យោងតាមបណ្ដាញសារព័ត៌មានអន្តរជាតិធំៗ ដូចជា BBCរបស់អង់គ្លេស និងCNNរបស់អាមេរិកបញ្ជាក់ថា ក្រុមហ៊ុននាំចេញបន្ទះសូឡាមួយចំនួននៅកម្ពុជា ទទួលរងការដំឡើងពន្ធពីអាមេរិក ជាង៣ពាន់ (៣.៥២១)% ខណៈបន្ទះសូឡាផលិតដោយក្រុមហ៊ុនចិនខ្លះ នៅប្រទេសថៃ រងការដំឡើងពន្ធ ៣៧៥% ប្រទេសវៀតណាម៣៩៥% និងម៉ាឡេស៊ី ៤១%។
ក្នុងរយៈពេលប៉ុន្មានឆ្នាំមកនេះ ក្រុមហ៊ុនចិនមួយចំនួន បានផ្លាស់ប្ដូរប្រតិបត្តិការរបស់ខ្លួន មកតំបន់អាស៊ីអាគ្នេយ៍ ដើម្បីគេចចេញពីការដំឡើងពន្ធលើទំនិញនាំចេញពីចិនដីគោក ដែលប្រកាសដោយប្រធានាធិបតីលោក ដូណាល់ ត្រាំ កាលពីអាណត្តិទី១។
សហរដ្ឋអាមេរិកបានបើកការស៊ើបអង្កេតតាំងពីឆ្នាំមុន បន្ទាប់ពីក្រុមហ៊ុនធំៗនៅអាមេរិក ដែលវិនិយោគរាប់ពាន់លានដុល្លារលើការផលិតបន្ទះសូឡា បានស្នើទៅរដ្ឋបាលលោកប្រធានាធិបតី ចូ បៃឌិន ឱ្យជួយការពារក្រុមហ៊ុនពួកគេ។ ការស្នើនៅពេលនោះ ខណៈមានការចោទប្រកាន់ថា ក្រុមហ៊ុនចិន ដែលបង្កើតរោងចក្រនៅកម្ពុជា ថៃ វៀតណាម និងម៉ាឡេស៊ី ទទួលបានការឧបត្ថម្ភធនពីរដ្ឋអំណាចចិន ដើម្បីផលិតនិងនាំចេញបន្ទះសូឡាក្នុងតម្លៃថោកជាងថ្លៃផលិតដើម ទៅលក់នៅសហរដ្ឋអាមេរិកបង្ខូចទីផ្សារ ដែលជាការប្រកួតប្រជែងមិនស្មោះត្រង់ដើម្បីផ្ដួលក្រុមហ៊ុនអាមេរិក។
កាលពីឆ្នាំ២០២៣ អាមេរិកនាំចូលបន្ទះសូឡាពីកម្ពុជា ថៃ វៀតណាម និងម៉ាឡេស៊ី ក្នុងទំហំទឹកប្រាក់ជិត១២ពាន់លានដុល្លារ ក្នុងនោះ នាំចេញពីកម្ពុជាជាង២ពាន់លានដុល្លារ។ នេះបើតាមតួលេខពីសហរដ្ឋអាមេរិក។ ទីភ្នាក់ងាររដ្ឋាភិបាលអាមេរិក គឺគណៈកម្មការពាណិជ្ជកម្មអន្តរជាតិ នឹងធ្វើសេចក្ដីសម្រេចចុងក្រោយនៅក្នុងខែមិថុនាខាងមុននេះ លើការដំឡើងពន្ធថ្មីលើបន្ទះសូឡា។
ការប្រកាសដំឡើងពន្ធលើបន្ទះសូឡា ធ្វើឡើងក្រោយពីរថ្ងៃនៃដំណើរទស្សនកិច្ចរបស់ប្រធានាធិបតីចិនលោក ស៊ី ជីនពីង មកកាន់ប្រទេសចំនួន៣នៅអាស៊ាន គឺវៀតណាម ម៉ាឡេស៊ី និងកម្ពុជា និងស្របពេលកម្ពុជានិងប្រទេសជាច្រើនទៀត កំពុងព្យាយាមចរចាជាមួយអាមេរិក បន្ទាប់ពីរងការដំឡើងអត្រាពន្ធលើទំនិញច្រើនមុខ ពីរដ្ឋបាលលោក ដូណាល់ ត្រាំ។
