រដ្ឋាភិបាលសហព័ន្ធអាមេរិកបានបញ្ចប់ការផ្តល់ជំនួយថវិកាដល់វិទ្យុអាស៊ីសេរី និងបណ្តាញវិទ្យុដៃគូដទៃទៀត កាលពីព្រឹកថ្ងៃសៅរ៍ ទី១៥ ខែមីនា ម្សិលម៉ិញ។
នេះបើយោងតាមសេចក្តីជូនដំណឹងអំពីការបញ្ចប់កិច្ចព្រមព្រៀងផ្តល់ជំនួយថវិកាសហព័ន្ធ ចេញផ្សាយដោយទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសាកល (USAGM) ដែលជាស្ថាប័នមេគ្រប់គ្រងលើអង្គភាពផ្សព្វផ្សាយព័ត៌មានទាំង៦របស់សហរដ្ឋអាមេរិក ក្នុងនោះក៏រួមមានទាំងវិទ្យុអាស៊ីសេរីផង។ តាមរយៈកិច្ចព្រមព្រៀងនេះ វិទ្យុអាស៊ីសេរីអាចប្រតិបត្តិការការផ្សព្វផ្សាយព័ត៌មានរបស់ខ្លួនទៅកាន់តំបន់អាស៊ី និងសាកលលោក។
ឆ្លើយតបនឹងការសម្រេចនេះ នាយិកាវិទ្យុអាស៊ីសេរី អ្នកស្រី បេយ៍ ហ្វាង (Bay Fang) ថ្លែងថា ស្ថាប័នវិទ្យុអាស៊ីសេរី នឹងតវ៉ាជំទាស់នឹងសេចក្តីសម្រេចនេះ។
អ្នកស្រីគូសបញ្ជាក់ថា ការបញ្ចប់ការផ្តល់ជំនួយរបស់រដ្ឋាភិបាលសហព័ន្ធដល់វិទ្យុអាស៊ីសេរី គឺជារង្វាន់ដល់មេដឹកនាំព្រៃផ្សៃ និងជនផ្ដាច់ការទាំងឡាយ រួមទាំងគណបក្សកុម្មុយនិស្តចិនផង ដែលពួកគេមិនចង់បានអ្វីទាំងអស់ ក្រៅតែពីឥទ្ធិពលរបស់ពួកគេមិនត្រូវបានត្រួតពិនិត្យនៅលើលម្ហព័ត៌មាន។ អ្នកស្រីសង្កត់ធ្ងន់ថា វិទ្យុអាស៊ីសេរី បានក្លាយជាមូលដ្ឋានគ្រឹះដ៏សំខាន់ក្នុងការជួយដល់ក្រុមអ្នកធ្វើគោលនយោបាយសហរដ្ឋអាមេរិក ឱ្យយល់ដឹងអំពីការពិតនៃអ្វីដែលកំពុងតែកើតមានឡើងនៅក្នុងប្រទេសចិន និងប្រទេសដទៃទៀតក្នុងតំបន់អាស៊ីដែលមានការរឹតត្បិត ដោយនាំមកនូវតម្លាភាព និងគណនេយ្យភាពទៅដល់កន្លែងដែលគ្មាន។
ការរាយការណ៍អំពីការរកឃើញនានានៅតំបន់ស៊ីនជាំង (Xinjiang) នៃប្រទេសចិន បាននាំឱ្យរដ្ឋបាលលោកត្រាំ កាលពីអាណត្តិទី១ ចេញនូវសេចក្តីប្រកាសចាត់ទុកការប្រព្រឹត្តដោយរដ្ឋាភិបាលចិនថាជាអំពើប្រល័យពូជសាសន៍។
នាយិកាវិទ្យុអាស៊ីសេរី អ្នកស្រី បេយ៍ ហ្វាង កត់សម្គាល់ថា ការជូនដំណឹងអំពីការបញ្ចប់កិច្ចព្រមព្រៀងផ្តល់មូលនិធិរបស់រដ្ឋាភិបាលសហព័ន្ធនេះ មិនត្រឹមតែដកហូតសិទ្ធិពីមនុស្សជិត៦០លាននាក់ដែលងាកមកពឹងផ្អែកលើសេចក្តីរាយការណ៍របស់វិទ្យុអាស៊ីសេរីជារៀងរាល់សប្តាហ៍ដើម្បីស្វែងយល់ពីការពិតប៉ុណ្ណោះទេ ប៉ុន្តែការសម្រេចដូច្នេះក៏ផ្តល់អត្ថប្រយោជន៍ដល់សត្រូវរបស់សហរដ្ឋអាមេរិក ដោយអាមេរិកជាអ្នកខាតបង់។
អ្នកស្រី គូសបញ្ជាក់ថា ស្ថាប័នវិទ្យុអាស៊ីសេរី នឹងតវ៉ាជំទាស់ទៅនឹងសេក្តីសម្រេចដែលមិនបានគិតគូរវែងឆ្ងាយនេះ ហើយស្វែងរកតាមគ្រប់មធ្យោបាយនានាដែលចាំបាច់ ដើម្បីបន្តការងារ និងការពារអ្នកកាសែតដ៏ក្លាហានរបស់យើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។