱར་གསལ་སྟོན་བྱས་ཡོད། རྒྱ་ནག་དམར་ཤོག་ཚོགས་པས་འཚོལ་སྙེགས་བྱེད་བཞིན་པའི་རྒྱལ་ཡོངས་མཐུན་སྒྲིལ་དངོས་འདི་འགོག་གནོན་ལས་འབྱུང་རྒྱུ་མེད་པར། མི་སེར་རྣམས་རང་དབང་གི་ངང་འཚོ་བ་སྐྱེལ་པ་དང་རང་གི་འདོད་མོས་ལྟར་ཆོས་དད་ལ་འཇུག་བཅུག་པ་ལས་འབྱུང་རྒྱུ་ཡིན་ཞེས་གསུངས་འདུག