ក្រសួងពាណិជ្ជកម្មកម្ពុជា បានចេញសេចក្ដីប្រកាសនៅថ្ងៃទី២២មេសាថា ការដំឡើងពន្ធលើបន្ទះសូឡា មិនពាន់ព័ន្ធនឹងការដំឡើងពន្ធបដិការបស់រដ្ឋាភិបាលអាមេរិកកាលពីថ្ងៃទី០៣មេសានោះទេ។ ក្រសួងពាណិជ្ជកម្មបន្តថា កន្លងមក ក្រសួងនិងក្រុមហ៊ុនផលិតបន្ទះសូឡានៅកម្ពុជា ក៏បានចូលរួមបំភ្លឺ ជុំវិញការចោទប្រកាន់ពីបទ លក់បង្ខូចតម្លៃ និងការទទួលឧបត្ថម្ភធននេះដែរ។
ទោះជាយ៉ាងណា អ្នកនាំពាក្យក្រុមប្រឹក្សាជាតិតស៊ូលោក គឹម សុខ មើលឃើញថា ការដំឡើងពន្ធរបស់សហរដ្ឋអាមេរិកលើបន្ទះសូឡានាំចូលពីកម្ពុជា និងប្រទេសអាស៊ានទាំង៣ផ្សេងទៀត ជាសារព្រមានថា អាមេរិកមិនងាយបញ្ចុះពន្ធពាណិជ្ជកម្មដែលបានដាក់មកលើទំនិញកម្ពុជា៤៩% នោះទេ ប្រសិនបើសហរដ្ឋអាមេរិករកឃើញដូចការចោទប្រកាន់ថា កម្ពុជាបានលួចដាក់បន្លំផលិតផលចិន ថាជាទំនិញផលិតនៅកម្ពុជា ដើម្បីនាំចេញទៅសហរដ្ឋអាមេរិក ទទួលបានការអនុគ្រោះពន្ធនាពេលកន្លងមក។
នយោបាយដំឡើងពន្ធរបស់សហរដ្ឋអាមេរិក លើផ្ទាំងសូឡា ពីប្រទេសកម្ពុជា និងប្រទេសមួយចំនួនពីតំបន់អាស៊ីអាគ្នេយ៍នេះ មានលក្ខណៈដាក់ទណ្ឌកម្មសេដ្ឋកិច្ចតែម្ដង លើប្រទេសទាំងឡាយ ដែលបង្ហាញចរិតល្អូកល្អិនជាមួយភាគីចិនជ្រុលពេក។
— លោក គឹម សុខ
កាលពីខែមិថុនា ឆ្នាំ២០១៩ ទីភ្នាក់ងារសារព័ត៌មានអង់គ្លេស Reuters បានចុះផ្សាយដោយដកស្រង់សម្ដីមន្ត្រីនៅស្ថានទូតអាមេរិកប្រចាំនៅកម្ពុជាថា សហរដ្ឋអាមេរិកបានផាកពិន័យក្រុមហ៊ុនចិនមួយចំនួននៅខេត្តព្រះសីហនុ បន្ទាប់ពីរកឃើញថា មានករណីលួចបន្លំដាក់ទំនិញមកពីប្រទេសចិន ថាជាទំនិញផលិតនៅកម្ពុជា ហើយនាំចេញទៅអាមេរិកដើម្បីគេចចេញពីវិធានការដំឡើងពន្ធរបស់អាមេរិក។ នៅពេលនោះ នាយកដ្ឋានគយរបស់វៀតណាម ក៏ប្រកាសរកឃើញការលួចដាក់ទំនិញចិន ថាផលិតនៅវៀតណាម ដើម្បីនាំចេញទៅសហរដ្ឋអាមេរិកដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។